36 C
Phnom Penh

ឯកអគ្គរដ្ឋទូត​សាធារណរដ្ឋប្រជាមានិតចិនរិះ​គន់​ដំណើរ​ទស្សនកិច្ច​គោរព​វិញ្ញាណក្ខន្ធ

ដោយ ឌឹ ខេមបូឌា ដេលី

បទវិភាគ

លោកស្រី​ ពូ ជៀនហ្គូ (Bu Jianguo) អគ្គ​រដ្ឋទូត​សាធារណរដ្ឋប្រជាមានិត​ចិន​ប្រចាំ​នៅ​ព្រះ​រាជាណាចក្រ​កម្ពុជា បាន​វាយ​ប្រហារ​ ​ទៅ​លើ​លោកនាយករដ្ឋ មន្ត្រី​ជប៉ុន ស៊ីនហ្សូ អាបេ (Shinzo Abe) តាម​លិខិត​មួយ​ច្បាប់​ដែល​ត្រូវ​បាន​បោះ​ពុម្ព​ផ្សាយ កាលពី​ម្សិលមិញ​នៅ​ក្នុង​សារព័ត៌មាន​ភាសា​ខ្មែរ​ជុំ​វិញដំណើរ​ទស្សន​កិច្ច​របស់​លោក​​ ទៅ​កាន់​ទីសក្ការ​​បូជា កាលពី​ខែ​មុន​  ដើម្បី​គោរព​វិញ្ញាណ​ក្ខន្ធ​ជន​ជាតិ​ជប៉ុន​ ដែល​បាន​ទទួល​មរណភាព​អំឡុង​សង្គ្រាម​​របស់​ប្រទេស​ជប៉ុន​។ ​

លោក ស៊ីន ហ្សូអាបេ បាន​ធ្វើ​ទស្សនកិច្ច​ទៅ​កាន់​ទី​សក្ការ​បូជា​ យ៉ាស៊ូគុនី (Yasukuni Shrine) កាលពី​ចុង​ខែ​ធ្នូឆ្នាំ​មុន ដែល​នេះ​ជា​សកម្មភាព​មួយ​ធ្វើ​ឲ្យ​មាន​ផល​ប៉ះ​ពាល់​អវិជ្ជ​មានភ្លាមៗ​ទៅ​លើ​ទំនាក់​ទំនង​ដ៏​រឹង​មាំ​ស្រាប់​រវាង​ប្រទេស​ជប៉ុន​ និង​ប្រទេស​ចិន​។ ក្នុង​ចំណោម​អ្នក​ដែល​ស្លាប់​ដោយ​សារ​សង្គ្រាម​ចំនួន​២,៥លាន​នាក់​ដែល​ត្រូវ​បាន​គោរព​វិញ្ញាណ​ក្ខន្ធ​នោះ មាន​ឧក្រិដ្ឋជន​សង្គ្រាម​ជា​ច្រើន​នាក់​នៅ​ពីក្រោយ​អំពើ​ឈ្លាន​ពាន និង​​អំពើ​កាន់​កាប់​ដ៏​ខ្លាំង​ក្លា​ពី​សំណាក់​ប្រទេស​ជប៉ុន​ ទៅ​លើ​ប្រទេសចិន​អំឡុង​សង្គ្រាម​លោក​លើក​ទី​២។

នៅ​ក្នុង​លិខិត​ចុះ​ផ្សាយ​​​ក្នុង​សារព័ត៌​មាន​ខ្មែរ​ដេលី លោកស្រី​ ពូ ជៀនហ្គូ ​ហៅ​ដំណើរ​​ទស្សនកិច្ច​របស់លោក​ ស៊ីន ហ្សូអាបេ ថា ជា​ការ​រក​រឿង​យ៉ាង​ជាក់​ស្តែង​ ចំពោះ​ប្រជា​ជន​ដែល​ស្រឡាញ់​សន្តិភាព​នៅ​ទូទាំង​ពិភព​លោក​ និង​បាន​លើក​ឡើង​ថា ដំណើរ​ទស្សនកិច្ច​នេះ​ “កំពុង​តែ​បំផ្លាញ​ស្ថិរភាព​ និង​សន្តិភាព​ក្នុង​តំបន់​”។

ទាក់​ទង​​នឹង​ការ​ស្អប់​គ្នា​ជាច្រើន​ទសវត្សរ៍​មក​ហើយ​ដោយ​សា​រ​សង្គ្រាម​​​នោះ​ ប្រទេស​ទាំង​​ពីរ​បច្ចុប្បន្ន​ជា​គូបក្ខដិបក្ខ​នឹង​គ្នា​ ជុំ​វិញ​បញ្ហា​កោះ​ដែល​មាន​ជម្លោះ​រវាង​ប្រទេស​ទាំង​ពីរ​។ ប្រទេស​ទាំង​ពីរ​បាន​ និង​កំពុងខិត​ខំ​បង្កើន​ឥទ្ធិពល​ជាមួយ​បណ្តា​ប្រទេស​ក្នុង​តំបន់​អាស៊ី​អាគ្នេយ៍​ បូក​រួម​ទាំង​ប្រទេស​កម្ពុជា​ដែលចាត់​ទុក​ប្រទេស​ចិន​ជា​វិនិយោគិន​ដ៏​ធំ​បំផុត​ និង​ប្រទេស​ជប៉ុន​ជា​ម្ចាស់​ជំនួយ​បរទេស​ដ៏ មាន​សណ្តាន​ចិត្ត​ល្អ​បំផុត​របស់​ខ្លួន​ផង​ដែរ។

លោកស្រី​ ពូ ជៀនហ្គូ បាន​សរសេរ​ទាក់​ទង​​​ទៅ​នឹង​ដំណើរ​ទស្សនកិច្ច​របស់​លោក​នាយក​រដ្ឋមន្ត្រី​ជប៉ុនថា “ទង្វើ​នេះ​ពិត​ជា​មាន​ផល​ប៉ះ​ពាល់​អាក្រក់​យ៉ាង​ខ្លាំង​ និង​លាត​ត្រដាង​អាថ៌កំបាំងនៃ​មូល​ដ្ឋាន​នយោបាយ​ក្នុង​ទំនាក់​ទំនង​រវាង​ប្រទេស​ចិន​ និង​ប្រទេស​ជប៉ុន។​ទង្វើនេះក៏​ជា​ការ​ប្រមាថ​ខ្លាំងៗ​ទៅ​លើ​ប្រជា​ជនគ្រប់​រូប​ដែល​ធ្លាប់​រងគ្រោះ​ដោយ​សារ​អំពើ​​​​ឈ្លាន​ពាន​របស់​ក្រុម​យោធានិយម​ជប៉ុន”។

លោក ចេង ហុង​ប៉ូ (Cheng Hong Bo)​ ដែល​​ជាប្រធាន​ផ្នែក​នយោបាយ​នៅ​ស្ថានទូត​ចិន​បានលើក​ឡើង​ថា លោកស្រីឯកអគ្គរដ្ឋទូត​ចិន​បាន​សង្កត់​ធ្ងន់​ទៅ​លើ​ជម្លោះ​នេះ ពីព្រោះ​​​​ដំណើរ​ទស្សនកិច្ច​របស់​លោក ស៊ីន ហ្សូអាបេ ទៅកាន់​ទីសក្ការ​បូជា​នោះ ក៏​ជា​ការ​ប្រមាថ​ប្រជាជន​ខ្មែរ​ផង​ដែរ។ លោក​បាន​មាន​ប្រសាសន៍​ថា “ សង្គ្រាម​ឈ្លាន​ពាន​ធ្វើ​ឡើង​ដោយ​ក្រុម​យោធានិយម​ជប៉ុន​អំឡុង​សង្គ្រាម​លោក​លើក​ទី២​ មិន​មែន​​ត្រឹម​តែ​ធ្វើ​ឲ្យ​នឹក​ឃើញ​ដល់​គ្រោះ​មហន្ត​រាយ​ដល់​ប្រជាជន​ចិន​ដែល​គ្មាន​​ការ​បង្ហាញ​ប៉ុណ្ណោះ​​ទេ ថែម​ទាំង​នឹក​ឃើញ​ដល់​ការ​ឈឺចាប់​យ៉ាង​ខ្លាំង​ដែល​កើត​ឡើង​ទៅ​លើ​ប្រជាជន​ក្នុង​តំបន់​អាស៊ី រួម​ទាំង​តំបន់​អាស៊ី​អាគ្នេយ៍​ ដូចជា​ ប្រទេស​កម្ពុជា​ជាដើម​។​ដូច្នេះ​ ចាំបាច់​ត្រូវ​លាត​ត្រដាង​ការពិតទាំង​នេះ ​​​ឲ្យប្រជាជន​ក្នុង​ប្រទេស​បាន​ដឹង​”។

លោក ចេង បាន​ឲ្យ​ដឹងបន្ថែម​​ទៀត​ថា លិខិត​របស់​ឯកអគ្គរដ្ឋទូត​ចិន​ ត្រូវ​បាន​ចុះ​ផ្សាយ​នៅ​ក្នុង​សារព័ត៌មាន​ចំនួន​ពីរ​ និង​សារ​ព័ត៌មាន​ជា​ភាសា​ចិន​ចំនួន​បួន​នៅ​ប្រទេស​ចិន​។ លោក តាកាក់​ យូស៊ី គុរុមិយ៉ា (Takayoshi ​Kuro-​miya) ក្រុម​ប្រឹក្សា​ស្ថានទូត​ជប៉ុន​ បាន​អះ​អាង​ថា ដំណើរ​ទស្សនកិច្ច​របស់​ស៊ីន ហ្សូអាបេ មកកាន់​ទីសក្ការបូជា ត្រូវ​បាន​សមភាគី​ចិន​យល់​ខុស​។

លោក​បាន​មាន​ប្រសាសន៍​ថា “ចេតនា​របស់​លោក​ក្នុងការ​មក​ធ្វើ​ទស្សនកិច្ច​នៅ​ទី​សក្ការបូជា​ យ៉ាស៊ូគុនី គឺ​ដើម្បី​គោរព​វិញ្ញាណ​​ក្ខន្ធ​របស់​អ្នកដែល​ស្លាប់​ និង​សន្យា​ថា នឹងមិន​ធ្វើ​សង្គ្រាម​ទៀត​ទេ​។ អស់​រយៈពេល​៦៨​ឆ្នាំ​តាំងពី​សង្គ្រាម​លោក​លើក​ទី២មក​ ប្រទេស​​ជប៉ុន តែង​តែ​គោរព​សេរី​ភាព​ លទ្ធិប្រជាធិប​តេយ្យ​ និង​នីតិរដ្ឋ​ ហើយ​ថែម​ទាំង​បាន​ចូល​រួម​ចំណែក​ក្នុង​សន្តិភាព​ និង​វិបុល​ភាព​នៅ​តំបន់​​អាស៊ីយ៉ាង​ជាក់​ស្តែង​ទៀត​ផង​។ ប្រទេស​ជប៉ុន​ នឹង​មិនដើរ​តាម​ផ្លូវ​ផ្សេង​ទេ ក្នុង​នាម​ជា​រដ្ឋ​ដែល​មាន​សន្តិភាព​”៕ សុធា​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស