កាលពីម្សិលមិញ មន្ត្រីសាលាដំបូងខេត្តព្រះសីហនុ បានឲ្យដឹងថា លោក សេរហ្គេ ប៉ូឡុនស្គី អតីតមហាសេដ្ឋីជនជាតិរុស្ស៊ី ដែលសមត្ថកិច្ចរុស្ស៊ីតាមចាប់ខ្លួន នៅតែប្រឈមនឹងការចោទប្រកាន់ពីបទប្រើអំពើហិង្សាលើកម្មករលើទូកជនជាតិកម្ពុជាចំនួនប្រាំមួយនាក់នៅលើសមុទ្រក្រុងព្រះសីហនុ កាលពីខែធ្នូឆ្នាំ២០១២។
លោកចៅក្រម ម៉ុង មុនីចរិយា ប្រធានសាលា ដំបូងខេត្តព្រះសីហនុបានថ្លែង ថា “ខ្ញុំគិតថា សំណុំរឿងនេះនឹងត្រូវ បើកសវនាការជំនុំជម្រះនៅក្នុងពេលឆាប់ៗ។ យើងមិនអាចទុកសំណុំរឿងនេះចោលក្នុងរយៈពេលយូរនោះទេ”។ លោកបានបង្វែរសំណួរបន្ថែមទៅលោកចៅក្រម ស្វាយ តុញ ដែលទទួលខុសត្រូវសំណុំរឿងនេះ។
លោក ស្វាយ តុញ បានឲ្យដឹងថា ថ្ងៃបើកសវនាការនៅមិនទាន់កំណត់នៅឡើយទេ។ លោកបានមានប្រសាសន៍ ដោយបដិសេធមិនធ្វើអត្ថាធិប្បាយច្រើនថា “ ខ្ញុំនៅតែសើរើរឿងនេះឡើងវិញ។ សំណុំរឿងរបស់លោក ប៉ូឡុនស្គី ត្រូវបានបញ្ជូនមកឲ្យខ្ញុំប្រហែលកន្លះខែកន្្លងមកហើយ។ ខ្ញុំមិនអាច ប៉ាន់ស្មានបានឡើយថា តើពេលណាសំណុំរឿងនេះ នឹងត្រូវយកមកបើកសវនាការជំនុំជម្រះនោះទេ”។
កាលពីថ្ងៃច័ន្ទ សាលាឧទ្ធរណ៍បានដោះលែងលោក ប៉ូឡុនស្គី ហើយបានព្យួរការធ្វើបត្យាប័នលោកទៅកាន់ប្រទេសរុស្ស៊ី ជាទីដែលលោកប្រឈមនឹងការចោទប្រកាន់ពីបទឆបោកប្រាក់រាប់លានដុល្លារ ដោយលើកឡើងថា លោកដាច់ខាតត្រូវតែប្រឈមនឹងតុលាការកម្ពុជាពីបទប្រើអំពើហិង្សាកាលពីឆ្នាំ២០១២ ជាមុនសិន។
ការលើកឡើងរបស់មន្ត្រីកម្ពុជាត្រូវបានធ្វើឡើងបន្ទាប់ពី ទីភ្នាក់ងារព័ត៌មានរុស្ស៊ី RIA Novosti បានរាយការណ៍កាលពីថ្ងៃអង្គារថា លោក អាឡិចសានឌឺ ការា៉បាណូវ (Alexander Karabanov) មេធាវីម្នាក់នៅក្នុងចំណោមមេធាវីទាំងអស់របស់លោក ប៉ូឡុនស្គី បាននិយាយថា ការចោទប្រកាន់លើកូនក្តីរបស់លោកក្នុងខេត្តព្រះសីហនុ ត្រូវបានលើកលែង បន្ទាប់ពី មានការព្រមព្រៀងគ្នាជាមួយកម្មករលើទូក។
កាលពីខែមករាឆ្នាំ២០១៣ មេធាវីម្មាក់របស់កម្មករលើទូកបាននិយាយថា កូនក្តីរបស់លោកបានទទួលយកប្រាក់សំណងជំងឺចិត្តចំនួន២០.០០០ដុល្លារ ហើយបានដកពាក្យបណ្តឹងពីតុលាការ ប៉ុន្តែលោកបានលើកឡើងថា លោក ប៉ូឡុនស្គី និងជនជាតិរុស្ស៊ីពីរនាក់ផ្សេងទៀតដែលជាប់ពាក់ព័ន្ធក្នុងសំណុំរឿងនេះនៅតែប្រឈមនឹងការចោទប្រកាន់។
លោក ប៉ូឡុនស្គី និងសហការីរបស់លោកបានជាប់ពន្ធនាគាររយៈពេលបីខែពីបទប្រើអំពើហិង្សានេះប៉ុន្តែពួកគេត្រូវបានដោះលែងឲ្យនៅក្រៅឃុំកាលពីខែមេសា។ កាលពីខែកក្កដា តុលាការរុស្ស៊ើបានចោទប្រកាន់លោក ប៉ូឡុនស្គី កំបាំងមុខពីបទឆបោក ប្រាក់ចំនួន១៧៦លានដុល្លារពីវិនិយោគិនក្នុងគម្រោងសាងសង់មួយក្នុងទីក្រុងមូស្គូ។
លោកត្រូវបានចាប់ខ្លួនកាលពីខែវិច្ឆិកាតាមសំណើពីអាជ្ញាធររុស្ស៊ី និងបន្ទាប់ពីត្រូវបានជាប់ឈ្មោះក្នុងបញ្ជីរបស់នគរបាលអន្តរជាតិ ជាជនដែលគេតាមរកចាប់ខ្លួនបំផុត។ លោក បែនសុន សម័យ តំណាងរបស់លោក ប៉ូឡុនស្គី ដែលទទួលដោះស្រាយក្នុងករណីមួយទាក់ទិននឹងការធ្វើបត្យាប័ន បាននិយាយថា លោកមិនដឹងអំពីសំណុំរឿងនៅក្នុងខេត្តព្រះសីហនុឡើយ៕ស៊ុយឈាង