30 C
Phnom Penh

​មាន​ភាព​ខុស​គ្នា​រវាង​តួលេខ​អ្នក​តវ៉ា​ដែលកង​រាជ​អាវុធហត្ថ​បាញ់សម្លាប់​នៅ​ផ្លូវវេងស្រេង

ដោយ ឌឹ ខេមបូឌា ដេលី

បទវិភាគ

លោក​ សម រង្ស៊ី ប្រធានគណបក្ស​សង្គ្រោះ​ជាតិ​​បាន​មាន​ប្រសាសន៍​កាល​ពី​ម្សិល​មិញ​ថា គណបក្ស​សង្គ្រោះជាតិ​​បាន​រាប់​ចំនួន​កម្មករ​រោងចក្រ​កាត់​ដេរ​ ដែល​កង​រាជអាវុធ​ហត្ថ​បាន​បាញ់​សម្លាប់​អំឡុង​ការ​តវ៉ា​កាល​ពី​ថ្ងៃ​សុក្រ​សប្ដាហ៍​មុន​នៅ​ក្នុង​រាជ​ធានីភ្នំពេញ​ថា មាន​ប្រាំមួយ​នាក់​។

តួលេខ​នេះ​គឺ​​ខ្ពស់​ជាង​​តួលេខ​ ដែល​បុគ្គ​លិក​មន្ទីរពេទ្យ​ចំនួន​បី​នៅ​ក្នុង​រាជ​ធានីភ្នំពេញ​បាន​រាយការណ៍​ប្រាប់​អ្នក​កាសែត​កាល​ពី​ថ្ងៃអង្គារ​​ថា​មាន​ប្រាំនាក់​ គឺ​ខ្ពស់​ជាង​ម្នាក់​ហើយតួ​លេខ​​ជន​រងគ្រោះវិញ គឺ​ខ្ពស់​ជាង​តួលេខ​ដែលប្រមូលដោយ​អង្គការ​សិទ្ធិ​មនុស្ស​ក្នុង​ស្រុក​លីកាដូ​​ គឺ​ខ្ពស់​ជាង​ពីរ​នាក់​។
លោក​ សម រង្ស៊ី បានចេញ​ផ្សាយ​បញ្ជី​ឈ្មោះ​អ្នក​ស្លាប់​ទាំង​ប្រាំមួយ​នាក់​​នៅ​ក្នុង​គេហ​ទំព័រ​ហ្វេសបុ៊ក​របស់​លោក​កាល​ពី​ម្សិល​មិញ​ ដោយ​បន្ថែម​ឈ្មោះ​ ខេង កុសល​ អាយុ​២៣​ឆ្នាំ​ ទៅក្នុង​បញ្ជី​ឈ្មោះ​អ្នក​ដែល​​កង
រាជ​​​អាវុធ​ហត្ថ​បាញ់សម្លាប់​ ដែល​គណបក្ស​សង្គ្រោះ​​​ជាតិ​បាន​ចង​ក្រង​កាល​​ពី​ថ្ងៃអាទិត្យ​។

ឈ្មោះ​និង​អាយុ​របស់​អ្នក​ស្លាប់​មួយ​ចំនួន​ ​ក្នុង​ចំណោម​អ្នក​ស្លាប់​ទាំង​នោះ​​ត្រូវ​បាន​រៀប​រាប់​ខុស​គ្នា​ ហើយ​ឈ្មោះ​ក៏សរសេរ​ខុស​គ្នាដែរ។

កាល​ពី​ថ្ងៃ​អាទិត្យ​ គណបក្ស​សង្គ្រោះ​ជាតិ​​បាន​លើក​ឡើង​ថា គឹម ផល្លី អាយុ​២៩​ឆ្នាំ​ យាន រិទ្ធី អាយុ​២៦​ឆ្នាំ​ ស្រេង​ វិបុល​ អាយុ​២២​​ឆ្នាំ​ និង​ អ៊ុក ភក្ត្រ អាយុ​២៣​ឆ្នាំ​ ត្រូវ​បាន​បញ្ជាក់​ថា ស្លាប់​នៅ​មន្ទីរពេទ្យ​មិត្ត​ភាព​ខ្មែរ-សូវៀត​ ហើយ​ថា សំ រ៉ាវី អាយុ​២៦​ឆ្នាំ​ត្រូវ​បាន​​បញ្ជាក់​ថា ស្លាប់​នៅ​មន្ទីរពេទ្យ​កាល់ម៉ែត។

លោក​ ឈឹង យ៉ាវយ៉ែន អនុប្រធាន​មន្ទីរ​ពេទ្យ​​មិត្តភាព​ខ្មែរ-សូវៀត​បាន​មាន​ប្រសា​សន៍​កាលពី​ថ្ងៃ​អង្គារ​ថា អ្នក​តវ៉ា​បួន​នាក់​ដែល​បញ្ជូន​មក​ពី​កន្លែង​តវ៉ានៅ​​ផ្លូវ​វេង​ស្រេង​បាន​ស្លាប់​នៅ​មន្ទីរពេទ្យ​របស់​លោក​ ចំណែក​ឯ​បុគ្គលិក​នៅ​មន្ទីរពេទ្យ​កាល់​ម៉ែតវិញ​ បាន​បញ្ជាក់​ថា មាន​អ្នក​តវ៉ា​ស្លាប់​ម្នាក់​ទៀត​។

លោក​ស្រី ណាលី ពីឡូក ប្រធាន​អង្គ​ការ​លីកាដូ​បាន​មាន​ប្រសាសន៍​ថា មាន​មនុស្ស​តែ​បួននាក់​ប៉ុណ្ណោះ​ត្រូវ​បាន​​ក្រុម​របស់​លោក​ស្រី​ដែលមាន​គ្នា​ពីរ​នាក់​​ត្រូវ​បាន​ចាត់​តាំង​ឲ្យ​ទៅ​ស៊ើប​អង្កេត​អំពី​ការ​ស្លាប់​របស់​អ្នក​តវ៉ា​ដែលគេ​បាន​រាយការណ៍នៅ​មន្ទីរ​ពេទ្យ​ក្នុង​រាជ​ធានី​ភ្នំពេញ​នោះ​បាន​​បញ្ជាក់​ថា ស្លាប់។

លោក​ស្រីបាន​ថ្លែង​​ថា “ យើង​មាន​វេជ្ជ​បណ្ឌិត​ពីរ​រូបប្រចាំ​​នៅ​​មន្ទីរពេទ្យ​ទាំង​បី​ គឺ​មន្ទីរ​ពេទ្យ​កាល់ម៉ែត​ មន្ទីរពេទ្យ​មិត្តភាព​ខ្មែរ​-សូវៀត​ និង​មន្ទីរពេទ្យ​ព្រះ​កុសុមៈ​ ហើយ​យើង​បាន​ថត​រូប​និង​បាន​និយាយ​ជាមួយ​វេជ្ជ​បណ្ឌិត​និង​សាច់​ញាតិ​ជន​រងគ្រោះ​។ យើង​អាច​បញ្ជាក់​ថា មាន​អ្ន​ក​ស្លាប់​តែ​បួន​នាក់​ប៉ុណ្ណោះ​”។

លោកស្រី ណាលី ពីឡូក​ ​មាន​ប្រសាសន៍​​ថា វេជ្ជបណ្ឌិត​​របស់​អង្គ​ការ​សិទ្ធិ​មនុស្ស​លីកាដូ​បាន​បញ្ជាក់​ថា ផេង​ កុសល​ អាយុ​២៤​ឆ្នាំ​ យា​ន រិទ្ធី​ អាយុ​២៤​ឆ្នាំ​ និង​ គឹម ផូលីន អាយុ​២៩​ឆ្នាំ​ ក៏​ត្រូវ​បាន​កត់​ត្រា​ថា ស្លាប់​នៅ​មន្ទីរពេទ្យ​មិត្តភាព​ខ្មែរ​-សូវៀត​ ផង​ដែរ ព្រម​ទាំង​ កង​ រ៉ាវ អាយុ​២៥​ឆ្នាំ​ ត្រូវ​បាន​កត់​ត្រា​ថា ស្លាប់​នៅ​មន្ទីរ​ពេទ្យ​កាល់ម៉ែត​។

លោក​ស្រី​បាន​បន្ថែម​ថា លោក​ស្រី​មិន​ជឿថា អ្នក​ផ្សេង​ទៀត​​មាន​ ស្រេង​ វិបុល​ ឬ ខេង​ កុសល ដែល​​មានឈ្មោះ​នៅ​ក្នុង​បញ្ជី​របស់​គណបក្ស​សង្គ្រោះ​ជាតិ​នោះ​​ត្រូវ​បាន​កត់​ត្រា​ថា ស្លាប់​នៅ​មន្ទីរ​ពេទ្យ​​ឡើយ ប៉ុន្តែ​លោក​ស្រី​បាន​មាន​ប្រសា​សន៍​ថា វា​អាច​ថា ពួក​គេ​បាន​ស្លាប់​ ហើយ​មិន​ត្រូវ​បាន​ដឹក​ទៅ​កាន់​មន្ទីរពេទ្យ​។

លោក​ស្រី​បាន​មាន​ប្រសាសន៍​ថា លោក​ យ៉ាវយ៉ែន បាន​ប្រាប់​បុគ្គលិក​អង្គ​ការ​លីកាដូ​កាលពី​ល្ងាច​ម្សិលមិញ​ថា តាម​ពិត​មាន​អ្នក​តវ៉ា​តែ​បី​នាក់​ប៉ុណ្ណោះ​​ត្រូវ​បាន​កត់​ត្រា​ថា បាន​ស្លាប់​នៅ​មន្ទីរពេទ្យ​មិត្ត​ភាព​ខ្មែរ​-សូវៀត​នោះ។
គេ​មិន​អាច​ទាក់ទង​លោក​ យ៉ាវយ៉ែន ដើម្បីសុំការ​​បញ្ជាក់​ពី​តួលេខ​នេះ​បាន​ទេ។

លោក​ ចាន់ សុវ៉េត អ្នក​ស៊ើប​អង្កេត​ជាន់​ខ្ពស់​នៅ​អង្គការ​សិទ្ធិ​មនុស្ស​អាដហុក​បាន​មាន​ប្រសាសន៍​ថា អង្គការ​របស់​លោក​នៅ​តែ​កត​់​ត្រា​ថា មាន​អ្នកស្លាប់​ប្រាំនាក់​ដដែល​។ លោក​​បាន​បន្ថែម​ថា លោក​ដឹង​ពី​តួ​លេខ​ថា មាន​ប្រាំមួយ​នាក់​នេះ​ពី​លោក​ សម រង្ស៊ី ប៉ុន្តែ​លោក​មិន​​ជឿថា មាន​អ្នក​តវ៉ា​ទី​៦​ស្លាប់​នោះ​ទេ​។

លោក​ សម​ រង្ស៊ី បាន​មាន​ប្រសាសន៍​ថា ការ​ខុស​គ្នា​ពី​តួលេខនេះ​អាច​មក​ពី​វិធី​ស៊ើប​អង្កេត​ខុស​គ្នា​។ប្រធានគណបក្ស​ប្រឆាំង​រូប​នេះ​បាន​មាន​ប្រសាសន៍​ថា “ មានអ្នកស្លាប់​ម្នាក់​​មិន​​ត្រូវ​បាន​រាប់​បញ្ចូល​…ដែល​សាកសព​ត្រូវ​​បាន​បញ្ជូន​ទៅ​ស្រុក​កំណើត​របស់​ខ្លួន​នោះ​។ ពួក​គេ​[អង្គការ​សិទ្ធិ​មនុស្ស​ក្នុង​ស្រុក​បាន​រាប់​ចំនួន​សាកសព​តែនៅ​តាម​សាល​តម្កល់​សព ប៉ុន្តែ​យើង​ដឹង​ថា មាន​អ្នក​តវ៉ាម្នាក់​ស្លាប់​រួច​ទៅ​ហើយ​ ប៉ុន្តែ​មិន​ត្រូវ​បាន​បញ្ជូន​ទៅ​កាន់​សាល​តម្កល់​សព​”៕ សារុន​   

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស