កាលពីម្សិលមិញសាលាដំបូងរាជធានីភ្នំពេញបានផ្ដន្ទាទោសបុរសម្នាក់ឲ្យជាប់ពន្ធនាគាររយៈពេល១៦ឆ្នាំ ពីបទរៀបចំគម្រោងសម្លាប់អ្នកនាំចេញឈើប្រណីតម្នាក់ ដែលខ្លួនធ្លាប់ធ្វើការឲ្យកាលពីឆ្នាំ២០១១។
បុរសឈ្មោះ សាន ឌីចាម អាយុ៤០ឆ្នាំ ដែលមានសញ្ជាតិពីរ កម្ពុជា និងឡាវ បានជាប់ពន្ធនាគារចាប់តាំងពីខែតុលា ឆ្នាំ២០១១មក ពីបទបោកប្រាស់ឈ្មោះ ខៃ ណារិន ជាឈ្មួញឈើមានខ្នងក្រាស់យកប្រាក់អស់៥០.០០០ដុល្លារនៅក្នុងកិច្ចព្រមព្រៀងមួយ ដើម្បីនាំឈើចេញពីកម្ពុជាទៅហុងកុងកាត់តាមប្រទេសឡាវ។
ពេលនេះបុរសជាប់ពន្ធនាគារត្រូវបានសាលាដំបូងរាជធានីភ្នំពេញសម្រេចឲ្យជាប់ពិរុទ្ធភាព ពីបទប៉ុនប៉ន រៀបចំផែនការសម្លាប់អ្នកស្រី ណារិន។
ចៅក្រមជំនុំជម្រះ សួស សំអាត បានផ្ដន្ទាទោសឈ្មោះ ឌីចាម ឲ្យជាប់ពន្ធគាររយៈពេល១៦ឆ្នាំ និងបង្គាប់ឲ្យជនសង្ស័យបង់សំណង២០លានរៀល។
លោក សាន ឌីចាម និយាយថា គាត់នឹងប្ដឹងជំទាស់សេចក្ដីសម្រេចនេះ។ ចៅក្រម សួស សំអាត ក៏បានបង្គាប់ឲ្យស៊ើបអង្កេតសាក្សីម្នាក់ឈ្មោះ អ៊ុច លីវ៉ាន់ ចំពោះតួនាទីរបស់គាត់ក្នុងចំណោមសាក្សីសំខាន់ៗនៅក្នុងករណីសមគំនិតមនុស្សឃាតនេះ។
កាលពីថ្ងៃទី១៦ ខែធ្នូ លោក លីវ៉ាន់ បានផ្ដល់សក្ខីកម្មថា គាត់ឃុបឃិតជាមួយឈ្មោះ ឌីចាម នៅក្នុងឃាតកម្មនេះ ដើម្បី ប្រាក់១០.០០០ដុល្លារ។ ឱកាសជួបគ្នារវាងលោក លី វ៉ាន់ និងអតីតមេរបស់គាត់នៅជួរកងយុទ្ធពលខេមរភូមិន្ទ ឈ្មោះ គង់ សុខណ្ណ ដែលអំឡុងពេលនោះ លោក លី វ៉ាន់ បានលាតត្រដាងផែនការធ្វើឃាតនេះ ធ្វើឲ្យនគរបាលឈានដល់ការចាប់ខ្លួនជនសមគំនិតទំាងនេះកាលពីឆ្នាំ២០១១៕ សុខុម