អ្នកនាំពាក្យគណបក្សសង្គ្រោះជាតិបានលើកឡើងកាលពីម្សិលមិញថា លោក សម រង្ស៊ី និងលោក កឹម សុខា មេដឹកនាំគណបក្សប្រឆាំងត្រូវបង្ហាញខ្លួននៅចំពោះមុខសាលាដំបូងរាជធានីភ្នំពេញតាមការគ្រោងទុកនៅព្រឹកនេះបន្ទាប់ពីរកបានមេធាវីថ្មី។
លោក សម រង្ស៊ី និងលោក កឹម សុខា ព្រមទាំងលោក រ៉ុង ឈុន និងលោក អាត់ ធន់ មេដឹកនាំសហជីពនឹងត្រូវសាកសួរចំពោះការចោទប្រកាន់ថា បានញុះញង់កម្មកររោងចក្រកាត់ដេរឲ្យចូលរួមធ្វើការតវ៉ាកាលពីថ្ងៃទី៣ ខែមករា ហើយក្នុងការតវ៉ានោះនគរបាលបានបាញ់សម្លាប់កម្មករប្រាំនាក់។ លោក សម រង្ស៊ី បានមានប្រសាសន៍កាលពីថ្ងៃអាទិត្យថា គណបក្សរបស់លោកនឹងស្វែងរកមេធាវីថ្មីបន្ទាប់ពីលោក ជូង ជូងី មេធាវីដំបូងរបស់ពួកគាត់នោះមានប្រសាសន៍ថា លោកជាប់រវល់ដោះស្រាយរឿងក្ដីផ្សេង ហើយបានស្នើឲ្យតុលាការពន្យារពេលការសាកសួរនៅថ្ងៃនេះ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មានប្រសាសន៍កាលពីម្សិលមិញថា លោកទាំងពីរនឹងត្រូវតំណាងដោយលោកមេធាវី កែត ឃី ដែលជាសមាជិកសភាគណបក្ស សម រង្ស៊ី កាលពីអាណត្តិមុន។ លោកបានមានប្រសាសន៍ថា “លោក សម រង្ស៊ី ប្រធានគណបក្សសង្គ្រោះជាតិ និងលោក កឹម សុខា អនុប្រធាននឹងបង្ហាញខ្លួននៅតុលាការ ដោយមានលោក កែត ឃី មេធាវីតំណាងលោកទាំងពីរ ហើយគ្មានអ្វីផ្លាស់ប្ដូរឡើយ”។
លោក កែត ឃី បានមានប្រសាសន៍ថា លោក ហៀង សុភក្ត្រ ព្រះរាជអាជ្ញារងនឹងសាកសួរកូនក្ដីរបស់លោកដាច់ដោយឡែកពីគ្នា ដោយលោក កឹម សុខា បង្ហាញខ្លួននៅម៉ោង៩ព្រឹក ហើយលោក សម រង្ស៊ី បង្ហាញខ្លួននៅម៉ោង១០ព្រឹក។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍ថា មន្ត្រីកងរាជអាវុធហត្ថនឹងទៅរក្សាសន្តិសុខនៅជុំវិញតុលាការនោះ ប៉ុន្តែមិនបានបញ្ជាឲ្យបំបែកក្រុមណាមួយដែលបានចេញមកគាំទ្រមេដឹកនាំទាំងពីររូបនេះឡើយ។ លោកឧត្តមសេនីយ៍ត្រី ខេង ទីតូ បានមានប្រសាសន៍ថា “កងរាជអាវុធហត្ថនឹងត្រូវដាក់ពង្រាយដើម្បីរក្សាសន្ដិសុខ។ មិនមានការដាក់កម្លាំងច្រើនទេ ហើយពួកគេនឹងមិនផ្ដោតលើអ្នកតវ៉ាឡើយ”។
កាលពីដើមខែនេះ រដ្ឋាភិបាលបានចេញបម្រាមហាមឃាត់មិនឲ្យមានការជួបជុំគ្នាជាសាធារណៈដែលមានមនុស្សចាប់ពី១០នាក់ឡើងទៅ។
លោក សម រង្ស៊ី បានមានប្រសាសន៍ថា លោកនិងលោក កឹម សុខា មិនអាចហាមឃាត់អ្នកគាំទ្រមិនឲ្យធ្វើដំណើរទៅមុខតុលាការបានឡើយ។ លោក សម រង្ស៊ី បានមានប្រសាសន៍ថា “យើងមិនបានស្នើសុំឲ្យនរណាម្នាក់មកទេ ហើយក៏មិនបានជំរុញប្រជាពលរដ្ឋឲ្យមកដែរ ប៉ុន្តែយើងមិនអាចហាមឃាត់ពួកគាត់មិនឲ្យមកបានទេ។ វាជាសេរីភាពរបស់បុគ្គលគ្រប់រូបដែលចង់ធ្វើអ្វីដែលខ្លួនចង់”។
កាលពីម្សិលមិញ គណៈប្រតិភូសហភាពអឺរ៉ុបប្រចាំរាជធានីភ្នំពេញក៏បានចេញ “សេចក្តីប្រកាសបន្ទាន់មួយ” បញ្ជាក់ថា លោក ហ្សង់ ហ្វ្រង់ស័រ កូតាំង ឯកអគ្គរដ្ឋទូតរបស់ខ្លួននឹងមិនទៅតុលាការអមលោក សម រង្ស៊ី និងលោក កឹម សុខា នៅថ្ងៃនេះដើម្បីបង្ហាញពីការគាំទ្ររបស់លោកឡើយ។ សេចក្ដីប្រកាសនេះបានលើកឡើងថា គណៈប្រតិភូ…សូមបញ្ជាក់ថា ព័ត៌មានចុះផ្សាយនៅក្នុងគេហទំព័រហ្វេសប៊ុកឈ្មោះថា “គណៈបក្សសង្គ្រោះជាតិ សុធាណា” ដែលលើកឡើងថា ឯកអគ្គរដ្ឋទូតសហភាពអឺរ៉ុបនឹងចូលរួមការសាកសួរនៅតុលាការនោះ…ជារឿងមិនពិតទាល់តែសោះ”៕ សារុន