28 C
Phnom Penh

សមាគម​ GMAC ៖ រោង​ចក្រ​បិទ​ទ្វារ​រហូត​​ទាល់​តែមាន​ការ​ធានា​សុវត្ថិភាព​រោង​ចក្រ​និង​បុគ្គលិក​

ដោយ ឌឹ ខេមបូឌា ដេលី

បទវិភាគ

សមាគម​រោង​ចក្រ​កាត់​ដេរ​ និង​ស្បែក​ជើង​កម្ពុជា​ (GMAC) បាន​ឲ្យ​ដឹងកាលពី​ម្សិល​មិញ​ថា​ រោង​ចក្រ​កាត់​ដេរជាង​៤០០នៅ​ក្នុង​ប្រទេស​កម្ពុជា​ នឹង​នៅ​តែ​បិទ​ទ្វារ​រហូត​ទាល់​តែ​រដ្ឋាភិបាល​ និង​សហជីព​ដែល​ធ្វើ​កូដកម្ម​ អាច​ធានា​សុវត្ថិភាព​របស់​រោង​ចក្រ​ទាំង​នេះ ព្រម​ទាំង​កម្មករ​ទាំង​អស់​ដែល​ចង់​ធ្វើការ​។

សេចក្តី​សម្រេច​នៅ​ក្នុង​លិខិត​បើក​ចំហ​ដែល​សមាគម​ GMAC ​ចេញ​ផ្សាយ​បន្ទាប់​ពី​ក្រុម​ប្រឹក្សា​ភិបាល​របស់​ខ្លួន​បាន​ជួប​ប្រជុំ​គ្នា​ កាលពី​ព្រឹក​ម្សិលមិញ នឹង​ផ្អាកជា​ផ្លូវការ​នូវ​​សកម្មភាព​នាំ​ចេញ​ដ៏​ធំ​បំផុត​របស់​ប្រទេស​កម្ពុជា ដែល​បាន​នាំ​មក​នូវ​ប្រាក់​ចំណូល​ប្រហែល​៥.០០០​លាន​ដុល្លារ​​ក្នុង​រយៈពេល​១១ខែ​ដើម​ឆ្នាំ​នេះ។

ដោយ​មិន​ពេញ​ចិត្ត​ការ​ដំឡើង​ប្រាក់​ឈ្នួល​ប្រចាំ​ខែ​​១៥ដុល្លារ​ ដល់​៩៥ដុល្លារ​ ដែល​រដ្ឋា​ភិបាល​បាន​អនុម័ត​សម្រាប់​កម្មករ​កាត់​ដេរ​ទាំង​អស់​កាលពី​សប្តាហ៍​មុន​ សហជីព​មួយ​ចំនួន​បាន​រៀប​ចំ​ធ្វើ​កូដកម្ម​ និង​តវ៉ា​ ដើម្បី​ទាម​ទារ​ឲ្យ​មានការ​ដំឡើង​ប្រាក់​ឈ្នួល​ទ្វេ​ដងឲ្យ​​ឡើង​ដល់​១៦០ដុល្លារ​។

កាលពី​ថ្ងៃ​សុក្រ​ សកម្មភាព​តវ៉ា​មួយ​នៅ​តំបន់​ជា​យ​រាជធានី​ភ្នំពេញ បាន​បណ្តា​ល​ឲ្យ​អំពើ​ហិង្សា​កើត​ឡើង​ នៅ​ពេល​កម្មករ​បាន​ប៉ះ​ទង្គិច​គ្នា​មួ​យ​ប៉្រាវជាមួយ​នគរបាល ជា​ហេតុ​បណ្តាល​ឲ្យ​បង្អួច​ជា​ច្រើន​បែក​ខ្ទេច​ ហើយ​អ្នក​​តវ៉ា​យ៉ាង​តិច​បី​នាក់​​ជាំ​មុខ​ជាំ​មាត់​។

សមាគម​ GMAC ​បាន​ចោទ​ប្រកាន់​សហ​ជីព​ប្រាំ​មួយ​ថា បាន​ញុះ​ញង់​សមាជិក​របស់​ខ្លួន​ឲ្យ​បំផ្លាញ​ទ្រព្យ​សម្បត្តិ​រោ​ង​ចក្រ​ និង​បង្ខំ​កម្មករ​ផ្សេង​ៗទៀត​ឲ្យ​ចូល​រួម​ក្នុង​សកម្មភាព​តវ៉ា​របស​់​ខ្លួន​។ សហជីព​ទាំង​ប្រាំមួយនោះ​ក៏​មាន​សហ​ជីព​សេរី​កម្មករ​ និង​សម្ព័ន្ធ​សហជីព​ប្រជា​ធិប​តេយ្យ​កម្មករ​កាត់ដេរ​កម្ពុជា​ (ស៊ីខាវ​ឌូ) ដែល​​ជា​សហជីពដ៏​​​​ធំ​បំផុត​ពីរ​​​​នៅក្នុង​​​ប្រទេស​​​កម្ពុជា​​​ដែល​​​មិន​គាំទ្រ​រដ្ឋាភិបាល​។

ទាក់​ទង​ទៅ​នឹង​ឥរិយាបថ​មិន​សម​រម្យ​របស់​សហជីព​ទាំង​ប្រាំ​មួយ​នេះ​ លិខិតរបស់​សមាគម​ GMAC មាន​ខ្លឹមសារ​ថា “ ឥរិយាបថ​ទាំង​នេះ​នាំ​ឲ្យ​យើង​មិន​មាន​ជម្រើស​ណា​ក្រៅ​ពី​បិទ​ទ្វារ​ទេ”។

សមាគម GMAC ក៏​បាន​ស្នើ​ឲ្យ​សហជីព​ទាំង​​នេះ និង​ក្រសួង​ការងារ​ និង​បណ្តុះ​បណ្តាល​​វិជ្ជាជីវៈ​ ការពារ​ទ្រព្យ​សម្បត្តិ​រោង​ចក្រ​ និង​ធានា​សុវត្ថិភាព​របស់​កម្មករ​ដែល​ចង់​ធ្វើការ​។

សមាគម GMAC បាន​លើក​ឡើង​ថា “ នៅ​​ពេល​លក្ខខណ្ឌ​ទាំង​នេះត្រូវ​បាន​ឆ្លើយ​តប​ យើង​នឹង​រីករាយ​ទទួល​ការ​អញ្ជើញ​សមាជិក​ សមាគម​ GMAC ឲ្យ​ដំណើរ​ការ​ឡើង​វិញ  ហើយ​​​​​​បន្ទាប់​មក​យើង​នឹង​អាច​ចូល​រួម​ក្នុង​កិច្ច​ពិភាក្សា​​ជុំ​វិញ​បញ្ហា​ដែល​កំពុង​កើត​ឡើង​”។

លិខិត​ដដែល​ក៏​បាន​លើក​ឡើង​ផង​ដែរ​ថា បញ្ហា​ឈប​់​ធ្វើការ​អស់​រយៈពេល​ជា​ច្រើន​ថ្ងៃ​កន្លង​មក​នេះ​អាច​នឹង​នាំ​ឲ្យ​រោង​ចក្រ​នានា​រង​ការ​ពិន័យ​ពី​សំណាក់​អតិថិជន​របស់​ខ្លួន​ ហើយ​កម្ម​ករ​ឈប់​ពីការ​ងារ​ដោយ​មិន​មាន​ប្រាក់​ឈ្នួល​។ លិខិត​នេះ​បាន​ដាក់បន្ទុក​​​ទាំង​ស្រុង​ទៅ​លើ​សហ​ជីព​ទាំង​ប្រាំមួយ​នេះ​ថា “ពួកគេ​នឹង​ត្រូវ​ទទួល​ខុស​ត្រូវ​ទាំង​ស្រុង​លើ​ការ​បាត់​បង់​ប្រាក់​ឈ្នួល​ ការ​បាត់​បង់​ការ​ងារ​ និង​ការ​បាត់​បង់​វិនិយោគ​នៅ​​ប្រទេស​កម្ពុជា​”។

លោក គង់ អាទិត្យ​ អនុប្រធាន​សហជីព​ ស៊ីខាវ​ឌូ បាន​លើ​ក​ឡើង​ថា  លោកមិន​អាច​បញ្ឈប់​សកម្មភាព​តវ៉ា​ទាំង​នេះ​បាន​ទេ​ ហើយ​​បាន​បដិសេធ​ថា សហជីព​ទាំង​នេះ​មិន​បាន​ញុះ​​ញង់​កម្មករ​ទេ​។ លោក​បាន​មាន​ប្រសា​ស​ន៍​ថា “ ខ្ញុំ​មិនមែន​​​​ជា​អ្នក​គ្រប់​គ្រង​កម្មករ​ទេ​ ដូច្នេះ នៅ​ពេល​កម្មករ​តវ៉ា​ តើ​ខ្ញុំ​អាច​បញ្ឈប់​ពួកគេ​យ៉ាង​ម៉េច​ទៅ​ ​ដោយ​សារ​តែ​គ្មាន​ដំណោះ​ស្រាយ​​​សម្រាប់​ពួកគេ​”។

លោក​បាន​លើក​ឡើង​បន្ត​ថា សហជីព​របស់​លោក​នឹង​មិន​បញ្ឈប់​កូដកម្ម​ទេ​ លុះត្រា​តែ​រដ្ឋាភិបាល​យល់​ព្រម​ដំឡើង​ប្រាក់​ឈ្នួល​អប្បបរមា​ដល់​១៦០ដុល្លារ​នាពេល​នេះ។

លោក​ ហេង សួរ អ្នក​នាំ​ពាក្យ​ក្រសួង​ការ​ងារ​បណ្តុះ​បណ្តាល​វិជ្ជាជីវៈ​បាន​ឲ្យ​ដឹង​ថា ក្រសួ​ង​នេះ​នឹង​ជួប​ប្រជុំ​ជាមួយ​មេដឹកនាំ​សហ​ជីព​ឡើង​វិញក្នុ​ង​ថ្ងៃ​នេះ ដើម្បី​ចរចា​បញ្ចប់​កូដកម្ម​ និង​ពន្យល់​អំពី​មូលហេតុ​ដែល​មិន​អាច​ដំឡើង​ប្រាក់​ឈ្នួល​ដល់​១៦០ដុល្លារ​។

លោក​ថ្លែងថា “ កិច្ច​ប្រជុំ​នេះ​…មិន​មែន​ធ្វើ​​​​ឡើង​ដើម្បី​ពិភាក្សា​អំពី​ការ​ផ្លាស់​ប្តូរ​ប្រាក់​ឈ្នួល​ទេ។ យើង​គ្រាន់​តែ​ពន្យល់​សហជីព​ និង​អ្នក​ដែល​ពាក់​ព័ន្ធ​ ឲ្យ​ពួក​គេ​យល់​អំពី​ស្ថានភាព​ និង​ការ​លំបាកនានា​របស់​សមាគម​ GMAC”។

ក្រសួង​ការងារ​ និងបណ្តុះ​បណ្តាល​វិជ្ជា​ជីវៈ​ក៏​បាន​ចេញ​សេចក្តី​ថ្លែង​ការ​ណ៍​មួយ​ផង​ដែរ​ ដើម្បី​សម្តែង​ការ​សោក​ស្តាយចំពោះ​សេចក្តី​សម្រេច​របស់​សមាគម​​ GMAC ថា មិន​ចូល​រួម​ក្នុង​កិច្ច​ប្រជុំ​ក្នុង​ខែ​នេះជាមួយ​សហ ជីព​​នៅ​ក្រសួង​នេះ។

ក្រសួង​នេះ​បាន​លើក​ឡើង​ថា “  និយោ​ជក​បាន​បដិសេធ​មិន​ចូល​រួម​ក្នុង​កិច្ច​ប្រជុំ​នៅ​ថ្ងៃ​ច័ន្ទ ទី៣០ ខែ​ធ្នូ នៅ​ក្រសួង​ការងារ​ និង​បណ្តុះ​​បណ្តាល​វិជ្ជាជីវៈ​”។ ក្រសួង​ដដែល​ក៏​បាន​លើក​ឡើង​បន្ត​ទៀត​ថា “ ក្រសួង​សូម​សម្តែង​ការ​សោក​ស្តាយ​ចំពោះ​កា​រ​បដិសេធ​របស់​សមាគម​ GMAC ថា នឹង​មិន​ចូល​រួម​ក្នុង​កិច្ច​ប្រជុំ​នេះ​។ ជាមួយ​គ្នា​ផង​ដែរ​ ក្រសួង​ក៏​សូម​សម្តែង​ការ​សោក​ស្តាយ​ចំពោះ​ការ​ខូច​ខាត​ និង​ផល​ប៉ះ​ពាល់​ផ្សេង​ៗទៀត​ ដែល​កើត​ឡើង​​ដោយ​សារ​តែបាតុករ​ប្រើអំពើ​ហិង្សាកាល​ពី​ប៉ុន្មានថ្ងៃ​មុន​នេះ”៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស