កាលពីម្សិលមិញ សាលាដំបូងរាជធានីបានបើកសវនាការជំនុំជម្រះរឿងក្តីរបស់បុរសបួននាក់ដែលត្រូវបានចោទប្រកាន់ថាបានរត់ពន្ធគ្រឿងញៀនមេតំហ្វេតាមីន១,៨គីឡូក្រាមចូលក្នុងប្រទេសកម្ពុជាពីប្រទេសឡាវ។
លោក សួស សំអាត ចៅក្រមស៊ើបអង្កេត បានមានប្រសាសន៍ថា ជនជាតិឡាវឈ្មោះ អំផន ខាំភូន អាយុ៣០ឆ្នាំ និងឈ្មោះ ខំបេ អាយុ៥២ឆ្នាំ ព្រមទាំងជនជាតិខ្មែរឈ្មោះ ណាត ថាំង អាយុ៣៦ឆ្នាំ និងឈ្មោះ ណាត ស៊ូត អាយុ១៨ឆ្នាំ ត្រូវបានចាប់ខ្លួនក្នុងខែធ្នូ ឆ្នាំ២០១២ក្នុងរាជធានីភ្នំពេញ និងត្រូវបានចោទប្រកាន់ពីបទជួញដូរគ្រឿងញៀន។ បុរសទាំងនេះដែលត្រូវបានឃុំខ្លួននៅ ក្នុងពន្ធនាគារព្រៃស ចាប់តាំងពីការចាប់ខ្លួនពួកគេ បានបដិសេធការចោទប្រកាន់នេះ។
ណាត ថាំង បានឲ្យដឹងថា គាត់បានមកដល់រាជធានីភ្នំពេញ ដោយស្វែងរកការងារ សំណង់ ហើយត្រូវបានចាប់ខ្លួនជាមួយគ្រឿង ញៀន បន្ទាប់ពីនិយោជកម្នាក់សុំឲ្យគាត់នាំថង់មួយទៅកាន់ផ្ទះសំណាក់មួយនៅក្នុងខណ្ឌឫស្សីកែវ។
ខាំភូន បានបដិសេធថាមិនបានដឹងអំពីគ្រឿងញៀននេះទេ និងបាននិយាយថា ខ្លួន បានធ្វើដំណើរមកកាន់ប្រទេសកម្ពុជាដើម្បីស្រាវជ្រាវឱសថបុរាណខ្មែរ។
គាត់បាននិយាយថា “នគរបាលមិនបានរកឃើញគ្រឿងញៀននៅនឹងខ្ញុំទេ នៅពេលដែលខ្ញុំត្រូវបានចាប់ខ្លួន ហើយខ្ញុំបានសុំឲ្យដោះលែងខ្ញុំត្រឡប់ទៅផ្ទះវិញ”។
លោក សឿ វណ្ណី ព្រះរាជអាជ្ញារងបាន លើកឡើងថា“ ទាំងបួននាក់នេះត្រូវបានគេជឿថា ជាផ្នែកនៃក្រុមជួញដូរគ្រឿងញៀនដ៏ល្បីដល់នគរបាល ដែលក្រុមនេះផ្គត់ផ្គង់គ្រឿងញៀនដល់ផ្ទះសំណាក់”។ សាលក្រមនឹងត្រូវប្រកាសនៅថ្ងៃទី២២ខែមករា៕ ប៊ុននី