កាលពីម្សិលមិញ គណបក្សសង្គ្រោះជាតិបានលុបចោលការជួបប្រជុំជាមួយគណបក្សប្រជាជនកម្ពុជាដែលបានគ្រោងធ្វើនៅថ្ងៃនេះបន្ទាប់ពីអង្គភាពទាហានឆត្រយោងបានបង្ក្រាបការតវ៉ាដ៏ហិង្សារបស់កម្មកររោងចក្រកាត់ដេរដែលបានធ្វើកូដកម្ម។ គម្រោងជួប ប្រជុំ ដែលគ្រោងធ្វើនៅម៉ោង៩ព្រឹកនៅអគារព្រឹទ្ធសភានេះ គឺដើម្បីកំណត់លក្ខខណ្ឌសម្រាប់ការចរចាបន្ថែមរវាងមេដឹកនាំគណបក្សទាំងពីរជុំវិញជម្លោះក្រោយការបោះឆ្នោតនេះ។
លោក សម រង្ស៊ី ប្រធានគណបក្សសង្គ្រោះជាតិបានប្រកាសពីការលុបចោលការជួបប្រជុំនោះដល់ក្រុមបាតុករកាលពីយប់មិញនៅទីលានប្រជាធិបតេយ្យ។ លោក សម រង្ស៊ី បាននិយាយទៅកាន់ក្រុមមនុស្សទាំងនោះថា “ក្នុងកាលៈទេសៈនេះ យើងមិនអាចចរចាជាមួយអ្នកធ្វើបាបប្រជាពលរដ្ឋខ្មែរបានឡើយ”។
យ៉ាងហោចណាស់អ្នកតវ៉ា១៥នាក់ត្រូវបានឃាត់ខ្លួនបន្ទាប់ពីទាហានឆត្រយោងបានប្រើដំបងឆក់ ដែកបំពង់ទីប និងចំពាមកៅស៊ូដើម្បីបង្ក្រាបការតវ៉ារបស់កម្មកររោងចក្រកាត់ដេរដែលបានធ្វើកូដកម្មនៅខាងក្រៅរោងចក្រយ៉ាកជីនក្នុងខណ្ឌពោធិ៍សែនជ័យ រាជធានីភ្នំពេញ។ អ្នកតវ៉ាមួយចំនួនត្រូវបានបញ្ជូនទៅព្យាបាលនៅមន្ទីរពេទ្យ។
លោក សម រង្ស៊ី បានមានប្រសាសន៍ថា “មិនមានការចរចាទៀតទេ។ យើងបានលុបចោលការចរចាទាំងនេះរហូតដល់លែងមានការធ្វើបាប ការវាយដំ ការចាប់ខ្លួនប្រជាពលរដ្ឋ ការបង្កបញ្ហានិងការប្តឹងផ្តល់ [ពីរដ្ឋាភិបាល]”។ លោក សម រង្ស៊ី បានបន្ថែមថា ការតវ៉ាជាប់ៗគ្នារបស់គណបក្សសង្គ្រោះជាតិដែលកាលពីថ្ងៃអាទិត្យមុនមានអ្នកចូលរួម៥០.០០០នាក់ហែក្បួនក្នុងរាជធានីភ្នំពេញនោះនឹងបន្តនៅថ្ងៃអាទិត្យនេះដូចដែលបានគ្រោងទុក ហើយជាថ្មីម្តងទៀតនឹងធ្វើកាន់តែធំនៅទូទាំងប្រទេស។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានមានប្រសាសន៍ថា ការចរចាត្រូវបានលុបចោល ពីព្រោះគណបក្សប្រជាជនកម្ពុជាបានរំលោភការសន្យាដែលខ្លួនបានធ្វើអំឡុងពេលចរចាកាលពីឆ្នាំមុនថា អាជ្ញាធរនឹងឈប់ប្រើអំពើហិង្សា ដើម្បីបង្ក្រាបអ្នកតវ៉ាប្រឆាំងរដ្ឋាភិបាលទៀតនោះ។
លោក យឹម សុវណ្ណ បានមានប្រសាសន៍បន្ថែមទៀតថា “ អ្វីដែលពួកគេបានធ្វើនៅថ្ងៃនេះ គឺបានរំលោភចំណុចទី១ ដែលបានធ្វើ អំឡុងការជួបប្រជុំកាលពីថ្ងៃទី១៦ ខែកញ្ញាថា ឈប់ប្រើអំពើហិង្សាទៅលើអ្នកតវ៉ា”។ លោកបានមានប្រសាសន៍ថា “យើងមិនអាចចរចាក្រោមបរិយាកាសគាបសង្កត់បែបនេះបានទេ។ វាមិនមែនជាការចរចាដោយសន្តិវិធីឡើយ”។
លុះណាតែការប្រើអំពើហិង្សាកាលពីម្សិលមិញពីសំណាក់ទាហានឆត្រយោង នគរបាល មន្ត្រីកងរាជអាវុធហត្ថបានត្រឡប់មករកភាពដើមវិញដូចអំឡុងការតវ៉ារាល់ថ្ងៃរបស់គណបក្សប្រឆាំងដែលបានចាប់ផ្ដើមកាលពីថ្ងៃទី១៥ ខែធ្នូ។
លោក ព្រំ សុខា រដ្ឋលេខាធិការក្រសួងមហាផ្ទៃ ដែលបានដឹកនាំគណបក្សប្រជាជន អំឡុងការចរចាលើកមុនជាមួយគណបក្សសង្គ្រោះជាតិ បានមានប្រសាសន៍កាលពីម្សិលមិញថា លោកខកចិត្តចំពោះការដែលមេដឹកនាំគណបក្សប្រឆាំងបានលុបចោលការចរចានេះ។ លោកបានមានប្រសាសន៍ថា “សម្រាប់គណបក្សប្រជាជនកម្ពុជា យើងសោកស្ដាយណាស់ដោយឃើញការលុបចោលនេះ”។
លោកបន្ថែមថា “ ជំហររបស់គណបក្សប្រជាជនកម្ពុជាមិនផ្លាស់ប្ដូរឡើយ។ មធ្យោបាយដ៏ល្អបំផុត និងមធ្យោបាយតែមួយដើម្បីដោះស្រាយវិបត្តិក្រោយការបោះឆ្នោតគឺការចរចាដោយសន្ដិវិធី។ ការប៉ះទង្គិចគ្នាបន្តិចបន្តួចដែលបានកើតឡើងកាលពីព្រឹកមិញនេះ យើងមានការសោកស្ដាយណាស់ ប៉ុន្តែតើឲ្យយើងធ្វើដូចម្តេចចំពោះបញ្ហានេះ?”។ ទោះជាយ៉ាងណា លោក ព្រំ សុខា បានគាំទ្រការប្រើអំពើហិង្សានេះ ដោយថ្លែងថា វាជាការចាំាបាច់។
លោកបានមានប្រសាសន៍ថា “មិនមែនត្រឹមតែចាប់ពីថ្ងៃទី១៦ ខែកញ្ញាប៉ុណ្ណោះទេ ប៉ុន្តែថែមទាំងចាប់តំាងពីមានវិបត្តិនេះមកគណបក្សប្រជាជនកម្ពុជា ជាពិសេសក្រសួងមហាផ្ទៃមានការអត់ធ្មត់ខ្លាំងណាស់ ហើយការប្រើអំពើហិង្សានេះមិនមែនកើតចេញពីកម្លាំងនគរបាលរបស់យើងទេ វាកើតឡើងដោយសារអ្នកតវ៉ាជ្រុលនិយមនេះឯង”។
លោក សម រង្ស៊ី បានអំពាវនាវឲ្យមន្ត្រីរាជការ អាជីវករ និងនិស្សិតចូលរួមជាមួយគណបក្សប្រឆាំងក្នុងពេលឥឡូវនេះ និងជាមួយកម្មកររោងចក្រកាត់់ដេរដែលកំពុងធ្វើកូដកម្ម រួមគ្នាទាមទារឲ្យលោក ហ៊ុន សែន ចុះចេញពីតំណែង។
លោក សម រង្ស៊ី បាននិយាយទៅកាន់ក្រុមមនុស្សទាំងនោះថា “កម្មករបានចេញពីរោងចក្រហើយ។ ឥឡូវនេះបងប្អូនទាំងអស់គ្នាសូមចេញពីទីផ្សារ ផ្ទះសំបែងរបស់ខ្លួន តូបលក់ដូរ និងសាលារៀន។ សូមចេញមកពីគ្រប់ទិសទី ដើរជាមួយគ្នា”៕សារុន