យោងតាមរបាយការណ៍ថ្មីរបស់សហអ្នកនិពន្ធស្តីអំពីការជក់បារីដែលត្រូវបានចុះផ្សាយ ក្នុងព្រឹត្តិប័ត្រសហគមវេជ្ជសាស្ត្រអាមេរិក (Journal of the American Medical Association) នៅថ្ងៃនេះគឺបានឲ្យដឹងថា រដ្ឋាភិបាលកម្ពុជាត្រូវតែចាត់វិធានការក្នុងពេលនេះ ដើម្បីចៀសវាងកុំឲ្យកើតមានការស្លាប់យ៉ាងច្រើនដោយសារថ្នាំជក់នៅប៉ុន្មានឆ្នាំខាងមុខ។
ការសិក្សាស្រាវជ្រាវមួយដែលមានចំណងជើងថា ‘ ការជក់បារីនៅក្នុងប្រទេសចំនួន១៨៧ ចាប់ពីឆ្នាំ១៩៨០ដល់ឆ្នាំ២០១២’ ត្រូវបានធ្វើឡើងសម្រាប់វិទ្យាស្ថានសុខាភិបាលមួយឈ្មោះថា Health Metrics and Evaluation នៅសាកលវិទ្យាល័យវ៉ាស៊ីនតោន (University of Washington)។ ការសិក្សានេះរកឃើញថា ការជក់បារីបានសម្លាប់បុរសកម្ពុជាចំនួន៩.០០០ នាក់ជារៀងរាល់ឆ្នាំ។
កាលពីថ្ងៃច័ន្ទ លោក អាឡេន ឡូប៉េស (Alan Lopez) សហអ្នកនិពន្ធនិងជាសាស្ត្រាចារ្យនៅសាកលវិទ្យាល័យម៉េលប៊ន (University of Melbourne) បានឲ្យដឹងថា ក្នុងឆ្នាំ២០១២ មានបុរសកម្ពុជាចំនួន៤២,១ភាគរយបានជក់បារីរៀងរាល់ថ្ងៃជាប្រចាំពោលគឺមានអាត្រាខ្ពស់ជាងគេទី៤នៅក្នុងតំបន់ រីឯស្ត្រីកម្ពុជាដែលជក់បារីវិញមានត្រឹមតែ៤ភាគរយប៉ុណ្ណោះ ជាភាគរយដែលទាបជាងគេបំផុតមួយនៅក្នុងតំបន់និងជាភាគរយដែលលោក ឡូប៉េស ចាត់ទុកថា វាជាស្ថានភាពធម្មតាមួយនៅក្នុងតំបន់អាស៊ីអាគ្នេយ៍។
ចំនួននៃអ្នកជក់បារីដែលជាបុរសនៅក្នុងប្រទេសកម្ពុជា “ គឺជាចំនួនមួយដ៏អាក្រក់បំផុតនៅក្នុងតំបន់ ហេតុដូច្នេះរដ្ឋាភិបាលកម្ពុជាគួរតែចាត់ទុកថា ចំនួននេះជាចំនួនដ៏ធ្ងន់ធ្ងរ។ ហើយបើយោងតាមការព្យាករថ្នាំជក់នឹងសម្លាប់អ្នកជក់បារីដែលជាបុរសចំនួន៥០ភាគរយនាពេលអនាគត”។
លោក ឡូប៉េស បានលើកឡើងថា មនុស្សមិនទាន់ពេញវ័យចំនួន៧ភាគរយនៅក្នុងប្រទេសកម្ពុជាបានជក់បារី ហើយជំងឺដែលកើតឡើងដោយសារការជក់បារីដូចជា មហារីក និងជំងឺសួតជាដើម នឹងជាបន្ទុកដ៏ធ្ងន់ធ្ងរមួយធ្លាក់លើវិស័យសុខាភិបាល។ លោកបានថ្លែងថា “ ហេតុដូច្នេះរដ្ឋាភិបាល គួរតែព្រួយបារម្ភបំផុត ព្រោះអ្នកជក់បារីជាបុរសនឹងស្លាប់យា៉ងច្រើនដោយសារថ្នាំជក់នៅប៉ុន្នានឆ្នាំខាងមុខ។ ហើយនេះគឺជារឿងមួយដែលអ្នកជក់បារីជាបុរសចាត់ទុកជាបញ្ហាធ្ងន់ធ្ងរ”។
លោកបានឲ្យដឹងថា ជំហានដំបូងដើម្បីទប់ស្កាត់បញ្ហានេះ គឺត្រូវតដំឡើងតម្លៃបារីទ្វេដងឬបីដង។ លោកមានប្រសាសន៍ថា “ ប្រសិនបើយើងដំឡើងតម្លៃបារី យើងនឹងអាចធ្វើឲ្យការជក់បារីមានការធ្លាក់ចុះយ៉ាងខ្លាំង។ហើយវិធីសាស្ត្រផ្សេងមួយទៀត គឺត្រូវហាមមិនឲ្យមានការផ្សព្វផ្សាយបារី ទោះបីជាក្រោមរូបភាពណាក៏ដោយ។ បញ្ឈប់ការផ្សព្វផ្សាយអំពីការប្រើប្រាស់ថ្នាំជក់។ចាប់ផ្តើមបង្កើតកម្មវិធីអំពីផលប៉ះពាល់នៃការជក់បារីនៅតាមសាលារៀន រីឯនៅលើកញ្ចប់បារីវិញ គឺមិនត្រូវប្រើពាក្យណាដែលជំរុញឲ្យមានការជក់បារីឡើយ”។
លោកបានព្យាករថា ពលរដ្ឋខ្មែរប្រហែល១,២លាននាក់នឹងស្លាប់ដោយសារការជក់បារីនៅរយៈពេល៣០ឆ្នាំទៅ៥០ឆ្នាំខាងមុខ ហើយពាក់កណ្តាលនៃតួលេខនេះគឺមនុស្សវ័យកណ្តាល ហេតុដូច្នេះដើម្បីចៀសវាងការស្លាប់យ៉ាងច្រើននេះ រដ្ឋាភិបាលត្រូវតែចាត់វិធាន ការប្រឆាំងការជក់បារីបន្ថែម៕ ស៊ុយឈាង