នគរបាលបានលើកឡើងកាលពីម្សិលមិញថា ខ្លួនកំពុងតាមចាប់ខ្លួនបុរសជនជាតិហូឡង់វ័យ៤៨ឆ្នាំម្នាក់ដែលជាជនសង្ស័យនៅក្នុងករណីសម្លាប់ស្ត្រីកម្ពុជាវ័យ២០ឆ្នាំម្នាក់ ហើយសាកសពនាងដែលត្រូវជនល្មើសអារបំពង់កត្រូវបានប្រទះឃើញនៅក្រោមគ្រែក្នុងសណ្ឋាគារមួយក្នុងរាជធានីភ្នំពេញកាលពីថ្ងៃអាទិត្យ។
សពអាក្រាតនៃជនរងគ្រោះ ដែលនគរបាលបានបដិសេធមិនបញ្ជាក់អត្តសញ្ញាកាលពីម្សិលមិញ ត្រូវបានអ្នកទទួលភ្ញៀវម្នាក់នៅសណ្ឋាគារ បូលីណា ផាឡេស ក្នុងខណ្ឌដូនពេញប្រទះឃើញ បន្ទាប់់ពីបុរសម្នាក់ ដែលនាងបានស្នាក់នៅជាមួយបានចាកចេញពីសណ្ឋាគារ ដោយមិនបង់ថ្លៃបន្ទប់ បណ្ដាលឲ្យបុគ្គលិកសណ្ឋាគារដើរចូលទៅក្នុងបន្ទប់។
លោក អេង សោភា នាយការិយាល័យនគរបាលព្រហ្មទណ្ឌរាជធានីភ្នំពេញបានមានប្រសាសន៍ថា “នេះគឺជាឃាតកម្ម ពីព្រោះជនរងគ្រោះត្រូវគេសម្លាប់ ហើយជនសង្ស័យបានយកសាកសពលាក់ក្រោមគ្រែ។ មិនដែលមាននរណាទៅស្លាប់ក្រោមគ្រែដោយខ្លួនឯងទេ”។
លោក អេង សោភា បានមានប្រសាសន៍ថា “ជនសង្ស័យមកពីប្រទេសហូឡង់ យើងបានកំណត់អត្តសញ្ញាណជននេះហើយ ហើយយើងបានស្នើឲ្យនគរបាលអន្តោប្រវេសន៍តាមស្វែងរកចាប់ខ្លួនជននេះ”។ លោកបានមានប្រសាសន៍ថា លោកមិនអាចប្រាប់ឈ្មោះជនសង្ស័យ ឬជនរងគ្រោះបានទេ។
ជនសង្ស័យហូឡង់រួមជាមួយនឹងជនរងគ្រោះមិនស្គាល់អត្តសញ្ញាណបានចូលស្នាក់នៅសណ្ឋាគារ បូលីណា ផ្លាឡេស នៅថ្ងៃទី២៥ ខែធ្នូ នេះបើយោងតាមបុគ្គលិកនៅទីនោះ។ អ្នកទទួលភ្ញៀវម្នាក់បានបញ្ជាក់អត្តសញ្ញាណជនសង្ស័យថា មានឈ្មោះ ស្ដត ជេម ហ្គ្រីន។
យោងតាមលោក ចម សាយហៀង ម្ចាស់សណ្ឋាគារ បូលីណា ផ្លាឡេស បានឲ្យដឹងថា កាលពីថ្ងៃទី២៨ ខែធ្នូ ជនសង្ស័យបានចាកចេញពីសណ្ឋាគារនេះដោយយកលិខិតឆ្លងដែនរបស់ខ្លួនទៅជាមួយផង ហើយប្រាប់អ្នកទទួលភ្ញៀវថា រូបគេទៅដកប្រាក់ពីធនាគារដើម្បីបង់ថ្លៃបន្ទប់សណ្ឋាគារ ប៉ុន្តែរូបគេមិនដែលវិលត្រឡប់មកវិញឡើយ។
លោកបានមានប្រសាសន៍ថា “នៅថ្ងៃទី២៩ ខែធ្នូ នៅពេលអ្នកទទួលភ្ញៀវដឹងថា [ជនសង្ស័យ] នៅមិនទាន់វិលត្រឡប់មកទូទាត់ថ្លៃបន្ទប់នៅឡើយនោះ នាងបានដើរទៅកាន់បន្ទប់នោះ ហើយក៏ឃើញសាកសពនៅក្រោមគ្រែ”។
លោក អេង សោភា នាយការិយាល័យនគរបាលព្រហ្មទណ្ឌរាជធានីភ្នំពេញបានមានប្រសាសន៍ថា លោកជឿជាក់ថា ជនសង្ស័យមិនទាន់ចាកចេញពីប្រទេសកម្ពុជានៅឡើយទេ ហើយលោកបានទាក់ទងទៅនគរបាលព្រំដែនឲ្យស្គាល់អត្តសញ្ញាណបុរសរូបនេះ ហើយបានស្នើសុំឲ្យពួកគេមានការប្រុងប្រយ័ត្ន៕ សុខុម