សហជីពដែលនៅពីក្រោយកូដកម្មរយៈពេលប៉ុន្មានថ្ងៃដែលនាំឲ្យមានមនុស្សស្លាប់នៅក្នុងខែនេះ បានឲ្យដឹងថា ខ្លួននឹងស្នើជាផ្លូវការនៅក្នុងថ្ងៃនេះឲ្យក្រសួងការងារនិងបណ្តុះបណ្តាលវិជ្ជាជីវៈបន្តការចរចាអំពីប្រាក់ឈ្នួលអប្បបរមាថ្មីមួយសម្រាប់វិស័យកាត់ដេរដ៏សំខាន់នៅក្នុងប្រទេសកម្ពុជា និងបានលើកឡើងថា ខ្លួននឹងធ្វើការតវ៉ាទៀត ប្រសិនបើសំណើរបស់ខ្លួនត្រូវបានច្រានចោល។
សហជីពចំនួនប្រាំមួយបានដឹកនាំកូដកម្មដើម្បីទាមទារឲ្យមានការដំឡើងប្រាក់ឈ្នួលអប្បបរមាប្រចាំខែដល់១៦០ដុល្លារ ហើយនៅពេលនោះ កម្លាំងកងរាជអាវុធហត្ថបានបាញ់ទៅលើក្រុមអ្នកតវ៉ានៅខាងក្រៅរោងចក្រមួយក្នុងរាជធានីភ្នំពេញកាលពីថ្ងៃទី៣ខែមករា ជាហេតុបណ្តាលឲ្យមនុស្សប្រាំនាក់ស្លាប់ និងធ្វើឲ្យមនុស្សជាច្រើននាក់រងរបួស។
បើទោះជាចាប់តាំងពីពេលនោះ កម្មករភាគច្រើនបានវិលត្រឡប់ចូលធ្វើការវិញហើយ ក្រសួងការងារ និងបណ្តុះបណ្តាលវិជ្ជាជីវៈបានយល់ព្រមដំឡើងប្រាក់ឈ្នួលអប្បបរមាពី៨០ដុល្លារ ដល់១០០ដុល្លារក្នុងមួយខែក៏ដោយ ក៏សហជីពទាំងនេះបានលើកឡើងកាលពីម្សិលមិញថា ពួកគេនៅតែទាមទារប្រាក់ឈ្នួល១៦០ដុល្លារដដែល។
លោក គង់ អាទិត្យ អនុប្រធានសម័្ពន្ធសហជីពប្រជាធិបតេយ្យកម្មករកាត់ដេរកម្ពុជា បានមានប្រសាសន៍ថា “យើងចង់ចរចាជាមួយក្រសួងការងារ និងបណ្តុះបណ្តាលវិជ្ជាជីវៈ និងនិយោជកជំនួសការតវ៉ា។ ប៉ុន្តែក្នុងករណីដែលពួកគេមិនផ្តល់ឲ្យយើងនូវដំណោះស្រាយទេនោះ យើងនឹងបន្តធ្វើការតវ៉ានៅខែក្រោយទៀត”។
លោក ប៉ាវ ស៊ីណា ប្រធានចលនាសហជីពកម្មករចម្រុះ បានលើកឡើងថា សហជីពបីទៀតក៏នឹងចុះហត្ថលេខាលើសំណើសុំឲ្យមានការចរចាផងដែរ ហើយថា ពួកគេមានសំណើមួយចំនួនទៀតសម្រាប់រដ្ឋាភិបាលផងដែរ។ លោក ស៊ីណា បានមានប្រសាសន៍ថា “នៅក្នុងលិខិតនេះ មេដឹកនាំសហជីពក៏នឹងស្នើឲ្យរដ្ឋាភិបាលបញ្ឈប់ការប្រើហិង្សាលើកម្មករយើង អំឡុងការតវ៉ា និងឈប់គំរាមមេដឹកនាំសហជីពយើងដែរ។ យើងស្នើឲ្យនិយោជកអនុញ្ញាតឲ្យមេដឹកនាំសហជីព និងតំណាងរបស់យើងវិលត្រឡប់ទៅធ្វើការវិញ បន្ទាប់ពីពួកគេត្រូវបានចោទប្រកាន់ថាបានញុះញង់កម្មករឲ្យធ្វើកូដកម្ម”។
លោកបានអះអាងថា រោងចក្រជាច្រើននៅទូទាំងប្រទេសបាន និងកំពុងតែបដិសេធមិនអនុញ្ញាតឲ្យតំណាងសហជីពរបស់ខ្លួនទៅធ្វើការនៅក្នុងសប្តាហ៍នេះ ប៉ុន្តែមិនបានផ្តល់សេចក្តីលម្អិតឡើយ។ រោងចក្រជាង១០០បានដាក់ពាក្យបណ្តឹងទៅសាលាដំបូងរាជធានី ដើម្បីប្តឹងសហជីពចំនួនប្រាំមួយ ដោយចោទសហជីពទាំងនោះថា បានញុះញង់ក្រុមអ្នកតវ៉ាឲ្យប្រើ អំពើហិង្សា។
ទាក់ទងនឹងការចរចាបន្ថែមទៀតអំពីប្រាក់ឈ្នួលអប្បបរមានេះ មន្ត្រីមួយរូបនៅក្រសួងការងារ និងបណ្តុះបណ្តាលវិជ្ជាជីវៈ បានលើកឡើងកាលពីម្សិលមិញថា លោកមិនត្រូវបានអនុញ្ញាតឲ្យឆ្លើយសំណួររបស់អ្នកសារព័ត៌មានទេ។ លោក ប្រាក់ ចាន់ធឿន អគ្គនាយក នៃអគ្គនាយកដ្ឋានដោះស្រាយវិវាទការងារនៅក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ក្រសួងកំពុងរៀបចំផែនការជួបជាមួយសហជីពទាំងនេះនាពេលឆាប់ៗនេះ ក៏ប៉ុន្តែគ្រាន់តែជុំរុញឲ្យពួកគេឈប់តវ៉ាទៀតប៉ុណ្ណោះ។ លោកបានមានប្រសាសន៍ថា “យើងនឹងមិនជជែកអំពីប្រាក់ឈ្នួលទេ យើងនឹងគ្រាន់តែពន្យល់ពួកគេកុំឲ្យញុះញង់កម្មករឲ្យធ្វើការតវ៉ាប៉ុណ្ណោះ”។
សមាគមរោងចក្រកាត់ដេរនៅកម្ពុជា ហៅកាត់ថា GMAC បានឲ្យដឹងថា ខ្លួនមិនចូលរួមការចរចាអំពីប្រាក់ឈ្នួលអប្បបរមាជាមួយសហជីពទាំងនេះទេ ពីព្រោះពួកគេគ្រាន់តែតំណាងឲ្យសហជីពភាគតិចក្នុងវិស័យនេះប៉ុណ្ណោះ។ លោក កែន លូ អគ្គលេខាធិការសមាគមGMAC បានមានប្រសាសន៍ថា “យើងមិនចរចាជាមួយសហជីពភាគតិចទេ”។ លោកបានឲ្យដឹងបន្ថែមទៀតថា “នៅក្នុងយន្តការណាមួយក៏ដោយ យើងគួរចរចាតែជាមួយសំឡេងភាគច្រើនប៉ុណ្ណោះ”។
ទោះជាយ៉ាងណា លោក កែន លូ នឹងចូលរួមកិច្ចប្រជុំគណៈកម្មាធិការប្រឹក្សាការងារតែប៉ុណ្ណោះ ប្រសិនបើមានការអំពាវពីក្រសួងការងារនិងបណ្តុះបណ្តាលវិជ្ជាជីវៈ។ ទាក់ទងទៅនឹងសេចក្តីអះអាងរបស់សហជីពថា តំណាងរបស់ខ្លួនមិនត្រូវបានអនុញ្ញាតឲ្យត្រឡប់ទៅធ្វើការវិញ លោក កែន លូ បានថ្លែងថា ការចោទប្រកាន់នេះទូទៅពេកហើយ ហើយថា សហជីពនឹងត្រូវផ្តល់ឲ្យ GMAC នូវសេចក្តីលម្អិត មុនពេលខ្លួនអាចស៊ើបអង្កេត៕ ប៊ុននី
(រាយការណ៍បន្ថែមដោយ Zsombor Peter)