កាលពីថ្ងៃច័ន្ទ កងរាជអាវុធហត្ថបានចាប់ខ្លួនអ្នកជួញដូរគ្រឿងញៀនពីរនាក់ ប៉ុន្តែចាប់ខ្លួនជនទី៣មិនបានឡើយបន្ទាប់ពីជិះរថយន្តប្រដេញរួចមក ដែលនៅពេលនោះកងរាជអាវុធហត្ថបានបាញ់បំបែកកង់រថយន្តរបស់ជនល្មើសនៅក្នុងក្រុងកំពង់ចាម។
យោងតាមលោក សែម ឃាង ប្រធានអង្គភាពប្រឆាំងគ្រឿងញៀននៃកងរាជអាវុធហត្ថខេត្តកំពង់ចាមបានឲ្យដឹងថា ដោយទទួលបានតម្រុយ កងរាជអាវុធហត្ថបានដាក់របាំងផ្លូវនៅផ្លូវជាតិលេខ៧ ដើម្បីចាប់ខ្លួនជនសង្ស័យទាំងនោះ ដែលតាមការរាយការណ៍ថា បានជួញដូរថ្នាំមេតំហ្វេតាមីនពីរាជធានីភ្នំពេញទៅខេត្តកំពង់ចាម។
ក្រុមជនល្មើសបានបុករបាំងផ្លូវ ប៉ុន្តែត្រូវបានកងរាជអាវុធហត្ថដេញតាម ហើយចាប់ខ្លួនបានឈ្មោះ ជា ហុកថៃ អាយុ២៣ឆ្នាំ និង ទិន ហាសរី អាយុ២៧ឆ្នាំ ចំណែកឯមេខ្លោងឈ្មោះ ទិត្យ ហារិទ្ធ អាយុ៣៣ឆ្នាំបានរត់គេចខ្លួនរួច។ លោកអនុសេនីយ៍ឯក សែម ឃាង មានប្រសាសន៍ថា “ពួកគេបើករថយន្តលឿនណាស់ ដូច្នេះកងរាជអាវុធហត្ថរបស់យើងបានព្យាយាមបាញ់បំបែកង់រថយន្តតែម្តង ហើយថា បានបណ្តាលឲ្យជនសង្ស័យម្នាក់រងរបួស”។
លោកបានបន្ថែមថា “យើងចាប់ខ្លួនបានជននេះនិងបុរសម្នាក់ទៀត ប៉ុន្តែបុរសជាមេខ្លោងដែលជាអ្នកបើករថយន្តបានគេចខ្លួនរួចដោយសារតែងងឹតពេក”។
នគរបាលដកហូតបានថ្នាំមេតំហ្វេតាមីន២៥ក្រាមពីជនទាំងនេះ។ បុរសឈ្មោះ ហុកថៃ ដែលរងរបួសដោយគ្រាប់កាំភ្លើងផ្នែកខាងលើចង្កេះនោះ ត្រូវបានបញ្ជូនពីមន្ទីរពេទ្យខេត្តកំពង់ចាមមករាជធានីភ្នំពេញដោយសារតែរបួសធ្ងន់ធ្ងរ៕ សារុន