27 C
Phnom Penh

អង្គការ​​​ជាតិ​​​និង​​​អន្តរជាតិ​​​ថ្កោល​​​ទោស​​​រដ្ឋាភិបាល​​​ចំពោះ​​​​​​​​​អំពើ​​​ហិង្សា​​​នៅ​​​ទីលាន​​​ប្រជា​​​ធិបតេយ្យ

ដោយ ឌឹ ខេមបូឌា ដេលី

បទវិភាគ

អង្គការ​​​សហប្រជាជាតិ​​​​​​ និ​​​ង​​​អង្គការ​​​សិទ្ធិ​​​មនុស្ស​​​ក្នុង​​​ស្រុក​​​​​​បាន​​​ថ្កោល​​​ទោស​​​រដ្ឋាភិបាល​​​ចំពោះ​​​​​​​​​ការ​​​​ប្រើ​​​អំពើ​​​ហិង្សា​​​​​​​​បណ្ដេញ​​​​​​អ្នក​​​គាំទ្រ​​​គណបក្ស​​​សង្គ្រោះ​​​ជាតិ​​​ចេញ​​​ពី​​​​​​ទីលាន​​​ប្រជា​ធិប​តេយ្យ​​​ក្នុង​​​រាជធានីភ្នំពេញ​​​កាល​​​ពី​​​ថ្ងៃ​​​សៅរ៍​​​ ព្រម​​​ទាំង​​​ការ​​​ហាម​​​ឃាត់​​​មិន​​​ឲ្យ​​​​​​មាន​​​ការ​​​តវ៉ា​​​ជា​​​សាធារណៈ​​​នៅ​​​ក្នុង​​​រាជធានី​​​។

កាល​​​ពី​​​ថ្ងៃ​​​សៅរ៍ សាលា​​​ដំបូង​​​រាជធានី​​​ភ្នំពេញ​​​បាន​​​កោះ​​​ហៅ​​​លោក​​​ សម រង្ស៊ី និង​​​លោក​​​ កឹម សុខា ឲ្យ​​​ចូល​​​ខ្លួន​​​ទៅ​​​តុលាការ​​​នៅ​​​ថ្ងៃ​​​ទី​​​១៤ ខែ​​​មករា​​​ ពាក់ព័ន្ធ​​​នឹង​​​ការ​​​​ប្រើ​​​អំពើ​​​ហិង្សា​​​​​​​​​​​រវាង​​​​​​កង​​​រាជអាវុធ​​​ហត្ថ​​​ និង​​​កម្ម​​​ករ​​​រោងចក្រ​​​កាត់​​​ដេរ​​​ដែល​​​ធ្វើការ​​​តវ៉ា​​​នៅ​​​ក្នុង​​​ខណ្ឌ​​​ពោធិ៍​​​សែន​​​ជ័យ​​​ កាល​​​ពី​​​ថ្ងៃ​​​សុក្រ​​​ ដែល​​​បាន​​​​​​ធ្វើ​​​ឲ្យ​​​​​​បាតុករ​​​ប្រាំ​​​នាក់​​​ស្លាប់​​​ និង​​​ជាង​​​២០​​​នាក់​​​ទៀត​​​រង​​​របួស​​​ដោយ​​​សារ​​​​​​គ្រាប់​​​កាំ​​​ភ្លើង​​​របស់​​​កង​​​រាជអាវុធ​​​ហត្ថ​​​។

លោក​​​ យឹម​​​ សុវណ្ណ អ្នក​​​នាំពាក្យ​​​គណបក​​្ស​​​សង្គ្រោះ​​​ជាតិ​​​បាន​​​មាន​​​ប្រសាសន៍​​​ថា លោក​​​សម រង្ស៊ី និង​​​លោក​​​ កឹម​​​ សុខា នឹង​​​គោរព​​​តាមដីកា​​​កោះ​​​ហៅ​​​នេះ​​ និង​​​​​​ស្ថិត​​​នៅ​​​ក្នុង​​​ប្រទេស​​​រហូត​​​ដល់​​​កាល​​​បរិច្ឆេទ​​​របស់​​​តុលាការ​​​។

នៅ​​​ម៉ោង​​​ប្រហែល​​​១១ និង​​​៣០​​​នាទី​​​ព្រឹក​​​​​​ថ្ងៃ​​​សៅរ៍​​​ បុរស​​​ជាង​​​១០០​​​នាក់​​​ ដែល​​​ភាគ​​​ច្រើន​​​​​​​​​ពាក់​​​មួក​​​​​​ការពារ​​​សុវត្ថិភាព​​​ និង​​​ប្រដាប់​​​ដោយ​​​ដំបង​​​ដែក​​​ ដំបង​​​ឈើ ពូថៅ​​​ និង​​​ដំបង​​​ឆក់​​​ បាន​​​សម្រុក​​​ចូល​​​ទៅ​​​ក្នុង​​​ទីលាន​​​ប្រជាធិបតេយ្យ​​​​​​ ​​​ដេញ​​​អ្នក​​​គាំទ្រ​​​​​​ និង​​​​​​ព្រះ​​​សង្ឃ​​​ពីរបី​​​រយ​​​នាក់​​​​​​ដែល​​​ជា​​​អ្នក​​​គាំទ្រ​​​គណ​​​បក្ស​​​សង្គ្រោះ​​​ជាតិ​​​ឲ្យ​​​ចេញ​​​ពីទីលាន​​​នេះ​​​ និង​​​​​​បាន​​​វាយ​​​អ្នក​​​​​​​​​ព្យាយាម​​​​​​​​​រត់​​​គេច​​​ខ្លួន​​​។

នគរបាល​​​ប្រឆាំង​​​កុប​​​កម្ម​​​និង​​​កង​​​រាជអាវុធ​​​ហត្ថ​​​រាប់​​​រយ​​​នាក់​​​បាន​​​បិទ​​​ទីលាន​​​នេះ​​​ និង​​​​​​ឃ្លាំ​​​មើល​​​​​​នៅ​​​ពេល​​​​​​ដែល​​​​​​ជន​​​សីុវិល​​​ជា​​​ច្រើន​​​ក្រុម​​​​​​ដែល​​​ពាក់​​​បូរ​​​ដៃ​​​ពណ៌​​​ក្រហម​​​​​​និង​​​​​​សន្ដិសុខ​​​​​​ក្រុង​​​បាន​​​វាយ​​​​​​អ្នក​​​នៅ​​​ក្នុង​​​ទីលាន​​​នេះ​​​និង​​​រុះរើ​​​តង់ វេទិកា និង​​​​​​កន្លែង​​​ដុត​​​​​​ទៀន​​​​​​​​​ធូប​​​ ដែល​​​បាតុ​​​​ករ​​​គាំទ្រ​​​គណបក្ស​​​សង្គ្រោះ​​​ជាតិ​​​បាន​​​បង្កើត​​​​​​ឡើង​​​​​​​​​ជាង​​​បី​​​សប្ដាហ៍​​​មក​​​ហើយ​​​ ដើម្បី​​​​​​ធ្វើ​​​ជា​​​កន្លែង​​​ជួប​​​ជុំ​​​គ្នា​​​ទាមទារ​​​ឲ្យ​​​លោក​​​ ហ៊ុន​​​ សែន​​​ ចុះ​​​ចេញ​​​ពី​​​តំណែង​​​។

អាជ្ញាធរ​​​ក្រុង​​​ភ្នំពេញ​​​​​​​​​បាន​​​ចេញ​​​សេចក្ដី​​​ថ្លែង​​​ការណ៍​​​ដំណាល​​​គ្នា​​​ចំនួន​​​ពីរ​​​កាល​​​ពី​​​ថ្ងៃ​​​សៅរ៍​​​​​​ ដោយលើក​​​ឡើង​ថា ទោះ​​​បី​​​ជា​​​បាតុកម្ម​​​នៅ​​​ទីលាន​​​ប្រជាធិបតេយ្យ​​​​​​​​​ធ្វើ​​​​​​ឡើង​​​ដោយ​​​​​​អហិង្សា​​​ក៏​​​ដោយ​​​ ក៏ការ​​​តវ៉ា​​​របស់​​​​​​គណបក្ស​​​សង្គ្រោះ​​​ជាតិ​​​​​​កំពុង​​​​​​ក្លាយ​​​ជា​​​ហិង្សា​​​នៅ​​​កន្លែង​​​ផ្សេង​​​ទៀត​​​​​​ដែរ​​​។

សេចក្ដី​​​ថ្លែង​​​ការណ៍​​​នោះ​​​លើក​​​ឡើង​​​ថា “ផ្អែក​​​​​​តាម​​​ស្ថានភាព​​​នេះ​​​សាលា​​​រាជធានី​​​ភ្នំពេញ​​​បាន​​​សម្រេច​​​មិន​​​អនុញ្ញាត​​​ឲ្យ​​​គណបក្ស​​​សង្គ្រោះ​​​ជាតិ​​​បន្ត​​​ធ្វើ​​​បាតុកម្ម​​​នៅ​​​ទីលាន​​​ប្រជា​​​ធិបតេយ្យ​​​ ឬ​​​ហែក្បួន​​​តាម​​​ផ្លូវ​​​នៅ​​​ក្នុង​​​ទីក្រុង​​​ភ្នំពេញ​​​​​​​​​ទេចាប់​​​ពី​​​ថ្ងៃ​​​ទី​​​៤ ខែ​​​មករា ឆ្នាំ​​​២០១៤​​​នេះ​​​ រហូត​​​ដល់​​​មាន​​​ការ​​​ធានា​​​ថា មាន​​​សន្ដិសុខ​​​និង​​​សណ្ដាប់​​​ធ្នាប់​​​សាធារណៈ​​​​​​ឡើង​​​វិញ​​​”។

នៅ​​​ក្នុង​​​សេចក្ដី​​​ថ្លែង​​​ការណ៍​​​ទី​​​២ សាលា​​​រាជ​ធានី​​​បាន​​​បដិសេធ​​​​​​ថា មិន​​​បាន​​​ប្រើ​​​អំពើ​​​ហិង្សា​​​ដើម្បី​​​បោស​​​សម្អាត​​​ទីលាន​​​ប្រជាធិប​​​តេយ្យ​​​ទេ​​​ ថ្វីបើ​​​សាក្សី​​​និង​​​​​​រូប​​​ថត​​​បង្ហាញ​​​ថា ព្រះ​​​សង្ឃ​​​ត្រូវ​​​បាន​​​​​​សន្ដិសុខ​​​ក្រុង​​​វាយ​​​​​​នឹង​​​ដំបង​​​ក៏​​​ដោយ​​​។ ក្រសួង​​​មហាផ្ទៃ​​​ក៏​​​បាន​​​ចេញ​​​សេចក្ដី​​​ថ្លែង​​​​​​ការណ៍​​​ដាច់​​​​​​ដោយ​​​ឡែក​​​មួយ​​​កាល​​​ពី​​​ថ្ងៃ​​​សៅរ៍​​​​​​ដើម្បី​​​ពន្យល់ប្រាប់​​​ថា សេរីភាព​​​ក្នុង​​​​​​ការ​​​ជួប​​​ជុំ​​​​​​នៅ​​​ក្នុង​​​ទីក្រុងត្រូវ​​​​​​ផ្អាក​​​ជា​​​បណ្ដោះ​​​អាសន្ន​​​។

ក្រសួង​​​នេះ​​​បាន​​​លើក​​​ឡើង​​​ថា “នៅ​​​ក្នុង​​​បរិបទ​​​នេះ​​​និង​​​​​​ដើម្បី​​​ធានា​​​សន្ដិសុខ​​​ និង​​​សណ្ដាប់​​​​​​ធ្នាប់​​​សាធារណៈ​​​​​​​​​ ការ​​​ធ្វើ​​​បាតុកម្ម​​​ និង​​​ការ​​​ហែ​ក្បួន​​​​​​​​ត្រូវ​​​បញ្ឈប់​​​​​​ជា​​​បណ្ដោះ​​​អាសន្ន​​​រហូត​​​ដល់​​​​​​ស្ថានភាព​​​​​​សន្ដិសុខ​​​ និង​​​​​​សណ្ដាប់​​​ធ្នាប់​​​​​​វិល​​​មក​​​រក​​​​​​ភាព​​​ធម្មតា​​​វិញ​​​”។ បន្ទាប់ពី​​​​​​មាន​​​ការ​​​ដេញ​​​​​​អ្នក​​​តវ៉ា​​​ចេញ​​​ពី​​​ទីលាន​​​ប្រជាធិបតេយ្យ​​​ គណបក្ស​​​សង្គ្រោះ​​​ជាតិ​​​​​​​​​បាន​​​លុប​​​ចោល​​​ការ​​​ហែក្បួន​​​​​​ដែល​​​​​បាន​​​គ្រោង​​​ទុក​​​​​​នៅ​​​ក្នុង​​ទីក្រុង​​​ភ្នំពេញ​​​កាលពី​​​ម្សិល​មិញ​​​ ដែល​​​គណបក្ស​​​ប្រឆាំង​​​អះអាង​​​ថា​​​ គឺ​​​ជា​​​ការ​​​ហែក្បួន​​​​​​ដ៏​​​ធំ​​​បំផុត​​​នៅ​​​ក្នុង​​​រាជធានី​​​​​​។

លោក​​​ សុរិយា ស៊ូបេឌី ប្រេសិត​​​​​​សិទ្ធិ​​​មនុស្ស​​​អង្គការ​​​សហប្រជាជាតិ​​​បាន​​​សម្ដែង​​​​​​កង្វល់​​​​​​ចំពោះ​​​​​​សកម្ម​​​ភាព​​​របស់​​​រដ្ឋាភិបាល​​​​​​ក្នុង​​​ការ​​​​​​​​​គាបសង្កត់​​​​​​សិទ្ធិ​​​​​​សេរី​​​ភាព​​​នៃ​​​ការ​​​ជួប​​​ជុំ​​​​​​ដោយ​​​អហិង្សា​​​។ លោក​​​ ស៊ូបេឌី បាន​​​សរ​​​សេរ​​​តាម​​​អីុម៉េល​​​​​​ថា “ខ្ញុំ​​​គិត​​​ថា​​​​​​ វិធានការ​​​​​​ណាមួ​​យ​​​របស់​​​រដ្ឋាភិ​​​បាល​​​​​​ត្រូវ​​​ស្រប​​​តាម​​​​​​ច្បាប់​​​​​​ ភាព​​​ចំាបាច់​​​និង​​​​​​ភាព​​​សម​​​ស្រប​​​”។

ប្រេសិត​​​អង្គការ​​​សហប្រជាជាតិ​​​រូប​​​នេះ​​​បាន​​​លើក​​​ឡើង​​​ថា “នៅពេល​​​មាន​​​ការ​​​​​​​​បោស​​​សម្អាត​​​ទីលាន​​​ប្រជាធិបតេយ្យ​​​កាលពី​​​ម្សិល​​​មិញ និង​​​ការ​​​​​​បាញ់​​​ទៅ​​​លើ​​​បាតុករ​​​​​​ស្លាប់​​​មនុស្ស​​​ប្រាំ​​​នាក់​​​កាលពី​​​ថ្ងៃសុក្រ​​​ គឺ​​​ជា​​​ការ​​​ព្រួយ​​​បារម្ភ​​​នោះ​​​ ពួក​​​គេ​​​​​​ដូចជា​​​មិន​​​ធ្វើ​​​តាម​​​​​​​​​គោល​​​ការណ៍​​​​​​​ទាំង​​​នេះ​​​ទេ​​​ ហើយ​​​គួរ​​​តែ​​​មាន​​​ការ​​​​​​ស៊ើប​​​អង្កេត​​​​ឲ្យ​​​បាន​​​ហ្មត់ចត់​​​​​​​​​និង​​​គួរ​​​ឲ្យ​​​ទុក​​​ចិត្ត​​​​​​ទៅ​​​លើ​​​សោក​​​នាដ​​​កម្ម​​​​​​ទាំង​​​នេះ​​​​​​”។

ទោះ​​​ជា​​​​​​​​​​​​មាន​​​ការ​​​ដោះ​​​ស្រាយ​​​ភាព​​​ទាល់​​​ច្រក​​​ផ្នែក​​​នយោបាយ​​​​​​ ដែល​​​កំពុង​​​​​​បន្ត​​​​​​កើត​​​មាន​​​ ដោយ​​​វិធី​​​​​​ណា​​​ក៏​​​ដោយ​​​ ក៏លោក​​​ ស៊ូបេឌី បាន​​​មាន​​​ប្រសាសន៍​​​ថា “ត្រូវ​​​​​​ធ្វើ​​​ការ​​​កែ​​​ទម្រង់​​​​​​ឲ្យ​​​បាន​​​ហ្មត់​​​ចត់​​​​​​លើ​​​ប្រព័ន្ធ​​​អភិបាល​​​កិច្ច​​​​​​ឲ្យ​​​បាន​​​កាន់តែ​​​ឆាប់​​​​​​”។ អង្គការ​​​សិទ្ធិ​​​មនុស្ស​​​លីកាដូ និង​​​​​​មជ្ឈ​​​មណ្ឌល​​​​អប់រំ​​​ច្បាប់សម្រាប់​​​សហគមន៍​​​​​​បាន​​​ចេញ​​​សេចក្ដី​​​ថ្លែង​​​ការណ៍​​​រួម​​​មួយ​​​កាលពី​​​ថ្ងៃ​​​សៅរ៍​​​​​​បន្ទោស​​​​​​រដ្ឋាភិបាល​​​របស់​​​លោក​​​ ហ៊ុន​​​ សែន​​​ ចំពោះ​​​ទង្វើ​​​​​​បណ្ដេញ​​​បាតុករ​​​នេះ​​​។

លោក​​​ស្រី​​​ ណាលី ពីឡូក​​​ ប្រធាន​​​អង្គការ​​​លីកាដូ បាន​​​លើក​​​ឡើង​​​នៅ​​​​​​ក្នុង​​​សេចក្ដី​​​ថ្លែង​​​ការណ៍​​​នោះ​​​ថា “យើង​​​​​​ស្រងាក​​​​​​ចិត្ត​​​ចំពោះ​​​ការ​​​ប្រើអំពើ​​​ហិង្សា​​​នេះ​​​។ បន្ទាប់ពី​​​​​​មាន​​​ការ​​​ស្លាប់​​​មនុស្ស​​​កាល​​​ពី​​​ថ្ងៃ​​​សុក្រ​​​ យើង​​​សង្ឃឹម​​​ថា រដ្ឋាភិបាល​​​​​​នឹង​​​ចាប់​​​ផ្ដើម​​​​​​អត់​​​ធ្មត់​​​ ប៉ុន្តែ​​​ទង្វើ​​​របស់​​​ពួក​​​គេ​​​នៅ​​​ថ្ងៃ​​​នេះ​​​ បង្ហាញ​​​ថា គ្មាន​​​ការ​​​គោរព​​​សិទ្ធិ​​​មនុស្ស​​​​​​និង​​​ការ​​​រស់​​​នៅ​​​របស់​​​​​​ប្រជាពលរដ្ឋ​​​​​​ខ្លួន​​​ឡើយ​​​”។ ស្ថានទូត​​​អាមេរិក​​​ជំរុញ​​​ឲ្យ​​​រដ្ឋាភិបាល​​​​​​កែ​​​ប្រែ​​​​​​សេចក្ដី​​​សម្រេច​​​របស់​​​ខ្លួន​​​លើការ​​​ហាម​​​ឃាត់​​​មិន​​​ឲ្យ​​​មាន​​​​​​ការ​​​តវ៉ា​​​នេះ​​​។

លោក​​​ ស៊ាន​​​ ម៉ាកគីន​​​តុស​​​ អ្នក​​​នាំពាក្យ​​​​​​ស្ថានទូត​​​អាមេរិក​​​បាន​​​មាន​​​ប្រសាសន៍​​​ថា “យើង​​​មាន​​​ការ​​​​​​ខក​​​ចិត្ត​​​ខ្លាំង​​​ណាស់​​​​​​ចំពោះ​​​សេចក្ដី​​​សម្រេច​​​របស់​​​សាលា​​​រាជធានីភ្នំពេញ​​​​​​ក្នុង​​​ការ​​​ហាម​​​ឃាត់​​​មិន​​​ឲ្យ​​​គណបក្ស​​​សង្គ្រោះ​​​ជាតិ​​​ធ្វើ​​បាតុកម្ម​​​។ ទង្វើ​​​នេះ​​​គឺ​​​ជា​​​ការ​​​ដើរ​​​ថយ​​​ក្រោយ​​​នៅ​​​ក្នុង​​​ការ​​​អភិវឌ្ឍ​​​ប្រជាធិបតេយ្យ​​​​​​​​​នៅ​​​កម្ពុជា​​​”។

លោក ម៉ាកគីនតុស បាន​​​សរសេរ​​​​​​តាម​​​អ៊ីម៉េល​​​​​​ថា “យើង​​​​​​សូម​​​ជំរុញ​​​ឲ្យ​​​រាជ រដ្ឋាភិបាល​​​​​​​​​កម្ពុជា​​​​​​​​​ពិចារណា​​​ពី​​​គោល​​​ជំហរ​​​របស់​​​ខ្លួន​​​ឡើង​​​វិញ​​​ និង​​​​​​ជួយ​​​​​​សម្រប​​​សម្រួល​​​​​​ដល់​​​ការ​​​ប្រើ​​​សិទ្ធិ​​​សេរី​​​ភាព​​​ក្នុង​​​ការ​​​​​​បញ្ចេញ​​​មតិ​​​ និង​​​ជួប​​​ជុំ​​​គ្នា​​​ដោយ​​​អហិង្សា​​​ឡើង​​​វិញ​​​ ដូច​​​​​​ដែល​​​​​​ខ្លួន​​​បាន​​​ធ្វើ​​​ក្នុង​​​រយៈ​​​ពេល​​​ប៉ុន្មាន​​​ខែ​​​មុន​​​នេះ​​​​​​”។
ក្រសួង​​​​​​មហាផ្ទៃ​​​​​​ក៏បាន​​​លើក​​​ឡើង​​​​​​ក្នុង​​​សេចក្ដី​​​ថ្លែង​​​ការណ៍​​​របស់​​​​​​ខ្លួន​​​ដែរ​​​ថា ការ​​​​​​បោស​​​​​​​សម្អាត​​​ទីលាន​​​ប្រជាធិបតេយ្យ​​​នេះ​​​ធ្វើ​​​ឡើ​​​ង​​​​​​ដោយ​​​អហិង្សា​​​។

សេចក្ដីថ្លែង​​​​​​ការ​​​ណ៍​​​នោះ​​​លើក​​​ឡើ​​​ងថា “ប្រតិបត្តិការ​​​​​​នេះ​​​ធ្វើ​​​ឡើ​​​ង​​​ដោយ​​​សន្ដិវិធី​​​​​​​​​ដោយ​​​​​​គ្មាន​​​ការ​​​ប៉ះទង្គិច​​​ ហើយ​​​អាជ្ញាធរ​​​បាន​​​បំបែក​​​​​​ការ​​​ជួប​​​ជុំគ្នា​​​ និង​​​ការ​​​កាន់​​​កាប់​​​ទីលាន​​​ប្រជាធិបតេយ្យ​​​​​​ដោយ​​​ខុស​​​ច្បាប់​​​”។

ទោះជាយ៉ាង​​​ណា​​​ ប៉ុន្មាន​​​ម៉ោង​​​​​​បន្ទាប់ពី​​​​​​ការ​​​​​​​​​​​​បំបែក​​​បាតុករ​​​​​​ដោយ​​​ហិង្សា​​​នេះ​​​ អ្នក​​​កាសែត​​​​​​និង​​​អ្នក​​​ឃ្លាំ​​​មើល​​​សិទ្ធិ​​​មនុស្ស​​​​​​បាន​​​​​​​​​ផ្សព្វផ្សាយ​​​រូប​​​ថត​​​ជា​​​ច្រើន​​​តាម​​​អ៊ីន​​​ធើណិត​​​​​​បង្ហាញ​​​ពី​​​​​​ជន​​​ស៊ីវិល​​​​​​ប្រដាប់​​​ដោយ​​​​​​បំពង់​​​ទីប​​​ និង​​​​​​ដំបង​​​ឈើ​​​​​​ ដេញ​​​វាយ​​​អ្នក​​​តវ៉ា​​​ ហើយ​​​សន្ដិ​​​សុខ​​​​​​ប្រដាប់​​​ដោយ​​​ដំបង​​​​​​​​​ដេញ​​​​​​វាយ​​​ព្រះ​​​សង្ឃ។

លោក​​​ ផៃ ស៊ីផាន​​​ អ្នក​​​នាំពាក្យ​​​រដ្ឋាភិបាល​​​និង​​​ជា​​​រដ្ឋលេខាធិការ​​​​​​ទីស្ដីការ​​​គណៈ​​​រដ្ឋមន្ត្រី​​​​​​បាន​​​អះអាង​​​​​​ថា   សកម្មភាព​​​​​​ហិង្សា​​​របស់​​​នគរ​​​បាល​​​​​​កាល​​​ពី​​​ថ្ងៃសុក្រ និង​​​ថ្ងៃ​​​សៅរ៍​​​ គឺ​​​ជា​​​ការ​​​ចាំបាច់​​​​​​​​​ដើម្បី​​​ស្ដារ​​​សណ្ដាប់​​​ធ្នាប់​​​​​​នៅ​​​​​​ក្នុង​​​រាជ​​​ធានី​​​​​​។ លោក​​​ ផៃ ស៊ីផាន​​​ បាន​​​មាន​​​ប្រសាសន៍​​​ថា “ការ​​​ស្ដារ​​​​​​​​​នីតិរដ្ឋ​​​គឺ​​​ជា​​​​​​ការ​​​សម្រេច​​​​​​របស់​​​រដ្ឋាភិ​​​បាល​​​ ដើម្បី​​​​​នាំ​​​សុភមង្គល​​​​​​មក​​​ឲ្យ​​​ប្រជាជន​​​វិញ។ យើង​​​​​​ចាត់​​​វិធានការ​​​ណាមួយ​​​ ដើម្បី​​​ធ្វើ​​​​​​ឲ្យ​​​មាន​​​​​​ភាព​​​ធម្មតា​​សម្រាប់​​​ប្រជាជន​​​វិញ​​​” ហើយ​​​លោក​​​បាន​​​បន្ទោស​​​គណបក្ស​​​សង្គ្រោះ​​​ជាតិ​​​ចំពោះ​​​អំពើ​​​ហិង្សា​​​នេះ​​​ ហើយ​​​បាន​​​ព្រមាន​​​​ថា ឥឡូវ​​​នេះ​​​ពួក​​​គេ​​​​​​ត្រូវ​​​តែ​​​ចូល​​​សភា។ លោក​​​បាន​​​មាន​​​ប្រសាសន៍​​​ថា “គណ​​​បក្ស​​​សង្គ្រោះ​​​ជាតិ​​​​​​មាន​​​​​​ជម្រើស​​​ដោយសេរី​​​​​​ក្នុង​​​ការ​​​ចរចា​​​ ប៉ុន្តែ​​​ផ្ទុយ​​​ទៅ​​​វិញ​​​ពួ​​​ក​​​គេ​​​ញុះ​​​ញង់​​​​​​​ប្រជាជន​​​។ អ្នក​​​មាន​​​សំឡេង​​​ភាគ​​​តិច​​​មិន​​​អាច​​​បង្ក​​​​​​សង្គ្រាម​​​បាន​​​ទេ​​​​​​។ ពួក​​​គេ​​​​​​ត្រូវ​​​ចូល​​​រដ្ឋសភា​​​”។

បន្ទាប់ពី​​​ការ​​​បង្សុកូ​​​ល​​​នៅ​​​ទីស្នាក់​​​​​​ការ​​គណ​​​​បក្ស​​​សង្គ្រោះ​​​ជាតិ​​​កាលពី​​​ម្សិលមិញ​​​ឲ្យ​​​​​​បាតុ​ករ​​​​​​​ប្រាំ​​​នាក់​​​ ដែល​​​កង​​​រាជ​​​អាវុធ​​​ហត្ថ​​​បាន​​​បាញ់​​​ស្លាប់​​​កាលពី​​​ថ្ងៃ​​​សុក្រ​​​នោះ​​​ លោក​​​ សម រង្ស៊ី បាន​​​មាន​​​ប្រសាសន៍​​​ថា គណបក្ស​​​ប្រឆាំង​​​​​​នឹង​​​​​​ផ្អាក​​​​​​​ការ​​​​​​​តវ៉ា​​​​​​ជា​​​សាធា​​​រណៈ​​​នៅ​​​ក្នុង​​​ទីក្រុង​​​ភ្នំពេញ​​​​​​ ដើម្បី​​​ទៅ​​​​​​ស្វែង​​​រក​​​ការ​​​​​​គាំទ្រ​​​នៅ​​​តាម​​​ខេត្ត​​​​​​។
លោក​​​ សម រង្ស៊ី បាន​​​មាន​​​ប្រសាសន៍​​​ថា “ឲ្យ​​​តែ​​​នៅ​​​មា​​​ន​​​ការ​​​​​​គាំទ្រ​​​ពី​​ប្រជាជន​ និង​​​មាន​​​ការ​​​គាំទ្រ​​​​​កាន់​​​តែ​​​ច្រើន​​​នោះ យើង​​​មិន​​​ចាំ​​​បាច់​​​​​​ធ្វើ​​​​​​​​​មហា​​​បាតុកម្ម​​​​​​​​​ជា​​​រៀង​​​រាល់​​​ថ្ងៃ​​​ ឬ​​​ជា​​​រៀង​​​រាល់​​​សប្ដាហ៍​​​ទេ។ ឥឡូវ​​​នេះ​​​លោក​​​ កឹម សុខា និង​​​ខ្ញុំ​​​​​​នឹ​​​ងចុះ​​​​​​ទៅ​​​​​​តាម​​​ខេត្ត​​​ ដើម្បីពង្រឹង​​​​​​​​ការ​​​គាំ​​​ទ្រ​​​​​​នៅ​​តាម​​​ជន​​​បទ​​​”។

លោក​​​បាន​​​បន្ត​​​ទៀត​​​ថា “ បន្ទាប់​​​ពី​​​ការ​​​បាញ់​​​នេះ​​​​​​ គណបក្ស​​​ប្រជាជន​​​​បាន​​​បង្ហាញ​​​មុខ​​​ពិត​​​ប្រាកដ​​​​​​របស់​​​​​​ខ្លួន​​​។ អំពើ​​​ហិង្សា​​​​​​នេះ​​​ច​​​ប់​​​​ហើយ​​​ពេល​​​នេះ​​​។ ប្រទេស​​​ផ្ដល់​​​ជំនួយ​​​​​​ដឹង​​​ថា ត្រូវ​​​ធ្វើ​​​អ្វី​​​ហើយ​​​។ យើង​​​មិន​​​អាច​​​​​​បិទ​​​ភ្នែក​​​​​​បាន​​​ទេ​​​។​​យើង​​​មិន​​​អាច​​ទទួល​​​​​​យក​​​លទ្ធិ​​​ប្រជា​ធិប​តេយ្យ​​​ដែល​​​មាន​​​តែ​​​ឈ្មោះ​​​នេះ​​​​​​ទេ​​​​​​”។

លោក​​​ កឹម សុខា បាន​​​មាន​​​ប្រសាសន៍​​​ថា លុះត្រា​​​តែ​​​រដ្ឋាភិបាល​​​របស់​​​គណបក្ស​​​ប្រជា​​​ជន​​​កម្ពុជា​​​​​​ឈប់​​​បំភិតបំភ័យ​​​មេដឹកនាំ​​​គណ​​​បក្ស​​​ប្រឆាំង​​​និង​​​អ្នក​​​គាំទ្រ​​​​របស់​​​ខ្លួន​​​ ​តាម​​​រយៈ​​​ការ​​​​​​​​​ប្រើ​​​អំពើ​​​ហិង្សា​​​និង​​​ការ​​​គំរាម​​​ចាត់​​​វិធាន​​​ការ​​​​​​ផ្លូវ​​​ច្បាប់​​​ ទើប​​​គណបក្ស​​​សង្គ្រោះ​​​ជាតិ​​​​​​ជួប​​​ចរចា​​​​​​បន្ត​​​ទៀត​​​​​​ជាមួយ​​​គណបក្ស​​​​​​កាន់​​​អំណាច​​​។

លោក​​​ កឹម សុខា បាន​​​ថ្លែង​​​​ថា “រដ្ឋា​ភិបាល​​​គណបក្ស​​​ប្រជាជន​​​កម្ពុជា​​​ប្រើ​​​អំពើ​​​ហិង្សា វាយ​ដំ គំរាម​​​កំហែង​​​ និង​​​ប្រើ​​​ប្រព័ន្ធ​​​តុលាការ​​​ឲ្យ​​​ចោទ​​​ប្រកាន់​​​យើង​​​​។​​​ យើង​​​​​​មិន​​​អាច​​​ចូល​​​ចរចា​​​ជា​មួយ​​​ពួក​​​គេ​​​ក្នុង​​​បរិយាកាស​​​មិន​​​ស្មើ​​​ភាព​​​នេះ​​​បាន​​​ទេ​​​។ យើង​​​មិន​​​​​​លេង​​​​​​ជាមួយ​​​ទេ​​​”។ លោក​​​បាន​​​បន្ថែម​​​​​​ថា គណបក្ស​​​សង្គ្រោះ​​​ជាតិ​​​មិន​​​ទទួល​​​ខុស​​​ត្រូវ​​​ចំពោះ​​​ការ​​​ប្រើ​​​អំពើ​​​ហិង្សា​​​របស់​​​បាតុករ​​​​​​នៅ​​​ជិត​​​ផ្លូវ​​​វេង​​​​​​ស្រេង​​​​​​ទេ​​​។

លោក​​​​​​បាន​​​មាន​​​ប្រសាសន៍​​​ថា “យើង​​​មិន​​​ព្រួយបារម្ភអំពីពាក្យ​​​បណ្ដឹង​​​ទេ ពីព្រោះ​​​យើង​​​គ្រាន់​​​តែ​​​ផ្ដល់​​​ជំនួយ​​​មនុស្ស​​​ធម៌​​​​​​ដូច​​​ជា​​​ អាហារ​​​និង​​​ទឹក​​​​​​ទៅ​​ឲ្យ​​​កម្មករ​​​។ យើង​​​មិន​​​បាន​​​ជំរុញ​​​ឲ្យ​​​ពួក​​​គេ​​​ប្រើ​​​អំពើ​​​ហិង្សា​​​ទេ​​​ ដូច្នេះ​​​​​​នេះ​​​មិន​​​មែន​​​ជា​​​បញ្ហា​​​ឡើយ​​​”។

ឧត្តមសេនីយ៍​​​ត្រី​​​ ខេង​​​ ទីតូ អ្នក​​​នាំពាក្យ​​​​​​កង​​​រាជអាវុធ​​​ហត្ថ​​​បាន​​​មាន​​​ប្រសាសន៍​​​ថា កម្លាំង​​​សន្ដិសុខ​​​របស់​​​រដ្ឋ​​​​​​នឹង​​​​​​បន្ត​​​ល្បាត​​​ទីក្រុង​​​​​​ភ្នំពេញ​​​ ដើម្បី​​​ទប់​​​ស្កាត់​​​ការ​​​ធ្វើ​​​បាតុកម្ម​​​ជា​​​សាធារណៈ​​​រហូត​​​ដល់​​​គណបក្ស​​​សង្គ្រោះ​​​ជាតិ​​​​​​អាច​​​ចរចា​​​និង​​​​​​យល់​​​ពី​​​រដ្ឋាភិបាល​​​។ លោក​​​បាន​​​មាន​​​ប្រសាសន៍​​​ថា “កង​​​កម្លាំង​​​ត្រូវ​​​ប្រចាំ​​​ការ​​​​​​ឃ្លាំមើល​​​​​​ស្ថានភាព​​​នៅ​​​តាម​​​កន្លែង​​​នានា​​​​​​ដូច​​​ជា​​​​​​ទីលាន​​​ប្រជាធិបតេយ្យ​​​។ យើង​​​ក៏​​​មាន​​​​​​ក្រុម​​​ចល័ត​​​តាម​​​ម៉ូតូ​​​​​​និង​​​រថយន្ត​​​បើក​​​ត្រឡប់​​​ទៅ​​​ត្រឡប់​​​មក​​​ផង​​​ដែរ​​​”។

លោក​​​បាន​​​មាន​​​ប្រសាសន៍​​​ថា “យើង​​​មិន​​​អាច​​​ប្រាប់​​​​​​បាន​​​ថា​​​ ការ​​​ធ្វើ​​​បែប​​​នេះ​​​នឹង​​​បញ្ចប់​​​​​​នៅ​​​ពេល​​​ណា​​​ទេ​​​។​​​ ស្ថាន​​​ភាព​​​ត្រឡប់​​​ទៅ​​​រក​​​ធម្មតា​​​វិញ​​​ឬ​​​យ៉ាងណា​​​នោះ​​​​​​គឺ​​​អាស្រ័យ​​​លើ​​​អ្នក​​​នយោបាយ​​​។ ប្រសិន​​​បើ​​​ពួក​​​គេ​​​ធ្វើ​​​ឲ្យ​​​ក្ដៅ​​​  វា​​​​​​​​​នឹងក្ដៅ​​​។ ប៉ុន្តែ​​​​​​ប្រសិន​​​បើ​​​ពួក​​​គេ​​​ធ្វើ​​​ឲ្យ​​​ត្រជាក់​​​​​​ វា​​​នឹង​​​ត្រជាក់​​​”៕​​​គឹមហឿន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស