កាលពីថ្ងៃពុធ សម្ព័ន្ធអង្គការសិទ្ធិមនុស្សអន្តរជាតិបានចេញញត្តិមួយដើម្បីដាក់សម្ពាធលើលោក សម រង្ស៊ី ប្រធានគណបក្សសង្គ្រោះជាតិនិងសមាជិកជាន់ខ្ពស់មួយចំនួនរបស់រដ្ឋាភិបាលដើម្បីថ្កោលទោសជាសាធារណៈនិងដើម្បីស៊ើបអង្កេតលើការគំរាមសម្លាប់លោក អ៊ូ វីរៈ មេដឹកនាំអង្គការសិទ្ធិមនុស្សក្នុងស្រុក បន្ទាប់ពីលោកបានរិះគន់ចំពោះការលើកឡើងរបស់លោក សម រង្ស៊ី អំឡុងការធ្វើបាតុកម្មមួយរបស់គណបក្សប្រឆាំង។
ចាប់តាំងពីលោក វីរៈប្រធានមជ្ឈមណ្ឌលសិទ្ធិមនុស្សកម្ពុជា បានចេញលិខិតជាសាធារណៈមួយកាលពីថ្ងៃ១២ខែធ្នូរិះគន់ការប្រើពាក្យប្រឆាំងវៀតណាមពីសំណាក់មេដឹកនាំគណបក្សសង្គ្រោះជាតិអំឡុងការតវា៉ារបស់គណបក្សប្រឆាំងមក លោកបានរងការរំលោភបំពានជាហូរហែតាមអុីនធើណិតពីក្រុមអ្នកគាំទ្រគណបក្សប្រឆាំង ដោយរិះគន់យ៉ាងខ្លាំងចំពោះជំហររបស់លោកថាជាជនក្បត់ជាតិ រីឯបុគ្គលិករបស់មជ្ឈមណ្ឌលសិទ្ធិមនុស្សកម្ពុជាផ្សេងៗទៀត បានរាយការណ៍ថា ខ្លួនក៏ទទួលបានការគំរាមកំហែងធ្វើទុក្ខបុកម្នេញរួមទាំងការគំរាមសម្លាប់ផងដែរ។
សេចក្តីថ្លែងការណ៍មួយធ្វើឡើងដោយអ្នកអង្កេតការណ៍របស់អង្គការការពារសិទ្ធិមនុស្ស ជាកម្មវិធីរួមមួយរវាងអង្គការពិភពលោកប្រឆាំងការធ្វើទារុណកម្មនិងសហព័ន្ធសិទ្ធិមនុស្សអន្តរជាតិ បានអំពាវនាវឲ្យមានការស៊ើបអង្កេតជាបន្ទាន់មួយដើម្បីស្វែងរកជនដែលត្រូវទទួលខុសត្រូវចំពោះការបំភិតបំភ័យនេះ ហើយចាប់ខ្លួនពួកគេឲ្យមកទទួលខុសត្រូវចំពោះមុខច្បាប់។
េសចក្តីថ្លែងការណ៍នេះក៏បានរិះគន់លោក សម រង្ស៊ី ផងដែរដោយសារលោកមិនបានថ្កោលទោសចំពោះជនដែលគំរាមលោក វីរៈ។
សេចក្តីថ្លែងការណ៍នេះមានខ្លឹមសារថា ចាប់តាំងពីមានការផ្សព្វផ្សាយជាសាធាណៈនូវលិខិតនេះរួច មជ្ឈមណ្ឌលសិទ្ធិមនុស្សកម្ពុជាជាពិសេសលោក អ៊ូ វីរៈ ដែលជាប្រធានរបស់មជ្ឈមណ្ឌលនេះផ្ទាល់ បានទទួលនូវការរិះគន់ សារអាក្រក់ៗ និងការគំរាមជាហូរហែរួមទាំងការគំរាមសម្លាប់តាមរយៈអុីម៉េលនិងបណ្តាញទំនាក់ទំនងសង្គមផងដែរ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានឲ្យដឹងថា គណបក្សប្រឆាំងមិនអាចទទួលខុសត្រូវចំពោះការគំរាមលោក វីរៈនិងបុគ្គលិករបស់មជ្ឈមណ្ឌលសិទ្ធិមនុស្សកម្ពុជាបានទេ ប៉ុន្តែទោះជាយ៉ាងណាគណបក្សរបស់លោក គឺជាគណបក្សដែលប្រឆាំងទៅនឹងការបំភិតបំភ័យគ្រប់រូបភាពទាំងអស់។
លោកមានប្រសាសន៍ថា “ យើងថ្កោលទោសចំពោះការគំរាមកំហែងលើនរណាម្នាក់ព្រោះវាផ្ទុយពីច្បាប់និងរដ្ឋធម្មនុញ្ញ។ វាជារឿងមួយដែលមិនអាចទទួលយកបានទាល់តែសោះ”។ លោកបានបន្ថែមថា វាអាស្រ័យលើអាជ្ញាធរថា តើត្រូវអនុវត្តការស៊ើបអង្កេតដើម្បីចាប់ខ្លួនជនល្មើសមកផ្តន្ទាទោសឬក៏អត់នោះ។
លោក វីរៈ បានលើកឡើងថា ការឆ្លើយតបយ៉ាងខ្លាំងបែបនេះចំពោះមជ្ឈមណ្ឌលសិទ្ធិមនុស្សកម្ពុជា ដែលមានបំណងឃ្លាំមើលសិទ្ធិមនុស្សនិងជំទាស់ការគាបសង្កត់ណាមួយពីគ្រប់ភាគីទាំងអស់ បានបង្ហាញឲ្យឃើញពីរូបភាពមិនល្អនៅក្នុងសង្គមកម្ពុជាសព្វថ្ងៃ។
លោកបានមានប្រសាសន៍ថា “ ខ្ញុំមិនមែនស្តីបន្ទោសទោសលោក សម រង្ស៊ី ឬក៏គណបក្សប្រឆាំងនោះទេ ប៉ុន្តែយើងធ្លាប់បានដឹងមកហើយថា មនុស្សមិនមែនសុទ្ធតែត្រូវរហូតនោះទេ ហើយនេះគឺជាបញ្ហាដ៏ធំព្រោះប្រសិនបើមេដឹកនាំរបស់យើងមិនថ្កោលទោសចំពោះការប្រើអំពើហិង្សានិងការបំភិតបំភ័យនោះទេ វាអាចបង្កើតជាគំរូអាក្រក់សម្រាប់ថ្ងៃអនាគត”៕ ស៊ុយឈាង