40.2 C
Phnom Penh

គម្រោង​សាង​សង់​មន្ទីរពេទ្យ​ជប៉ុន​ដែល​ត្រូវ​ចំណាយ​ទឹក​ប្រាក់​៣៥លាន​ដុល្លារ​

ដោយ ឌឹ ខេមបូឌា ដេលី

បទវិភាគ

យោង​តាម​បុគ្គលិក​មួយ​រូប​ដែល​ធ្វើការ​នៅ​ក្នុង​ក្រុម​ហ៊ុន​ជប៉ុន​ដែល​ទទួល​បន្ទុក​ការ​អនុវត្ត​គម្រោង​សាង​សង់​មជ្ឈមណ្ឌល​ថែទាំ​សុខភាព​កម្រិត​ស្តង់ដារ​អន្តរជាតិ​ក្នុង​រាជធានី​ភ្នំពេញ បាន​ឲ្យដឹង​ថាគម្រោង​នេះ​ត្រូវ​បាន​រំពឹង​ថា នឹង​ចាប់​ផ្តើម​អនុវត្ត​ក្នុង​ខែមេសា​ ហើយ​នៅ​ពេល​សកម្មភាព​សាង​សង់​ត្រូវ​បាន​​បញ្ចប់​ មជ្ឈមណ្ឌល​នេះ​នឹង​បំពាក់​​​បច្ចេក​​វិទ្យា​វេជ្ជសាស្ត្រ និង​ប្រើ​ធនធាន​មនុស្ស​ដែល​មាន​ការ​បណ្តុះ​បណ្តាល​ត្រឹម​ត្រូវ​។

លោកស្រី មីហូកុ ណាកាក់​យ៉ាម៉ាក់ (Mihoko Nakayama) ប្រធាន​គ្រប់​គ្រង​គម្រោង​ក្រៅ​ប្រទេស​ នៅ​វិទ្យាស្ថាន Kitahara Neurosurgical Institute Japan បាន​មាន​ប្រសាសន៍​កាលពីថ្ងៃ​ច័ន្ទ​ថា “គម្រោង​សាង​សង់​នេះ​នឹង​ចាប់​ផ្តើម​អនុវត្ត​ចាប់​ពី​ខែ​មេសា ឬ​ឧសភា ឆ្នាំ​២០១៤”។ លោកស្រី ណាកាក់យ៉ាម៉ាក់ បាន​ឲ្យ​ដឹង​ទៀត​ថា មន្ទីរពេទ្យ​ដែល​ជា​គម្រោង​មួយ​របស់​ក្រុមហ៊ុន​មន្ទីរពេទ្យ​អន្តរជាតិ​ Kitahara Interna tional Hospital ដែលមាន​មូលដ្ឋាន​នៅ​ប្រទេស​ជប៉ុន​នេះ នឹង​ត្រូវ​បាន​សាង​សង់​នៅ​សង្កាត់​ជ្រោយ​ចង្វារ​ ក្នុង​រាជធានីភ្នំពេញ ដោយ​ត្រូវ​ធ្វើ​ដំណើរ​តាម​ផ្លូវ​គោក​ឆ្លង​កាត់​ស្ពាន​មិត្ត​ភាព​​កម្ពុជា-ជប៉ុន ហើយ​គម្រោងសាង​សង់​​នេះ​នឹង​ត្រូវ​ចំណាយ​ប្រាក់​៣៥លាន​ដុល្លារ​។

នេះគឺ​ជា​លើក​ដំបូង​ហើយ​ ​ដែល​បុគ្គលិក​របស់​ក្រុម​ហ៊ុន​មន្ទីរពេទ្យ​ផ្តល់​ព័ត៌មាន​លម្អិត​ ទាក់​ទង​នឹ​ង​គម្រោង​នេះ តាំង​ពី​លោកនាយក​រដ្ឋមន្ត្រី​ជប៉ុន ស៊ីនហ្សូ អាបេ (Shinzo Abe) បាន​ប្រកាស​គម្រោង​នេះ​ អំឡុង​ដំណើរ​ទស្សន​កិច្ច​​របស់​លោក​មក​កាន់​ប្រទេសកម្ពុជា​កាល​ពី​ខែ​វិច្ឆិកា​ឆ្នាំ​មុន​ ក៏​ប៉ុន្តែ គ្រាន់​តែ​បាន​និយាយ​បន្តិច​បន្តួច​ទាក់​ទង​នឹ​ង​គម្រោង​នេះ​ប៉ុណ្ណោះ​។

លោកស្រី ណាកាក់​យ៉ាម៉ាក់ បាន​លើក​ឡើង​ថា កង្វះ​ប្រព័ន្ធ​វេជ្ជសាស្រ្ត​នៅ​ប្រទេស​កម្ពុជា​ និង​តម្រូវ​ការ​ដ៏​ច្រើន​ក្នុង​ចំណោម​ប្រជា​ជន​ខ្មែរ​ ដែល​ត្រូវ​ការ​សេវាថែទាំ​សុខភាព​ គឺ​ជា​មូលហេតុ​ចម្បង​ដែល​ក្រុមហ៊ុន Kitahara សម្រេច​ចិត្ត​បើក​មន្ទីរពេទ្យ​មួយ​នៅ​ក្នុង​រាជ​ធានីភ្នំពេញ។ លោកស្រី​បានមាន​ប្រសា​សន៍​បន្ត​ទៀត​ថា “ដោយ​សារ​តែ​ការ​អភិវឌ្ឍហេដ្ឋា​រចនា​សម្ព័ន្ធ​វេជ្ជសាស្រ្ត​នៅ​ក្រៅ​កំណើន​សេដ្ឋកិច្ច​ដ៏​លឿន​របស់​ប្រទេសកម្ពុជា​ ប្រជាជន​ដែល​ត្រូវ​ការ​សេវា​ថែទាំ​សុខភាព​ និង​មាន​លទ្ធ​ភាព​បង់​ថ្លៃ​សេវា​កម្ម​ទៅ​ក្រៅ​ប្រទេស​ ដើម្បី​ទទួល​បាន​សេវា​ព្យាបាល​។ ម្យ៉ាងវិញ​ទៀត​ ប្រជា​ជន​ជាច្រើន​ដែល​មាន​ជីវភាព​ក្រីក្រ​ មិន​អាច​ទទួល​បា​ន​សេវាថែទាំ​សុខភាព​គ្រប់​គ្រាន់​នៅ​​ក្នុង​ប្រទេស​របស់​ខ្លួន​ឡើយ​​​”។

លោកស្រីណាកាក់​យ៉ាម៉ាក់ បាន​ឲ្យ​ដឹង​បន្ថែមទៀត​​​ថា មន្ទីរពេទ្យ​នេះ​នឹង​ផ្តល់​សេវា​សង្គ្រោះ​​​​បន្ទាន់​ សេវាវះកាត់​ប្រព័ន្ធ​សរសៃ​ប្រសាទ​ និង​សេវា​ពិនិត្យ​ជំងឺ​ទូទៅ​ ព្រម​ទាំង​លក់​ឱសថ​ទូទៅ​ផង​ដែរ។ លោកស្រីបាន​បន្ត​ថា មន្ទីរពេទ្យ​នេះ​នឹង​ជួយ​បណ្តុះ​បណ្តា​ល​​​បុគ្គលិក​ជាតិ​ឲ្យ​យល់​ដឹង​អំពី​ឱសថ​សម័យ​ទំនើប​។លោកស្រី​បាន​មាន​ប្រសាសន៍​ថា “អ្វី​ដែល​យើង​កំពុង​ព្យាយាម​ធ្វើ​នៅ​ទីនេះ​ មិន​មែន​គ្រាន់​តែ​ដើម្បី​បង្កើត​មន្ទីរពេទ្យ​ប៉ុណ្ណោះ​​ទេ​ ប៉ុន្តែ​ ថែម​ទាំង​ដើម្បី​បណ្តុះ​បណ្តាល​អ្នក​អាជីព​ផ្នែក​វេជ្ជសាស្ត្រ​ក្នុង​ស្រុក​ និង​ខិត​ខំ​ពង្រឹង​សមត្ថភាព​ផ្នែក​វេជ្ជសាស្រ្ត​ នៅ​ក្នុង​ប្រទេស​កម្ពុជា​ផង​ដែរ”។

លោកស្រី ណាកាក់យ៉ាម៉ាក់ បានមាន​ប្រសាសន៍​បន្ត​ទៀត​ថា “ វេជ្ជបណ្ឌិត​ជប៉ុន​ និង​បុគ្គលិក​វេជ្ជសាស្ត្រ​ផ្សេងៗទៀត​នឹង​ត្រូវ​បាន​បញ្ជូន​មក​នៅ​ពេល​ចាប់​ផ្តើម​ដំណើរ​ការ​​ក៏​ប៉ុន្តែ ច្បាស់​ណាស់​ យើង​នឹង​បណ្តុះ​បណ្តា​ល​​​ ប្រជាជន​កម្ពុជា​ ដើម្បី​ជួយ​រក្សា​កម្រិត​ស្តង់​ដារ​វេជ្ជសាស្ត្រ​អន្តរជាតិ​។ យើង​នឹង​ផ្តោត​សំខាន់​ទៅ​លើ​ការ​បណ្តុះ​បណ្តា​ល​​​ផ្នែក​វេជ្ជ​សាស្ត្រ​នៅ​ មុន​ និង​ក្រោយ​ការ​បង្កើត​មន្ទីរ​ពេទ្យ​នេះ​”។

យោង​តាម​ឯកសារ​ដែល​ត្រូវ​បាន​ផ្សព្វ​ផ្សាយ​តាម​គេហទំព័រ​របស់​ក្រសួង​សេដ្ឋកិច្ច​ ពាណិជ្ជកម្ម​ និង​ឧស្សាហកម្ម​ជប៉ុន​ បាន​បង្ហាញ​ថា មន្ទីរពេទ្យ​នេះ​ទំនង​ជា​ស្ថិត​ក្នុង​គម្រោង​ផ្តួច​ផ្តើម​របស់​ប្រទេស​នេះ​ ក្នុងការ​ពង្រីក​វិសាល​ភាព​សេវា​វេជ្ជសាស្ត្រ​របស់​ខ្លួន​លើ​ទីផ្សារ​អន្តរជាតិ​។ ឯកសារ​នោះ​មាន​ឈ្មោះ​ថា ឧត្តមភាព​ផ្នែក​វេជ្ជសាស្ត្រ​របស់​ជប៉ុន។ មន្ទីរពេទ្យ​នេះ​ត្រូវ​បាន​រំពឹង​ថា នឹង​ចាប់​ផ្តើម​ដំណើរ​ការ​នៅ​ក្នុង​ខែមេសា ឆ្នាំ​២០១៥៕
សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស