ប្រជាពលរដ្ឋ១៨គ្រួសារនៅក្នុងខណ្ឌឫស្សីកែវ រាជធានីភ្នំពេញអាចក្លាយជាសហគមន៍ដែលត្រូវបានបណ្ដេញចេញលើកដំបូងក្នុងឆ្នាំ២០១៤នេះបន្ទាប់ពីទទួ ល បានសេចក្ដីជូនដំណឹងចុងក្រោយឲ្យចាកចេញពីផ្ទះសំបែងរបស់ខ្លួនដើម្បីយកកន្លែងសម្រាប់គម្រោងពង្រីកផ្លូវ។
សេចក្ដីជូនដំណឹងចុះថ្ងៃទី១៧ ខែធ្នូ ហើយចុះហត្ថលេខាដោយលោក ឃ្លាំង ហួត អភិបាលខណ្ឌឫស្សីកែវនោះ មានខ្លឹមសារថា “សាលាខណ្ឌតម្រូវឲ្យប្រជាពលរដ្ឋរុះរើរបងផ្ទះ សំយាបផ្ទះ និងសំណង់ផ្សេងៗ…។ នៅក្នុងហេតុការណ៍ដែលប្រជាពលរដ្ឋមិនគោរពតាមសេចក្ដីណែនាំនេះ សាលាខណ្ឌនឹងចាត់វិធានការរុះរើផ្ទះសំបែងរបស់ពួកគាត់ ហើយមិនទទួលខុសត្រូវចំពោះការខូចខាតឡើយ។
យោងតាមក្រុមការងារពិសេសសិទ្ធិលំនៅដ្ឋានបានឲ្យដឹងថា គ្រួសារទាំងនោះនឹងត្រូវបណ្ដេញចេញដោយមិនទទួលបានសំណងឡើយ។ គ្រួសារដែលរងផលប៉ះពាល់ដែលរស់នៅតាមបណ្ដោយកំណាត់ផ្លូវប្រវែង៥០០ម៉ែត្រក្បែរព្រែកបាក់ទូក ក្នុងភូមិទួលគោក សង្កាត់ទូលសង្កែ លើកឡើងថា ពួកគាត់ទទួលបានសេចក្ដីជូនដំណឹងនេះកាលពីថ្ងៃទី២៧ ខែធ្នូ ហើយបារម្ភថា ពួកគាត់នឹងត្រូវបណ្ដេញចេញនៅថ្ងៃណាមួយមិនខាន។
លោក សុខ ពិទូ អាយុ៤០ឆ្នាំ បាននិយាយថា “យើងនឹងមិនចាកចេញទេ ប្រសិនបើពួកគេមិនផ្ដល់សំណងសមរម្យដល់ពួកយើងតាមតម្លៃទីផ្សារទេនោះ”។
លោកបាននិយាយថា “អាជ្ញាធរត្រូវតែផ្ដល់សំណងដល់ពួកយើង ពីព្រោះយើងមានលិខិតបញ្ជាក់កម្មសិទ្ធិដីធ្លីដែលចេញដោយនាយកដ្ឋានកសិកម្មខណ្ឌ នៅក្នុងឆ្នាំ១៩៩១។ គេមិនអាចទាក់ទងអាជ្ញាធរសង្កាត់ និងខណ្ឌដើម្បីសុំអត្ថាធិប្បាយបានទេ៕ សារុន