27 C
Phnom Penh

NGO​ ទាមទារ​ឲ្យ​រដ្ឋាភិបាល​ដំឡើង​ប្រាក់​ខែ​ដល់​កម្មករ​និង​មន្ត្រី​រាជការ

ដោយ ឌឹ ខេមបូឌា ដេលី

បទវិភាគ

មនុស្ស​ប្រហែល​១០០នាក់​រួម​ទាំង​ព្រះ​សង្ឃ​ចំនួន​២០​អង្គ​ផង​ដែរ​ ​បាន​ប្រារព្ធ​ពិធី​មួយ​ក្នុង​រាជធានី​ភ្នំពេញ​កាល​ពី​ថ្ងៃ​សុក្រ​ ដើម្បី​ឧទិ្ទស​កុសល​ដល់​កម្មករ​រោង​ចក្រ​កាត់​ដេរ​ទាំងប្រាំនាក់​ដែល​ត្រូវ​គ្រាប់​កាំភ្លើង​​ស្លាប់​កាល​ពី​សប្តាហ៍​មុន​ នៅ​ពេល​កង​រាជ​អាវុធ​ហត្ថ​បាន​បើក​ការ​បាញ់​ប្រហារ​លើ​កម្មករ​រោង​ចក្រ​កាត់​ដេរ​ និង​ដើម្បី​ទាម​ទារ​ឲ្យ​រដ្ឋាភិបាល​ដំឡើង​ប្រាក់​ខែ​គោល​​ឲ្យ​បាន​សម​រម្យ​ដល់​កម្មករ​រោង​ចក្រ​កាត់​ដេរ​និង​មន្ត្រី​រាជ​ការ​។

នៅ​ក្នុង​សង្កាត់​ទឹក​ថ្លា​ ខណ្ឌសែន​សុខ​ តំណាង​មក​ពី​សហជីព​និងអង្គការ​តស៊ូ​មតិ​ចំនួន​ប្រាំ​ពីរ ​​បាន​ឲ្យ​ដឹង​ថា ខ្លួន​នឹង​សាមគ្គី​គ្នា​ជាមួយ​នឹង​កម្មករ​រោង​ចក្រ​កាត់​ដេរ​ដែល​កំពុង​តែ​ទាម​ទារ​ឲ្យ​រដ្ឋាភិបាល​ដំឡើង​ប្រាក់​ខែគោល​ពី​៨០​ដុល្លារ​ទៅ​១៦០ដុល្លារ​ក្នុង​មួយ​​ខែ ប៉ុន្តែ​ពួក​គេ​បាន​លើក​ឡើង​ថា ការ​ដំឡើង​​​ប្រាក់​ខែនេះ​គួរ​តែ​ត្រូវ​ធ្វើ​ឡើង​នៅ​វិស័យ​ផ្សេង​ៗ​ផងដែរ​។

​អង្គការ​ដែល​រួម​មាន​សម្ព័ន្ធ​សហគមន៍​កសិករ​កម្ពុជា​ បណ្តាញ​ព្រះ​សង្ឃឯករាជ្យ​សម្រាប់​យុត្តិ​ធម៌សង្គម ​ក៏​បាន​អំពាវ​នាវ​ឲ្យ​មាន​ការ​ដោះ​លែង​កូដករ​សក​ម្មជន​ និង​តំណាង​សហជីពទាំង២៣​នាក់​ដែល​ត្រូវ​បាន​ឃុំ​ខ្លួន​នៅ​មណ្ឌលអប់រំ​​កែ​ប្រែ​ម៣ នៅ​ខេត្ត​កំពង់ចាម​ បន្ទាប់​ពីការ​ចាប់​ខ្លួន​កាល​ពី​សប្តាហ៍​​មុន​។

លោក​ ហេង​ សំអូន​ អគ្គលេខា​ធិការ  ​សមា​​គម​ប្រ​ជា​ធិបតេយ្យ​ឯករាជ្យ​នៃ​សេដ្ឋកិច្ច​ក្រៅប្រព័ន្ធ ​ជា​អង្គការ​ដែល​តំណាង​ឲ្យ​អ្នក​រត់​រ៉ូម៉កម៉ូតូ​កង់​បី ​និង​អ្នក​ធ្វើ​ការ​ក្រៅ​ប្រព័ន្ធ​ផ្សេង​ៗ​ទៀត​ បាន​មាន​ប្រសាសន៍​ថា​ “យើង​ទាម​ទារ​ឲ្យ​មាន​ការ​ដោះ​លែង​អ្នក​ដែល​ត្រូវ​បាន​ចាប់​ខ្លួន​ទាំង​២៣នាក់​។ យើង​ទាម​ទារ​ឲ្យ​មាន​ការ​បញ្ចប់ការ​ប្រើ​អំពើ​ហិង្សា​នៅគ្រប់​ស្ថានភាព​ទាំង​អស់​ និង​ទាម​ទារ​ឲ្យ​មាន​ការ​ដំឡើង​​ប្រាក់ខែគោល​ដល់​១៦០​ដុល្លារ​សម្រាប់​កម្មករ​និង​អ្នក​ផ្សេង​ៗ​ទៀត​នៅ​គ្រប់​វិស័យ​។ រដ្ឋាភិបាល​​​មិន​គួរ​ចរចា​តែ​ជា​មួយ​វិស័យ​កាត់​ដេរ​នោះ​ទេ​”។

លោក​ ស មូរ៉ា ប្រធាន​សហព័ន្ធ​សហជីព​កម្មករ​ចំណី​អាហារ​និង​សេវា​កម្ម​កម្ពុជា ​បាន​ឲ្យ​ដឹង​ថា លោក​មិន​អាច​ទទួល​យក​ទង្វើ​ដ៏​ហិង្សា​ក្នុង​ពេល​ថ្មីៗ​នេះ​​របស់រដ្ឋាភិបាល​បាន​ឡើយ​ ហើយ​លោក​សូម​ជម្រាប​​ថា បាតុកម្ម​​នឹង​​បន្ត​​ទោះ​បី​ជា​មាន​ការ​យល់​ព្រម​ឬ​ក៏​គ្មាន​ក៏ដោយ​។ លោក​បាន​មាន​ប្រសាសន៍ថា “ប្រសិន​បើ​​​ពួកគេ​​មិន​ដោះ​លែង​មនុស្ស​ទាំង​២៣​នាក់នោះ​ទេ​ យើង​នឹង​ប្រមូល​ផ្តុំ​គ្នានៅ​ទី​សាធារណៈ​ក្នុង​រាជធានី​ភ្នំពេញ​នៅ​ដំណាច់​ខែនេះ។ហើយ​​ទោះ​បី​ជា​សាលា​រាជធានី​ឬ​រដ្ឋាភិបាល​រារាំង​យើង​ក៏ដោយ​ យើង​នឹង​មិន​ព្រួយ​បារម្ភ​ពី​បញ្ហា​នេះ​ទេ”។

លោក​ មូរ៉ា​ ក៏បាន​អំពាវនាវ​ឲ្យ​មាន​ការ​ដំឡើង​ប្រាក់​ខែ​គោល​នៅ​ទូទាំង​ប្រទេស​​ ក៏​ដូច​ជា​ការ​អំពាវនាវ​ដាច់​ដោយ​ឡែក​​មួយ​ផ្សេង​ទៀត​កាលពី​ថ្ងៃ​ព្រហស្បតិ៍ ឲ្យ​មន្ត្រី​រាជការ​ធ្វើ​កូដកម្ម​​ទាម​ទារ​ឲ្យ​រដ្ឋាភិបាល​ដំឡើង​ប្រាក់​ខែ​គោល​ដល់​២៥០​ដុល្លារផង​ដែរ​។ កាល​ពី​ថ្ងៃ​ទី​៤​ខែ​មករា​ ក្រសួង​មហា​ផ្ទៃ​ បាន​ព្យួរដោយ​គ្មាន​ពេល​កំណត់​នូវ​​មាត្រា​មួយ​ចំនួន​នៃ​​រដ្ឋធម្មនុញ្ញ​ដែល​ទាក់​ទិន​នឹង​សិទ្ធិ​សេរី​នៃ​ការបញ្ចេញ​មតិ​ និង​ការ​ជួប​ជុំ​ដោយ​ហាម​មិន​ឲ្យ​មាន​ការ​ជួបជុំ​ជាសា​ធារណៈ​​ចាប់​ពី១០​នាក់​ឬ​ក៏​លើស​ពី​នេះ​។

ការ​ប្រមូល​ផ្តុំ​ស្រដៀង​គ្នា​ដើម្បី​ឧទ្ទិស​កុសល​ដល់​កម្ម​ករ​រោង​ចក្រ​កាត់​ដេរ​ចំនួន​ប្រាំនាក់​ដែល​ត្រូវ​គ្រាប់​ស្លាប់​ ក៏​ត្រូវ​បាន​ធ្វើ​ឡើង​នៅ​ខេត្ត​សៀម​រាប​​ បាត់​ដំបង​​ បន្ទាយ​មាន​ជ័យ​ និង​ខេត្ត​ព្រះ​សីហនុ​កាល​ពី​ថ្ងៃ​សុក្រ​ផង​ដែរ​។ ពិធី​ឧទ្ទិស​កុសល​កាល​ពី​ថ្ងៃ​សុក្រ​ក៏ត្រូវ​បាន​ធ្វើ​ឡើង​ដំណាល​គ្នា​ជាមួយ​នឹងសប្តាហ៍​សកម្មភាព​ពិភពលោក​ ដែល​រៀប​ចំ​ឡើង​ដោយ​វេទិកា​អាស៊ី​ប៉ាស៊ីហ្វិក​ស្តី​អំពី​ស្ត្រី​ ច្បាប់​និង​ការ​អភិវឌ្ឍ​ដែលមាន​មូលដ្ឋាន​នៅ​ប្រទេស​ថៃ​ដើម្បី​ប្រឆាំង​នឹង​រដ្ឋាភិបាល​របស់​លោក​ ហ៊ុន​ សែន​ ចំពោះ​ការ​បង្ក្រាប​កម្មករ​កាត់​ដេរ​ដែលបណ្តាល​ឲ្យ​មាន​អ្នក​ស្លាប់​ផង​ដែរ​។

កាល​ពី​ថ្ងៃ​សុក្រ​ដដែល​នោះ សហព័ន្ធ​សហជីព​កូរ៉េ បាន​ធ្វើ​បាតុកម្ម​​មួយ​ នៅ​ក្នុងទី​ក្រុង​​សេអ៊ូល​នៅ​ខាង​ក្រៅ​ក្រសួង​ការបរ​ទេស​​​​របស់​ប្រទេស​នេះ​ ហើយ​ការ​តវ៉ា​មួយ​ទៀត​ក៏​ត្រូវ​បាន​ធ្វើ​ឡើងនៅ​ឯ​ស្ថានទូក​កម្ពុជា​ក្នុង​ទីក្រុង​បាងកក​​ផង​ដែរ​។ ដោយ​ឡែក​ក្នុង​ទី​ក្រុង​ហុងកុងឯ​ណោះ​​​​វិញ​ខ្សែអាត់​វីដេអូ​មួយ​ដែល​គេ​បង្ហោះ​នៅ​លើ​គេហ​ទំព័រ​​ YouTube បាន​បង្ហាញ​ឲ្យ​ឃើញ​ពី​មន្ត្រី​សហ​ជីព​និង​សកម្ម​ជន​ការពារ​សិទ្ធិ​ការ​ងារ​​  កំពុង​តែ​តតំាង​គ្នាជាមួយ​លោក​ ឈាង​ ធីរ៉ា តំណាង​អគ្គកុងស៊ុល​នៅ​ខាង​ក្រៅ​​​ស្ថាន​កុងស៊ុល​កម្ពុជា​។

សកម្មជន​ម្នាក់​បាន​និយាយ​ថា “យើង​មាន​កំហឹង​យ៉ាង​ខ្លាំង​ចំពោះ​ការ​បង្ក្រាប​របស់​រដ្ឋាភិបាល។ វា​មិន​អាច​ទទួល​យក​បាន​ទេ​។ វា​រំ​លោភ​សិទ្ធិ​ជាមូលដ្ឋា​ន​របស់​មនុស្ស​​។ យើង​ទាម​ទារ​យ៉ាង​ដាច់​ខាត​ឲ្យ​រដ្ឋាភិបាល​ពន្យល់​យើង​អំពីអ្វី​ដែល​បាន​កើត​ឡើង​នៅ​ប្រទេស​កម្ពុជា​”។ តំណាង​អគ្គ​កុងស៊ុលរូបនេះ​​បាន​ឲ្យ​ដឹងថា​លោក​មិន​អាច​ធ្វើ​អត្ថាធិប្បាយ​បាន​ទេ​ ប៉ុន្តែ​លោក​នឹង​ទទួល​យក​លិខិត​ដែល​អ្នកតវ៉ា​ដាក់​ជូន​មក​លោក​។ លោក​មាន​ប្រសាសន៍​ថា “ខ្ញុំ​មិនមាន​អ្វី​ត្រូវ​និយាយ​ទៅ​កាន់​អ្នក​តវ៉ា​ទេ។ ខ្ញុំ​គ្រាន់​តែ​មក​ទី​នេះ​ដើម្បី​ទទួល​យក​លិខិត​របស់​អ្នក​តវ៉ា​ប៉ុណ្ណោះ​ ហើយ​បន្ទាប់​មក​ខ្ញុំ​នឹង​រាយ​ការណ៍​ទៅ​កាន់​រដ្ឋាភិបាល​របស់​យើង”​។​ អ្នក​តវ៉ា​ជា​ច្រើន​នាក់​បាន​ឆ្លើយ​តប​ថា “រដ្ឋាភិបាល​កម្ពុជា​គ្មាន​កេរ្តិ៍ខ្មាស់​!”។

យោង​តាម​សេចក្តី​រាយ​ការណ៍​ព័ត៌មាន​បាន​ឲ្យ​ដឹង​ថា កាល​ពី​ថ្ងៃ​សុក្រ​ អង្គការ​ក្រៅ​រដ្ឋា​ភិបាល និង​តំណាង​សហ​ជីព​ក្នុង​ប្រទេស​ម៉ាឡេស៊ី​បាន​ប្រគល់​ញត្តិ​មួយ​ទៅ​ឲ្យ​មន្ត្រី​ស្ថានទូ​ត​កម្ពុជា​ក្នុង​ទី​ក្រុង​គូឡា ឡាំពួរ​ ដែល​អំពាវនាវ​ឲ្យ​មាន​ការ​ដោះ​លែង​មនុស្ស​ចំនួន​២៣​នាក់​ ហើយ​បាន​ថ្កោល​ទោស​​ចំពោះ​ការ​ប្រើ​កម្លាំង​​​ហួស​ហេតុ​ទៅលើ​កម្មករ​រោង​ចក្រ​កាត់​ដេរ​ដែល​នាំ​គ្នា​ធ្វើ​កូដ​កម្ម​។

នៅ​ក្នុង​ទី​ក្រុង​ហ្សាការតា រូបភាព​ដែល​គេ​បង្ហោះ​នៅ​លើ​អ៊ីនធើណិត​ បាន​បង្ហាញ​ឲ្យ​ឃើញ​ពី​អ្នក​តវ៉ា​កំពុង​កាន់​បដា​មួយ​ចំនួន​ក្នុង​នោះ​មាន​បដា​មួយ​មាន​ខ្លឹម​សារថា “កុំ​សម្លាប់​មិត្តភក្តិ​របស់​យើង​នៅ​កម្ពុជា​”។

លោក ផៃ​ ស៊ី​ផាន អ្នក​នាំ​ពាក្យ​ទី​ស្តី​ការ​គណៈរដ្ឋមន្ត្រីបាន​ឲ្យ​ដឹង​ថា បាតុករ​អន្តរជាតិ​ចាំបាច់​ត្រូវ​តែ​ស៊ើប​ឲ្យ​ដឹង​រឿង​ពិត​អំពី​ការ​ស្លាប់​និង​ការ​រង​របួស​របស់​កម្មករ​។ លោក​នៅ​តែ​រក្សា​ជំហរ​ថា “ពួក​គេ​នៅ​ឆ្ងាយ​ពី​ការពិត ហើយ​ទទួល​បាន​តែ​ព័ត៌មាន​មិន​ពិត​និង​ព័ត៌មាន​បំបែក​បំបាក់​។ កម្មករ​កាត់​ដេរ​ចំនួន​៩៩ភាគរយ​បាន​ត្រឡប់​ទៅ​ធ្វើ​ការ​នៅ​ក្នុង​រោង​ចក្រ​របស់​ខ្លួន​ជា​ធម្មតា​វិញ​ហើយ​”៕ ស៊ុយឈាង​

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស