28 C
Phnom Penh

អ្នក​រៃអង្គាសប្រាក់​សម្រាប់​អ្នក​តវ៉ា​ដែល​កម្រើក​ខ្លួន​លែង​រួ​ចប្រមូលបាន​ប្រាក់​ជាង​១.៥០០ដុល្លារ​

ដោយ ឌឹ ខេមបូឌា ដេលី

បទវិភាគ

សកម្មភាពខិត​ខំប្រឹង​ប្រែង​​​រៃអង្គាស​​​មូលនិធិ​​ដែល​ត្រូវ​បាន​ធ្វើឡើង ​ដើម្បី​ជួយ​គ្រួសារ​​របស់​លោក ហឿន ចាន់  ដែលកម្រើក ​​​​ខ្លួន​​​​​មិន​រួច​ បន្ទាប់​ពី​ត្រូវ​បាន​នាយនគរបាល​ម្នាក់​បាញ់​ចំ​ឆ្អឹង​ខ្នង​ អំឡុង​ការ​តវ៉ារបស់កម្មករ​​​រោង​​​​ចក្រ​កាត់​ដេរ​ អេស​អិល (SL Garment Factory) កាល​ពី​ខែ​វិច្ឆិកា​ឆ្នាំមុន បាន​​បញ្ចប់​កាល​ពី​ម្សិលមិញ​ ដោយ​​រៃ​អង្គាស​​បាន​ប្រាក់​ជាង​១.៥០០​ដុល្លារ​។

យុទ្ធ​នាការ​ “សាមគ្គីភាព​ជាមួយ​ ហឿន ចាន់” ត្រូវ​បាន​បង្កើត​​​ឡើង​ដោយ​​ ហ្វ្រង់​សេស្កា​ អ៊ែលឌ្រីក (Francesca Eldridge) ជន​ជាតិ​​​​នូវែលសេឡង់​ កាល​ពី​ក្នុងខែ​ធ្នូ ដើម្បី​ជួយ​សង​ប្រាក់​កម្ចី​ជាង​៤.០០០ដុល្លារ​​ ដែល​គ្រួសារ​របស់​​​លោក ហឿន ចាន់ ​ ជាប់​​​បន្ទុក ទូទាត់​ថ្លៃសេវា​ព្យាបាល​​​លោក។ អ្នក​រៃ​អង្គាស​រូប​នេះ​បាន​បញ្ចប់យុទ្ធនាការ​​​រៃ​អង្គាស​របស់​ខ្លួន​នៅ​វេលាម៉ោង​៧​ព្រឹក​តាម​​គេ​ហ​ទំព័រ​ YouCaring កាល​ពីម្សិលមិញ បន្ទាប់​​​ពីបាន​រៃ​អង្គាសប្រាក់​១.៥១៥​ដុល្លារ​សម្រាប់គោល​ដៅ​៣.០០០​ដុល្លារ​របស់​ខ្លួន​។

អ្នកស្រី ហួន ខុន ដែល​ត្រូវ​ជា​ម្តាយ​អាយុ​៥១​ឆ្នាំ​របស់​ជ​ន​រងគ្រោះ​ បាន​ឲ្យដឹង​ថា អ្នក​ស្រី​អរគុណ​សម្រាប់ការផ្តល់ប្រាក់​​ទាំង​​​នេះ​ ដែល​នឹង​ជួយ​ទូទាត់​ប្រាក់​ចំនួន​១៣​លាន​រៀល​ (ប្រហែល​៣.២៥០ដុល្លារ​) ដែល​អ្នក​​​ស្រី​និយាយ​ថា គ្រួសារ​នេះ​ជំពាក់​អ្នក​ចង​​​ការ​​​ឯកជន​​​​នៅ​ឡើយ​។ អ្នក​ស្រី ហួន ខុន បាន​​​និយាយថា “ យើង​ពិត​ជា​រីករាយ​ចំពោះ​ជំនួយ​ទាំង​​​នេះ​។​​​ប្រសិន​​​​ បើ​គ្មាន​ជំនួយទាំង​​​នេះ​ទេ​ គ្រួសារ​របស់​ខ្ញុំ​នឹង​ជំពាក់​បំណុល​កាន់​តែ​ច្រើន​ឡើង​”។

អ្នកស្រី​បាន​បន្ថែម​ទៀត​ថា “ចាប់​តាំង​ពី​កូន​របស់ខ្ញុំ​វិល​ត្រឡប់​ពីការ​ព្យាបាល​នៅ​ក្នុង​ប្រទេស​វៀត​ណាម​វិញមក​ ស្ថាន ​ភាព​របស់​វា​កាន់​តែ​ដុនដាប​ទៅ​ៗ។ ដំបៅ​របស់វា​កាន់​តែ​រីកធំឡើង​នៅ​លើ​រាង​កាយ​ ហើយ​វា​ស្រែក​យំ​ស្ទើ​រតែ​រាល់​ថ្ងៃ​។ ខ្ញុំពិបាកចិត្តណាស់”។

លោក ហឿន​ ចាន់ ដែល​​បានគេច​ខ្លួន​នៅ អំឡុង​​​កូដកម្មនោះ​ ត្រូវ​បានបាញ់​ត្រូវ​ចំ​ឆ្អឹង​ខ្នង​ដោយ​​នាយនគរបាល​ឆេវឆាវមួយរូប​​​ ដែល​​ត្រូវ​បាន​រំដោះចេញ​ពី​ស្ថាន​ភាព​ចំណាប​់​​​ ខ្មាំង​មួយ​ធ្វើ​ឡើង​ដោយ​កម្មករ​ធ្វើកូដកម្ម​។

នៅ​​​ក្នុងព្រឹត្តិការណ៍​កាល​ពីចុង​ឆ្នាំមុន​​អ្នកលក់​បាយម្នាក់​ត្រូវ​បាន​នគរបាល​​​បាញ់​​​ស្លាប់​ ហើយ​បន្ទាប់មក​បាន​ក៏មាន​​​ប្រតិបត្តិការ​​​បង្ក្រាបសកម្មភាពតវ៉ា​​​កាលពីថ្ងៃសុក្រសប្តាហ៍​​​មុន។ នៅ​​​ក្នុង​​​ប្រតិបត្តិការ​​​​នោះ​ កង​រាជ​អាវុធ​ហត្ថ​​ប្រដាប់​ដោយ​កាំភ្លើង​ AK-47 បាន​បាញ​់​សម្លាប់​កម្មករ​កាត់​ដេរ​ធ្វើ​កូដ​កម្ម​ប្រាំនាក់​។

លោក អំ សំអាត​អ្នកស៊ើប​អង្កេត​ជាន់​ខ្ពស់​​​​របស់​អង្គការ​សិទ្ធិមនុស្សក្នុង​ស្រុក​ លីកាដូ​​បានលើកឡើងថា អង្គការ​របស់លោក​ក៏​បាន​ផ្តល់់ជំនួយ​ដល់​លោក ហឿន​ ចាន់​ ផង​ដែរ​ ដើម្បីជួយ​ចេញ​ថ្លៃ​ព្យាបាល ​ពី​អង្កការ​ក្រៅ​រដ្ឋាភិបាល​ផ្នែកវេជ្ជសាស្ត្រមួយ។ លោក អំ សំអាត​ បាន​មាន​ប្រសាសន៍​ថា  “យើង​នៅតែ​សុំ​ឲ្យមាន​ការ​ស៊ើប​អង្កេត​ឯក​រាជ្យ​មួយ​ក្នុង​ករណីនេះ​។ ប្រសិន​បើ​គ្មាន​ទេ​​ នឹង​មាន​និទណ្ឌភាព​ទៀត​ ហើយ​​… នគរបាល​នឹង​បន្ត​ប្រើ​អំពើ​ហិង្សា​ទៀត​”៕ ប៊ុននី​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស