ប្រទេសជប៉ុនបានបង្ហាញក្តីកង្វល់ដ៏ខ្លាំងរបស់ខ្លួន អំពីស្ថានភាពនៅក្នុងប្រទេសកម្ពុជា បន្ទាប់ពីមានករណីបាត់បង់ជីវិត អំឡុងប្រតិបត្តិការបង្ក្រាបកូដកម្មរបស់កម្មកររោងចក្រកាត់ដេរកាលពីថ្ងៃសុក្រមុន និងបានសារភាពកាលពីម្សិលមិញថា ខ្លួនបានទាក់ទងរដ្ឋាភិបាល អំឡុងពេលមានការតវ៉ា ដើម្បីស្នើសុំកិច្ចការពារប្រជាជន និងក្រុមហ៊ុនជប៉ុន។
កម្លាំងកងរាជអាវុធហត្ថបំពាក់ដោយកាំភ្លើង AK-47 បានបាញ់សម្លាប់ប្រជាជនប្រាំនាក់ និងធ្វើឲ្យ៤២នាក់ផ្សេងទៀតរងរបួស បន្ទាប់ពីបានបាញ់ទៅលើក្រុមអ្នកតវ៉ា នៅខាងក្រៅសួនឧស្សាហកម្មកាណាឌីយ៉ា ស្ថិតក្នុងខណ្ឌពោធិ៍សែនជ័យ រាជធានីភ្នំពេញ ជាហេតុនាំឲ្យសកម្មភាពតវ៉ាភាគច្រើនដោយសន្តិវិធីធ្វើឡើងដោយកម្មកររោងចក្រកាត់ដេរ ដែលអំពាវនាវឲ្យមានការដំឡើងប្រាក់ឈ្នួលអប្បបរមារបស់ខ្លួន បញ្ចប់ទៅដោយមានការបង្ហូរឈាម។
លោកឧត្តមសេនីយ៍ ខេង ទីតូ អ្នកនាំពាក្យ កងរាជអាវុធហត្ថលើផ្ទៃប្រទេស បានឲ្យដឹងក្រោយហេតុការណ៍បង្ហូរឈាមថា កម្លាំងរបស់លោកបានអនុវត្តចំណាត់ការ ដោយប្រើកម្លាំងដែលបណ្តាលឲ្យមានការបាត់បង់ជីវិត ដើម្បីការពាររោងចក្រ និងទ្រព្យសម្បត្តិឯកជន នៅក្នុងសួនឧស្សាហកម្មនេះ។
មួយថ្ងៃមុននេះ លោក ព្រំ សុខា រដ្ឋលេខាធិការក្រសួងមហាផ្ទៃ ក៏បានថ្លែងការពារការប្រើប្រាស់កម្លាំងទាហានពិសេស ដែលមកពីអង្គភាពទ័ពឆត្រយោងលេខ៩១១ ដែលបានបង្ក្រាបកូដកម្មយ៉ាងសាហាវ នៅឯរោងចក្រ យ៉ាក់ជីន (Yakjin) ដែលជាកម្មសិទ្ធិរបស់វិនិយោគិនកូរ៉េខាងត្បូង និងស្ថិតនៅក្នុងខណ្ឌពោធិ៍សែនជ័យផងដែរ។
លោក ព្រំ សុខា បានលើកឡើងកាលពីថ្ងៃនោះថា ទាហានត្រូវបានដាក់ពង្រាយបន្ទាប់ពីស្ថានទូតជប៉ុន បានត្អូញត្អែរជាផ្លូវការទៅរដ្ឋាភិបាល អំពីការគំរាមរបស់អ្នកតវ៉ា។
លោកបានមានប្រសាសន៍ថា “ គេ[ស្ថានទូតជប៉ុន] បានត្អូញត្អែរជាផ្លូវការ អំពីក្រុមអ្នកតវ៉ាដែលគំរាមពួកយើង”។
កាលពីថ្ងៃពុធ ទីភ្នាក់ងារព័ត៌មាន ក្លូប៊ល ផុស (Globalpost) បានរាយការណ៍ថា ស្ថានទូតកូរ៉េខាងត្បូងក៏បានស្នើឲ្យអាជ្ញាធរយោធាកម្ពុជាការពាររោងចក្រកាត់ដេរកូរ៉េខាងត្បូងកំុឲ្យមានការខូចខាតដោយសារក្រុមអ្នកតវ៉ា។
ស្ថានទូតកូរ៉េខាងត្បូងបានឆ្លើយតបទៅនឹងសេចក្តីរាយការណ៍នេះថា ខ្លួនមិនបានស្នើឲ្យមានការប្រើអំពើហិង្សាទៅលើកូដករ ទេ ហើយក៏បានលើកឡើងទៀតថា តាមរយៈការស្នើឲ្យរដ្ឋាភិបាលការពារក្រុមហ៊ុនកូរ៉េខាងត្បូង ខ្លួនគ្រាន់តែធ្វើការងាររបស់ខ្លួនប៉ុណ្ណោះ។
ទោះជាយ៉ាងណា មិនទាន់មានមន្ត្រីរដ្ឋាភិបាលរូបណាចេញមុខបកស្រាយឲ្យបានច្បាស់លាស់ អំពីមូលហេតុដែលបណ្តាលឲ្យមានការដាក់ពង្រាយកម្លាំងទ័ពឆត្រយោងមកពីអង្គភាពទ័ពឆត្រយោងលេខ៩១១ ដើម្បីការពាររោងចក្រ យ៉ាក់ជីន ដែលជាកម្មសិទ្ធិរបស់វិនិយោគិនកូរ៉េខាងត្បូងនេះ នៅឡើយទេ ហើយនេះគឺជាលើកដំបូងហើយដែលទាហានត្រូវបានបញ្ជូនមករាជធានីភ្នំពេញ នៅតាមវិថីនានា ដើម្បីបង្ក្រាបកូដកម្មភាគច្រើនធ្វើឡើងដោយសន្តិវិធី អស់រយៈពេលស្ទើរតែពេញមួយសប្តាហ៍។កាលពីម្សិលមិញ ស្ថានទូតជប៉ុនបានបញ្ជាក់ថា ខ្លួនក៏បានពិភាក្សាជាមួយរដ្ឋាភិបាលអំពីការការពាររោងចក្រ និងបុគ្គលិកជប៉ុនផងដែរ ក៏ប៉ុន្តែ ខ្លួនបានជំរុញមិនឲ្យមានអំពើហិង្សាពីគ្រប់ភាគី។
លោក យ៉ូស៊ីហីុរ៉ូ ហ៊ីហ្គូជី (Yoshihiro Higuchi) អគ្គរាជទូតជប៉ុន បានមានប្រសាសន៍ថា “ ស្ថាន ទូតជប៉ុនមានឱកាសមួយចំនួនសម្រាប់បង្ហាញរដ្ឋាភិបាលអំពីក្តីកង្វល់របស់ខ្លួនទាក់ទងទៅនឹងសុវត្ថិភាពរបស់កម្មករ និងប្រតិបត្តិការរបស់រោងចក្រជប៉ុននៅក្នុងប្រទេសកម្ពុជា និងសម្រាប់ស្នើឲ្យមានការចាត់វិធានការសមស្រប ដើម្បីឲ្យកម្មករ និងរោងចក្រទាំងនោះត្រូវបានការពារពីអំពើហិង្សា”។
លោក ហ៊ីហ្គូជី បានសង្កត់ធ្ងន់ថា ស្ថានទូតជប៉ុនបានអំពាវនាវឲ្យភាគីទាំងអស់ដែលពាក់ព័ន្ធក្នុងវិវាទនេះ ទប់ស្កាត់កុំឲ្យមានអំពើហិង្សា និងស្វែងរកដំណោះស្រាយសម្រាប់បញ្ហានេះ ដោយសន្តិវិធី។
លោកបានមានប្រសាសន៍ថា “ យើងយល់អំពីសិទ្ធិមូលដ្ឋានរបស់ប្រជាពលរដ្ឋក្នុងការតវ៉ាដោយសន្តិវិធី ហើយកូដកម្មគួរតែត្រូវបានគោរពយ៉ាងសមរម្យ។ ដូច្នេះយើងសោក ស្តាយជាខ្លាំង ដែលនៅក្នុងស្ថានភាពបច្ចុប្បន្ន មានការប៉ះទង្គិចគ្នារវាងកម្លាំងសន្តិសុខ និងបាតុករ ជាហេតុបណ្តាលឲ្យមានជនរងគ្រោះ ជាច្រើននាក់”៕ សុធា