29.3 C
Phnom Penh

ក្មេងស្រី​ជំទង់ពីរនាក់​ត្រូវ​ឪពុក​ចុង​​រ​បស់ខ្លួន​ចាប់​រំលោភ​នៅក្នុង​ករណីដាច់ដោយ​ឡែក​ពីគ្នា

ដោយ ឌឹ ខេមបូឌា ដេលី

បទវិភាគ

នគរ​បាល​បាន​និយាយថា កាលពី​ម្សិល​​មិញ សាលាដំបូង​រាជ​ធានីភ្នំពេញ​បាន​ចោទ​ប្រកាន់​បុរស​អាយុ​៣៤ឆ្នាំម្នាក់​ពី​បទ​ចាប់រំលោភ​កូន​ចុង​របស់​ខ្លួន​អាយុ​១៣​ឆ្នាំ​នៅក្នុង​ខណ្ឌ​សែន​សុខ ចំណែក​ឯ​បុរស​ម្នាក់​ទៀត​ត្រូវ​បាន​ចោទ​ប្រកាន់​ពី​បទ​ចាប់​រំលោភ​កូន​ចុង​របស់ខ្លួន​អាយុ​១៥ឆ្នាំ​ផង​ដែរ​នៅក្នុង​ខេត្ត​ក្រចេះ។

លោក ញាណ ណុន នាយប៉ុស៌្តិសង្កាត់ឃ្មួញ​បាន​មាន​ប្រសាសន៍ថា នគរ​បាល​បាន​ចាប់​ខ្លួន​ បុរស​ឈ្មោះ​ វង ហឿន ជា​អ្នក​រត់​រ៉ឺម៉ក​ម៉ូតូ​កង់​បី កាលពីថ្ងៃ​អាទិត្យ។ លោក​បាន​មាន​ប្រសាសន៍ថា “យើង​បាន​ចាប់ខ្លួន​បុរស​រូបនេះ​បន្ទាប់ពី​យើង​ទទួល​បាន​ពាក្យ​បណ្តឹង​ពី​ជីដូ​ន​របស់​ក្មេង​ស្រី​រងគ្រោះ​កាលពីថ្ងៃ​អាទិត្យ​ ដែល​បាន​​ចោទ​ជន​សង្ស័យ​​រូប​នេះថា ​បាន​ចាប់​រំលោភ​ចៅស្រី​របស់​គាត់​​ជា​ច្រើន​ដង​”។

លោក សោម លីថុល នាយ​ការិ​យា​ល័យ​នគរ​បាល​ព្រហ្មទណ្ឌ​ខណ្ឌ​សែ​ន​សុខ​ បាន​មាន​ប្រសាសន៍ថា ជន​សង្ស័យ​រូប​នេះ​ត្រូវ​បាន​នាំ​ខ្លួន​ទៅ​កាន់​សាលា​ដំបូង​​រាជ​ធានី​​កាលពី​ម្សិល​មិញ​ដើម្បី​ធ្វើ​ការ​ចោទ​ប្រកាន់។ បន្ទាប់ពី​ការ​ចាប់ខ្លួន បុរសឈ្មោះ​ វង ហឿន​ បាន​សារភាពថា ខ្លួន​ពិត​​ជា​បាន​ចាប់​រំលោភ​ក្មេងស្រី​រូបនេះ​ពី​រ​លើក​មែន ប៉ុន្តែ​បាន​និ​យាយ​ថា ខ្លួន​ស្រវឹង​ស្រា​ទាំង​ពី​រ​លើក​។

លោក ញាណ ណុន បាន​មាន​ប្រសា​សន៍​ថា “ជន​សង្ស័យ​រូបនេះ​បាន​និយាយថា រាល់​លើក​ដែល​ខ្លួន​ចាប់រំលោភ​ក្មេង​ស្រី​​នេះ​គឺ​ខ្លួន​ស្រវឹង​ស្រា​ហើយ​ប្រពន្ធ​របស់​ខ្លួន​ទុក​ឲ្យ​ខ្លួន​នៅ​ផ្ទះតែ​ម្នាក់​ឯង​ជាមួយ​កូនចុង​​នោះ​”។ លោក​បាន​បន្ថែម​ថា “ក្មេងស្រី​រង​គ្រោះ​បាន​ប្រាប់​នគរបាល​ថា បុរសឈ្មោះ វង ហឿន បាន​គំរាម​សម្លាប់នាង ប្រសិន​បើ​នាង​និយាយ​ប្រាប់​គេ​​អំពី​ការ​ចាប់​រំលោភ​នេះ។

ជីដូន​របស់​ក្មេងស្រី​រងគ្រោះ​បាន​ដាក់​ពាក្យ​បណ្តឹង​អំពី​ការ​ចាប់រំលោភ​នេះ​ដែល​បាន​កើត​ឡើង​កាល​ពី​ថ្ងៃទី​២០ និង​ថ្ងៃ​ទី​២១ ខែ​វិច្ឆិកា បន្ទាប់​ពីប្អូន​ប្រុស​របស់​នាង​បាន​យក​រឿង​នេះ​ប្រាប់​គាត់​។ លោក ញាណ ណុន បាន​មាន​ប្រសា​សន៍​ថា “ក្មេង​ប្រុស​ដែលមាន​អាយុ​៧ឆ្នាំ​បាន​ប្រាប់​ជីដូន​ និង​ម្តាយ​របស់ខ្លួន​កាលពី​ថ្ងៃទី​២៤​ខែ​ធ្នូ ហើយ​បន្ទាប់មក​ពួកគាត់​បាន​ដាក់​ពាក្យ​​បណ្តឹង”។

នគរ​បាលបាន​និយាយ​ថា នៅក្នុង​ករណី​ដាច់​ដោយ​ឡែកមួយ​ទៀត កាល​ពី​ម្សិល​មិញ សាលាដំបូង​ខេត្ត​ក្រចេះបាន​ចោទ​ប្រកាន់​បុរស​អាយុ​៥២ឆ្នាំម្នាក់​ពីបទ​ចាប់​រំលោភ​កូន​ចុង​របស់ខ្លួន​អាយុ១៥ឆ្នាំ​ជាច្រើន​លើក។

លោក ស្រ៊ឺ ជាលី អធិការ​រង​នគរ​បាល​ស្រុក​​ចិត្រ​បុរីបាន​មាន​ប្រសាសន៍ថា នគរ​បាល​បាន​ចាប់ខ្លួន​ បុរស​ឈ្មោះ​ ឡុង​ ថុល កាលពី​ថ្ងៃច័ន្ទ​នៅក្នុង​ឃុំថ្មី។
លោក​​មាន​ប្រសាសន៍ថា “ជន​សង្ស័យ​រូប​នេះ​បាន​ចាប់​រំលោភ​ក្មេងស្រី​រងគ្រោះ​ជា​ច្រើន​​លើក​ក្នុង​ពេល​កន្លង​មក ហើយ​បាន​ចាប់​​រំលោភ​នាង​​ម្តងទៀត​កាល​ពី​យប់​ថ្ងៃ​អាទិត្យ”។

កាលពី​ថ្ងៃអាទិត្យ​ ក្មេងស្រីរូបនេះ​បាន​ប្រាប់​ម្តាយ​​នាង​​អំពី​ការ​ចាប់​រំលោភ​ជា​បន្ត​បន្ទាប់​នេះ ហើយ​​នាង​​ខ្លាច​មិន​ហ៊ាន​និយាយ​ពីមុនមក ពីព្រោះ​ឪពុក​ចុង​របស់​នាង​បាន​គំរាម​​សម្លាប់​នាង​។លោក ជាលី ​មាន​ប្រសាសន៍​ថា បន្ទាប់​​មក​ ស្ត្រី​ជាម្តាយ​បាន​ដាក់​ពាក្យ​បណ្តឹង​ទៅ​នគរ​បាល​។ លោក​បន្ត​ថា “ជន​សង្ស័យ​​រូប​នេះ​បាន​សារ​ភាពថា ខ្លួន​ពិត​ជា​បាន​ចាប់​រំ​លោភ​កូន​ចុង​​​របស់ខ្លួន​មែន ហើយ​​បុរស​រូបនេះ​ត្រូវ​បាន​នាំខ្លួន​ទៅ​សាលា​​ដំបូង​ខេត្ត​កាល​ពី​ម្សិល​មិញ​ដើម្បីចោទ​ប្រកាន់”៕ ​សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស