ក្រសួងអប់រំ យុវជន និងកីឡា និងធនាគារអភិវឌ្ឍន៍អាស៊ី (ADB) បានឲ្យដឹងកាលពីម្សិលមិញថា ខ្លួនបានចាប់ផ្តើមធ្វើប្រតិបត្តិការស៊ើបអង្កេតរួមគ្នា ទៅលើសកម្មភាពប្រើប្រាស់ជាប្រយោជន៍ផ្ទាល់ខ្លួននូវសៀវភៅអានសម្រាប់សិស្សវិទ្យាល័យ ក្នុងគម្រោងផ្តល់មូលនិធិដោយធនាគារនេះ។
កាលពីថ្ងៃព្រហស្បតិ៍សប្តាហ៍មុន អង្គការក្រៅរដ្ឋាភិបាលពីរបានបង្ហាញលទ្ធផលនៃការស៊ើបអង្កេតនៅតាមវិទ្យាល័យចំនួន៣៣ថា មន្ត្រីអប់រំថ្នាក់ស្រុកបានលួចសៀវភៅអានដែលផ្តល់មូលនិធិដោយធនាគារ ADB។ គួរបញ្ជាក់ថា សៀវភៅទាំងនេះស្ថិតក្នុងគោលបំណងប្រគល់ឲ្យសិស្សដោយផ្ទាល់ និងឥតគិតថ្លៃ។ លើសពីនេះទៅទៀត មន្ត្រីទាំងនោះក៏បានលក់សៀវភៅអានទាំងនេះនៅក្នុងបណ្ណាគារ និងទីផ្សារនានា។
លោក ហង្ស ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានឲ្យដឹងកាលពីម្សិលមិញថា សេចក្តីរាយការណ៍នៅក្នុងប្រព័ន្ធផ្សព្វផ្សាយកាលពីថ្ងៃសុក្រ បានធ្វើឲ្យលោកភ្ញាក់អារម្មណ៍ចំពោះបញ្ហានេះ។ លោកបានលើកឡើងថា នឹងមានប្រតិបត្តិការស៊ើបអង្កេតទៅលើបញ្ហានេះ ប្រសិនបើការចោទប្រកាន់របស់អង្គការក្រៅរដ្ឋាភិបាលទាំងនេះគឺជារឿងពិត។ លោកបានមានប្រសាសន៍ថា “ ប្រសិនបើយើងស្គាល់អត្តសញ្ញាណរបស់មន្ត្រីអប់រំដែលបានយកសៀវភៅទាំងនោះទៅលក់ នោះយើងនឹងចាត់វិធានការ”។
លោកបានមានប្រសាសន៍បន្តទៀតថា “ ក៏ប៉ុន្តែ ដំបូងយើងត្រូវបញ្ជាក់ឲ្យច្បាស់ថា អ្វីដែលអង្គការក្រៅរដ្ឋាភិបាលបានលើកឡើងពិតជាត្រឹមត្រូវ និងមិនលម្អៀង ព្រោះសៀវភៅខ្លះត្រូវបានបោះពុម្ពផ្សាយសម្រាប់ផ្តល់ជូនសិស្សដោយឥតគិតថ្លៃ ប៉ុន្តែ សៀវភៅខ្លះទៀតត្រូវបានបោះពុម្ពសម្រាប់លក់”។
នៅក្នុងបណ្ណាគារជាច្រើននៅតាមផ្លូវនានានៅជុំវិញវិទ្យាល័យបាក់ទូកក្នុងរាជធានីភ្នំពេញ កាលពីម្សិលមិញ សៀវភៅអានដែលមានកត់សម្គាល់អក្សរនៅក្នុងប្រអប់ក្រហមនិងលឿងថា “ ហាមលក់ ទ្រព្យសម្បត្តិរបស់រដ្ឋ” ត្រូវបានដាក់លក់នៅក្បែរសៀវភៅផ្សេងៗទៀត ដែលមានកំណត់សម្គាល់ថា “ សម្រាប់លក់” ។
សៀវភៅអាន “ សម្រាប់លក់” ត្រូវបានលក់រាយក្នុងតម្លៃចាប់ពី៨.០០០រៀលទៅ១០.០០០រៀល (២ដុល្លារទៅ២,៥0ដុល្លារ) ចំណែកឯសៀវភៅដែលមានកំណត់សម្គាល់ថា “ ហាមលក់” មានតម្លៃចាប់ពី៥.០០០ទៅ៨.០០០រៀល។
នៅក្នុងបណ្ណាគារមួយលោក ថៃ គឹមនាង អ្នកលក់សៀវភៅបានឲ្យដឹងថា សៀវភៅអានដែលមានកំណត់សម្គាល់ថា “ ហាមលក់” ត្រូវបានលក់ដាច់យ៉ាងច្រើន។
លោក គឹមនាង ដែលបានអស់ទឹកចិត្តលក់ដោយដឹងថា សៀវភៅអានទាំងនេះត្រូវបានគេយកមកដោយខុសច្បាប់នោះ បាននិយាយថា “ សៀវភៅអានដែលមានកំណត់សម្គាល់ថា ‘ ហាមលក់’ មានតម្លៃថោកជាង”។
លោកបាននិយាយបន្តទៀតថា “ យើងតែងតែដឹងថា តើសៀវភៅអានដែលមានកំណត់សម្គាល់ថា ‘ សម្រាប់លក់’ មានតម្លៃប៉ុន្មាន ក៏ប៉ុន្តែ សៀវភៅដែលមានកំណត់សម្គាល់ថា ‘ ហាមលក់’ មានតម្លៃអាស្រ័យទៅលើអ្នកយកមកលក់មកពីក្រសួងអប់រំ នៅក្នុងបណ្ណាគារនេះ”។
នៅបណ្ណាគារបាក់ទូក ដែលផ្គត់ផ្គង់សៀវភៅឲ្យតូបលក់សៀវភៅតូចៗនៅជុំវិញវិទ្យាល័យបាក់ទូក អ្នកស្រី ឆាយ មួយវួច អ្នកគ្រប់គ្រងបណ្ណាគារនេះបានឲ្យដឹងថា សៀវភៅអានដែលមានកំណត់សម្គាល់ថា “ ហាមលក់” ត្រូវបានគេយកមកឲ្យអ្នកស្រីដល់ទីកន្លែងតាមសំណើរបស់អ្នកស្រី។ អ្នកស្រីបាននិយាយថា “ សៀវភៅទាំងនោះមកពីក្រសួងអប់រំ។ អ្នកយកមកលក់មកទីនេះនៅពេលខ្ញុំទូរស័ព្ទហៅឲ្យយកសៀវភៅមក”។
លោក ភីធ័រ ប្រ៊ីមបល (Peter Brimble) នាយករងធនាគារ ADB ប្រចាំប្រទេសកម្ពុជាដែលកាលពីឆ្នាំ២០០៨ បានផ្តល់មូលនិធិ១,៧លានដុល្លារសម្រាប់បោះពុម្ព និងចែកចាយសៀវភៅអានទាំងនេះ បានបញ្ជាក់ថា លោកកំពុងតែធ្វើការជាមួយក្រសួងអប់រំ យុវជន និងកីឡា ក្នុងប្រតិបត្តិការស៊ើបអង្កេតនេះ។ លោកបានមានប្រសាសន៍ថា “ បច្ចុប្បន្នយើងកំពុងធ្វើការតាមដានបន្តជាមួយក្រុមការងារគម្រោង ដើម្បីឲ្យដឹងថា តើពួកគេដឹងអ្វីខ្លះអំពីការប្រើប្រាស់ជាប្រយោជន៍ផ្ទាល់ខ្លួននេះ”៕ សុធា