32 C
Phnom Penh

អ្នកភូមិ​ដែល​ជាប់​ពាក់​ព័ន្ធ​ក្នុង​​វិវាទដីធ្លីឃាត់ខ្លួន​កម្មករ​ក្រុមហ៊ុ​ន ​និង​ដក​ហូត​​​ឧបករណ៍រាវមីន

ដោយ ឌឹ ខេមបូឌា ដេលី

បទវិភាគ

អ្នក​​ភូមិ​និង​នគរ​បាល​បាន​លើក​ឡើង​ថា អ្នក​ភូមិ​ដែល​ជាប់​ពាក់ព័ន្ធ​ក្នុង​វិវាទ​ដីធ្លី​មួយ​ក្នុង​​ខេត្ត​បាត់​ដំបង​ កាលពី​ថ្ងៃ​ច័ន្ទ​បាន​ឃាត់​ខ្លួន​បុរស​ប្រាំមួយ​នាក់​បណ្តោះ​អាសន្ន ដែល​​ធ្វើ​ការ​ឲ្យ​ក្រុមហ៊ុន​កសិ​ពាណិ​ជ្ជ​កម្ម​មួយ​ ​នៅ​ពេល​ដែល​​ពួក​គេ​កំពុង​​ត្រៀម​រាន​ដី​​មាន​ជម្លោះ​។

យោង​តាម​លោក​ ប៉ែន​ សុផុន​ តំណាង​សហគមន៍​បាន​ឲ្យ​ដឹង​ថា កម្មករ​ប្រាំ​មួ​យ​នាក់​បាន​​ប្រើប្រាស់​ឧបករណ៍​រាវ​មីន​ ដើម្បីរុករក​យុទ្ធភណ្ឌ​មិន​ទាន់​ផ្ទុះ​នៅ​ក្នុង​តំបន់​នោះ​ ស្រាប់​ តែ​អ្នក​ភូមិ​ជាង​១០០​នាក់​មក​ពី​ឃុំ​បន្ទាយ​ឆ្មា ស្រុក​ថ្ម​ពួក បាន​ឡោម​ព័ទ្ធ​ពួក​គេ​ ហើយ​បាន​ឃាត់​ខ្លួន​ពួក​គេ​​រយៈ​ពេល​ខ្លី និង​បាន​ដក​ហូត​​ឧបករណ៍​​​​រាវមីន​​។

លោក​ សុផុន បាន​មានប្រសាសន៍​ថា អ្នក​ភូមិ​ដែល​ជាប់​ពាក់​ព័ន្ធ​ក្នុង​វិវាទ​ដីធ្លី​ជាមួយ​ក្រុមហ៊ុន​លាង​ប៊ូ​  ចាប់​តាំង​ពី​ឆ្នាំ​២០០៨​មក​ បន្ទាប់ពី​ដី​ទំហំ​១.៧០០​ហិក តា​នេះ​ត្រូវ​បាន​ផ្ដល់​​ជា​ដី​សម្បទាន​ ដែល​អ្នក​ភូមិ​ជាង​៥០០​គ្រួសារ​បាន​ធ្វើ​ស្រែ​ចម្ការ​ចាប់​តាំង​ពី​ឆ្នាំ ២០០០​មក​ម៉្លេះ​។ លោក​បាន​មាន​ប្រសាសន៍​ថា ត្រាក់​ទ័រ​ឈូសឆាយ​បាន​​រាន​ដី​ដែល​មាន​ជម្លោះ​នោះ​អស់​មួយ​ផ្នែក​ទៅហើយ​កាល​ពី​ខែ​មុន​ បន្ទាប់​​​ពី​កម្មករ​​បាន​មក​ដោះ​​មីន​នៅ​តំបន់​នេះ​។

លោក​បាន​មាន​ប្រសាសន៍​ថា “នេះជា​មូល​​​​ហេតុ​ដែល​យើង​​តវ៉ា​ ហើយ​ឃាត់​ខ្លួន​កម្មក​រទាំង​ប្រាំមួយ​នាក់​នេះ និង​ដក​ហូត​​ឧបករណ៍​រាវ​មីន​”។ លោក​បាន​បន្ថែម​ថា អ្នកភូមិ​បាន​ដោះ​លែង​កម្មករ​ទាំង​នោះ​វិញហើយ​​ បន្ទាប់ពី​​ពួក​គេ​សន្យា​ថា នឹង​ឈប់​រាវ​មីន​ទៀត​។

លោក​ យ៉ត រ៉ៃ អធិការ​នគរបាល​ស្រុក​ថ្មពួកបាន​អះអាង​ថា ក្រុមហ៊ុន​លាង​ប៊ូ បាន​កាន់​កាប់​ដី​នេះ ប៉ុន្តែ​ លោក​មាន​ប្រសា​សន៍​ថា​​​ លោក​មិន​អាច​ផ្ដល់​ព័ត៌មាន​លម្អិត​អំពី​ក្រុមហ៊ុន​ ឬ​ដី​សម្បទាន​នេះ​បាន​ឡើយ​។ លោក​បាន​មាន​ប្រសាសន៍​ថា “នគរ​បាលបានធ្វើការ​​អប់រំ​”​​​ អ្នក​ភូមិ​ដែល​បាន​ឃាត់​ខ្លួន​​កម្មក​រ​ទាំង​នោះ​​​​​​។​លោក​ យ៉ត រ៉ៃ បាន​មាន​ប្រសាសន៍​ថា “យើង​បាន​អប់​រំ​អ្នក​ភូមិ​ដែល​បាន​ទាម​ទារ​​សិទ្ធិ​កាន់កាប់​និ​ង​បាន​ប្រើប្រាស់​ដី​ដែល​មាន​វិវាទ​នេះ ​កុំ​ឲ្យ​ប្រើ​អំពើហិង្សា​ ឬ​ប៉ះពាល់​ដល់​អាយុ​ជីវិត​បុគ្គលិក​របស់​ក្រុម​ហ៊ុន​​”។

លោក​ សំ​​​ ចាន់​គា អ្នក​សម្រប​សម្រួល​អង្គការ​សិទ្ធិ​មនុស្ស​អាដហុក​ប្រចាំ​ខេត្ត​នេះ​បាន​​មាន​ប្រសាសន៍​ថា ក្រុមហ៊ុ​ន​មិន​បាន​ផ្ដល់​សំណង​ដល់​អ្នក​ភូមិ​ ដែល​​បាន​បាត់​បង់​ដី​ស្រែ​របស់​ខ្លួន​ឡើយ​។ លោក​បាន​មានប្រសាសន៍​បន្ថែម​ទៀត​ថា “ វិវាទដី​ធ្លី​ជាមួយ​​ក្រុមហ៊ុន​លាង​ប៊ូ​នេះ​កាន់​​​តែ​ធ្ងន់ធ្ងរ​ទៅ​ៗដោយ​សារ​​មិន​មាន​ដំណោះ​ស្រាយ​សម្រាប់​អ្នក​ភូមិ​ដែល​រង​ផល​ប៉ះពាល់​”។

លោក​ ផ្លេ​ក វ៉ារី​ អភិបាល​ស្រុក​​ថ្ម​ពួក​ បាន​មានប្រសាសន៍​ថា គណៈកម្មាធិការ​មួយ​ដែល​រួម​មាន​អាជ្ញាធរ​មូលដ្ឋាន​ រដ្ឋ​បាល​ព្រៃឈើ និង​មន្ទីរ​រៀប​ចំ​ដែន​ដី​និង​បរិស្ថានខេត្ត​​កំពុង​ធ្វើ​ការ​សម្រប​សម្រួល​រវាង​អ្នក​ភូមិ​និ​ង​ក្រុម​​​ហ៊ុន​លាង​ប៊ូ៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស