ដោយប្រឆាំងជំទាស់នឹងបម្រាមហាមមិនឲ្យធ្វើការប្រមូលផ្តុំក្នុងរាជធានីភ្នំពេញ សកម្មជនបាននាំគ្នាប្រមូលផ្តុំនៅមុខស្ថានទូតសហរដ្ឋអាមេរិក ស្ថានទូតជប៉ុន ស្ថានទូតអូស្ត្រាលីនិងស្ថានទូតអាល្លឺម៉ង់ កាលពីថ្ងៃសុក្រមុនពេលឈប់សម្រាកទទួលទានអាហារថ្ងៃត្រង់ ហើយបាននាំគ្នាតវ៉ាម្តងទៀតនៅពេលរសៀលនៅស្ថានទូតអង់គ្លេស សហភាពអឺរ៉ុបនិងការិយាល័យធនាគារពិភពលោក បន្ទាប់មកទៀតបានហែក្បូនជាលើកចុងក្រោយទៅកាន់ស្ថានទូតកូរ៉េខាងត្បូង ដើម្បីបញ្ចុះបញ្ចូលឲ្យមានការដោះលែងអ្នកតវ៉ា ដែលត្រូវបានបញ្ជូនទៅកាន់ពន្ធនាគារកាលពីដើមខែនេះ។
ការតវ៉ាដោយសន្តិវិធីនៅមុខស្ថានទូតនានានេះត្រូវបានរៀបចំដោយសកម្មជនការពារសិទ្ធិលំនៅដ្ឋានមកពីសហគមន៍បឹងកក់ ដែលបានដាក់ញត្តិជូនស្ថានទូតនីមួយៗ ស្នើសុំឲ្យជួយដាក់សម្ពាធអន្តរជាតិលើរដ្ឋាភិបាលដើម្បីឲ្យមានការដោះលែងមនុស្សទាំង២៣នាក់ ដែលកងទ័ពឆត្រយោងនិងកងរាជអាវុធហត្ថចាប់ខ្លួនអំឡុងការបង្ក្រាបដ៏ហិង្សាលើកម្មកររោងចក្រកាត់ដេរក្នុងរាជធានីភ្នំពេញ កាលពីថ្ងៃទី២និងទី៣ខែមករា។
អ្នកស្រី យ៉ោម បុប្ផា សកម្មជនការពារសិទ្ធិដីធ្លីមកពីសហគមន៍បឹងកក់ បានស្រែកតាមឧគ្ឃោសនសព្ទ នៅខាងក្រៅស្ថានទូតកាលពីព្រឹកថ្ងៃសុក្រថា “ សូម ស្ថានទូតអាមេរិកជួយអន្តរាគមន៏ឲ្យរដ្ឋាភិបាលដោះលែងលោក វ៉ន ពៅ លោក ចាន់ ពុទ្ធិសក្កិ លោក ថេង សាវឿន និងមនុស្ស២០នាក់ផ្សេងទៀត ដែលត្រូវអាជ្ញាធរចាប់ខ្លួន ហើយសូមជួយរកយុត្តិធម៌ឲ្យអ្នកដែលត្រូវគេសម្លាប់ផង”។
អ្នកស្រី យ៉ោម បុប្ផា បាននិយាយ ខណៈអ្នកតវ៉ារាប់សិបនាក់កំពុងស្រែកពាក្យស្លោកនិងគ្រវីទង់ជាតិដែលតំណាងសហរដ្ឋអាមេរិក អង្គការសហប្រជាជាតិ និងសហភាពអឺរ៉ុបថា “ មនុស្សទាំង២៣នាក់មិនបានធ្វើអ្វីខុសឡើយ។ប្រសិនបើរដ្ឋាភិបាលមិនដោះលែងពួកគេភ្លាមៗនោះទេ យើងនឹង តស៊ូ ហើយយើងហ៊ានបូជាជីវិតដើម្បីសេរីភាពនិងយុត្តិធម៌ ទោះបីជារដ្ឋាភិបាលប្រើកាំភ្លើងបាញ់សម្លាប់យើងក៏ដោយ”។
បន្ទាប់ពីត្រូវបានបញ្ជូនទៅកាន់មណ្ឌលអប់រំកែប្រែទី៣ ដែលមានការរឹតបន្តឹងសន្តិសុខយ៉ាងខ្លាំងនៅក្នុងខេត្តកំពង់ចាម ក្រោយពេលចាប់ខ្លួន មនុស្សទាំង២៣នាក់ មិនទាន់ត្រូវបាននាំយកមកបើកសវនាការជំនុំជម្រះក្តីនៅឡើយទេ បន្ទាប់ពីអាជ្ញាធរបានដាក់ពាក្យប្តឹងពួកគេរួច។ មនុស្ស១០នាក់ក្នុងចំណោមមនុស្សជាប់ឃុំទាំងអស់ត្រូវបានឆក់និងវាយដំយ៉ាងព្រៃផ្សៃដោយទ័ពឆត្រយោងមកពីអង្គភាពទ័ពឆត្រយោងលេខ៩១១ ដែលគេដាក់ពង្រាយនៅខាងក្រៅរោងចក្រកាត់ដេរ យ៉ាក់ជីង គ្រប់គ្រងដោយកូរ៉េ ក្នុងខណ្ឌពោធិ៍សែនជ័យរាជធានីភ្នំពេញ កាលពីថ្ងៃទី២ខែមករា ។
មនុស្ស១៣នាក់ផ្សេងទៀត ត្រូវបានចាប់ខ្លួននៅថ្ងៃបន្ទាប់ ក្រោយពេលមានការប៉ះទង្គិចដ៏បង្ហូរឈាមនៅផ្លូវវេងស្រេង ក្នុងខណ្ឌពោធិ៍សែនជ័យ អំឡុងពេលកងរាជអាវុធហត្ថបើកការបាញ់ប្រហារដោយកាំភ្លើង អាកា៤៧ លើយុវជនគប់ដុំថ្មដោយបណ្តាលឲ្យកម្មកររោងចក្រកាត់ដេរចំនួនប្រាំនាក់ស្លាប់និងជាង៤០នាក់ផ្សេងទៀតរងរបួស។ មន្ត្រីស្ថានទូតអាមេរិកមួយរូប បានទទួលយកញត្តិនៅម៉ោងប្រហែល៩ព្រឹក ពីអ្នកតវ៉ាដែលបន្ទាប់មកបាននាំគ្នាជិះរ៉ឺម៉កម៉ូតូកង់បី និងម៉ូតូទៅកាន់ស្ថានទូតជប៉ុន ជាទីដែលពួកគេបាននាំគ្នាតវ៉ាម្តងទៀតដោយគ្រវីទង់ជាតិ និយាយតាមឧគ្ឃោសនសព្ទ និងស្រែកពាក្យស្លោក មុនពេលត្រូវបានអនុញ្ញាតឲ្យចូលទៅក្នុងបរិវេណស្ថានទូត ដើម្បីដាក់ញត្តិឲ្យស្ថានទូតជប៉ុនដាក់សម្ពាធលើរដ្ឋាភិបាល ឲ្យដោះលែងមនុស្សទាំង២៣នាក់។
នៅពេលការតវ៉ាគ្មានការរារាំង ទោះបីជារដ្ឋាភិបាលបានចេញបម្រាមហាមមិនឲ្យមានការប្រមូលផ្តុំគ្នាចាប់ពី១០នាក់ឡើងទៅនោះ នៅម៉ោង៩និង៤០នាទីព្រឹកអ្នកតវ៉ាបានចាប់ផ្តើមហែក្បួនទៅកាន់ស្ថានទូតអូស្ត្រាលី តាមបណ្តោយមហាវិថីព្រះនរោត្តម ដោយមានមន្ត្រីនគរបាលសម្ងាត់រាប់សិបនាក់ដើរតាមយ៉ាងកៀកពីក្រោយ ហើយមន្ត្រីនគរបាលសម្ងាត់ទាំងនេះ បានផ្តល់ព័ត៌មានអំពីព្រឹត្តិការណ៍នេះទៅឲ្យថ្នាក់់លើរបស់ខ្លួនជាប់ជានិច្ចតាមអាយកូម។
បន្ទាប់ពីដាក់ញត្តិជូនស្ថានទូតអូស្ត្រាលីរួច អ្នកតវ៉ា បាននាំគ្នាធ្វើដំណើរទៅកាន់ស្ថានទូតអាល្លឺម៉ង់ ដែលស្ថិតនៅតាមបណ្តោយផ្លូវលេខ២១៤ ជាទីដែលអ្នកស្រី ទេព វន្នីមេដឹកនាំអ្នកតវ៉ាបាននិយាយថា ប្រទេសម្ចាស់ជំនួយត្រូវតែចេញមុខមកនិយាយជំនួសឲ្យពលរដ្ឋខ្មែរទូទៅ។
អ្នកស្រី ទេព វន្នី និយាយថា “ ស្ថានទូតទាំងនេះដែលជាប្រទេសម្ចាស់ជំនួយ និងជាប្រទេសគោរពសិទ្ធិមនុស្សមានអំណាចខ្លាំងណាស់ ហេតុដូច្នេះពួកគេអាចជួយយើងបាននៅក្នុងករណីនេះ។
អ្នកស្រីបាននិយាយបន្តថា “ សម្លាប់មនុស្ស គឺជាទង្វើមួយដ៏ព្រៃផ្សៃ។ ហើយជាពិសេស គឺទ័ពឆត្រយោងមកពីអង្គភាពទ័ពឆត្រយោងលេខ៩១១ ដែលបានប្រើអំពើហិង្សាដ៏ព្រៃផ្សៃប្រឆាំងមនុស្ស។ នេះគឺជាការរំលោភសិទ្ធិមនុស្សយ៉ាងធ្ងន់ធ្ងរ ហើយយើងថ្កោលទោសសកម្មភាពខុសច្បាប់របស់រដ្ឋាភិបាលដែលចង់បានតែអំណាច ហើយមិនគិតគូរពីប្រជាពលរដ្ឋ”។
នៅពេលនាំគ្នាចេញមកតាមផ្លូវម្តងទៀត កាលពីរសៀលថ្ងៃសុក្រ អ្នកតវ៉ាបាននាំគ្នាតវ៉ាមួយស្របក់ម្តងទៀតនៅស្ថានទូតអង់គ្លេស ការិយាល័យសហភាពអឺរ៉ុប និងការិយាល័យធនាគារពិភពលោកព្រមទាំងស្ថានទូតកូរ៉េផងដែរ។
នៅពេលចូលរួមក្នុងការតវ៉ានៅស្ថានទូតនានា អ្នកស្រី ប្រាក់ សុផាន់ណារី ប្រពន្ធរបស់លោក វ៉ន ពៅ ដែលត្រូវទ័ពឆត្រយោងវាយដំយ៉ាងព្រៃផ្សៃហើយចាប់ខ្លួននៅខាងក្រៅរោងចក្រ យ៉ាក់ជីង កាលពីថ្ងៃទី២ខែមករា បានសួរថា ហេតុអ្វីបានជាប្តីរបស់អ្នកស្រី ដែលកំពុងមានសុខភាពមិនល្អ ត្រូវបានគេឃុំខ្លួននៅក្នុងពន្ធនាគារដែលនៅឆ្ងាយពីផ្ទះរបស់គាត់យ៉ាងដូច្នេះ។
អ្នកស្រីបានសួរនៅពេលនិយាយនៅខាងក្រៅស្ថានទូតអាមេរិក កាលពីព្រឹកថ្ងៃសុក្រថា “ ហេតុអ្វីបានជាគេចាប់គាត់ហើយដាក់គាត់នៅក្នុងពន្ធនាគារដែលស្ថិតនៅឆ្ងាយពីរាជធានីភ្នំពេញដូច្នេះ?”។អ្នកស្រីបាននិយាយបន្តថា “ ប្រសិនបើបញ្ហាសុខភាពរបស់ប្តីខ្ញុំកាន់តែយ៉ាប់យ៉ឺនទៅៗនោះ ខ្ញុំនឹងថ្កោលទោសរដ្ឋាភិបាលហើយនឹងដាក់ពាក្យបណ្តឹងទៅតុលាការ”។សកម្មជនការពារសិទ្ធិមនុស្ស និងមេធាវីបានចុះទៅសួរសុខទុក្ខនៅមណ្ឌលអប់រំកែប្រែទី៣ កាលពីថ្ងៃសុក្រ ខណៈមានសេចក្តីរាយការណ៍ថា មនុស្សទាំង២៣នាក់ជិតត្រូវបានគេដោះលែងឲ្យនៅក្រៅឃុំហើយ ហើយឯកសារពន្ធនាគារក៏ត្រូវបានគេត្រៀមរួចហើយផងដែរសម្រាប់ការដោះលែង។
លោក យ៉េង វីរៈ នាយកប្រតិបត្តិមជ្ឈមណ្ឌលអប់រំច្បាប់សម្រាប់សហគមន៍បានឲ្យដឹងថា មេធាវីនៅពន្ធនាគារបានដាក់សំណើសុំឲ្យមានការដោះលែងឲ្យនៅក្រៅឃុំរួចហើយ។លោកបានមានប្រសាសន៍ថា “ យើ់ងសង្ឃឹមថា ពួកគេនឹងត្រូវបានដោះលែង”។
លោក សុរិយា ស៊ូបេឌី ប្រេសិតពិសេសរបស់អង្គការសហប្រជាជាតិទទួលបន្ទុកសិទ្ធិមនុស្ស ដែលបេសកកម្មលើកទី១០នៅក្នុងប្រទេសកម្ពុជារបស់លោកត្រូវបានបញ្ចប់កាលពីថ្ងៃសុក្រ ក៏បានអំពាវនាវឲ្យមានដោះលែងអ្នកទាំងអស់នោះឲ្យនៅក្រៅឃុំផងដែរ អំឡុងកិច្ចប្រជុំមួយជាមួយលោកនាយករដ្ឋមន្ត្រី ហ៊ុន សែន នៅក្នុងសប្តាហ៍នេះ។
លោក ប៉ា សុជាតិវង្ស អភិបាលរាជធានីភ្នំពេញ បានចោទប្រកាន់សកម្មជនទាំងនេះថា ជា “ អ្នកតវ៉ាអាជីព” ព្រោះមានមេដឹកនាំមិនបញ្ចេញឈ្មោះបានជួលឲ្យពួកគេមកធ្វើការតវ៉ានៅតាមស្ថានទូតទាំងនេះ។
លោក ប៉ា សុជាតិវង្ស មានប្រសាសន៍ ដោយបដិសេធមិននិយាយថា តើនរណាដែលលោកជឿជាក់ថា ជាអ្នកដែលនៅពីក្រោយសកម្មជនថា “ ពេលពួកគេបានលុយពួកគេធ្វើការតវ៉ា”៕ ស៊ុយឈាង
(រាយការណ៍បន្ថែមដោយ Lauren Crothers)