កាលពីម្សិលមិញ និងកាលពីថ្ងៃអាទិត្យ នគរបាលមូលដ្ឋានក្នុងខេត្តស្វាយរៀងបានដាក់កុងត្រូលនៅតាមផ្លូវជាតិលេខ១ដើម្បីឃាត់និងឆែកឆេររថយន្តវ៉ែនដែលដឹកកម្មកររោងចក្រកាត់ដេរពីស្រុកកំណើតរបស់ពួកគេមកកាន់រាជធានីភ្នំពេញវិញ។
លោក ហាស់ ណាលី អធិការរងនគរបាល ស្រុកស្វាយទាប បានមានប្រសាសន៍ថា នគរ បាលបានដាក់កុងត្រូលឆែកឆេររថយន្តដឹកកម្មករដើម្បីរកអាវុធ ពីព្រោះពួកគេបារម្ភខ្លាច កម្មករធ្វើការតវ៉ាដើម្បីទាមទារប្រាក់ខែគោលទៀត។
លោកបានមានប្រសាសន៍ថា “យើងមិនហាមឃាត់ពួកគេមិនឲ្យធ្វើដំណើរនោះទេ ប៉ុន្តែ យើងបានឆែកឆេររថយន្តវ៉ែនដែលពួកគេជិះដើម្បីពិនិត្យមើលក្រែងពួកគេមានដឹកអាវុធ”។ លោក ណាលី មានប្រសាសន៍ថា “យើង បារម្ភខ្លាចរថយន្តទាំងនោះដឹកកម្មករមកធ្វើបាតុកម្ម។យើងចង់ស្គាល់ឈ្មោះក្រុមហ៊ុន តួនាទី និងអត្តសញ្ញាណរបស់កម្មករ”។
នៅក្នុងស្រុកស្វាយជ្រុំ ឯណោះវិញ លោក ផាន់ ផាន់ណា អនុប្រធាននគរបាលសណ្តាប់ធ្នាប់សាធារណៈបានមានប្រសាសន៍ថា នគរបាលចរាចរខេត្តក៏បានឃាត់ និងឆែកឆេររថយន្តដឹកកម្មកររោងចក្រកាត់ដេរផងដែរ។ លោក ថោង ចាន់ណា អ្នកស៊ើបអង្កេតនៅអង្គការសិទ្ធិមនុស្សអាដហុក បានមានប្រសាសន៍ថា លោកទទួលបានព័ត៌មានថា កម្មករមួយចំនួនបានត្រឡប់ទៅវិញបន្ទាប់ពីមកដល់ចំណុចកុងត្រូលនោះ ហើយមិនត្រូវបានអនុញ្ញាតឲ្យធ្វើដំណើរមកកាន់រាជធានីភ្នំពេញឡើយ ប៉ុន្តែលោក ណាលី បានបដិសេធរឿងនេះ។
លោក ចាន់ណា បានមានប្រសាសន៍ថា កម្មករភាគច្រើនបានធ្វើដំណើរទៅខេត្តស្វាយរៀងពេលកើតមានអំពើហិង្សា នៅខណ្ឌពោធិ៍សែនជ័យរាជធានីភ្នំពេញកាលពីយប់ថ្ងៃព្រហស្បតិ៍ និងថ្ងៃសុក្រ ប៉ុន្តែ មានបំណងត្រឡប់មកធ្វើការវិញកាលពីម្សិលមិញ។ លោក មឿន តុលា ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា លោកមិនមានព័ត៌មានជាក់លាក់អំពីការឆែកឆេររថយន្តទាំងនោះទេ ប៉ុន្តែ លោកនឹងស៊ើបអង្កេតអំពីសេចក្តីរាយការណ៍នេះ៕ សារុន