រយៈពេលបីថ្ងៃកន្លងមក ឈ្មោះ សុខ មីន អាយុ ២៧ឆ្នាំ ជាម្ចាស់ហាងកាហ្វេមួយនៅក្នុងខណ្ឌពោធិ៍សែនជ័យដែលរកចំណូលបានពី៥០០ទៅ៦០០ដុល្លារក្នុងមួយខែ។ ពេលនេះគាត់មានតែហាងទទេមួយ ដែលពាសពេញទៅដោយអំបែងកែវ និងសំរាម។
ក្រុមអ្នកតវ៉ាសំដៅហាងរបស់ សុខ មីន នៅលើផ្លូវវ៉េងស្រេងក្នុងសង្កាត់ចោមចៅ កាលពីរសៀលថ្ងៃសុក្រ ជាអ្វីដែលគាត់និងអ្នកក្បែរខាងនិយាយថា ជាការវាយប្រហារលើជនជាតិភាគតិចមួយ។ គាត់ជាជនជាតិវៀតណាម ក៏ប៉ុន្តែ គាត់ដាក់ឈ្មោះខ្មែរ បន្ទាប់ពីមកនៅទីនេះរយៈពេល១០ឆ្នាំមកនេះ។
សុខ មីន និយាយថា “ពួកគេគ្រាន់តែស្វែងរកទីកន្លែងវៀតណាមប៉ុណ្ណោះ។ ពួកគេមិនបានប៉ះពាល់ទីកន្លែងដែលមិនមែនជាជនជាតិវៀតណាមឡើយ”។
នៅពេលដែលក្រុមអ្នកយកព័ត៌មានចុះទៅដល់ហាងនេះកាលពីម្សិលមិញ បុរសក្នុងស្រុកដែលទំនងជាស្រវឹងជោកម្នាក់ កំពុងតែបត់ជើងធំនៅលើកម្រាលឥដ្ឋ។ អំបែងកែវ និងថង់កាហ្វេទទេនៅរាយប៉ាយគ្រប់ទីកន្លែងទាំងអស់ សម្លៀកបំពាក់នារី និងខោអាវទ្រនាប់ត្រូវបានបោះចូលទៅក្នុងបន្ទប់ទឹក និងញាត់ក្នុងបង្គន់។
សុខ មីន បានឲ្យដឹងថា “ពួកគេបានយកអ្វីៗទាំងអស់ រួមមានសម្លៀកបំពាក់ ទូរទស្សន៍ចំនួនបួនគ្រឿង និងម៉ូតូមួយគ្រឿងសរុបប្រហែល៤០.០០០ដុល្លារ។ ពេលនេះខ្ញុំមិនដឹងថា ត្រូវធ្វើអ្វីនោះទេ”។ អ្នកជិតខាងម្នាក់ដែលបានឃើញការវាយប្រហារនេះ ឈ្មោះ តាន់ ឃាង អាយុ៦០ឆ្នាំ បានឲ្យដឹងថា បុរសមួយក្រុមមានគ្នាប្រមាណ១០០នាក់បានដើរបែកចេញពីក្បួនតវ៉ាដ៏ធំនេះ និងបានដើរជាក្បួនចូលទៅក្នុងសង្កាត់បុរីត្រពាំងក្រឡឹង ដោយនិយាយថា ពួកគេនឹងបំផ្លាញហាងវៀតណាមទាំងអស់នៅក្នុងតំបន់នេះ។
សុខ មីន បាននិយាយថា បុគ្គលិកនារីបីនាក់នៅក្នុងហាងនេះ នៅពេលនោះបានលោតតាមបង្អួចជាន់ទីពីរដើម្បីគេចខ្លួន។ អ្នករត់ម៉ូតូឌុបម្នាក់ដែលគ្រាន់តែប្រាប់ថា ឈ្មោះ ថា នោះ ដោយសារភ័យខ្លាចមានការតាមសងសឹក បានឲ្យដឹងថា គាត់បានឃើញការលួចនិងបំផ្លិចបំផ្លាញនេះពីចម្ងាយ ហើយថា ជនដៃដល់ទាំងនោះមិនមែនជាកម្មករធ្វើកូដកម្មទេ។ អ្នករត់ម៉ូតូឌុបរូបនេះបាននិយាយថា “អ្នកដែលបំផ្លាញហាងនេះមិនមែនជាកម្មករកាត់ដេរទេ ពីព្រោះ ខ្លះក្នុងចំណោមពួកគេជិះម៉ូតូ ចំណែកកម្មករដើរជាជួរ ដោយរាំ និងស្រែកទាមទារឲ្យមានការដំឡើងប្រាក់ខែរបស់ខ្លួន”។
លោក យឹម សារ៉ន នាយនគរបាលប៉ុស្តិ៍សង្កាត់ចោមចៅបានអះអាងអំពីហេតុការណ៍លួចនេះ ក៏ប៉ុន្តែ លោកថ្លែងថា លោកមិនច្បាស់នៅឡើយថា តើការវាយប្រហារស្រដៀងគ្នាផ្សេងទៀតបានកើតឡើងក្នុងតំបន់នេះទេ។ លោកបន្តថា “ខ្ញុំកំពុងតែប្រមូលរបាយការណ៍។ ខ្ញុំមិនដឹងថា តើនរណាបង្កហេតុការណ៍នេះនៅឡើយទេ”។
នៅតាមកន្លែងតវ៉ាក្នុងរាជធានីភ្នំពេញ រយៈពេលប៉ុន្មានថ្ងៃចុងក្រោយនេះ មានព្រឹត្តិការណ៍ប្រឆាំងវៀតណាមក្នុងចំណោមបាតុករ ដែលខ្លះក្នុងចំណោមអ្នកតវ៉ានិយាយឥតសំចៃចំអកឲ្យនគរបាល និងកងរាជអាវុធហត្ថដោយស្រែកថា “យួន” ជាពាក្យដែលគេចាត់ទុកថា ជាការប្រមាថដល់ជនជាតិវៀតណាម។
ការប្រឆាំងចំពោះអន្តោប្រវេសន៍ និងផលប្រយោជន៍ជំនួញ គឺជាកម្មវិធីសំខាន់នៃគោលនយោបាយរបស់គណបក្សសង្គ្រោះជាតិក្នុងការបោះឆ្នោតជ្រើសតាំងតំណាងរាស្ត្រ កាលពីក្នុងខែកក្កដា បើទោះជាមេដឹកនាំរបស់គណបក្សនេះបានពោលសង្កត់ថា ខ្លួនមិនបណ្តោយឲ្យមានអំពើហិង្សាប្រឆាំងវៀតណាមនៅក្នុងកម្ពុជាក៏ដោយ។
ទោះជាយ៉ាងណា ឪពុករបស់ សុខ មីន ឈ្មោះ ដូន បា ខាំ បានឲ្យដឹងថា មិត្តភក្តិ និងអ្នកស្គាល់គ្នាជាច្រើនរបស់គាត់បានវិលត្រឡប់ទៅប្រទេសវៀតណាមមួយរយៈដោយសារតែការតវ៉ា។ ហាងវៀតណាមមួយទៀតនៅក្នុងតំបន់នោះដែរ កាលពីម្សិលមិញបិទនៅឡើយចាប់តំាងពីអំពើហិង្សាកាលពីថ្ងៃសុក្រ។
អ្នកក្បែរខាងម្នាក់បាននិយាយអំពីម្ចាស់ហាងដែលបិទនោះថា “គាត់ខ្លាចអ្នកតវ៉ា”៕ ប៊ុននី