លោក សម រង្ស៊ី មេដឹកនាំគណបក្សប្រឆាំងបានមានប្រសាសន៍កាលពីម្សិលមិញថាតំណាងគណបក្សសង្គ្រោះជាតិ និងគណបក្សប្រជាជនកម្ពុជា កំពុងរៀបចំផែនដើម្បីជួបគ្នាពិភាក្សាអំពីលទ្ធភាពនៃការចរចាថ្មីរវាងគណបក្សទាំងពីរ។
លោក សម រង្ស៊ី បានប្រកាសកាលពីថ្ងៃអាទិត្យថា គណបក្សសង្គ្រោះជាតិ ផ្អាកការធ្វើបាតុកម្មរបស់ខ្លួនដែលមានប្រជាពលរដ្ឋរាប់ម៉ឺននាក់ហែក្បួនទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង ដើម្បីទុកពេលឲ្យគណបក្សទាំងពីរត្រៀមខ្លួនសម្រាប់ការពិភាក្សាគ្នា។ កាលពីយប់ថ្ងៃច័ន្ទ លោក ខៀវ កាញារីទ្ធរដ្ឋមន្ត្រីក្រសួងព័ត៌មានបានអះអាងថា ការជួបប្រជុំរវាងលោក សម រង្ស៊ី និងលោក ហ៊ុន សែន គ្រោងធ្វើនៅថ្ងៃព្រហស្បតិ៍។
លោក សម រង្ស៊ី បានបដិសេធថា មិនមានជំនួបនៅថ្ងៃច័ន្ទទេ ប៉ុន្តែបានមានប្រសាសន៍កាលពីថ្ងៃច័ន្ទថា លោកនឹងជួបជាមួយ “ ប្រធានអង្គការមួយចំនួន” ដើម្បីពិភាក្សាឲ្យមានការផ្សាព្វផ្សាយជាសាធារណៈអំពីកិច្ចប្រជុំនោះ។ លោក សម រង្ស៊ី បានមានប្រសាសន៍កាលពីម្សិលមិញថា គណបក្សប្រជាជនកម្ពុជា និងគណបក្សសង្គ្រោះជាតិមានផែនការពិភាក្សាអំពីការចរចានៅពេលអនាគត ប៉ុន្តែ លោកបានមានប្រសាសន៍បន្ថែមថា លោកមិនដឹង
ថា តើកិច្ចប្រជុំដំបូងនឹងធ្វើឡើងនៅពេលណានោះទេ។
លោក សម រង្ស៊ី មានប្រសាសន៍ថា “យើងបានបញ្ជូនផែនការនេះទៅឲ្យក្រុមការងារ[រួមរបស់គណបក្ស] ដើម្បីកំណត់អំពីបែបបទ និងគោលការណ៍ក្នុងការចរចានោះ”។ លោកបានមានប្រសាសន៍ថា “ដំបូងយើងត្រូវយល់ព្រមជាគោលការណ៍ទៅលើបញ្ហាដែលយើងត្រូវពិភាក្សាជាមុនសិន”។
ក្នុងរយៈពេលប៉ុន្មានខែថ្មីៗនេះ លោក សម រង្ស៊ី និងលោកកឹម សុខា បានដាក់លក្ខខណ្ឌជាច្រើនអំពីការចរចានៅពេលអនាគតជាមួយគណបក្សប្រជាជនកម្ពុជា រួមមានការផ្សាយអំពីការចរចា វត្តមានរបស់អ្នកសង្កេតការណ៍ឯករាជ្យ រួមមានព្រះសង្ឃ និងបញ្ញវន្ត ហើយដំបូងឲ្យលោក ហ៊ុន សែន រៀបចំការបោះឆ្នោតជាតិឡើងវិញនៅពេលណាមួយនៅឆ្នាំនេះ។
មន្ត្រីរដ្ឋាភិបាលជាន់ខ្ពស់មកពីគណបក្សប្រជាជនកម្ពុជារួមមាន លោក ស ខេង រដ្ឋមន្ត្រីក្រសួងមហាផ្ទៃ លោក ឈាង វុន សមាជិកសភា លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានអះអាងដដែលៗថា គណបក្សកាន់អំណាចបើកចំហឲ្យមានការចរចាជានិច្ច ប៉ុន្តែ នឹងមិនធ្វើតាមលក្ខខណ្ឌរបស់គណបក្សសង្គ្រោះជាតិឡើយ។
លោក សម រង្ស៊ី បានមានប្រសាសន៍ថា សេចក្តីសម្រេចបើកចំហឲ្យមានការចរចារវាងគណបក្សទាំងពីរជាសេចក្តីសម្រេចរួម។ លោកបានមានប្រសាសន៍ថា “តាមធម្មតា ខ្ញុំបានទាក់ទងលោក ស ខេង អំពីបញ្ហាសន្តិសុខ ហើយយើងបានសម្រេចរួមគ្នាថា យើងនឹងស្នើឲ្យក្រុមការងារជួបប្រជុំគ្នាដើម្បីកំណត់នូវរបៀបវារៈ”។
លោក ខៀវ កាញារីទ្ធ ដែលលោក ផៃ ស៊ីផាន បានមានប្រសាសន៍កាលពីម្សិលមិញថា ជាអ្នកទទួលខុសត្រូវចំពោះព័ត៌មានពីគណបក្សកាន់អំណាចអំពីការចរចានោះ មិនអាចទាក់ទងសុំការអត្ថាធិប្បាយបន្ថែមបានឡើយ៕ សារុន