34 C
Phnom Penh

ក្រសួង​មហាផ្ទៃ​អញ្ជើញ​លោក រ៉ុង ឈុន ទៅ​ពិភាក្សា​ការងារ​របស់​សមាគម​គ្រូបង្រៀន​កម្ពុជា​ឯករាជ្យ​

ដោយ ឌឹ ខេមបូឌា ដេលី

បទវិភាគ

លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ្យ​ ហៅកាត់​ថា CITA បាន​មាន​ប្រសាសន៍​កាលពី​ថ្ងៃ​សុក្រ​ថា លោក​មាន​អារម្ម​ណ៍​ថា ចលនា​គ្រូបង្រៀន​របស់​លោក​កំពុង​រង​ការ​គំរាម​កំហែង​ បន្ទាប់​ពី​លោក​ទទួល​បាន​លិខិត​អញ្ជើញ​ពី​ក្រសួង​មហាផ្ទៃ​ ហៅ​ឲ្យ​លោក​ទៅ​ពន្យល់​ពីការងារ​របស់​លោក​នៅ​ថ្ងៃ​ច័ន្ទ។

លិខិត​អញ្ជើញដែល​ចុះកាលបរិច្ឆេទ​​​ថ្ងៃ​ព្រហស្បតិ៍​និង​ចុះ​ហត្ថលេខា​ដោយ​លោក មាស សារឹម អគ្គនាយករង​នៃ​អគ្គនាយ​ដ្ឋាន​​​ក្រសួង​មហាផ្ទៃ​បាន​មាន​ប្រសាសន៍​ថា គោល​បំណង​នៃ​ជំនួប​នេះ​គឺ​ដើម្បី​ “ ពិភាក្សា​ការ​ងារ​” របស់​សមាគម​គ្រូបង្រៀន​កម្ពុជា​ឯករាជ្យ​ ដែល​បាន​ជាប់​ពាក់​ព័ន្ធ​ក្នុងសកម្មភាព​តវ៉ា​នៅ​ខែ​នេះ ធ្វើ​ឡើង​ដោយ​ក្រុម​គ្រូ​បង្រៀន​​ដែល​ទាមទារ​ដំឡើង​ប្រាក់​ខែ។

លោក រ៉ុង ឈុន ​​មាន​ប្រសាសន៍​ថា “ ខ្ញុំ​នឹង​មិន​ទៅ​ទេ​ ពីព្រោះ​នៅ​ថ្ងៃ​នោះ​ខ្ញុំ​ជាប់​រវល់​បំពេញ​បេសកកម្ម​នៅតាម​ខេត្ត​” មុន​ពេល​លោក​បដិសេធ​មិន​បញ្ជាក់​លម្អិត​បន្ថែមទៀត​​។​

លោក រ៉ុង ឈុន ដែល​ត្រូវ​បាន​សាលា​ដំបូង​រាជធានី​ភ្នំពេញ​កោះ​ហៅ​ទៅ​សាក​សួរ​​នៅ​សប្តាហ៍​នេះ ជុំ​វិញ​ការ​ជាប់​ពាក់​ព័ន្ធ​របស់​លោក​នៅ​ក្នុងបាតុកម្ម​​របស់​កម្មករ​កាត់​ដេរ​ ដែល​ត្រូវ​កង​រាជអាវុធហត្ថ​និង​ទាហាន​បង្ក្រាប​​ដោយ​ហិង្សានោះ​ បាន​មាន​ប្រសា​សន៍​ថា លោកចាត់ទុក​ការ​អញ្ជើញ​លើក​ចុងក្រោយ​នេះ​ថា ជា “ការ​គំរាម​កំហែង​ថ្មី​”​​មួយ​មក​លើ​រូបលោក។

កាលពី​ថ្ងៃ​ទី​២៧ ខែធ្នូ លោក ប៉ុល លឹម រដ្ឋលេខា​ធិការ​ក្រសួង​មហាផ្ទៃ​បាន​ព្រមាន​លោក រ៉ុង​ ឈុន ថា លោកនឹង​ដក​អាជ្ញាប័ណ្ណ​របស់​សមាគម​គ្រូបង្រៀន​កម្ពុជា​ឯករាជ្យ​ដោយ​សារ​តែ​សមាគម​​នេះ​​ពាក់​ព័ន្ធនឹង​គណ​បក្ស​សង្គ្រោះជាតិ​ជា​អ្វី​ដែល​លោក​បាន​ច្រាន​​ចោល​យ៉ាង​ដាច់​អហង្ការ។

លោក​បាន​មាន​ប្រសាសន៍​អំពី​ការ​អញ្ជើញ​លោក​ទៅ​ក្រសួង​មហាផ្ទៃថា “ វា​ពិត​ជា​ចម្លែក​​ណាស់ ពីព្រោះ​ខ្ញុំ​មិន​ដឹង​ថា ការងារ​ប្រភេទ​ណា​នៅ​ CITA ដែល​ពួកគេ​ចង់​​ពិភាក្សា​នោះ​ទេ​។ ប៉ុន្តែ វាមិន​មែន​ជា​ការ​គាប់​ជួន​ទេ ពី​ព្រោះ​ក្រសួង​មហាផ្ទៃ​បាន​ព្រមាន​ហើយ​ថា នឹងដក​ហូត​អាជ្ញាប័ណ្ណ​”។

សមាគមគ្រូបង្រៀន​កម្ពុជា​ឯករាជ្យ​ដែល​មាន​សមាជិក​ទាំង​អស់​ជាង​១០.០០០នាក់​នៅ​ទូទាំង​ប្រទេស​ បាន​សម្រេច​អំឡុង​សមាជ​​ប្រចាំ​ឆ្នាំរបស់ខ្លួន​កាលពី​ថ្ងៃ​ទី​៣១ ខែធ្នូ ឆ្នាំ​២០១៣ ធ្វើ​បាតុ​កម្ម​រយៈពេល​មួយ​សប្តាហ៍​នៅ​​ទូទាំង​ប្រទេស​ ដើម្បី​ទាម​ទារ​ឲ្យ​ដំឡើង​ប្រាក់​ខែដល់​​២៥០​ដុល្លារ​សម្រាប់​​គ្រូ
ប​ង្រៀន​ដែល​​ភាគ​ច្រើន​​​ទទួល​បាន​ប្រាក់​ខែ​ប្រហែល​១០០​ដុល្លារ​។

អាជ្ញាធរ​បានចាប់ផ្តើម​បង្ក្រាប​លើ​ចលនា​នេះ​កាលពី​ដើម​ខែ​មករា ដោយជា​ថ្មី​ម្តង​ទៀត​ ក្រសួង​មហា​​ផ្ទៃ​បាន​គំរាម​ដក​ហូត​អាជ្ញាប័ណ្ណ​របស់​សមា​គមគ្រូបង្រៀន​កម្ពុជា​ឯករាជ្យ​ និង​ក្រោយ​មក​បាន​បញ្ជា​​គ្រូ​បង្រៀន​ឲ្យ​ចុះ​កិច្ច​សន្យា​ឈប់​ធ្វើកូដកម្មតទៅ​ទៀត​​។

ក្រសួង​មហាផ្ទៃ​ក៏​បាន​លើក​ឡើង​ដែរថា រដ្ឋាភិបាល​មិន​ទទួល​ស្គាល់​លោក រ៉ុង ឈុន ជាមេដឹកនាំ​សហជីព​ទេ​ ពីព្រោះ​សហភាព​សហជីពកម្ពុជា​ដែល​មានរូប​​លោក​ជាប្រធាន​មិន​ត្រូវ​បាន​ចុះ​បញ្ជី​ត្រឹម​ត្រូវ​។
លោក រ៉ុង​ ឈុន បាន​អះអាង​ថា ចលនា​គ្រូបង្រៀន​នេះ​គ្មាន​និន្នាការ​នយោបាយទេ​ ហើយ​បញ្ហា​ពិត​ប្រាកដ​ហាក់ដូច​ជា​នៅ​ត្រង់​ថា “ គណបក្ស​ប្រជាជន​កម្ពុជា​ភ័យ​ខ្លាច​ខ្លាំង​ចំពោះ​ការ​តវ៉ា​ដោយ​សន្តិវិធី”។
លោក​បាន​មាន​ប្រសាសន៍​ទៀត​ថា លោក​នឹង​បន្ត​អំពាវនាវ​ឲ្យ​រដ្ឋាភិបាល​ដំឡើង​ប្រាក់​ខែ​ ទោះ​បី​ជា​សមាគម​របស់​លោក​រង​ការ​គំរាម​កំហែង​ក៏​ដោយ​៕ សុខុម​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស