នៅពេលដែលរដ្ឋាភិបាលបានបណ្តេញអ្នកតវ៉ាដោយហិង្សាចេញពីទីលានប្រជាធិបតេយ្យកាលពីព្រឹកថ្ងៃសៅរ៍ ដោយប្រើមនុស្សជាង១០០នាក់ប្រដាប់ដោយដំបងដែក និងដំបងឈើនោះ រដ្ឋាភិបាលមិនបានប្រើកងកម្លាំងនគរបាលទេ។
នៅពេលសកម្មជនប្រឆាំងការបណ្តេញចេញមួយក្រុមមានគ្នាប្រាំនាក់ត្រូវបានចាប់អូស និងរុញបញ្ចូលរថយន្តកាលពីព្រឹកម្សិលមិញ ហើយដឹកយកទៅឃុំខ្លួននៅពន្ធនាគារនៅរាជធានីភ្នំពេញនោះ ក៏រដ្ឋាភិបាលមិនបានប្រើកងកម្លាំងនគរបាលដែរ។
ហើយកាលពីខែតុលា នៅពេលដែលនិស្សិត ស្ត្រី និងព្រះសង្ឃត្រូវបានវាយពេលកំពុងធ្វើពិធីរំឭកវិញ្ញាណក្ខន្ធដល់លោក ម៉ៅ សុខចាន់ ជាអ្នកឈរមើលហេតុការណ៍អាយុ២៩ឆ្នាំ ដែលនគរបាលបានបាញ់ស្លាប់នៅជិតស្ពានព្រះមុនីវង្សនោះ អ្នកដែលបានរុញនិងដាល់់មនុស្សទាំងនោះ ក៏មិនមែនជានគរបាលដែរ។
នៅក្នុងករណីទាំងនេះ និងករណីច្រើនទៀត នៅពេលដែលមានអំពើហិង្សាលើរាងកាយនោះ រដ្ឋាភិបាលបានប្រើមនុស្សវ័យក្មេងមួយក្រុមស្លៀកពាក់ឯកសណ្ឋានពណ៌ខៀវពាក់មួកសុវត្ថិភាព និងកាន់ដំបង។
នៅមុនការតវ៉ាប៉ុន្មានខែថ្មីៗនេះដែលបានកើនឡើងកាន់តែខ្លាំង បន្ទាប់ពីការបោះឆ្នោតដ៏ចម្រូងចម្រាសកាលពីខែកក្កដានោះ សន្តិសុខខណ្ឌដូនពេញដែលមានឯកសណ្ឋាន ពណ៌ខៀវត្រូវបានគេប្រើឲ្យដេញមនុស្សចេញពីវាលស្មៅនៅតាមមាត់ទន្លេ និងរារាំងអ្នកលក់ដូរនៅតាមផ្លូវមិនឲ្យបិទផ្លូវ។
ឥឡូវនេះ ពួកគេធ្វើជាអង្គភាពពិសេសនៅតាមផ្លូវ ត្រូវបានដឹកយកទៅបង្ក្រាបបាតុកម្មដោយហិង្សា បំភិតបំភ័យប្រជាពលរដ្ឋ ហើយកាលពីម្សិលមិញបានចាប់ទាញស្ត្រីជាសកម្មជនប្រាំនាក់ចេញពីមហាវិថីព្រះមុនីវង្ស។ ទោះបីជាគោលបំណងផ្លូវការរបស់សន្តិសុខខណ្ឌ គឺដើម្បីកាត់បន្ថយបទល្មើសនៅតាមសហគមន៍នៅទីក្រុងភ្នំពេញក៏ដោយ ក៏ពួកគេបានក្លាយទៅជាមនុស្សគួរឲ្យភ័យខ្លាច។
លោក ចាន់ សុវ៉េត ប្រធានផ្នែកស៊ើបអង្កេតនៅអង្គការអាដហុកបានមានប្រសាសន៍ ថា “ត្រូវតែមានការសើុបអង្កេតលើការប្រើសន្តិសុខខណ្ឌឲ្យវាយប្រជាជននេះ ហើយត្រូវនាំពួកគេទៅផ្តន្ទាទោស។ ពួកគេមិនមានការបណ្តុះបណ្តាលត្រឹមត្រូវផ្នែកច្បាប់ទេ ដូច្នេះហើយពួកគេគ្មានអំណាចផ្លូវច្បាប់ឲ្យអនុវត្តវិធានការបែបនេះទេ”។
លោកមេធាវី សុក សំអឿន ប្រធានគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា បានមានប្រសាសន៍ថា ទោះជាពួកគេស្លៀកពាក់ឯកសណ្ឋាន កាន់ដំបង និងអនុវត្តការងារនៅក្រោមការគ្រប់គ្រងពេញលេញពីរដ្ឋាភិបាលក៏ដោយ ក៏សន្តិសុខខណ្ឌ មិនមែនជាមន្ត្រីច្បាប់ដែរ។ លោក សុក សំអឿន បានមានប្រសាសន៍ថា “ពួកគេគិតថា ប្រសិនបើពួកគេបង្កើតកងកម្លាំងនេះ និងមានការអនុម័តយល់ព្រមពីរដ្ឋាភិបាល វាគឺជាកងកម្លាំងផ្លូវការ។ ប៉ុន្តែ តាមទស្សនច្បាប់ គ្មានច្បាប់ណាមួយផ្តល់អំណាចឲ្យពួកគេឡើយ”។
លោក សុខ ពេញវុធ អភិបាលរងខណ្ឌដូនពេញបានបដិសេធមិនធ្វើអត្ថាធិប្បាយអំពីសកម្មភាពរបស់សន្តិសុខខណ្ឌទេ រីឯអ្នកនាំពាក្យសាលារាជធានីភ្នំពេញលោក ឡុង ឌីម៉ង់ បានបដិសេធថា សាលារាជធានីមិនបានគ្រប់គ្រងសន្តិសុខទាំងនោះទេ និងបដិសេធថា ពួកគេមិនដែលប្រព្រឹត្តអំពើហិង្សាក្រៅប្រព័ន្ធតុលាការទេ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានមានប្រសាសន៍ថា “មនុស្ស ទាំងនេះប្រហែលជាពេញចិត្តធ្វើការងារមិនល្អនេះជាង”។ លោកបានមានប្រសាសន៍ថា មន្ត្រីនគរបាលពិតប្រាកដ “ មិនចង់ធ្វើការងារពិបាកមួយចំនួនទេ” ។ លោកបានបន្ថែមថា តាមរយៈការប្រើប្រាស់សន្តិសុខខណ្ឌ រដ្ឋាភិបាលក៏បានសន្សំសំចៃលុយដែរ ពីព្រោះពួកគេមានប្រាក់ខែតិចជាងនគរបាល។
លោក ខាលីល ថៃយ័រ អ្នកជំនាញផ្នែកសន្តិសុខប្រចាំអាស៊ីអាគ្នេយ៍នៅបណ្ឌិត្យសភា កងកម្លាំងការពារជាតិអូស្ត្រាលីបានមានប្រសាសន៍ថា ការប្រគល់ការងារដ៏ចម្រូងចម្រាសរបស់ខ្លួនទៅឲ្យសន្តិសុខ និងជនសីុវិលជំនួសឲ្យកងកម្លាំងសន្តិសុខផ្លូវការរបស់រដ្ឋនោះ រដ្ឋាភិបាលនៅតែបដិសេធថា មិនបានដឹង។
លោក ថៃយ័រ បានមានប្រសាសន៍ថា រដ្ឋាភិបាលប៉ុនប៉ងគេចចេញពីការបន្ទោសដោយផ្ទាល់ចំពោះទង្វើដែលអាចបណ្តាលឲ្យមានប្រតិកម្មពីប្រជាជនប្រឆាំងស្ថាប័នរដ្ឋ។ លោកបានមានប្រសាសន៍ថា “ រដ្ឋាភិបាលធ្វើឲ្យបញ្ហានេះមិនច្បាស់លាស់” ។ លោកមានប្រសាសន៍ថា “រដ្ឋាភិបាលមិនអាច ឆបោកអ្នកដទៃអំពីអ្នកបញ្ជាបាន ទេ។ ប៉ុន្តែ រដ្ឋាភិបាលធ្វើឲ្យមានភាពមិនច្បាស់លាស់ចំពោះកងកម្លាំងបំពេញការងារ និងរារាំងមិនឲ្យគេថតរូបនគរបាលវាយបាតុករ”។ សូម្បីតែមន្ត្រីនគរបាល និងកងរាជអាវុធហត្ថជាន់ខ្ពស់ក៏មិនដឹងថា មានការប្រើអំពើហិង្សាពីសន្តិសុខទាំងនេះដែរ។
លោក ម៉ក់ ជីតូ ស្នងការស្តីទីនគរបាលរាជធានីភ្នំពេញដែលបានទទួលស្គាល់ថា នគរបាលសហការជាមួយសន្តិសុខទាំងនេះបានមានប្រសាសន៍ថា “ ពួកគេមិនត្រឹមត្រូវទេនៅពេលដែលពួកគេវាយមនុស្ស។ ប៉ុន្តែ វាជារឿងតូចតាច ដូច្នេះយើងបិទភ្នែកខ្លះទៅ”។ លោក ខេង ទីតូ អ្នកនាំពាក្យកងរាជអាវុធហត្ថបានមានប្រសាសន៍ថា លោកក៏មិនដឹងថា សកម្មភាពរបស់សន្តិសុខខណ្ឌត្រឹមត្រូវតាមច្បាប់ ឬអត់ដែរ។
លោកឧត្តមសេនីយ៍ត្រី ខេង ទីតូ បានមានប្រសាសន៍អំពីការដែលសន្តិសុខខណ្ឌវាយអ្នកតវ៉ាមកពីតំបន់បឹងកក់កាលពីខែតុលា និងវាយបាតុករគណបក្សសង្គ្រោះជាតិនៅទីលានប្រជាធិបតេយ្យនៅចុងសប្តាហ៍នេះថា “យើងមិនដឹងច្បាស់ថា តើវាត្រឹមត្រូវ ឬមិនត្រឹមត្រូវតាមច្បាប់នោះទេ”។ លោកបានមានប្រសាសន៍ថា “ ប្រសិនបើមានការបង្កឲ្យមានស្នាមរបួស ជនរងគ្រោះអាចដាក់ពាក្យប្តឹងពួកគេទៅតុលាការបាន។ ប៉ុន្តែ ជួនកាលយើងចាត់ទុកពួកគេថា ជាមន្ត្រីមានសមត្ថកិច្ចដូចយើងដែរ ដូច្នេះយើងមិនរារាំងពួកគេទេ”។
ទោះជាយ៉ាងណា លោកស្រី ណាលី ពីឡូក ប្រធានអង្គការលីកាដូ បានមានប្រសាន៍ថា ការប្រើសន្តិសុខនៅក្នុងបរិបទបែបនេះមិនត្រឹមត្រូវតាមច្បាប់ទាល់តែសោះ។ លោកស្រីបានមានប្រសាសន៍ថា ច្បាប់ចែងថា មានតែនគរបាល កងរាជអាវុធហត្ថ និងតុលាការទេដែលមានអំណាចចាប់ខ្លួនជនស៊ីវិល។
លោកស្រី ពីឡូក បានមានប្រសាសន៍ថា “សន្តិសុខ និងជនស៊ីវិល ពួកគេគ្មានអំណាចចាប់ខ្លួន ឃាត់ខ្លួន ឬចាត់វិធានការផ្លូវច្បាប់ណាមួយឡើយ”៕គឹមហឿន