ក្រុមមន្ត្រីបាននិយាយកាលពីម្សិលមិញថា កាលពីថ្ងៃអង្គារសាលាដំបូងខេត្តពោធិ៍សាត់ បានចោទប្រកាន់បុរសបីនាក់ពីបទរានដីព្រៃខុសច្បាប់នៅក្នុងដែនជម្រកសត្វព្រៃដែលត្រូវបានការពារ ហើយអាជ្ញាធរកំពុងតាមចាប់ខ្លួនបុរសម្នាក់ដែលតាមចោទថា បានជួលបុរសទាំងនេះ។
លោក តន់ សីហតេជះ ព្រះរាជអាជ្ញាអមសាលាដំបូងខេត្ត ពោធិ៍សាត់ បានមានប្រសាសន៍ថា បុរសទាំងបីនាក់ដែលត្រូវបានចោទប្រកាន់នោះមានឈ្មោះដូចជា ប៉ក់ អ៊ឹម អាយុ៤១ឆ្នាំ គង់ ពុធ អាយុ២០ឆ្នាំ និង រឿន រ៉ុប អាយុ៣១ឆ្នាំ ត្រូវបានចាប់ខ្លួនកាលពីថ្ងៃច័ន្ទ ខណៈពេលពួកគេកំពុងកាប់ឈើខុសច្បាប់នៅក្នុងដែនជម្រកសត្វព្រៃភ្នំសំកុស ជាប់ព្រំដែនថៃ។
លោកបានមានប្រសាសន៍ថា “តុលាការបានចោទប្រកាន់បុរសទាំងបីនាក់នេះ ពីបទរានដីព្រៃខុសច្បាប់ ហើយឥឡូវនេះបុរសទាំងនេះកំពុងត្រូវបានឃុំខ្លួនក្នុងពន្ធនាគារខេត្ត ហើយលោកបានអះអាងថា ពួកគេបានសារភាពចំពោះបទឧក្រិដ្ឋដូចដែលបានចោទប្រកាន់។ បទឧក្រិដ្ឋនេះមានទោសជាប់ពន្ធនាគារចាប់ពី៥ឆ្នាំដល់១០ឆ្នាំ។
លោក ចាប ស៊ាត ប្រធានដែនជម្រកសត្វព្រៃ បានមានប្រសាសន៍ថា បុរសទាំងបីនាក់នេះបានរានដីព្រៃទំហំប្រហែល៥ហិកតា នៅក្នុងឃុំអូរសោម ស្រុកវាលវែង ហើយថា ពួកគេធ្វើការឲ្យបុរសម្នាក់ដែលមានឈ្មោះថា ញ៉ាន ឌឹម ។ លោកមានប្រសាសន៍ថា “ពួកគេបានរានដីព្រៃទំហំ៥ហិកតា ហើយពួកគេបានសារភាពថា ពាណិជ្ជករក្នុងស្រុកម្នាក់ឈ្មោះថា ញ៉ាន ឌឹម បានជួលពួកគេឲ្យរានដីព្រៃនេះ ហើយសន្យាថា នឹងផ្ដល់ប្រាក់ឲ្យពួកគេ២០០ដុល្លារក្នុងមួយហិកតា”។ លោកបានមានប្រសាសន៍បន្ថែមទៀតថា “ យើងកំពុងស្វែងរកចាប់ខ្លួនបុរសឈ្មោះ ញ៉ាន ឌឹម ដែលបានគេចខ្លួន”។
គេមិនអាចទាក់ទងមន្ត្រីមូលដ្ឋានម្នាក់ធ្វើការនៅរដ្ឋបាលព្រៃឈើបានទេ។ លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សអាដហុក បានមានប្រសាសន៍ថា វាមិនយុត្តិធម៌ទេចំពោះតុលាការក្នុងការផ្ដន្ទាទោសបុរសទាំងបីនាក់នេះនោះ នៅពេលដែលមានមន្ត្រីជាន់ខ្ពស់ និងពាណិជ្ជករមានអំណាចជាច្រើនទៀតមិនត្រូវបានផ្ដន្ទាទោសពីបទឧក្រិដ្ឋរានដីព្រៃធំជាងនេះទៅទៀតនោះ។
លោក អំ សំអាត បានមានប្រសាសន៍ថា “តុលាការគួរពិចារណាដោះលែងបុរសទាំងបីនាក់ដែលត្រូវបានចោទប្រកាន់នេះវិញ ហើយស៊ើបអង្កេតដើម្បីស្វែងរកចាប់ខ្លួនអ្នកដែលនៅពីក្រោយពួកគេ។ លោក អំ សំអាត បានមានប្រសាសន៍បន្ថែមថា “ វាមិនយុត្តិធម៌សម្រាប់ពួកគេទេ ពីព្រោះយើងមិនដែលឃើញអ្នកមានទ្រព្យសម្បត្តិ និងអ្នកមានអំណាចប្រឈមនឹងការផ្ដន្ទាទោសនៅពេលពួកគេរំលោភច្បាប់ព្រៃឈើឡើយ”៕សារុន