28 C
Phnom Penh

កម្មករ​នៅ​រោង​ចក្រ​មួយ​ឈប់​ធ្វើកូដកម្ម​ ខណៈដែល​កម្មករ​នៅ​រោង​ចក្រពីរ​ផ្សេង​ទៀតនៅ​តែ​បន្ត​​

ដោយ ឌឹ ខេមបូឌា ដេលី

បទវិភាគ

កម្មករ​រោង​ចក្រ​កាត់​ដេរមួយ​​នៅក្នុង​​ខេត្ត​​កណ្តាល បាន​បញ្ឈប់​សកម្មភាព​កូដកម្ម​របស់​ខ្លួន​កាលពី​ម្សិលមិញ បន្ទាប់​ពី​គណៈគ្រប់​គ្រង​រោង​ចក្រ​យល់​ព្រម​ផ្តល់​ប្រាក់​ឈ្នួល​របស់​ពួកគេ​មួយ​ចំណែក​ សម្រាប់​ថ្ងៃ​ដែល​ពួកគេ​អវត្តមាន​អំឡុង​ពេល​ពួកគេ​កំពុង​ធ្វើ​កូដកម្ម​ កាលពី​ពេល​ថ្មី​ៗនេះ ខណៈដែល​រោង​ចក្រ​មួយ​ផ្សេង​ទៀត​នៅ​ក្នុង​រាជធានី​ភ្នំពេញ បាន​ត្រឡប់​ទៅ​ធ្វើកូដកម្ម​វិញ ដោយ​សារ​និយោ​ជក​របស់​ពួកគេ​មិន​ព្រម​ផ្តល់​ប្រាក់​ឈ្នួល​ដល់​ពួ​ក​គេ សម្រាប់​ពេល​ពួកគេ​កំពុង​ធ្វើ​កូដកម្ម​។

កម្មករ​​ប្រហែល​​៣.០០០នាក់​នៅ​រោង​ចក្រ​ Quint Major Industrial ក្នុង​ខេត្ត​កណ្តាល​ បាន​ធ្វើ​កូដកម្ម​ក្នុង​សប្តាហ៍​នេះ​ ដើម្បី​ទាម​ទារ​ឲ្យ​និយោជក​របស់​ពួកគេ​ផ្តល់​ប្រាក់​ឈ្នួល​របស់​ពួកគេ​យ៉ាង​តិច​ពាក់​កណ្តាល​ សម្រាប់​ថ្ងៃ​ដែល​ពួកគេ​បាន​ចូល​រួម​ធ្វើកូដកម្ម​ទូទាំង​ប្រទេស​ កាលពី​ខែ​ធ្នូ ដើម្បី​ទាម​ទារ​ប្រាក់​ឈ្នួល​អប្បបរមាខ្ពស់​ជាង​មុន​ សម្រាប់​វិស័យ​កាត់​ដេរ​ទាំង​មូល​។

ក៏​ប៉ុន្តែ​ កម្មករ​ទាំង​នេះបាន​បញ្ឈប់​កូដកម្ម​ចុង​ក្រោយ​បំផុត​របស់​ខ្លួន​កាលពី​ម្សិលមិញ បន្ទាប់​ពី​រោង​ចក្រ​យល់​ព្រម​ផ្តល់​ឲ្យ​ពួកគេ​នូវ​ប្រាក់​ឈ្នួល​៣០ភាគរយ​សម្រាប់​ថ្ងៃ​ដែល​ពួកគេ​បានធ្វើ​កូដកម្ម​​ នេះ​បើ​យោង​តាម​លោក សៀង រិទ្ធី ប្រធាន​សម្ព័ន្ធ​សហ​ជីព​សាមគ្គី​ភាព​ការងារ​កម្ពុជា​។ លោក​បាន​មាន​ប្រសាសន៍​ថា “ យើង​បាន​​ចុះ​កិច្ច​សន្យា​ជាមួយ​តំណាង​ក្រុមហ៊ុន​ដែល​បង់​ប្រាក់​ឈ្នួល​៣០ភាគរយ​​ និង​អត្ថប្រយោ​ជន៍​ ដែល​ពួកគេ​បាន​កាត់​អំឡុង​កូដកម្ម​ ក៏ប៉ុន្តែ ប្រាក់​ទាំង​នោះ​នឹង​ត្រូវ​បាន​ផ្តល់​ឲ្យ​នៅ​ខែ​ក្រោយ​ ពីព្រោះ​ក្រុម​ហ៊ុន​មិន​អាចផ្តល់​ឲ្យ​យើង​ឥឡូវ​នេះ​បាន​ទេ”។

លោក ភីធ័រ ប៉ាន់ (Peter Pan) អ្នក​គ្រប់​គ្រង​ជនជាតិ​តៃ​វ៉ាន់​ នៅក្នុង​រោង​ចក្រ​ Quint Major Industrial បាន​បញ្ជាក់​ថា កូដករ​បាន​យល់​ព្រម​ត្រឡប់​ចូល​ធ្វើការ​វិញ​ បន្ទាប់ពី​ទទួល​យក​ប្រាក់​ ៣០ភាគរយ​នេះ។ ទោះ​​​ជាយ៉ាង​ណា កាលពីម្សិលមិញ កម្មករ​​ប្រហែល​១.៨០០នាក់ នៅ​រោង​ចក្រ Canteran Apparel ​ក្នុង​រាជធានី​ភ្នំពេញ បាន​បន្ត​ធ្វើកូដ​កម្ម​តវ៉ា​ទាម​ទារ​ប្រាក់​ឈ្នួល​ដែល​ត្រូវ​បាន​កាត់​កាលពី​ខែ​មុន​ ក៏​ប៉ុន្តែ ពួកគេ​បាន​ឈប់​ធ្វើ​កូដកម្ម​មួយ​រយៈពេល​ខ្លី​ កាលពី​ថ្ងៃ​អង្គារ​ ដោយ​សារ​តែ​មាន​ការ​ព្រួយ​បារម្ភ​ខ្លាច​មាន​ការ​កាត់​ប្រាក់​ឈ្នួល​បន្ថែម​ទៀត​ នេះ​បើ​យោង​តាម​លោក ប៉ាវ ស៊ីណា ប្រធាន​សម្ព័ន្ធ​​សហជីព​ចលនា​កម្មករ​។ លោក​បាន​មាន​ប្រសាសន៍​ថា “កម្មករ​ទាម​ទារ​ឲ្យ​ក្រុម​ហ៊ុនផ្តល់​ប្រាក់​ដល់​​ពួកគេ​ អំឡុង​​កូដកម្ម​ ក៏ប៉ុន្តែ ​ពួកគេ​មិន​ព្រម ​ហើយ​ចោទ​ប្រកាន់​កម្មករ​ទាំង​អស់​ថា ធ្វើកូដកម្ម​ខុស​ច្បាប់​”។

ចំណែក​ឯ​រោង​ចក្រ​មួយ​ទៀត​ គឺ​រោង​ចក្រ​ Manhattan Textile កម្មករ​ប្រហែល​៦០០នាក់​នៅ​តែ​បន្ត​ធ្វើកូដកម្ម​ ដើម្បី​ទាម​ទារ​ប្រាក់​ឈ្នួល​ដែល​ត្រូវ​បានគេ​កាត់​កាលពី​ខែមុន សម្រាប់​ការ​ធ្វើ​កូដកម្ម​ និង​តវ៉ា​ការ​ព្យួរ​ការ​ងារ​​របស់តំណាង​សហជីព​បួន​នាក់​ នេះ​បើ​យោង​តាម​តំណាង​សហជីព​ និង​រោង​ចក្រ​។​ លោក ឃឹម វាសនា អនុប្រធាន​មន្ត្រី​ការ​ងារ​​ខេត្តកំពង់​​ចាម បាន​ឲ្យ​ដឹង​ថា កិច្ច​​ខិត​ខំ​ប្រឹង​​ប្រែង​របស់​លោក​ក្នុង​ការ​ដោះ​ស្រាយ​វិវាទ​នេះ​បានទទួល​បរាជ័យ​។​

លោក​បាន​មាន​ប្រសាសន៍​ថា “កិច្ច​ប្រជុំ​ត្រូវ​បាន​បញ្ចប់​ទៅ​ដោយ​មិន​មាន​លទ្ធផល​​ពីព្រោះ​ក្រុម​ហ៊ុន​នៅ​តែ​អះ​អាង​ថា ខ្លួន​នឹង​មិន​ផ្តល់​ប្រាក់​សម្រាប់​ពេល​ធ្វើកូដកម្ម​ឡើយ​ហើយ​ពួកគេ​នឹង​មិន​អនុញ្ញាត​ឲ្យ​មេដឹកនាំ​សហជីព​បួន​នាក់​នោះត្រឡប់​ចូល​ធ្វើការ​វិញ​ទេ។ លើស​ពីនេះ​ទៀត​ ក្រុម​ហ៊ុន​ក៏​បាន​ចោទ​​ប្រកាន់​មេដឹក​នាំ​សហជីព​ទាំង​នេះ​ថា បាន​ញុះ​ញង់​ឲ្យ​កម្មករ​ចូលរ​ួម​ក្នុង​សកម្មភាព​ធ្វើ​កូដកម្ម​”៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស