កាលពីថ្ងៃសុក្រ ក្រសួងព្រះបរមរាជវាំង បានប្រកាសបដិសេធលិខិតក្លែងក្លាយមួយដែលមានខ្លឹមសារទាក់ទងទៅនឹងព្រះបរមរាជវាំង និងត្រូវបានផ្សព្វផ្សាយលើគេហទំព័របណ្តាញទំនាក់ទំនងហ្វេសប៊ុក (Facebook)។ លិខិតនោះអំពាវនាវឲ្យប្រជាជនកម្ពុជា “ ក្រោកឈរឡើង” ដើម្បីប្រឆាំងនឹងលោកនាយករដ្ឋមន្ត្រី ហ៊ុន សែន។
លិខិតក្លែងក្លាយនោះត្រូវបានចុះកាលបរិច្ឆេទនៅថ្ងៃសុក្រសប្តាហ៍មុន និងមានហត្ថលេខាក្លែងបន្លំរបស់ព្រះមហាក្សត្រ នរោត្តម សីហមុនី នេះបើយោងតាមច្បាប់ថតចម្លងលិខិតនេះដែលត្រូវបានបោះពុម្ពផ្សាយបន្តនៅក្នុងកាសែតរស្មីកម្ពុជាកាលពីម្សិលមិញ។
លិខិតនោះមានខ្លឹមសារថា “ អស់រយៈពេល៣០ឆ្នាំមកហើយ ប្រទេសកម្ពុជាយើងបានទទួលរងនូវការបំផ្លិចបំផ្លាញ។ យើងជាប្រជាជនខ្មែរ រងនូវការសង្កត់សង្កិនពីសំណាក់ ជនបរទេសយួន។ លោក ហ៊ុន សែន បានប្រើប្រាស់អំណាចរបស់ខ្លួនទៅដាក់សម្ពាធខ្លាំងលើព្រះមហាក្សត្រ ហើយប្រជាជនកំពុងរងទុក្ខវេទនា និងយំស្រែកជារៀងរាល់ថ្ងៃ”។
លិខិតនោះមានខ្លឹមសារបន្តថា “ យើងមានការឈឺចាប់យ៉ាងខ្លាំង។ នៅពេលនេះយើងអំពាវនាវឲ្យជនរួមជាតិ និងអ្នកស្រឡាញ់សន្តិភាព យុត្តិធម៌ និងលទ្ធិប្រជាធិបតេយ្យ រួមកម្លាំងគ្នា និងក្រោកឈរឡើងទាំងអស់គ្នាដើម្បីជួយសង្គ្រោះប្រជាជាតិខ្មែរយើង”។
លិខិតក្លែងក្លាយនេះត្រូវបានលុបចេញពីគេហទំព័របណ្តាញទំនាក់ទំនងសង្គមហ្វេសប៊ុក កាលពីម្សិលមិញ។
គួរបញ្ជាក់ថា លិខិតនោះត្រូវបានផ្សព្វផ្សាយជាសាធារណៈនៅលើទំព័របណ្តាញទំនាក់ទំនងសង្គមហ្វេសប៊ុករបស់ឈ្មោះ ចាន់ សីហា អ្នកប្រើប្រាស់គណនីទំព័រនេះ ដែលកាសែតរស្មីកម្ពុជាបានលើកឡើងថា បានបង្ហោះលិខិតនេះមុនគេ។
ក្រសួងព្រះបរមរាជវាំងបានលើកឡើងនៅក្នុងសេចក្តីប្រកាសរបស់ខ្លួនថា លិខិតនោះគឺជាលិខិតក្លែងក្លាយដ៏សាហាវមួយ និងត្រូវបានបង្កើតឡើងក្នុងគោលបំណងបង្កបញ្ហាសម្រាប់លោក ហ៊ុន សែន បន្ទាប់ពីលោកត្រឡប់ពីប្រទេសវៀតណាមវិញ កាល ពីថ្ងៃសៅរ៍។
ក្រសួងព្រះបរមរាជវាំងបានលើកឡើងថា “ ក្រសួងព្រះបរមរាជវាំងសូមបដិសេធសេចក្តីប្រកាសនៅក្នុងលិខិតក្លែងក្លាយដែលមានហត្ថលេខាព្រះមហាក្សត្រនេះ… លិខិតនេះមានខ្លឹមសារញុះញង់ និងបង្កចលាចល ព្រមទាំងអស្ថិរភាព ដល់ប្រទេសកម្ពុជានៅពេលសម្តេចនាយករដ្ឋមន្ត្រី ហ៊ុន សែន ចាកចេញពីអាកាសយានដ្ឋាន បន្ទាប់ពីបានបំពេញភារកិច្ចរបស់សម្តេចនៅប្រទេសវៀតណាម”។
សេចក្តីប្រកាសរបស់ក្រសួងនេះមានខ្លឹមសារបន្តថា “ ក្រសួងព្រះបរមរាជវាំងសូមអំពាវនាវឲ្យអាជ្ញាធរគ្រប់លំដាប់ថ្នាក់ តាមចាប់ជនល្មើសដែលក្លែងលិខិតរបស់ព្រះមហាក្សត្រ និងនាំមកផ្តន្ទាទោស”៕ សុធា