កម្មករកម្មការិនីមកពីរោងចក្រកាត់ដេរចំនួនពីរបានបន្តការធ្វើកូដកម្មកាលពីម្សិលមិញទាមទារឲ្យនិយោជករបស់ខ្លួនបើកប្រាក់ឈ្នួលឲ្យពួកគេពាក់កណ្តាលសម្រាប់ថ្ងៃដែលពួកគេបានចូលរួមធ្វើកូដកម្មអំឡុងការធ្វើបាតុកម្មធំបំផុតក្នុងវិស័យកាត់ដេរកាលពីដើមខែនេះ។
កម្មករកម្មការិនីប្រហែល ៣.000នាក់មកពីរោងចក្រកាត់ដេរ Quint Major Industrial ក្នុងខេត្តកណ្តាលមិនបានចូលធ្វើការទេដោយធ្វើការហែក្បួនតវ៉ាតាមផ្លូវជាតិលេខ៤ដើម្បីទាមទារឲ្យនិយោជកបើកប្រាក់ឈ្នួលឲ្យពួកគេយ៉ាងហោចណាស់ក៏ពាក់កណ្តាលដែរសម្រាប់ថ្ងៃដែលពួកគេចូលរួមធ្វើកូដកម្ម។
លោក សៀង រិទ្ធី ប្រធានសម្ព័ន្ធសហជីពសាមគ្គីភាពការងារកម្ពុជាបានឲ្យដឹងថា កម្មករកម្មការិនីបានហែក្បួនចម្ងាយប្រហែលកន្លះគីឡូម៉ែត្រពីរោងចក្រឆ្ពោះទៅការិយាល័យសាលាស្រុកមុនពេលអ្នកគ្រប់គ្រងរោងចក្របានប្រាប់កម្មករថា ពួកគេមានឆន្ទៈចរចា។ លោកបានមានប្រសាសន៍ថា “កម្មករកម្មការិនីរបស់យើងទាមទារប្រាក់ឈ្នួល៥០ភាគរយសម្រាប់ថ្ងៃដែលពួកគេចូលរួមធ្វើកូដកម្ម ប៉ុន្តែ រោងចក្រមិនទាន់បានឆ្លើយតបតាមសំណើរបស់យើងនៅឡើយទេ ហើយពួកគេនឹងផ្តល់ចម្លើយ [ថ្ងៃនេះ] ”។ លោកបានបន្ថែមថា “កម្មករកម្មការិនីទាំងអស់ប្តេជ្ញាថា នឹងមិនចូលធ្វើការវិញទេ ប្រសិនបើរោងចក្រមិនបើកប្រាក់ឈ្នួលឲ្យពួកគេ៥០ភាគរយសម្រាប់ថ្ងៃដែលពួកគេចូលរួមធ្វើកូដកម្មទេនោះ”។
លោក ភីធើ ប៉ាន (Peter Pan) អ្នកគ្រប់គ្រងរោងចក្រជាជនជាតិតៃវ៉ាន់បានលើកឡើងថា លោកសង្ឃឹមថា នឹងអាចដោះស្រាយវិវាទនេះបាននៅថ្ងៃនេះ។
លោកបានមានប្រសាសន៍ថា “ប្រសិនបើកម្មករកម្មការិនីមួយចំនួនមិនមកធ្វើការ ហើយចូលរួមធ្វើកូដកម្មនៅខាងក្រៅនោះ ពួកគេប្រាកដជានឹងមិនទទួលបានប្រាក់ឈ្នួលឡើយ…ប៉ុន្តែថៅកែរោងចក្រប្រហែលជាសម្រេចបើកប្រាក់ឈ្នួលឲ្យពួកគេខ្លះ។ យើង សង្ឃឹមថា កិច្ចប្រជុំ[នៅថ្ងៃនេះ] នឹងអាចដោះស្រាយបញ្ហានេះបាន”។
លោក ចន ឃាង តំណាងរោងចក្រមកពីសម្ពន្ធភាពសហជីពពាណិជ្ជកម្មកម្ពុជាបានមានប្រសាសន៍ថា កម្មករកម្មការិនីធ្វើកូដកម្មប្រហែល៦០០នាក់មកពីរោងចក្រម៉ានហាតតាននៅក្នុងខេត្តកំពង់ចាមក៏បានហែក្បួនផងដែរកាលពីម្សិលមិញ ដើម្បីទាមទារប្រាក់ឈ្នួលសម្រាប់ថ្ងៃធ្វើកូដកម្មកន្លងមកផង និងដើម្បីតវ៉ាចំពោះការផ្អាកការងាររបស់តំណាងសហជីពបួននាក់ផង។ លោកបានឲ្យដឹងថា កម្មករកម្មការិនីបានហែក្បួនទៅកាន់ការិយាល័យនៃមន្ទីរការងារខេត្តដែលនៅទីនោះមន្ត្រីពាក់ព័ន្ធបានរៀបចំឲ្យមានការចរចារវាងកម្មករ និងអ្នកគ្រប់គ្រងរោងចក្រនៅថ្ងៃនេះ។
លោក ខឹម វាសនា អនុប្រធានមន្ទីរការងារខេត្តបានមានប្រសាសន៍ថា លោកបានអញ្ជើញភាគីទាំងពីរឲ្យមកជួបប្រជុំគ្នានៅការិយាល័យរបស់លោកនៅថ្ងៃនេះដើម្បីព្យាយាមដោះស្រាយវិវាទនោះ។ លោក វាសនា ដែលនិយាយថា លោកសង្ឃឹមថា នឹងមានជំនួបនៅថ្ងៃនេះនោះបានមានប្រសាសន៍ថា “យើងបានអញ្ជើញតំណាងមួយចំនួនរបស់កម្មករមកជួបប្រជុំគ្នា[នៅថ្ងៃពុធ] ប៉ុន្តែជំនួបនោះត្រូវបានលុបចោលវិញដោយសារកម្មករបានធ្វើការតវ៉ានៅខាងក្រៅការិយាល័យ។ ពួកគេមិនមានបំណងជួបប្រជុំទេ ពួកគេមកបង្កបញ្ហាតែប៉ុណ្ណោះ”។
លោក ចន ឃាង បានមានប្រសាសន៍ថា ពួកគេត្រូវបានរារាំងមិនឲ្យចូលទៅក្នុងមន្ទីរទេកាលពីម្សិលមិញ ប៉ុន្តែលោកបានបន្ថែមថា សហជីពនឹងចូលរួមពិភាក្សាគ្នាតាមការគ្រោងទុកនៅថ្ងៃនេះ។
កម្មករកម្មការិនីរាប់រយនាក់ក៏បានធ្វើកូដកម្មវិញនៅរោងចក្រចំនួនពីរក្នុងរាជធានីភ្នំពេញផងដែរនៅសប្តាហ៍នេះ។ ទោះយ៉ាងណា កាលពីម្សិលមិញ កម្មករកម្មការិនីនៅរោងចក្រនីមួយៗបានឲ្យដឹងថា ពួកគេភាគច្រើនបានត្រឡប់ទៅធ្វើការវិញហើយ ឬនឹងត្រឡប់ទៅធ្វើការវិញឆាប់ៗនេះដោយសារខ្លាចគេកាត់ប្រាក់ឈ្នួលទៀត។ ក្រុមប្រឹក្សាអាជ្ញាកណ្តាលនៅក្រសួងការងារកំពុងព្យាយាមដោះស្រាយវិវាទការងាទាំងបួននេះ។
លោក សុខ ឡោ នាយកប្រតិបត្តិក្រុមប្រឹក្សាអាជ្ញាកណ្តាលបានមានប្រសាសន៍ថា “ឥឡូវនេះយើងកំពុងដោះស្រាយរឿងនេះហើយ ហើយយើងត្រូវការពេលវេលាយ៉ាងហោចណាស់ក៏២០ថ្ងៃដែរដើម្បីចេញសេចក្តីសម្រេច”។
សមាគមរោងចក្រកាត់ដេរនៅកម្ពុជាបានលើកយកច្បាប់ការងារក្នុងប្រទេសកម្ពុជាមកធ្វើជាមូលដ្ឋានសម្រាប់ការណែនាំដល់រោងចក្រទាំងអស់មិនឲ្យបើកប្រាក់ឈ្នួលដល់កម្មករសម្រាប់ថ្ងៃដែលពួកគេចូលរួមធ្វើកូដកម្ម។ ក្រសួងការងារលើកឡើងថា ក្រសួងកំពុងជំរុញឲ្យរោងចក្រទាំងអស់បើកប្រាក់ឈ្នួលដល់កម្មករ យ៉ាងហោចណាស់ក៏មួយចំនួនដែរ ដោយសង្ឃឹមថា នឹងអាចកាត់បន្ថយ ការធ្វើកូដកម្មបន្តទៀតបាន៕ សារុន
(រាយការណ៍បន្ថែមដោយ Zsombor Peter)