31 C
Phnom Penh

មេធាវី​ដាក់​សំណើ​សុំ​ឲ្យ​មានការ​ដោះ​លែង​អ្នក​ទោសដែល​ត្រូវ​បាន​ចាប់​ខ្លួន​អំឡុង​ការបង្ក្រាប​

ដោយ ឌឹ ខេមបូឌា ដេលី

បទវិភាគ

មេ​ធាវី​ចំនួន​១០​រូប​តំណាង​ឲ្យ​កម្មករ​រោង​ចក្រ​កាត់​ដេរ​ មន្ត្រី​សហ​ជីព​ និង​សកម្ម​ជន​​​នយោបាយ​ចំនួន​២២នាក់​ក្នុង​ចំណោម​​កម្មករ​រោង​ចក្រ​កាត់​ដេរ​ មន្ត្រី​សហ​ជីព​ និង​សកម្ម​ជន​នយោបាយចំនួន​២៣នាក់​ ដែល​ត្រូវ​​បាន​ឃុំឃាំង​នៅ​ពន្ធនាគារ​ដែល​មាន​ការ​រឹត​បន្តឹង​សន្តិសុខ​យ៉ាង​ខ្លាំង​នៅ​ក្នុង​ខេត្ត​កំពង់​ចាម ចាប់​តាំង​ពី​ ការ​ចាប់​ខ្លួន​​ពួក​គេ​អំឡុង​ការ​តវ៉ា​ចំនួន​ពីរ​នៅ​រាជ​ធានី​ភ្នំ​ពេញ​ កាល​ពី​ដើម​ខែ​នេះ​​ បាន​ដាក់​សំណើ​សុំ​ឲ្យ​តុលាការដោះ​លែង​​​​​កូន​ក្តី​របស់​ខ្លួន​​ឲ្យ​នៅ​ក្រៅ​ឃុំ កាល​ពី​ម្សិល​​មិញ ​ នេះ​បើ​យោង​តាម​មេ​ធាវី​ម្នាក់​ក្នុង​ចំណោម​​​មេធាវី​ទាំង​១០​នាក់។

លោក​ ហម ស៊ូរិទ្ធ មេធាវី​នៅ​មជ្ឈមណ្ឌល​​អប់រំ​ច្បាប់​សម្រាប់​សហ​គម​ន៍​បាន​ឲ្យ​ដឹង​ថា សំណើ​សុំ​​​ឲ្យ​មាន​ការ​ដោះ​លែង​នៅ​ក្រៅ​ឃុំ​សម្រាប់អ្នក​​ដែល​ត្រូវ​បាន​ឃុំ​ឃាំង​នៅ​មណ្ឌល​​អប់រំ​កែ​ប្រែ​ទី​៣​ ត្រូវ​បាន​ដាក់​ជូន​ទៅ​កាន់​សាលា​រាជធានី​ភ្នំពេញ​ ជា​ទី​ដែលមនុស្ស​ទាំង​២៣​នាក់​​ ត្រូវ​បាន​ចោទ​ប្រកាន់​ពី​បទ​បង្ក​របួស​ស្នាម​ដោយ​ចេតនា និងពី​បទ​បំផ្លិច​បំផ្លាញ​​​ទ្រព្យសម្បត្តិ​​សាធារណៈ។

លោក​ វ៉ន​ ពៅ​ មេ​ដឹក​នាំ​សហជីព​ដ៏​លេច​ធ្លោ​មិន​ត្រូវ​បាន​រួម​បញ្ចូល​នៅ​ក្នុង​សំណើ​នេះ​​ទេ​ ព្រោះ​ពាក្យ​សុំ​នៅ​ក្រៅ​ឃុំ​របស់​គាត់​ត្រូវ​បាន​ច្រាន​ចោល​កាល​ពី​សប្តាហ៍មុន។ លោក​ ស៊ូរិទ្ធ​ បាន​មាន​ប្រសាសន៍​ថា “ យើង​​​​​​បាន​អំពាវ​នាវ​ឲ្យ​តុលា​ការ​ដោះ​លែង​​​មនុស្ស​ចំនួន​២២នាក់​ ព្រោះ​ពួក​គេ​ជា​កម្ម​ករ​និងជា​មេ​គ្រួសារ​។ ក្រុម​គ្រួសារ​របស់​ពួក​គេ​ពឹង​ផ្អែក​តែ​លើ​ពួក​គេ​ប៉ុណ្ណោះ​។ មនុស្ស​ទាំង​២២​នាក់​ អាច​ទៅ​រស់​ជាមួយ​ក្រុម​គ្រួសារ​របស់​ខ្លួន​វិញ  ហើយ​ប្រសិន​បើ​តុលាការ​ចង​់​កោះ​ហៅ​​ពួក​គេ​មក​បង្ហាញ​ខ្លួន​នៅ​តុលា​​ការ​ ពួ​ក​គេ​នឹង​បង្ហាញ​ខ្លួន​តាម​សំណើ​”។

មនុស្ស​​ចំនួន​១០នាក់​ក្នុង​ចំណោម​អ្នក​ទាំង​​២៣​នាក់​នេះ​ ត្រូវកង​​ទ័ព​ឆត្រយោង​ចាប់​ខ្លួន ​​អំឡុង​ការ​បង្ក្រាប​លើ​កម្មករ​រោង​ចក្រ​កាត់​ដេរ​មក​ពី​រោង​ចក្រ​កាត់​ដេរ​ យ៉ាក់ជីង​ កាល​ពី​ថ្ងៃ​ទី​២​ខែ​មករា​។រីឯមនុស្ស​​១៣​នាក់ផ្សេង​ទៀត​ត្រូវ​បាន​ចាប់​ខ្លួន​នៅ​ថ្ងៃ​បន្ទាប់​ អំឡុង​ការ​តវ៉ា​នៅ​ផ្លូវ​វេង​ស្រេង​ ដែល​កង​រាជ​អាវុធ​ហត្ថ​​បានបាញ់​សម្លាប់​កម្មករ​រោង​ចក្រ​កាត់​ដេរ​កំពុង​ធ្វើ​កូដ​កម្ម​ចំនួនប្រាំ​នាក់​។

មន្ត្រី​តុលាការ​និង​មន្ត្រី​ពន្ធ​នាគារ​ បាន​បដិ​សេធ​​សំណើ​ម្តង​ហើយ​ម្តង​ទៀត​របស់​​មេធាវី​ ដែល​ស្នើ​ឲ្យ​មាន​ការ​បង្ហាញពី​​ទី​តាំង​របស់​មនុស្ស​ទាំង​​២៣​នាក់​​ ដែល​ត្រូវ​បាន​ឃុំខ្លួន​រហូត​ដល់​ថ្ងៃ​ទី​៨​ខែ​មករា​ ហើយ​ចាប់​តាំង​ពី​ពេល​នោះ​មក​ការ​ចូល​ទៅ​សួរ​ទុក្ខ​ក៏​ត្រូវ​បាន​ដាក់​កំហិត​ដែរ​។

លោក វ៉ន​ ពៅ​ បច្ចុប្បន្ន​កំពុង​តែ​មាន​ការ​ឈឺ​ចាប់​លើ​មុខ​របួស​វះកាត់​តម្រងនោម​​​ ដែល​ត្រូវ​បាន​វះ​កាត់​កាល​ពី​ប្រាំ​ខែមុន​ នេះ​បើ​យោង​តាម​ការ​ឲ្យ​ដឹង​ពី​ប្រពន្ធ​របស់​លោក​។ រីឯសកម្ម​ជន​ការ​ពារ​សិទ្ធិ​មនុស្ស​ដែល​បាន​ទៅសួរ​សុខ​ទុក្ខ​គាត់​កាល​ពី​សប្តាហ៍​មុន​បាន​និយាយ​ថា អាជ្ញា​ធរ​បាន​ទាត់​ធាក់​គាត់​ម្តង​ហើយ​ម្តង​ទៀត​នៅ​ក្បែរ​ស្នាម​របួស​វះ​កាត់​តម្រង​នោម​​។

ចៅ​ក្រម​ស៊ើបអង្កេត ភូ ពៅ​ស្រ៊ុន​ នៅ​សាលា​ដំបូង​រាជ​ធានី​ភ្នំពេញ​បាន​បដិសេធ​មិន​ធ្វើ​អត្ថាធិប្បាយអំពី​​សំណើ​សុំ​ឲ្យ​ដោះ​លែង​មនុស្ស​ចំនួន​២២​នាក់ឲ្យ​​​នៅ​ក្រៅ​ឃុំ​ឡើយ​ ប៉ុន្តែ​លោក​បាន​លើក​ឡើង​ថា តុលា​ការ​​កំពុង​តែ​ចាត់​វិធានស៊ើប​អង្កេត​ហើយ។ ហើយ​​សំណុំ​រឿង​នេះ​ក៏​ត្រូវ​បាន​លោក សុរិយា​ ស៊ូបេឌី​ ប្រេសិត​ពិសេស​ទទួល​បន្ទុក​សិទ្ធិ​មនុស្ស​របស់​អង្គការ​សហ​ប្រជា​ជាតិ​លើក​យក​មក​និយាយ​អំឡុង​កិច្ច​ប្រជុំ​របស់​លោក​ជាមួយ​លោក​នាយក​រដ្ឋ​មន្ត្រី​ ហ៊ុន សែន​ កាល​ពី​ថ្ងៃអង្គារផងដែរ​។

លោក​បាន​មាន​ប្រសាសន៍​ថា “ យើង​ឥឡូវ​​នេះ​កំពុង​តែ​ស្ថិត​ក្នុង​ដំណើរ​ការ​ស៊ើប​អង្កេត​និង​កំពុង​តែ​ប្រមូល​ភ័ស្តុតាង​ថា តើ​ត្រូវ​ដាក់​បន្ទុក​ឬ​ក៏​មិន​ដាក់​បន្ទុក​លើចុង​ចោទ​​ ហើយ​ប្រសិន​បើ​យើង​រក​ឃើញ​ថា ពួ​កគេ​មិនជាប់​ពាក់​ព័ន្ធ​នោះ​ យើង​នឹង​ដោះ​លែង​ពួក​គេ​។ យើង​នឹង​អនុវត្ត​តាម​ច្បាប់​” ។​

លោក​ ឈឹម​ ភ័ណ្ឌ​ អាយុ​ ៣៥​ឆ្នាំ​ត្រូវ​ជា​បង​ប្រុស​របស់ ឈឹម​ ធឿន​​ អាយុ​២៦​ឆ្នាំ​ ដែល​ជា​កម្មករ​ម្នាក់​ក្នុង​ចំណោម​កម្មករ​ដែល​ត្រូវ​បាន​ចាប់​ខ្លួន​​នៅផ្លូវ​វេង​ស្រេង​​បញ្ជូន​​ទៅ​ពន្ធនាគារ​ បាន​ឲ្យ​ដឹង​ថា លោក​បាន​ទៅ​សួរ​សុខ​ទុក្ខ​ប្អូន​ប្រុស​ដែល​រង​របួស​ធ្ងន់​កាល​ពី​សប្តាហ៍​មុន​ ហើយ​បាន​ទាម​ទារ​ឲ្យ​មាន​ការ​ដោះ​លែង​គាត់​ឲ្យ​នៅ​ក្រៅ​ឃុំ​ជា​បន្ទាន់​។

គាត់​បាន​និយាយ​​ថា “គេ​បាន​វាយ​ដំ​ពេញ​ទាំង​រាង​កាយ​របស់​គាត់​។ ខ្ញុំ​ចង់​ឲ្យ​តុលាការ​ដោះ​លែង​គាត់​ ព្រោះគាត់​​គ្មាន​កំហុស​​ទេ​ ហើយ​គាត់​គ្រាន់​តែ​ទាម​ទារ​ឲ្យ​មានការ​ដំឡើង​​​ប្រាក់​ខែ​ប៉ុណ្ណោះ។ គ្រួសារ​របស់​យើង​ពឹង​ផ្អែក​លើ​គាត់​”៕ ស៊ុយឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស