27.5 C
Phnom Penh

ក្រុមហ៊ុន​ផ្តល់​​​សេវា​​​បាឡុង​ហោះ​លើ​​​​បរិវេណ​ប្រាសាទ​អង្គរ​​​ត្រូវបាន​​​អនុញ្ញាត​​​​​​ឲ្យ​​​ផ្តល់​​​សេវា​​​នេះ​​​វិញ

ដោយ ឌឹ ខេមបូឌា ដេលី

បទវិភាគ

មន្ត្រី​ម្នាក់​បានឲ្យ​​​ដឹង​​​​កាល​ពី​ម្សិល​មិញ​ថា​ ក្រុម​ហ៊ុន​​​​ផ្តល់​​​សេវា​​​បាឡុង​ហោះ​នៅក្នុង​ខេត្ត​សៀម​​រាប​ បាន​ចាប់​ផ្តើម​​​​ផ្តល់​​​សេវា​​​នេះ​​​​ឡើង​​​វិញ​ហើយ ​នៅ​សប្តាហ៍ នេះ​ គឺ​រយៈពេល​ប្រាំបួន​ខែ​បន្ទាប់ ​ពី​បាឡុង​ហោះ​លើ​បរិវេណ​ប្រាសាទ​អង្គរមួយ​​​​​​​ដែល​មាន​ភ្ញៀវ​ទេសចរ​​​​​១៧នាក់​​​​​ជិះ​​​​​​ក្នុង​​​នោះ បាន​ធ្លាក់​​បណ្តាល​ឲ្យ​មនុស្ស​​ប្រាំបួន​នាក់​រង​រ​បួស​។

ក្រុមហ៊ុន​ Cambodia Flight Holiday International របស់​​​​ចិននេះ​​​​ គឺ​​​​​​ជាក្រុម​ហ៊ុន​តែ​មួយ​គត់​ដែល​ផ្តល់​​​សេវា​​​បាឡុង​ហោះ​លើ​បរិវេណ​ប្រាសាទ​អង្គរ​វត្ត​។
ប៉ុន្តែ​ អាជ្ញាធរ​បានផ្អាក​​​អាជីវកម្ម​​​របស់​​​ក្រុម​ហ៊ុន​​នេះ​ភ្លាម​ៗ​បន្ទាប់ពី​មាន​ឧបទ្ទវ​ហេតុ​  មួយ​​​កាល​ពី​ថ្ងៃ​ទី​២៦ ខែ​មីនា ​ពេលខ្យល់​ខ្លាំង​ហួស​​​​ពី​​​ការ​​​រំពឹង​​​ទុក​​​​​​បាន​បង្ខំឲ្យ​អ្នក​បញ្ជា​បាឡុង​ធ្វើការ​ចុះ​ចត​​ជា​បន្ទាន់​ ​បណ្តាល​ឲ្យ​​​មនុស្ស​ប្រាំបួន​នាក់​រង​របួស ក្នុង​​​នោះ​​​មាន​​​​ពីរ​នាក់​រង​​រ​បួស​ធ្ងន់។

លោក កែវ ស៊ីវន អនុរដ្ឋ​លេខាធិការ​នៅ​លេខាធិការ​ដ្ឋាន​អាការ​ចរណ៍ស៊ីវិល​​បាន​មាន​ប្រសា​សន៍​ថា “ឧបទ្ទវហេតុធ្លាក់​បាឡុង​ហោះ​​​​​កាល​ពី​ឆ្នាំ​មុន​​បាន​កើត​ឡើង​ដោយ​សារ​តែ​មាន​ខ្យល់​ខ្លាំង​ និង​​​ប្រហែលជា​​​ដោយសារ​​​​បុគ្គលិក​​​​មាន​​​ការ​​​ធ្វេស​​​ប្រហែស​​​​ក្នុង​ការ​ប៉ាន់​ប្រមាណ​ពី​ល្បឿន​ខ្យល់”។ លោក​បាន​បន្ថែម​ថា អាជ្ញាធរ​អាកាស​ចរណ៍​ស៊ីវិល​បាន​ផ្អាក​​​​សេវា​​​របស់​​​ក្រុម​ហ៊ុន​នេះ​​រយៈពេល​ពីរថ្ងៃ​បន្ទាប់ពី​មាន​​​​ឧបទ្ទវ​ហេតុនោះ​​​។

ចាប់​តាំង​ពី​ពេល​នោះ​មក​ ក្រុម​ហ៊ុន​នេះ​បាន​សហការ​ជាមួយ​អាជ្ញាធរ​ ហើយ​បន្ទាប់​ពី​បាន​​​ឆ្លងកាត់​​​ការ​​​ហោះ​ហើរ​សាកល្បង​​​​រួច​​​មក​​​ក្រុមហ៊ុន​​​នេះត្រូវ​​​បាន​​​អនុញ្ញាត​​​ឲ្យ​បន្ត​សេវា​កម្ម​ឡើង​វិញ​​​នៅ​​​ក្នុង​​​សប្តាហ៍​​​នេះ​​​។

លោក ស៊ីវន បាន​មាន​ប្រសាសន៍ថា “យើង​ បាន​បង្ហោះ​បាឡុង​​​​ទាំងនោះ​​​សាកល្បង​រួច​​​ហើយ​ ហើយក្រុម​ហ៊ុន​មាន​ឯក​សារ​គ្រប់​គ្រាន់​ដូច​ជា ប័ណ្ណ​​​​ធា​នា​រ៉ាប់​រង​អាយុ​ជីវិត​សម្រាប់​​​​​​អ្នក​ជិះ​កម្សាន្តជាដើម​​​ ដូច្នេះហើយ​ទើប​​​យើងអនុញ្ញាត​ឲ្យ​ក្រុម​ហ៊ុននេះ​​​​​ផ្តល់​​​សេវាកម្ម​​​​​ឡើង​វិញ”។ លោក​បាន​បន្ថែមទៀត​ថា អាជ្ញាប័ណ្ណ​ថ្មី​សម្រាប់​​​​ក្រុម​ហ៊ុន​​​​នេះ​​​កំពុង​ត្រូវបាន​​​រៀបចំ​​​។

លោក ម៉ៅ វីសាន ដែល​ជា​ផ្នែក​នៃ​គណៈ​​​​គ្រប់​គ្រង​នៅ​ក្រុមហ៊ុន​ Cambodia Flight Holiday International​ ​បាន​​​​ឲ្យ​​​ដឹង​​​កាល​ពី​ម្សិល​មិញ​ថា ការ​បង្ហោះ​បាឡុង​បាន​ដំណើរការ​ឡើង​វិញ​ធម្មតា​​​ហើយ​​​។ លោក​បាន​មាន​ប្រសាសន៍ពី​ឧបទ្ទវ​ហេតុ​កាល​ពី​ខែ​មីនា​ថា “វាមិន​មែន​ជា​ការ​ធ្លាក់​ទេ គ្រាន់​តែ​ជា​គ្រោះ​ថ្នាក់​តិច​តួច​ប៉ុណ្ណោះ ហើយ​ យើង​កំពុង​យក​ចិត្តទុក​ដាក់​ចំពោះ​​​​អ្នក​ជិះ​កម្សាន្ត​​ដែល​បាន​​រង​របួស​​​​នៅ​​​ពេល​​​នោះ​​​តាម​ រយៈ​ក្រុម​ហ៊ុន​ធានា​រ៉ាប់​រង​របស់​យើង​”។

លោក​​មាន​ប្រសាសន៍​បន្ត​​​ថា​ “សុវត្ថិ​ភាព​គឺ​សំខាន់​ណាស់​សម្រាប់​យើង​ ប៉ុន្តែ​វិធាន​ការ​ការ​ពារ​សុវត្ថិភាព​របស់​យើង​​គឺ​ល្អ​​​ហើយ​ដោយ​​​​​​យើង​​បាន​​​សហការ​ជាមួយ​នាយក​ដ្ឋាន​អាកាស​ចរណ៍ស៊ីវិល​ និង​ភ្នាក់ងារ​​​ព្យាករ​​​អាកាស​ធាតុរហូត​​​​​​ទាល់​​​តែ​​​នៅ​​​សល់​​​​​​មួយ​​​ម៉ោង​​​មុនពេល​​​បាឡុង​​​ហោះ​​”។

អ្នកស្រី Malou Ojastro មក​ពី​ប្រទេស​ហ្វីលីពីន​ ដែល​​​ស្ថិត​​​ក្នុង​ចំណោម​អ្នក​រង​របួស​ក្នុង​ឧបទ្ទវហេតុ​នោះ​ បាន​សរសេរ​រៀប​រាប់​​អំពី​គ្រោះ​ថ្នាក់​នេះ​តាម​​​​គេ​ហ​ទំព័រ​ផ្ទាល់​ខ្លួន​របស់​ខ្លួន​​​ ដោយ​មាន​​​បង្ហាញ​រូបថតដែលថត​​​​​ក្នុង​បាឡុង​ហោះ​​​​​ពេល​​វា​​​​ធ្លាក់​ផង​​​ ហើយ​​​បាន​​​​រៀប​រាប់ពី​ការ​បាក់​ក​ដៃរបស់ខ្លួន​​​​។ អ្នក​ស្រី​បាន​បង្ហោះ​​​សារ​​​មួយ​នៅ​​​ក្នុង​​​គេហទំព័រ​​​នេះ​​​​​កាល​ពី​ខែ​មុន​ថា “ខ្ញុំ​មិនទាន់​ជា​សះស្បើយ​ទាំង​ស្រុង​ពី​របួស​ផ្លូវ​កាយ​ ផ្លូវ​អារម្មណ៍​និង​ផ្លូវ​ចិត្ត​របស់​​​ខ្ញុំ​​​នៅ​ឡើយ​ទេ​​​…ព្រោះរហូត​​មក​​​ទល់​​​នឹង​​​ថ្ងៃ​​​នេះ កម្ពស់ខ្ពស់​​​ៗ​​​​ ការ​​​ធ្វើ​​​ដំណើរ​​​តាម​​​​យន្ត​ហោះ​ និង​ការ​ធ្វើ​ដំណើរ​​​ទូទៅ​​​នៅ​តែ​ធ្វើ​ឲ្យ​ខ្ញុំ​ភ័យ​ខ្លាច​រាល់​​​លើក​​​”៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស