32 C
Phnom Penh

គ្រួសារ​អ្នក​តវ៉ា​ដែល​ត្រូវ​បានសម្លាប់​ និងបាត់ខ្លួន​ធ្វើ​ពាក្យ​បណ្តឹង​ទៅ​អាជ្ញាធរ​និង​អង្គការ​សិទ្ធិមនុស្ស​

ដោយ ឌឹ ខេមបូឌា ដេលី

បទវិភាគ

សមាជិកគ្រួសារ​របស់​កម្មករ​រោង​ចក្រ​កាត់​ដេរ​ធ្វើ​កូដកម្ម​ដែលត្រូវ​បានសម្លាប់​ រង​របួស​ និង​បាត់​ខ្លួន​បន្ទាប់​ពីកង​រាជអាវុធ​ហត្ថ​បាន​បង្ក្រាបការ​តវ៉ា​​ដោយ​ហិង្សា​នៅ​តាម​ផ្លូវ​វ៉េង​ស្រេង​ កាល​ពីថ្ងៃសុក្រ​មុន​ បានចាប់​ផ្តើម​ធ្វើ​ពាក្យ​បណ្តឹង​ទៅ​អាជ្ញាធរ​និង​អង្គការ​សិទ្ធិ​មនុស្ស​ក្រៅ​រដ្ឋាភិបាល​។

មនុស្ស​យ៉ាង​តិច​ប្រាំនាក់ត្រូវ​បានបាញ់​ស្លាប់​ និង​ជាង​៤០​នាក់​បាន​រង​របួស​ បន្ទាប់​ពី​កង​រាជ​អាវុធ​ហត្ថ​ប្រដាប់​ដោយ​កាំភ្លើង​ AK-47 បាន​បង្ក្រាប​ការ​តវ៉ា​មួយ​របស់​កម្មករ​ធ្វើ​​កូដ​កម្ម​ចោល​ដុំថ្ម​។

អ្នក​ស្រី ឈីវ ផានិត អាយុ​២០​ឆ្នាំ​ភរិយា​របស់​លោក សំ រ៉ាវី ដែល​​កង​រាជ​អាវុធ​​ហត្ថ​បាញ់​ស្លាប់​បាន​មាន​ប្រសាសន៍ថា អ្នក​ស្រីនឹង​ធ្វើពាក្យ​បណ្តឹង​ទៅ​សាលា​ដំបូង​រាជ​ធានី​ភ្នំពេញ​ដោយ​ស្វែង​រក​ឲ្យមាន​ការ​ស៊ើប​អង្កេត​មួយ​ក្នុង​ការ​ស្លាប់​ស្វាមីរបស់​អ្នកស្រី ​និង​បង្ហាញ​មុខ​ឃាត​ករ​។

អ្នកស្រី ផានិត បាន​លើកឡើង​ក្នុង​ពាក្យ​បណ្តឹង​លាយ​ល័ក្ខ​ណ៍​អក្សរ​របស់អ្នកស្រី​ ដែល​នឹង​ដាក់​ជូន​ទៅ​តុលាការ​ថា “អាជ្ញាធរ​ដែល​គេ​មិន​ស្គាល់ឈ្មោះ…បាន​បាញ់​សម្លាប់​ប្តី​របស់​ខ្ញុំ​ឈ្មោះ សំ រ៉ាវី នៅ​ម៉ោង​១០​និង​១៥​នាទីព្រឹក​ អំឡុងការ​បង្ក្រាប​ទៅលើ​បាតុ​កម្ម​របស់​កម្មករ​”។

អ្នកស្រី​បាន​បន្ថែមថា “ប្តីរបស់ខ្ញុំ​ត្រូវ​បាន​បាញ់​ត្រូ​វ​ចំក្រោម​ទ្រូង​ខាង​ឆ្វេង​ ហើយ​អាជ្ញាធរ​បាន​វាយ​ត្រូវ​ច្រមុះ​ និង​ថ្គាមរបស់​គាត់​ ហើយគាត់​បាន​ស្លាប់​នៅម៉ោង​១០​និង​៣០​នាទីព្រឹក​នៅមន្ទីរ​ពេទ្យ​​មិត្ត​ភាពខ្មែ​រ​-​សូវៀត​ ដោយ​បន្សល់​ទុក​កូន​ពីរនាក់​​អាយុ​ ២ឆ្នាំ និង​អាយុ​១០ខែ​ និង​រូប​ខ្ញុំ​ផ្ទាល់​”។ អ្នកស្រី ផានិត បាន​លើក​ឡើង​តាម​ទូរ​ស័ព្ទថា “នេះ​ជាការ​​បង្ក្រាប​ខុស​ច្បាប់​ទៅ​លើ​បាតុកម្មមួយ​។ ខ្ញុំចង់​ឲ្យមានការ​ដាក់​ទោស​ជន​ដៃ​ដល់​ទៅតាម​ច្បាប់​”។

លោក ខែម សឿន អាយុ​៤១​ឆ្នាំ​ កាល​ពី​ថ្ងៃ​ពុធ​ ក៏បាន​ធ្វើ​ពាក្យ​បណ្តឹង​ទៅ​អង្គការ​សិទ្ធិ​មនុស្ស​ក្នុង​ស្រុក​​អាដហុក​ផង​ដែរ​ អំពី​កូន​ប្រុស​អាយុ​១៦ឆ្នាំ​ដែល​កំពុង​តែ​បាត់ខ្លួន​របស់​លោក​ឈ្មោះ ខែម សុផាត ដែល​លោក​បាន​​ឲ្យដឹង​ថា លោក​ខ្លាច​ក្រែង​ថា កូន​គាត់​ស្លាប់​ បន្ទាប់​ពី​ទទួល​ដំណឹង​ថា កូន​ប្រុស​រូប​នេះ​ត្រូ​វបាន​គេ​បាញ់​​ក្នុង​ការ​ប៉ះទង្គិច​គ្នា​នៅ​លើ​ផ្លូវ​វេ៉ង​ស្រេង​។

លោក ខែម សឿន បាន​​ឲ្យដឹង​កាល​ពី  ថ្ងៃ​ពុធថា “យើង​បាន​និង​កំពុង​តែ​តាម​រក​​វា​គ្រប់​កន្លែង​ តាម​​វត្ត​ តាម​មន្ទីរពេទ្យ​ ជាមួយ​មិត្ត​ភក្តិ​របស់វា​ ក៏ប៉ុន្តែ យើង​មិនអាច​រក​ឃើញ​វា​ឡើយ​។​រដ្ឋាភិបាល​ត្រូវ​ទទួល​ខុស​ត្រូវ​ចំពោះ​កូន​របស់​ខ្ញុំ​ដែល​បាត់​ខ្លួន ពីព្រោះ​មិត្ត​ភក្តិ​របស់វា​ដែល​ត្រូវ​បាន​ [កង​រាជអាវុធ​ហត្ថ​] បាញ់​នោះ​បាន​និយាយ​ថា នគរបាល​បាន​ នាំ​ខ្លួន​វា​ចេញ​ក្នុង​ឧបទ្ទវហេតុ​ដូចគ្នា​នេះ​”។

លោក ខែម សឿន បាន​មាន​ប្រសាសន៍​កាល​ពីម្សិលមិញថា លោកគិត​ថា សាកសព​កូន​ប្រុស​របស់​គាត់​បាត់​ដោយសារ​តែ​កង​រាជ​អាវុធ​ហត្ថ​ដែល​បើក​ការ​វាយប្រហារ​ទៅ​លើ​បាតុករ​ នៅលើ​ផ្លូវ​វ៉េងស្រេង​ អំឡុង​​ការ​តវ៉ា​របស់​កម្មករ​នោះ​៕ ប៊ុននី​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស