37 C
Phnom Penh

ម្ចាស់​ហាង​វៀតណាម​​ព្រួយ​បារម្ភ​ព្រោះ​ខ្លាច​ហាង​របស់​ខ្លួន​ក្លាយ​ជា​គោ​ដៅ​នៃ​ការ​ប្រើ​អំពើហិង្សា​របស់​អ្នក​តវ៉ា

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​ អ្នក​គ្រប់​គ្រង​និង​ម្ចាស់​ហាង​វៀតណាម​មួយ​ចំនួន​ក្នុង​រាជធានី​ភ្នំ​ពេញ​បាន​ឲ្យ​ដឹង​ថា ពួក​គេ​កំពុង​តែ​ព្រួយ​បារម្ភ​​ខ្លាច​ក្រែង​ហាង​របស់​ខ្លួន​ក្លាយ​ជា​គោល​ដៅ​នៃ​ការ​ប្រើ​អំពើ​ហិង្សា​របស់​អ្នក​តវ៉ា​ដែល​សុទ​​្ធ​តែ​មាន​អារម្មណ៍​ស្អប់​ជន​ជាតិ​វៀត​ណាម​នោះ​ ប៉ុន្តែ​ពួក​េគបាន​លើក​ឡើង​ថា ខ្លួន​នៅ​តែ​បន្ត​បើក​ហាង​របស់​ខ្លួន​ជា​ធម្មតា​ក្នុង​ពេល​បច្ចុប្បន្ន។

អ្នក​ស្រី​ អ៊ុយ​ ធារី​ អ្នក​គ្រប់​គ្រង​ហាង​មួយ​ឈ្មោះ​ថា គឹម​ លាន ដែល​បាន​បើក​កាល​ពី​ែខ​តុលា​  ហើយ​លក់​ទំនិញ​ដែល​នាំ​ចូល​ពី​ប្រទេស​​​វៀតណាម​នៅ​តាម​បណ្តោយ​​​ផ្លូវ​លេខ​៩០​ បាន​និយាយថា “ ខ្ញុំ​ព្រួយ​បារម្ភ​ ប៉ុន្តែ​ខ្ញុំ​នៅ​តែ​បើក​លក់​ជា​ធម្មតា”។

អ្នក​ស្រី​បាន​បន្ថែម​ថា “ អំឡុង​ការ​តវ៉ា​កាល​ពី​សប្តាហ៍មុន​ ខ្ញុំ​បាន​បិទ​ហាង​របស់​ខ្ញុំ​មួយ​ថ្ងៃ​ ព្រោះ​ខ្ញុំ​ខ្លាច​អ្នក​តវ៉ា​មួយ​ចំនួន​មក​វាយ​កម្ទេច​ហាង​របស់​ខ្ញុំ​”។

អ្នក​ស្រី​​ ធារី​ អាយុ​៤១​ឆ្នាំ​ បាន​លើក​ឡើង​​​ថា អ្នក​ស្រី​នឹង​នៅ​តែ​បើក​ហាង​របស់​ខ្លួន​ប្រសិន​បើ​អ្នក​តវ៉ា​មិន​ធ្វើ​ដំណើរ​មក​ជិត​ហាង​របស់​អ្នក​ស្រី​ឬ​ក៏​មិន​មាន​អំពើ​ហិង្សា​ទៀត​។

អ្នក​ស្រី​បាន​និយាយ​ថា “ ប្រសិន​បើ​ការ​តវ៉ា​រីក​កាន់​តែ​ធំ​ ខ្ញុំ​នឹង​បិទ​ហាង​របស់​ខ្ញុំ​”។ គួរ​រំឭកថា អ្នក​ស្រី​ ធារី​ បាន​ចាក​ចេញ​ពី​ប្រទេស​​​វៀត​ណាម​មក​ប្រទេស​កម្ពុជា​អស់​រយៈពេល​​​ប្រហែល​១២​ឆ្នាំ​កន្លង​មក​ហើយ​ ប៉ុន្តែ​អ្នក​ស្រី​បាន​បដិសេធ​មិន​ប្រាប់​ឈ្មោះ វៀត​ណាម​​​របស​់​អ្នក​ស្រី​ឡើយ។

នៅ​ក្នុង​ប៉ុន្មាន​សប្តាហ៍​ថ្មីៗ​នេះ​ ការ​តវ៉ា​ប្រឆាំង​ជន​ជាតិ​វៀត​ណាម​មាន​ការ​កើន​ឡើង​​នៅ​ក្នុង​ចំណោម​អ្នក​តវ៉ាដែល​គាំទ្រ​គណបក្ស​ប្រឆាំង​និង​កម្មករ​កាត់​ដេរ​ដែល​បាន​ធ្វើ​កូដ​កម្ម​ទូ​ទាំង​រាជ​ធានី​ភ្នំពេញ​។ គណបក្ស​សង្គ្រោះ​​ ​ជាតិ​បាន​ប្រឆាំង​ជន​អន្តោ​ប្រវេសន៍​​​វៀត​ណាម​ដែល​គ្មាន​លិខិត​បញ្ជាក់​ច្បាស់​លាស់​ ហើយ​បាន​ចោទ​ប្រកាន់​គណ​បក្ស​ប្រជា​ជន​កម្ពុជា​ថា មិន​យក​ចិត្ត​ទុកដាក់​នឹង​បញ្ហានេះ​។

កាល​ពី​ថ្ងៃ​សុក្រ​ នៅ​ពេល​អ្នក​តវ៉ា​ចំនួន​ប្រាំ​នាក់​ត្រូវ​បាន​បាញ់​សម្លាប់​និង​ជាង​៤០​ផ្សេង​ទៀត​រង​របួស​ដោយ​ការ​បាញ់​ប្រហារ​ពី​សំណាក់​កង​រាជ​អាវុធ​ហត្ថ​នៅ​តាម​បណ្តោយ​​​ផ្លូវ​វ៉េង​ស្រេង​នោះ​ ក្រោយ​មក​មាន​អ្នក​តវ៉ា​ដាច់​ដោយ​ឡែក​មួយក្រុមផ្សេង​ទៀត​​បាន​វាយ​កម្ទេច​ហាង​កាហ្វេ​វៀតណាម​យ៉ាង​តិច​មួយ​កន្លែង​នៅ​ក្នុង​តំបន់​នោះ​។

លោក​ សុខ​ មីន​ អាយុ​២៧​ឆ្នាំ​ជា​ម្ចាស់​ហាង​កាហ្វេ​នេះ​បាន​​និយាយ​ថា ការ​វាយ​កម្ទេច​​​​ហាង​របស់​ខ្លួន​គឺ​មាន​ជាប់​ពាក់​ព័ន្ធ​នឹង​ការ​ស្អប់​ខ្ពើម​ពូជ​សាសន៍​ ព្រោះ​រូប​គេ​ជា​ជន​ជាតិ​វៀត​ណាម​​ ម្ចាស់​ហាង​ជន​ជាតិ​វៀតណាម​រូបនេះ​ក៏បាន​លើក​ឡើង​ដែរ​ថា​ ក្រុម​អ្នក​តវ៉ា​​មិន​វាយកម្ទេច​ហាង​ណា​ដែល​មិន​មែន​ជា​របស់​ជន​ជាតិ​វៀត​ណាម​ឡើយ​​។

ម្ចាស់​ហាង​វៀត​ណាម​នៅ​ផ្សារ​កណ្តាល​ក្នុង​រាជធានី​ភ្នំពេញ ជា​ទីកន្លែង​ដែល​មាន​ហាង​វៀត​ណាម​យ៉ាង​ច្រើន​នោះ​មិន​សូវ​ជា​មាន​ការ​ព្រួយ​បារម្ភ​ទេ​កាល​ពី​ម្សិល​មិញ​។

ម្ចាស់​ហាង​ធ្វើ​សក់​មួយស្ថិត​​នៅ​ផ្សារ​កណ្តាល​ឈ្មោះ​ សុខ​ ចិន្តា​ អាយុ​២៧​ឆ្នាំ​បាន​និយាយ​ថា​ “ យើង​នឹង​នៅ​តែ​បន្ត​បើក​ហាង​របស់​យើង​ជា​ធម្មតា​ទោះ​បី​ជា​អ្វី​បាន​កើត​ឡើង​នៅ​ក្នុង​ប្រទេស​ក៏​ដោយ​។ ខ្ញុំ​ដឹង​អំពី​ការ​តវ៉ា ​ហើយ​ខ្ញុំ​ដឹង​ថា ការ​តវ៉ានេះ​បាន​បន្ត​ជា​រៀង​រាល់​ថ្ងៃ​”។

ម្ចាស់ហាង​ម្នាក់​ទៀត​ដែល​បដិសេធ​មិន​ប្រាប់​ឈ្មោះ​របស់​ខ្លួន​ព្រោះ​ខ្លាច​មាន​ការ​សងសឹក​បាន​និយាយ​ថា​ “ ខ្ញុំ​ព្រួយ​បារម្ភ​អំពី​ការ​តវ៉ា​ ប៉ុន្តែ​នេះ​ជា​រឿង​ធម្មតា​។ ខ្ញុំ​ត្រូវ​តែ​បន្តធ្វើ​ការ​ដើម្បី​រស់​”៕ ស៊ុយ​ឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស