30 C
Phnom Penh

ប្រធាន​ភូមិ​ដើរ​ប្រមូល​ស្នាម​មេដៃធ្វើ​​ញត​្តិ​ដក​ព្រះ​គ្រូ​ចៅ​អធិការ​វត្ត​ដែលពាក់ព័ន្ធ​គណបក្ស​ប្រឆាំង​

ដោយ ឌឹ ខេមបូឌា ដេលី

បទវិភាគ

ប្រធាន​ភូមិ​ម្នាក់​នៅក្នុង​ខេត្ត​កំពង់​ធំ​បាន​ចាប់​ផ្តើម​ដើរ​ប្រមូល​ហត្ថ​លេខា​ធ្វើ​ញត្តិ​​​ដក​ព្រះ​គ្រូ​ចៅ​អធិការ​​វត្ត​​របស់​​លោក​ដែលមាន​ទំនាក់​ទំនង​ជាមួយ​គណបក្ស​ប្រឆាំង​ ​ដោយ​​លោក​បាន​ចោទ​ប្រកាន់ថា ​ព្រះ​គ្រូ​ចៅ​អធិការ​​អង្គ​នេះបាន​កិបកេង​បច្ច័យ​វត្ត។

លោក ឃាង​ ឃាន ប្រធាន​ភូមិ​ក្រចាប់​នៅ​​​ក្នុង​ឃុំ​អាចារ្យ​លក្ខណ៍ ស្រុក​ស្ទឹង​សែន​បាន​មាន​ប្រសាសន៍កាល​ពី​ម្សិល​មិញ​ថា ព្រះ​តេជ​គុណ ព្រះនាម អាន់ មុនី ព្រះ​គ្រូ​ចៅ​អធិ​ការ​វត្ត​ក្រចាប់ប្រឈម​នឹង​ការ​ចោទ​ប្រកាន់​ពី​សំណាក់​អ្នក​ភូមិ​ថា​បាន​កិប​កេង​បច្ច័យ​វត្ត​ដែល​​ព្រះ​អង្គ​​គ្រប់​គ្រង​។

លោក​បាន​មាន​ប្រសាសន៍ថា “អ្នក​ភូមិ​មិន​សប្បាយចិត្ត​​ជាមួ​យ​ព្រះ​គ្រូ​ចៅ​អធិការ​អង្គ​នេះ​ទេ​​ ដោយសារ​ព្រះ​អង្គ​គ្រប់​គ្រង​វត្ត​មិន​បាន​ត្រឹម​ត្រូវ​ បាន​កិប​កេង​បច្ច័យ​វត្ត​និង​​មិន​បាន​កសាង​វត្ត​ឲ្យ​បាន​រីក​ចម្រើន​ឡើយ”។​លោក​​បាន​ពន្យល់​ថា អ្នក​ភូមិ​បាន​ទាមទារ​ឲ្យ​ផ្សព្វផ្សាយ​ញត្តិ​នេះ។ លោក ឃាង ឃាន បាន​​​​អះ​អាង​ថា “នេះ​មិន​មែន​ជា​រឿង​នយោ​​​បាយ​​​​​​​ទេ។ យើង​​មិន​មែន​រើស​អើង​ទេ…​បើទោះ​ជា​ព្រះ​អង្គ​បាន​ចូលរួម​ការ​ហែក្បួន​ជាមួយ​គណ​​​​​​បក្ស​សង្គ្រោះ​​​​ជាតិ​ក៏ដោយ”។

លោក​ប្រធាន​ភូមិ​បាន​មាន​ប្រសាសន៍​បន្ថែម​ទៀត​ថា លោក​​ប្រមូល​ស្នាម​មេដៃ​បាន​​ចំនួន​៣៧៧មេដៃហើយ ហើយ​លោក​បាន​មាន​ប្រសាសន៍ថា ញត្តិនេះ​នឹង​ត្រូវ​បញ្ជូន​​ទៅ​អាជ្ញាធរ​ខេត្ត​នៅពេល​ឆាប់​ៗនេះ។ ព្រះ​តេជគុណ អាន់ មុនី បាន​បដិ​សេធ​ថា ព្រះ​អង្គ​មិន​ដែល​ចំណាយ​បច្ច័យ​វត្ត​មិន​ត្រឹម​ត្រូវ​ឡើយ​ ហើយ​ព្រះ​តេជ​គុណ​មាន​សង្ឃ​ដីកាថា ញត្តិ​នេះ​ជា​ការ​ឆ្លើយ​តប​ទៅ​នឹង​ការ​ដែល​ព្រះ​អង្គបាន​ទៅ​ចូល​រួម​តវ៉ានៅក្នុង​រាជ​ធានី​ភ្នំពេញ។

ព្រះ​តេជគុណ​​មាន​សង្ឃដីកា​ថា “អាត្មា​ ​មិន​បាន​ធ្វើ​រឿង​ដូចនេះ​ទេ ដោយ​​​​​​​សារ​​បច្ច័យ​​​ទាំង​អស់​ប្រគល់​ឲ្យ​អាចារ្យ​ជា​អ្នក​ចាត់ចែង​ទុក​ដាក់​ ហើយ​អាចារ្យ​ចាំបាច់​ត្រូវ​សួរ​អាត្មា មុនពេល​គា​ត់​យក​បច្ច័យ​ទាំង​នេះ​ទៅ​ប្រើ​ប្រាស់”។

ព្រះ​តេជគុណ​បាន​មាន​សង្ឃដីកា​បន្ថែម​ថា “ពួកគេ​ចង់​កម្ចាត់​អាត្មា ដោយ​សារ​អាត្មា​បាន​ចូលរួម​ក្នុង​ការ​ហែក្បួន​របស់​គណបក្ស​សង្គ្រោះ​ជាតិ។​ពួកគេ​មិន​សប្បាយ​ចិតិ​នៅ​ពេល​ ពួកគេ​ឃើញ​អាត្មា​ចូលរួម​ហែក្បួន​ជា​មួយ​គណបក្ស​សង្គ្រោះ​ជាតិ​ ហើយ​ពួកគេ​និយាយ​ថា ព្រះ​សង្ឃ​មិន​គួរ​ពាក់ព័ន្ធ​នឹង​នយោបាយ​ឡើយ”។

លោក​ សុខ ប៉េងសេង មន្ត្រី​គណបក្ស​សង្គ្រោះ​ជាតិ​ប្រចាំ​ខេត្ត​នេះ​​មាន​ប្រសា​សន៍​ថា គណបក្ស​ប្រឆាំង​នឹង​ធ្វើការ​ស៊ើប​អង្កេត​អំពី​ករណី​នេះ។លោក​បាន​មាន​ប្រសាសន៍​ថា “អ្នក​ភូមិ​មួយ​ចំនួន​បាន​ផ្តិ​ត​មេដៃ​ដោយ​មិន​ដឹង​មូល​ហេតុ​ថា ពួកគេ​ប្រមូល​ដើម្បី​​ធ្វើ​អ្វីឡើយ”៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស