មនុស្សប្រាំនាក់ត្រូវបានបាញ់ស្លាប់ ហើយជាង២០នាក់ទៀតបានរងរបួស ភាគច្រើនគឺដោយសារគ្រាប់កាំភ្លើង ពេលមន្ត្រីកងរាជអាវុធហត្ថបាញ់កាំភ្លើង AK អំឡុងការប៉ះទង្គិចគ្នាជាមួយក្រុមអ្នកតវ៉ា ដែលប្រដាប់ដោយដុំថ្ម ដំបង និងដបសាំងនៅលើផ្លូវវេងស្រេង ក្នុងតំបន់រោងចក្រកាត់ដេរនៅខណ្ឌពោធិ៍សែនជ័យ រាជធានីភ្នំពេញកាលពីថ្ងៃសុក្រ ម្សិលមិញនេះ។
អង្គការសិទ្ធិមនុស្សលីកាដូបានលើកឡើងថា ការបាញ់សម្លាប់នេះជាអំពើហិង្សាអាក្រក់បំផុតដែលរដ្ឋបានប្រើលើជនសីុវិលនៅក្នុងរយៈពេល១៥ឆ្នាំនេះ និងជាហេតុការណ៍អកុសលបំផុតក្នុងវិស័យកាត់ដេរដ៏សំខាន់ដែលមានកម្មករកម្មការិនីបម្រើការងារប្រហែល៦០មឺុននាក់តាមរោងចក្ររាប់រយដែលភាគច្រើនស្ថិតនៅក្រោមាករកាន់ កាប់របស់ជនបរទេស។
ការស្លាប់ និងរងរបួសនេះគឺជាលទ្ធផលនៃការតវា៉ាដោយសន្តិវិធីរយៈពេលជាងមួយសប្តាហ៍ដែលកម្មករកម្មការិនីរោងចក្រកាត់ដេររាប់ម៉ឺុននាក់បានធ្វើកូដកម្មទាមទារប្រាក់ខែ១៦០ដុល្លារក្នុងមួយខែ។
អំពើហិង្សានៅតំបន់ផ្លូវវេងស្រេងនេះបានផ្ទុះឡើងកាលពីយប់ថ្ងៃព្រហស្បតិ៍ ពេលយុវជនបិទផ្លូវ និងដុតកង់ឡានជាការឆ្លើយតបចំពោះការវាយដំ និងឃុំខ្លួនកូដករ មេដឹកនាំសហជីព និងព្រះសង្ឃពីសំណាក់ទាហានអង្គភាពឆត្រយោងលេខ៩១១នៅរោងចក្រកាត់ដេរ យ៉ាកជីន ដែលស្ថិតនៅក្នុងខណ្ឌពោធិ៍សែនជ័យដែរ។
នគរបាលនិងកងរាជអាវុធហត្ថរាប់រយនាក់បានព្យាយាមបង្ក្រាបការតវ៉ានេះនៅវេលាម៉ោង២រំលងអធ្រាត្រឈានចូលព្រឹកថ្ងៃសុក្រ ប៉ុន្តែ មិនបានសម្រេចទេ នេះបើតាមការឲ្យដឹងពីអង្គការលីកាដូតាមរយៈសេចក្តីថ្លែងការណ៍មួយដែលមានការបញ្ជាក់ថា “កងកម្លាំងសន្តិសុខចម្រុះ” រហូតដល់២.០០០នាក់បានប្រមូលផ្តុំគ្នានៅក្នុងតំបន់នេះមុនពេលមានការប្រើកាំភ្លើងបាញ់គ្រាប់ពិតនៅថ្ងៃសុក្រ វេលាម៉ោង១០ព្រឹក។
ចាប់ពីព្រឹកព្រលឹមថ្ងៃសុក្រមក យុវជនរាប់រយនាក់បាននាំគ្នាឈរនៅពីក្រោយរបាំង ធ្វើពីឈើបានមកពីតូបលក់ដូរនៅក្នុងផ្សារនិងស្លាកសញ្ញាធ្វើពីដែកតាមដងផ្លូវនៅចំកណ្តាលផ្លូវវេងស្រេង ដែលជាកន្លែងពួកគេគប់ដុំថ្មដាក់កងរាជអាវុធហត្ថ។យុវជនធ្វើកុបកម្មជាច្រើនសុទ្ធតែមានដបសាំង ប៉ុន្តែ គ្មានដបសាំងណាមួយគប់ចំកន្លែងឈរជើងរបស់កងរាជអាវុធហត្ថទេ។
នៅវេលាម៉ោងប្រហែល៩ព្រឹក ឧទ្ធម្ភាគចក្រកងរាជអាវុធហត្ថពីរគ្រឿងបានហោះពីលើកន្លែងធ្វើការតវ៉ា ហើយនៅម៉ោង៩និង៣០នាទីព្រឹកក៏មានវត្តមានមន្ត្រីកងរាជអាវុធហត្ថរាប់រយនាក់ដែលបានធ្វើដំណើរជាក្បួនមកបង្ក្រាបក្រុមអ្នកតវ៉ានៅក្បែរសួនឧស្សាហកម្មកាណាឌីយ៉ា។
ដោយមានការគប់ដុំថ្មពីសំណាក់ក្រុមអ្នកតវ៉ាជាង១០០នាក់ មន្ត្រីកងរាជអាវុធហត្ថក៏បានបាញ់កាំភ្លើងនៅម៉ោងប្រហែលជា១០ព្រឹក ដោយបានបាញ់រាប់រយគ្រាប់ដាក់ក្រុមកូដករ ក្នុងនោះមានទាំងការបាញ់ទៅលើរានហាលនៅជាន់លើនៃអគារដែលក្រុមអ្នកតវ៉ាឈរគប់របស់របរផ្សេងៗដាក់ពួកគេផងដែរ។ បទបញ្ជាឲ្យមានការបាញ់កូដករនេះត្រូវសាក្សីស្តាប់ឭយ៉ាងច្បាស់។
អង្គការសិទ្ធិមនុស្សអាដហុកបានឲ្យដឹងតាមសេចក្តីថ្លែងការណ៍មួយកាលពីថ្ងៃសុក្រថា “កម្មករកម្មការិនីដែលធ្វើកូដកម្មបានគប់ដបសាំងដាក់កងរាជអាវុធហត្ថដែលបានតបតវិញ តាមរយៈការបាញ់កាំភ្លើង” ។
ហេតុការណ៍នេះបានធ្វើឲ្យមនុស្សស្លាប់ចំនួនប្រាំនាក់ ក្នុងនោះមានឈ្មោះ យ៉ាន វុទ្ធី អាយុ២៣ឆ្នាំមកពីខេត្តព្រៃវែង ដែលត្រូវបានបាញ់ចំត្រង់ពោះ ឈ្មោះ គឹម ផល្លី អាយុ២៨ឆ្នាំមកពីរាជធានីភ្នំពេញ និងបុរសបីនាក់ទៀតដែលគេមិនស្គាល់ឈ្មោះ។ ម្នាក់ក្នុងចំណោមអ្នកស្លាប់ទាំងបីនាក់ដែលគេមិនស្គាល់ឈ្មោះ និងដែលត្រូវបានបាញ់ចំខ្នងនេះត្រូវបានបញ្ជូនទៅវត្តទួល នៅម៉ោងប្រហែល១២ថ្ងៃត្រង់។
មនុស្ស១៥នាក់ត្រូវបានចាប់ខ្លួន ហើយជាង២០នាក់បានរងរបួស។ អង្គការអាដហុក សូមថ្កោលទោសពេញទំហឹងចំពោះការប្រើកម្លាំងហួសហេតុរបស់រដ្ឋាភិបាលក្នុងការបង្ក្រាបក្រុមអ្នកតវ៉ា និងការបង្កើនការដាក់ពង្រាយកងកម្លាំងយោធាពិសេសដើម្បីបំបែកការតវ៉ានេះ”។
ភ្លាមៗបន្ទាប់ពីកងរាជអាវុធហត្ថបាញ់កំាភ្លើងលើក្រុមអ្នកតវា៉ អ្នកយកព័ត៌មានពីរនាក់របស់កាសែត ខេមបូឌា ដេលី បានឃើញគេដឹកយុវជនសន្លប់បាត់ស្មារតីនៅកន្លែងកើតហេតុនិងមានឈាមជោកខ្លួនពីរនាក់តាមម៉ូតូមកដាក់លើរ៉ឺម៉កម៉ូតូយ៉ាងលឿនដើម្បីបញ្ជូនទៅមន្ទីរពេទ្យ។
អ្នករងរបួសប្រហែលប្រាំមួយនាក់ដែលគេឃើញត្រូវគ្រាប់កាំភ្លើងចំជើង ដៃ និងស្មាត្រូវបានគេជួយឈឺឆ្អាលនៅតូបលក់ថ្នាំមួយនៅផ្សារនេះ។ ដំុថ្ម របាំងដែលបានឆាបឆេះ ផ្សែងខ្មួលខ្មាញ់ និងសំបកគ្រាប់កាំភ្លើងត្រូវគេឃើញរាយប៉ាយពេញផ្លូវវេងស្រេងក្នុងតំបន់ឧស្សាហកម្មនេះ ហើយក៏ឃើញមានថ្លុកឈាមដែលបន្សល់ទុកដោយអ្នកតវា៉ដែលបានរងរបួសផងដែរ។
បន្ទាប់ពីមានការបាញ់កាំភ្លើងនេះ ក្រុមបាតុករបានបញ្ចេញកំហឹងរបស់ខ្លួនដាក់គ្លីនិកព្យាបាលឯករាជ្យ ដែលពួកគេចោទថា បានបដិសេធមិនព្យាបាលអ្នកតវ៉ារងរបួស ដោយបានសម្រុកចូលក្នុងគ្លីនិកនេះ និងបានវាយបំបែកកញ្ចក់បង្អួច ទ្វារ និងដុតគ្រែ ព្រមទាំងគ្រឿងបរិក្ខាពេទ្យផ្សេងៗទៀតក្នុងភ្នក់ភ្លើងនៅខាងក្រៅ។ រថយន្តដឹកកុងតឺន័រមួយចំនួនដែលកាន់ចង្កូតដោយក្រុមអ្នកតវ៉ាក៏បានចតនៅពេញផ្លូវវេងស្រេងនេះដែរ។
ការបាញ់កាំភ្លើងពីសំណាក់កងរាជអាវុធហត្ថនេះបានបន្តអស់ពាក់កណ្តាលថ្ងៃ ខណៈយុវជនជាច្រើនក្រុមដែលប្រដាប់ដោយដំបង និងបំពង់ទីបបានបន្តគប់ដុំថ្មលើជួរនគរបាល ហើយបានដុតកៅអីឈើ និងឆត្រដែល ពួកគេយកមកពីផ្សារតូចមួយនៅមុខឧទ្យានឧស្សាហកម្មកាណាឌីយ៉ា។
នៅវេលាម៉ោងប្រហែល១រសៀល កងកម្លាំងយោធាពិសេសប្រហែលជា ៣០នាក់ដែលពុំមានប្រដាប់ដោយអ្វីផ្សេងក្រៅពីអាវុធស្វ័យប្រវត្តនោះបានមកពីក្រោយក្រុមអ្នកតវ៉ា ដោយបានចោលគ្រាប់បែកផ្សែង កំប៉ុងបញ្ចេញឧស្ម័នបង្ហូរទឹកភ្នែក និងបានបាញ់កាំភ្លើងស្វ័យប្រវត្តរំលងក្បាលអ្នកគប់ដំុថ្មជាច្រើននាក់។
នៅល្ងាចថ្ងៃអង្គារ អាជ្ញាធរដែលមានមន្ត្រីកងរាជអាវុធហត្ថរាប់រយនាក់ឈរជើងនៅតំបន់វេងស្រេង បានប្រើឧគ្ឃោសនស័ព្ទ
ណែនាំពលរដ្ឋ និងជនសីុវិលចេញឲ្យផុតពីផ្លូវដោយបានព្រមានថា អ្នកណាក៏ដោយដែលឈររញ៉េរញ៉ៃនៅលើផ្លូវ គឺជា “ ជនជ្រុលនិយម” ហើយនឹងត្រូវបានចាត់ការទៅតាមនោះ។
ទោះបីជាមានការព្រមាន និងវត្តមានកងរាជអាវុធហត្ថច្រើនយ៉ាងណាក៏ដោយ ក៏មនុស្សរាប់រយនាក់នៅតែបានប្រមូលផ្តុំគ្នានៅតំបន់ផ្លូវវេងស្រេងនេះដដែល។
អ្នកស្រី ណាលី ពីឡូក ប្រធានអង្គការសិទ្ធិមនុស្សលីកាដូបានលើកឡើងតាមរយៈសេចក្តីថ្លែងការណ៍មួយថា “យើងថ្កោលទោសការប្រើកម្លាំងហួសហេតុដែលបណ្តាលឲ្យមានការបាត់បង់អាយុជីវិតពីសំណាក់កងកម្លាំងសន្តិសុខ។ កងកម្លាំងសន្តិសុខដាច់ខាតត្រូវតែបញ្ឈប់ជាបន្ទាន់នូវការប្រើគ្រាប់កាំភ្លើងពិតលើជនសីុវិល។ យើងសូមអំពាវនាវឲ្យអាជ្ញាធរធ្វើការសើុបអង្កេតឲ្យបានពេញលេញ និងហ្មត់ចត់ជាបន្ទាន់លើការប្រើកម្លាំងហួសហេតុក្នុងពេលថ្មីៗនេះ ក្នុងនោះរាប់ទាំងការរកឲ្យឃើញអ្នកបញ្ជាឲ្យមានការបាញ់គ្រាប់ពិត និងការប្រើកម្លាំងមិនសមនឹងស្ថានភាពនៅចំពោះមុខផងដែរ។ អ្នកណាក៏ដោយដែលទទួលខុសត្រូវចំពោះការរំលោភសិទ្ធិមនុស្សនេះត្រូវតែនាំមកទទួលទោសតាមច្បាប់”។
អង្គការអាដហុក ក៏បានអំពាវនាវឲ្យរដ្ឋាភិបាលចាប់សមាជិកកងកម្លាំងសន្តិសុខដែលបានប្រើកម្លាំងហួសហេតុអំឡុងការប៉ះទង្គិចគ្នានេះមកផ្តន្ទាទោសផងដែរ។
ឧត្តមសេនីយ៍ទោ រ័ត្ន ស្រៀង មេបញ្ជាការកងរាជអាវុធហត្ថរាជធានីភ្នំពេញ បានបដិសេធមិននិយាយពីចំនួនអ្នកតវ៉ាដែលកងរាជអាវុធហត្ថបានធ្វើឲ្យស្លាប់ទេ ហើយមិនព្រមនិយាយអំពីការរងរបួសរបស់មន្ត្រីកងរាជអាវុធហត្ថក្រោមឱវាទរបស់លោកឡើយ។
ឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសអះអាងថា កងរាជអាវុធហត្ថរាជធានីភ្នំពេញ គឺជាអ្នកដែលជាប់ពាក់ព័ន្ធក្នុងការប៉ះទង្គិចគ្នានៅផ្លូវវេងស្រេងនេះ ហើយបានបដិសេធមិនធ្វើអត្ថាធិប្បាយបន្ថែមទេ។
ឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស មិនអាចទាក់ទងសុំការអត្ថាធិប្បាយបានឡើយ។
តាមរយៈសេចក្តីថ្លែងការណ៍ពីរទំព័រមួួយច្បាប់កាលពីថ្ងៃសុក្រ ក្រសួងការពារជាតិបានបញ្ជាក់ថា កងយោធពលខេមរភូមិន្ទប្តេជ្ញាការពារលោកនាយករដ្ឋមន្ត្រី ហ៊ុន សែន និងលទ្ធផលនៃការបោះឆ្នោតកាលពីខែកក្កដាដែលគណបក្សប្រជាជនបានឈ្នះទាំងប្រផិតប្រផើយ។ អ្នកឃ្លាំមើលការបោះឆ្នោតឯករាជ្យមួយចំនួន រួមទាំងគណបក្សប្រឆាំងផង អះអាងថា ការបោះឆ្នោតនេះពោរពេញដោយភាពមិនប្រក្រតី ដូច្នេះមិនតំណាងឲ្យឆន្ទៈរបស់ប្រជាពលរដ្ឋកម្ពុជាទេ។
គណបក្សសង្គ្រោះជាតិ ដែលបានឈ្នះ៥៥អាសនៈទល់នឹង៦៨អាសនៈរបស់គណបក្សប្រជាជននោះ បានធ្វើពហិការសភាដើម្បីទាមទារឲ្យមានការសើុបអង្កេតលើភាពមិនប្រក្រតី អំឡុងការបោះឆ្នោតនេះ ហើយបានធ្វើការតវា៉ស្ទើររៀងរាល់ថ្ងៃចាប់តាំងពីថ្ងៃទី១៥ ខែធ្នូមក ដើម្បីទាមទារឲ្យមានការបោះឆ្នោតសាឡើងវិញ និងឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង។
ក្រសួងការពារជាតិបានលើកឡើងក្នុងសេចក្តីថ្លែងការណ៍ដែលគ្មានការចុះហត្ថលេខាមួយថា “ កងយោធពលខេមរភូមិន្ទសូមប្រកាសពីការប្តេជ្ញារបស់ខ្លួនក្នុងការការពារជាតិ សាសនា ព្រះមហាក្សត្រ ពិសេសគឺ រដ្ឋធម្មនុញ្ញ និងលទ្ធផលនៃការបោះឆ្នោតដែលឆ្លុះបញ្ចាំងពីឆន្ទៈរបស់ប្រជាពលរដ្ឋភាគច្រើន ហើយនឹងគាំទ្រការដឹកនាំរបស់ [នាយករដ្ឋមន្ត្រី] ហ៊ុន សែន គ្រប់កាលៈទេសៈទាំងអស់។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថា កងរាជអាវុធហត្ថមិនបានបាញ់ប្រហារអ្នកតវា៉ស្របច្បាប់ទេ គឺបាញ់តកុបករប៉ុណ្ណោះ។ លោកបានមានប្រសាសន៍ដោយពន្យល់អំពីភាពចាំបាច់នៃការប្រើកងកម្លាំងនេះថា “ ក្រុមកុបករទាំងនោះបានចាប់ផ្តើមបំផ្លិចបំផ្លាញទ្រព្យសម្បត្តិរដ្ឋ និងឯកជន ព្រមទាំងស្រែកគំរាមដល់កម្មករកម្មការិនីផ្សេងៗទៀត ដែលកំពុងធ្វើការដោយស្ងៀមស្ងាត់នៅក្នុងរោងចក្រផងដែរ”។
លោកមានប្រសាសន៍បន្ថែមថា “ បាតុកម្ម បានបន្តអស់រយៈពេលពីរបីសប្តាហ៍មកហើយ រដ្ឋាភិបាលមិនបានប្រើកងកម្លាំងប្រដាប់អាវុធទេ ព្រោះរដ្ឋាភិបាលមិនចង់ឃើញមានអំពើហិង្សា ប៉ុន្តែក្រុមកុបករបានធ្វើឲ្យយើងអស់ភាពអត់ធ្មត់ ដោយសារពួកគេបានបាញ់ចំពាម គប់ដុំថ្មនិងដបសាំងមកលើកងកម្លាំងរបស់យើង”។
លោក ផៃ ស៊ីផាន ក៏បានឲ្យដឹងផងដែរថា អ្នកតវ៉ាបានស្រែកពាក្យស្លោកឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង។ នៅពេលត្រូវបានសួរថា តើនរណាជាអ្នកទទួលខុសត្រូវចំពោះការបាញ់សម្លាប់អ្នកតវ៉ាទាំង៥នាក់នេះ លោក ផៃ ស៊ីផាន បានឆ្លើយថាគឺ “អ្នកញុះញង់” ដោយសំដៅទៅលើគណបក្សប្រឆាំង។
លោក ផៃ ស៊ីផាន បានមានប្រសាសន៍ថា “យើងចាំបាច់ត្រូវគិតពីនីតិវិធីព្រហ្មទណ្ឌ។ នរណាដែលរារាំងអាជ្ញាធរក្នុងការអនុវត្តច្បាប់ អាជ្ញាធរមានសមត្ថកិច្ចមានកាតព្វកិច្ចអនុវត្តច្បាប់”។ លោក កែន លូ អគ្គលេខាធិការនៃសមាគមរោងចក្រកាត់ដេរនៅកម្ពុជាហៅកាត់ថា GMAC បានឲ្យដឹងថា ការស្លាប់និងការរងរបួសមិនមែនជាការទទួលខុសត្រូវរបស់ម្ចាស់រោងចក្រកាត់ដេរឡើយ ព្រោះថា អ្នករងរបួសនិងស្លាប់ប្រហែលជាមិនមែនជាកម្មករកាត់ដេរផងទេ។ លោកបានមានប្រសាសន៍ថា “ ខ្ញុំជឿជាក់ថា ពួកគេមិនមែនជាកម្មករកាត់ដេរឡើយ”។
លោកបានសួរថា “កង[សន្តិសុខ] មានតួនាទីការពារសង្គមនិងវិនិយោគិន។ប្រសិនបើទ្រព្យសម្បតិ្តរបស់រោងចក្រត្រូវគេបំផ្លិចបំផ្លាញ តើនរណាទទួលខុសត្រូវចំពោះការខូចខាតនេះ?”។
លោក កែន លូ ក៏បានច្រានចោលនូវការយល់ឃើញដែលថា កេរ្តិ៍ឈ្មោះលើឆាកអន្តរជាតិរបស់កម្ពុជានៅក្នុងនាមជាប្រទេសផលិតសម្លៀកបំពាក់នឹងខូចផងដែរ។ លោកមានប្រសាសន៍ថា “ទេវាមិនប៉ះពាល់ដលកេរ្តិ៍ឈ្មោះប្រទេសកម្ពុជាឡើយ ព្រោះរោងចក្រកាត់ដេរមិនមែនជាអ្នកដែលបាញ់ប្រហារអ្នកទាំងនោះឡើយ”។
នៅមន្ទីរពេទ្យមិត្តភាពខ្មែរ-សូវៀត មានអ្នកតវ៉ា ៣នាក់ស្លាប់នៅទីនោះហើយមាន អ្នករងរបួស២២នាក់ក៏កំពុងព្យាបាលរបួសដោយសារតែត្រូវគ្រាប់កាំភ្លើងផងដែរ។ អ្នករងរបួសចំនួន១៩នាក់បាននិយាយថា ពួកគេធ្វើការនៅក្នុងរោងចក្រកាត់ដេរ។ហើយមាន៤នាក់ជាស្ត្រីក្នុងចំណោមមនុស្សទាំង១៩នាក់នោះ។
ទាវ រ៉ាឌី អាយុ២០ឆ្នាំ ដែលត្រូវគ្រាប់កាំភ្លើងចំនួន២គ្រាប់បាននិយាយពេលដេកនៅលើគ្រែពេទ្យថា “ គ្រាប់កាំភ្លើងបានទម្លុះទ្រូងនិងដៃខាងឆ្វេងរបស់ខ្ញុំ។
ព្រំ ភារម្យ អាយុ២២ឆ្នាំត្រូវគេបាញ់ចំត្រូវចំហៀងខ្លួន ហើយរបួសរបស់នាងមានសភាពធ្ងន់នៅល្ងាចថ្ងៃសុក្រ នេះបើយោងតាមការឲ្យដឹងពីគ្រូពេទ្យ។ សូ សម្បត្តិ អាយុ២០ឆ្នាំដែលត្រូវគ្រាប់ចំជើងបានសួរថា “យើងគ្មានកាំភ្លើងឡើយ ហេតុអ្វីបានជាកងរាជអាវុធហត្ថបាញ់ប្រហារយើងដូច្នេះ?”។
ឈីវ សារី អាយុ២៨ឆ្នាំដែលត្រូវជាបងថ្លៃស្រីរបស់ យា៉ន វុទ្ធី ជាអ្នកតវ៉ាដែលបានបាត់បង់ជីវិតបាននិយាយថា នាងក៏មានការរន្ធត់ចិត្តដែរពេលឃើញកងរាជអាវុធហត្ថប្រើគ្រាប់កាំភ្លើងប្រឆាំងនឹងអ្នកតវ៉ាប្រដាប់ដោយដុំថ្មនោះ។ នាងបានសួរថា “កងរាជអាវុធហត្ថមិនគួរប្រើកាំភ្លើងដើម្បីដាក់សំពាធលើកម្មករទេ។ ហេតុអ្វីបានជាពួកគេមិនប្រើត្រឹមតែដំបងឆក់របស់ខ្លួនទៅ?”។
ក្រសួងការងារបានចេញសេចក្តីថ្លែងការណ៍មួយបន្ទាប់ពីការផ្ទុះអំពើហិង្សា ដោយអះអាងថា កម្មករភាគច្រើនពេញចិត្តចំពោះការផ្តល់ប្រាក់ខែ១០០ដុល្លារ ក្នុងមួយខែ។ ក្រសួងនេះបានស្តីបន្ទោសការកើតមានអំពើហិង្សានេះលើសហជីពចំនួន៥ដែលដឹកនាំការធ្វើកូដកម្ម ក៏ដូចជាគណបក្សសង្គ្រោះជាតិផងដែរ។
លោក សម រង្ស៊ី ប្រធានគណបក្សសង្គ្រោះជាតិបានអំពាវនាវ កាលពីថ្ងៃសុក្រឲ្យមានការបញ្ឈប់ការប្រើអំពើហិង្សាជាបន្ទាន់។ លោកបានមានប្រសាសន៍នៅក្នុងវីដេអូគ្លីប ដែលបង្ហោះនៅលើទំព័រហ្វេសប៊ុករបស់លោកថា “ខ្ញុំមានទុក្ខសោកយ៉ាងខ្លាំង បន្ទាប់ពីទទួលបានព័ត៌មាននៅថ្ងៃនេះថា មានការបង្ហូរឈាមគ្នារវាងខ្មែរនិងខ្មែរ នៅឯសួនឧស្សាហកម្មកាណាឌីយា៉”។
លោកមានប្រសាសន៍ថា “ វាគឺជាការប៉ះទង្គិចគ្នាយ៉ាងធ្ងន់ធ្ងររវាងកម្មករដែលកំពុងធ្វើកូដកម្មនិងកងកម្លាំងប្រដាប់អាវុធដែលស្ថិតក្រោមការបញ្ជាពីរដ្ឋាភិបាល។ ខ្ញុំសូមអំពាវនាវឲ្យភាគីទាំងពីរដកថយដើម្បីបញ្ចប់អំពើហិង្សាជាបន្ទាន់”។
សម្ព័ន្ធអង្គការសង្គមស៊ីវិលដែលមានសមាជិកចំនួន១៥បានចេញសេចក្តីថ្លែងការណ៍មួយកាលពីល្ងាចថ្ងៃសុក្រ ដោយថ្កោលទោសការបាញ់ប្រហារលើជនស៊ីវិល ហើយបានអំពាវនាវឲ្យសហគមអន្តរជាតិនិងអ្នកអង្កេតការណ៍ទាំងជាតិនិងអន្តរជាតិឃ្លាំមើលស្ថានភាពនៅក្នុងប្រទេសកម្ពុជាដើម្បី ” ធ្វើអន្តរាគមន៍ឲ្យបានទាន់ពេលវេលា ក្នុងគោលបំណងបញ្ឈប់ការរំលោភបំពានសិទ្ធិមនុស្សធ្ងន់ធ្ងរណាមួយ”។
អង្គការសហប្រជាជាតិបានចេញេសចក្តីថ្លែងការណ៍មួយកាលពីល្ងាចថ្ងៃសុក្រដោយលើកឡើងថា ខ្លួនកំពុងតាមដានព្រឹត្តិការណ៍នៅក្នុងរាជធានីភ្នំពេញ។ អង្គការសហប្រជាជាតិបានលើកឡើងថា “ យើងទទូចឲ្យភាគីទាំងអស់រក្សាភាពអត់ធ្មត់ឲ្យបានខ្លាំងបំផុត។ យើងថ្កោលទោស ចំពោះការប្រើគ្រាប់កាំភ្លើងពិតលើកម្មករ និងបាតុករនិងការធ្វើសកម្មភាពហិង្សារបស់បុគ្គលមួយចំនួនអំឡុងការធ្វើបាតុកម្មនេះ”។
អង្គការសហប្រជាជាតិបានលើកឡើងថា “ការចោទប្រកាន់អំពីអ្នកបង្កហេតុ និងភាគីទី៣ក្នុងចំណោមកម្មករ និងបាតុករ គឺជារឿងគួរឲ្យថ្នាំងថ្នាក់ចិត្តណាស់។ អង្គការសហប្រជាជាតិសូមអំពាវនាវឲ្យមានការនាំអ្នកបង្កអំពើហិង្សានេះមកផ្ដន្ទាទោសតាមនីតិវិធីច្បាប់ ដោយផ្អែកលើភ័ស្តុតាងរឹងមាំដើម្បីធានាឲ្យបានថា អ្នកទទួលខុសត្រូវពិតប្រាកដត្រូវបានផ្ដន្ទាទោស។
យើងទទូចឲ្យអាជ្ញាធររក្សាភាពអត់ធ្មត់ដោយមិនប្រើគ្រាប់កាំភ្លើងពិតជាមធ្យោបាយក្នុងការគ្រប់គ្រងធ្វើកូដកម្ម”៕ សេរីវុធ
(រាយការណ៍បន្ថែមដោយ គុច ណារ៉េន និងសេក ឧត្តម)