កាលពីម្សិលមិញ នគរបាលបានឲ្យដឹងថា ខ្លួនមិនទាន់ឈានទៅរកការចាប់ខ្លួនបុរសបរទេសម្នាក់ដែលត្រូវបានសង្ស័យពីបទមនុស្សឃាតលើស្ត្រីជនជាតិខ្មែរម្នាក់នៅសណ្ឋាគារមួយក្នុងរាជធានីភ្នំពេញ កាលពីសប្តាហ៍មុន ឬក៏មិនទាន់បញ្ជាក់ពីអត្តសញ្ញាណជនរងគ្រោះនៅឡើយទេ។
កាលពីថ្ងៃអាទិត្យ បុគ្គលិកនៅសណ្ឋាគារ Bolina Palace Hotel បានរកឃើញសពអាក្រាតកាយរបស់ស្ត្រីជនជាតិខ្មែរដែលនគរបាលបញ្ជាក់ថា មានអាយុប្រហែលខ្ទង់ ២០ឆ្នាំនៅក្រោមគ្រែក្នុងបន្ទប់មួយដែលលោក ស្ទូអាត ហ្គ្រីន (Stuart Green)អាយុ៤៨ឆ្នាំធ្លាបបានជួលស្នាក់នៅ។
លោក សួស សុភ័ក្ត្រ នាយនគរបាលការិយាល័យព្រហ្មទណ្ឌខណ្ឌដូនពេញបានមានប្រសាសន៍ថា “យើងមិនស្គាល់អត្តសញ្ញាណជនរងគ្រោះបាននៅឡើយទេ ហើយយើងបានស្នើឲ្យតុលាការចេញដីកាចាប់ខ្លួនលោក ស្ទូអាត ហ្គ្រីន”។ លោកបន្ថែមថា សពរបស់ស្ត្រីជនជាតិខ្មែរត្រូវដឹកទៅកាន់វត្តស្ទឹងមានជ័យ ខណៈការស៊ើបអង្កេតកំពុងបន្ត។
លោក សុភ័ក្ត្រ បានប្រសាសន៍បន្ថែមទៀតថា “យើងអាចបានត្រឹមតែគិតថា ជនសង្ស័យធ្លាប់ស្គាល់ជនរងគ្រោះអស់រយៈពេលជាយូរមកហើយប៉ុណ្ណោះ ព្រោះជនសង្ស័យបានមករស់នៅក្នុងប្រទេសកម្ពុជាប្រហែលកន្លះឆ្នាំមកហើយ។ ហើយប្រហែលជាជនសង្ស័យរូបនេះបានស្គាល់ស្ត្រីដែលធ្វើការនៅបាសម្រាប់ជនបរទេសយ៉ាងច្រើន ហេតុដូច្នេះហើយជនរងគ្រោះប្រហែលធ្វើការនៅក្នុងបាមួយសម្រាប់ជនបរទេស។ ខ្ញុំគិតថាជនសង្ស័យប្រហែលជាដេកជាមួយជនរងគ្រោះហើយបន្ទាប់មកយកកាំបិតអារកជនរងគ្រោះភ្លាមៗ”។
ទោះបីជាកាលពីថ្ងៃច័ន្ទ នគរបាលបានបញ្ជាក់ថា ជនសង្ស័យជាពលរដ្ឋហូឡង់ក៏ដោយ ប៉ុន្តែពួកគេបានលើកឡើងម្តងទៀតកាលពីម្សិលមិញថា ជនសង្ស័យរូបនេះគឺជាជនជាតិអង់គ្លេស។កាលពីម្សិលមិញ តំណាងរបស់ស្ថានទូតអង់គ្លេសបានឲ្យដឹងថា ខ្លួនបានដឹងអំពីករណីនេះ ប៉ុន្តែបានបដិសេធមិនធ្វើអត្ថាធិប្បាយបន្ថែមឡើយ៕ ស៊ុយឈាង