កាលពីម្សិលមិញ សហជីពសេរីកម្មករ បានចេញផ្សាយរបាយការណ៍អំពីកំណើនសរុបនៃចំនួនកូដកម្មនៅតាមសាខាមូលដ្ឋានរបស់ខ្លួនកាលពីឆ្នាំមុន ពោលគឺចំនួនកូដកម្មសរុបបានកើនឡើងដល់១៣៦ ក្នុងរយៈពេល១១ខែដើមឆ្នាំ២០១៣ បើប្រៀបធៀបជាមួយឆ្នាំ២០១២ដែលមាន១០១កូដកម្ម ដែលសមាជិករបស់ខ្លួនបានធ្វើ ឬក៏កើនឡើង៣៥ភាគរយ បើធៀបរវាងឆ្នាំទាំងពីរនេះ។
បើបូកបញ្ចូលកូដកម្មទាំង២៤១ដែលធ្វើឡើងដោយសមាជិកសហជីពសេរីកម្មករកាលពីខែធ្នូ អំឡុងកូដកម្មទូទាំងប្រទេស ដែលបានបណ្តាលឲ្យនគរបាលបាញ់សម្លាប់កម្មករប្រាំនាក់ និងបាញ់ឲ្យរងរបួសជាង៤០នាក់ផ្សេងទៀត កាលពីថ្ងៃទី៣ ខែមករា សហជីពនេះបានរាយការណ៍ថា កូដកម្មមានចំនួន៣៨១ កាលពីឆ្នាំមុន។
លោក ជា មុនី ប្រធានសហជីពសេរីកម្មករបានឲ្យដឹងថា ស្ថានភាពកាន់តែច្របូកច្របល់ក្នុងវិស័យកាត់ដេរក្នុងចំណោមកម្មករជាសមាជិករបស់ខ្លួន ដោយសារតែថ្លៃចំណាយក្នុងការរស់នៅកើនឡើង។ លោកបានមានប្រសាសន៍ថា “មានកូដកម្មនិងសកម្មភាពតវ៉ាកើនឡើងកាន់តែច្រើន ដោយសារតែអតិផរ ណា ទើបកម្មករត្រូវទាមទារប្រាក់ខែខ្ពស់ជាងមុន។ ក្នុងពេលជាមួយគ្នានេះដែរ កម្មកររោងចក្រក៏ត្រូវបានបង្ខំឲ្យធ្វើការបន្ថែមម៉ោងទៀតផង”។
ដើម្បីកាត់បន្ថយកូដកម្មទាំងនេះ លោក ជា មុនី បានសំណូមពរឲ្យ រដ្ឋាភិបាល និងម្ចាស់រោងចក្របញ្ឈប់ការគំរាមកំហែង និងបញ្ឈប់សកម្មជនសហជីពពីការងារ ហើយសិក្សាអំពីដើមចមនៃកូដកម្មទាំងនេះ ដូចជា ប្រាក់ខែតិច និងការងារបន្ថែមម៉ោង។
លោក ដេវ វេល (Dave Welsh) នាយកប្រចាំប្រទេសមជ្ឈមណ្ឌលអាមេរិកសម្រាប់សាមគ្គីភាពពលកម្ម បានលើកឡើងថា កំណើននៃកូដកម្មទាំងនេះ គឺជាលទ្ធផលផ្ទាល់នៃបរាជ័យរបស់រដ្ឋាភិបាលក្នុងការដោះស្រាយវិវាទនៅក្នុងវិស័យកាត់ដេរ និងការអនុវត្តច្បាប់ការងារនៅក្នុងរោងចក្រ។ លោកបានមានប្រសាសន៍ថា “ [វិស័យកាត់ដេរ] ពិតជាមានកូដកម្មកើតឡើងច្រើនមែន ដោយសារតែវិស័យនេះមានការអនុវត្តច្បាប់ការងារតិចតូច និងការអនុវត្តគោលការណ៍ចរចាសមូហភាព ហើយការគំរាមកំហែងអ្នករៀបចំសហជីពមានកម្រិតខ្ពស់”។
លោក ដេវ បានមានប្រសាសន៍បន្តទៀតថា “ដូច្នេះ ប្រសិនបើ[រោងចក្រ] កាត់បន្ថយបញ្ហាទាំងនេះ ពួកគេនឹងប្រហែលជាឃើញថា ចំនួនកូដកម្មថយចុះ”។
សមាគមរោងចក្រកាត់ដេរនៅកម្ពុជា ហៅកាត់ថា GMAC ដែលជាតំណាងរោងចក្រកាត់ដេរសម្លៀកបំពាក់ និងស្បែកជើងជាង៤០០នៅក្នុងប្រទេសនេះបានរាយការណ៍អំពីកូដកម្មក្នុងរយះពេល១១ខែដំបូងនៃឆ្នាំ២០១៣ ជាហេតុបណ្តាលឲ្យមានការបាត់បង់ការងាររយៈពេល៨២៦.០០០ថ្ងៃ។
លោក កែន លូ អគ្គលេខាធិការសមាគម GMAC បានលើកឡើងថា GMAC ជឿថា រាល់កូដកម្មដឹកនាំដោយសហជីពកាលពីឆ្នាំមុន គឺជាកូដកម្មខុសច្បាប់។ លោកបានថ្លែងថា “ពោលគឺថា ចំនួនកូដកម្មមិនមែនជាក្តីកង្វល់ទេ។ ក្តីបារម្ភគឺថា ចំនួនកូដកម្មធ្វើឡើងដោយខុសច្បាប់។ សហជីពមិនដែលគោរពច្បាប់ទេ។ ពួកគេជានិច្ចកាលតែងតែរំលោភច្បាប់”។
លោក កែន លូ បានមានប្រសាសន៍បន្តថា “គ្មានអ្វីត្រូវធ្វើជាមួយនិយោជកដែលមិនគោរពច្បាប់មុនទេ ឬក៏និយោជកដែលបដិសេធមិនជួបចរចា។ នោះជារឿងផ្សេង។ រឿងគឺថា…ដោយមិនគិតពីហេតុផលរបស់ខ្លួន [សហជីពត្រូវតែ] ធ្វើកូដកម្មឲ្យបានត្រឹមត្រូវតាមនីតិវិធីច្បាប់”។
លោកប្រាក់ ចាន់ធឿន អគ្គនាយកអគ្គនាយកដ្ឋានដោះស្រាយវិវាទការងារនៅក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា ដើម្បីកាត់បន្ថយកូដកម្មនៅឆ្នាំក្រោយ រដ្ឋាភិបាលនឹងអប់រំកម្មករឲ្យទទួលយកប្រាក់ឈ្នួលអប្បបរមា១០០ដុល្លារ។ លោក ចាន់ធឿន បានមានប្រសាសន៍ថា “ទាក់ទងនឹងប្រាក់ខែវិញ រដ្ឋាភិបាលបានរៀបចំសម្រាប់កម្មករទាំងអស់រួចស្រេចហើយ ប៉ុន្តែពួកគេចាំបាច់ត្រូវយល់ឲ្យបានច្បាស់”។
សហជីពមិនគាំទ្ររដ្ឋាភិបាលចំនួនប្រាំមួយនេះ ដែលដឹកនាំកូដកម្ម និងបាតុកម្មកាលពីខែមុន បានបដិសេធមិនទទួលយកប្រាក់ឈ្នួលអប្បបរមា១០០ដុល្លារក្នុងមួយខែនេះ ហើយបានសន្យាថា នឹងធ្វើកូដកម្មបន្តទៀត ប្រសិនបើរដ្ឋាភិបាល និងសមាគម GMAC មិនព្រមជួបគ្នាសម្រាប់ការចរចាថ្មីទេនោះ៕ សុធា
(រាយការណ៍បន្ថែមដោយ Colin Meyn)