ទាហានរាប់សិបនាក់មកពីកងយោធពលខេមរភូមិន្ទនៅក្នុងខេត្តបន្ទាយមានជ័យបានដាក់ពាក្យបណ្តឹងប្តឹងទៅអង្គការសិទ្ធិមនុស្សអាដហុក ដោយចោទមេបញ្ជាការរបស់ខ្លួនថា បានប្រព្រឹត្តអំពើពុករលួយធ្ងន់ធ្ងរ លួចប្រាក់សោធនរបស់អតីតយុទ្ធជន បក្ខពួកនិយម និងកាប់ឈើខុសច្បាប់។
រយៈពេលបីឆ្នាំហើយ តំណាងម្នាក់របស់ទាហានទាំងនេះបានឲ្យដឹងថា ពួកគេបានព្យាយាមប្តឹងលោក ផ្លន តារា មេបញ្ជាការនៃកងយោធពលខេមរភូមិន្ទប្រចាំខេត្តបន្ទាយមានជ័យ និងបងប្អូនថ្លៃរបស់គាត់ឈ្មោះ កែប សេងលុន ជាមួយអាជ្ញាធរមួយចំនួនទៀត ប៉ុន្តែ បានបដិសេធ ឬគ្មានចម្លើយម្តង ហើយម្តងទៀតមុនពេលបង្វែរពាក្យបណ្តឹងទៅអង្គការអាដហុក កាលពីម្សិលមិញ។
ពាក្យបណ្តឹងមាន១៦ទំព័រ ដែលមានផ្តិតស្នាមមេដៃដោយទាហាននៃកងយោធពលខេមរភូមិន្ទចំនួន៣៩នាក់ ជាតំណាងឲ្យកងកម្លាំងប្រដាប់អាវុធខេត្តបន្ទាយមានជ័យទាំងមូល មានខ្លឹមសារថា “ ហេតុផលដែលយើងកំពុងតែធ្វើពាក្យបណ្តឹងនេះ គឺថា ឧត្តមសេនីយ៍ ត្រី ផ្លន តារា ដែលជាមេបញ្ជាការរបស់យើង និងបងប្អូនថ្លៃរបស់គាត់គឺ លោកវរៈសេនីយ៍ឯក កែប សេងលុន ជាមេបញ្ជាការរងបានប្រើអំណាចរបស់ខ្លួនប្រព្រឹត្តអំពើពុករលួយ និងកេងប្រវ័ញ្ចទ្រព្យសម្បត្តិរបស់អង្គភាពទាហាន និងកាត់ប្រាក់ខែរបស់ទាហាន”។
ពាក្យបណ្តឹងនេះមានរៀបរាប់ពីបទល្មើសជាច្រើនដែលប្រព្រឹត្តឡើងដោយលោកឧត្តមសេនីយ៍ត្រី ផ្លន តារា និងវរៈសេនីយ៍ឯក សេងលុន គឺការកាត់ប្រាក់ខែទាហាន យុទ្ធជនពិការ និងអតីតយុទ្ធជនចាប់ផ្តើមក្នុងឆ្នាំ២០០៥ បន្ថែមឈ្មោះទាហានខ្មោច ដើម្បីបើកប្រាក់ខែ និងអនុញ្ញាត ឲ្យសាច់ញតិរបស់ខ្លួនប្រមូលប្រាក់ខែ ដំឡើងឋានន្តរ ស័ក្តិដល់សមាជិកគ្រួសារនូវមុខតំណែងខ្ពស់ លួចរថយន្ត និងប្រេង សូកប៉ាន់ទាហានថៃដើម្បីអនុញ្ញាតឲ្យពួកគេកាប់ឈើគ្រញូងឆ្លងដែន និងលួចជំនួយពីលោកនាយករដ្ឋមន្ត្រី ហ៊ុន សែន និងភរិយារបស់លោក គឺ លោកស្រី ប៊ុន រ៉ានី។
ទាហានទាំងនោះបានលើកឡើងក្នុងពាក្យបណ្តឹងរបស់ខ្លួនថា “ ថ្ងៃទី២៩ ខែកុម្ភៈ ឆ្នាំ២០០៩ ពួកគេបានកាត់ប្រាក់ខែអតីតយុទ្ធជនចំនួន៧៣៤នាក់ ចំនួន២៥០.០០០រៀល [ប្រហែល៦២,៥០ដុល្លារ] ក្នុងអតីតយុទ្ធជនម្នាក់ៗសរុប១៨៣.៥០០.០០០រៀល” ឬប្រហែល ៤៥.៨៧៥ដុល្លារ។
ពាក្យបណ្តឹងនេះបន្តថា ក្នុងខែតុលា ឆ្នាំ២០១០ លោកឧត្តមសេនីយ៍ត្រី តារា និង លោកវរៈសេនីយ៍ឯក សេងលុន បានកាត់ប្រាក់១២០.០០០រៀល (ប្រហែល៣០ដុល្លារ) ពីប្រាក់ខែរបស់ទាហាន១៥៩នាក់ដែលក្លាយជាទាហានពិការ ឬអតីតយុទ្ធជននៅខែនោះសរុប៤.៧០០ដុល្លារ។ ពាក្យបណ្តឹងបានបន្ថែមថា អង្ករមួយបាវក៏ត្រូវបានលួចពីអតីតយុទ្ធជន ឬយុទ្ធជនពិការម្នាក់ៗផងដែរ។
ក្នុងខែវិច្ឆិកា ឆ្នាំ២០១០ ពួកគេបានលួចប្រាក់២២០.០០០រៀល ប្រហែល៥៥ដុល្លារពីអតីតយុទ្ធជន និងទាហានពិការសរុបប្រហែល៩.០០០ដុល្លារ ព្រមទាំងអង្ករពីរបាវសម្រាប់អតីតយុទ្ធជនម្នាក់ៗ។
ឈ្មោះអតីតយុទ្ធជន យុទ្ធជនពិការ និងទាហានដែលប្រាក់ខែរបស់គេត្រូវបានសម្រប សម្រួល ត្រូវបានចុះក្នុងពាក្យបណ្តឹងនោះ។
លោកឧត្តមសេនីយ៍ត្រី តារា និងលោកវរៈសេនីយ៍ឯក សេងលុន ក៏ត្រូវបានចោទប្រកាន់ផងដែរថា បានដំឡើងឋានន្តរស័ក្តិសាច់ញាតិរបស់ខ្លួនផ្ទាល់នៅតាមបណ្តោយព្រំដែនកម្ពុជា-ថៃ។
យោងតាមពាក្យបណ្តឹងបានឲ្យដឹងថា “ ពួកគេបានដំឡើងបុណ្យស័ក្តិដល់សាច់ញាតិរបស់ខ្លួន និងបានបញ្ជូនពួកគេទៅកាន់ព្រំដែន កម្ពុជា-ថៃដើម្បីរកប្រាក់ឲ្យបានច្រើន ហើយលោកឧត្តមសេនីយ៍ត្រី តារា មិនសកម្មអំឡុង ការបំពេញកាតព្វកិច្ចរបស់ខ្លួន ហើយគិតតែ មុខជំនួញរបស់ខ្លួនប៉ុណ្ណោះ អនុញ្ញាតឲ្យបងប្អូនប្រុសថ្លៃរបស់ខ្លួនទទួលបន្ទុកជំនួសវិញ”។
លោកទាំងពីរក៏ត្រូវបានចោទផងដែរថា បានបញ្ជាកងកម្លាំងយោធពលខេមរភូមិន្ទកាប់ឈើគ្រញូងខុសច្បាប់នៅក្នុងប្រទេសថៃ និងសូកប៉ាន់ទាហានថៃ។
ពាក្យបណ្តឹងនេះមានខ្លឹមសារថា “ លោកទាំងពីរបានប្រើកម្លាំងកងយោធពលខេមរភូមិន្ទចូលក្នុងព្រៃថៃ ដើម្បីស្វែងរកឈើគ្រញូងដោយបង់ប្រាក់ចំនួន៤០០.០០០បាត [ប្រហែល១.២០០ដុល្លារ] ជាសំណូក”។
ចាប់តាំងពីឆ្នាំ២០១០ ទាហានបានបញ្ជូនពាក្យបណ្តឹងមកលោកនាយករដ្ឋមន្ត្រី ហ៊ុន សែន លោក ទៀ បាញ់ រដ្ឋមន្ត្រីក្រសួងការពារជាតិ លោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ លោក មាស សុភា នាយអគ្គសេនាធិការទ័ពជើងគោកនៃកងយោធពលខេមរភូមិន្ទ និងអង្គភាពប្រឆាំងអំពើពុករលួយ។
តំណាងម្នាក់របស់ទាហានខេមរភូមិន្ទប្រចាំខេត្តបន្ទាយមានជ័យ ដែលមានតួនាទីសំខាន់ៗ ប៉ុន្តែ សុំមិនបញ្ចេញឈ្មោះដោយសារតែខ្លាចមានការតាមសងសឹកបានលើកឡើងថា គ្មាននរណាម្នាក់ចាត់ការបណ្តឹងរបស់ពួកគេទេ រីឯអង្គភាពប្រឆាំងអំពើពុករលួយបានច្រានចោលពាក្យបណ្តឹងនេះ ពីព្រោះបទល្មើសដែលត្រូវបានចោទនេះ ត្រូវបានប្រព្រឹត្តឡើងមុនការបង្កើតអង្គភាពនេះទៅទៀត។
អ្នកតំណាងរូបនេះបានឲ្យដឹងថា “ យើងអស់សង្ឃឹមណាស់ ដូច្នេះ យើងបង្វែរពាក្យបណ្តឹងនេះទៅ [អង្គការសិទ្ធិមនុស្ស]អាដហុកនៅក្នុងខេត្តបន្ទាយមានជ័យវិញ”។
លោកឧត្តមសេនីយ៍ត្រី ផ្លន តារា បាន បដិសេធមិនធ្វើអត្ថាធិប្បាយ៕ ប៊ុននី