30 C
Phnom Penh

ក្រសួង​ព័ត៌មាន​អញ្ជើញលោក​ ម៉ម​ សូណង់​ដូ​ ទៅជួប​ពិភាក្សា​គ្នា

ដោយ ឌឹ ខេមបូឌា ដេលី

បទវិភាគ

ក្រសួង​ព័ត៌មាន​បាន​អញ្ជើញ​លោក​ ម៉ម​ សូណង់​ដូ​ ម្ចាស់​ស្ថានីយវិទ្យុ​សម្បុក​ឃ្មុំ​ ដ៏មាន​ប្រជា​​​​ប្រិយភាព​ឲ្យ​មក​ជួប​ពិភាក្សា​គ្នា​ កាល​ពី​ថ្ងៃ​សុក្រ​​ បន្ទាប់​ពី​បាន​ច្រាន​ចោល​ម្តង​ហើយ​​ម្តង​ទៀត​ នូវ​សំណើ​របស់​លោក​ ដែល​បាន​ស្នើ​​​សុំ​ដំឡើង​ស្ថានីយ​ផ្សាយ​បន្ត​នៅ​តាម​បណ្តា​ខេត្ត​ចាប់​តាំង​ពី​ឆ្នាំ​២០០៥​មក​នោះ​។

អ្នក​ស្រី​ ហួន​ ផាន់ណារី​ ជំនួយ​ការ​របស់​លោក​ ម៉ម​ សូណង់​ដូ​ បាន​លើក​ឡើង​ថា លោក​​ ប៊ុត ប៊ូវុធ អគ្គនាយក​នៃ​អគ្គ​នាយក​ដ្ឋាន​សោត​ទស្សន៍​​ បាន​សរសេរ​លិខិត​មួយ​ច្បាប់​ កាល​ពី​ថ្ងៃ​ព្រហស្បតិ៍​ មក​អញ្ជើញ​លោក​ ម៉ម​ សូណង់​ដូ ឲ្យ​មក​ចូល​រួម​ក្នុង​កិច្ច​​ប្រជុំ​មួយ​ដើម្បី​ពិភាក្សា​​អំពី​សំណើ​របស់​លោក ​ដែល​ស្នើ​សុំ​ដំឡើង​ស្ថានីយ​​​​ផ្សាយ​បន្ត​​នៅ​តាម​បណ្តា​ខេត្ត​ ក៏ដូច​ជា​អាជ្ញាប័ណ្ណ​សុំ​បង្កើត​ទូរទស្សន៍​ផង​ដែរ​ ប៉ុន្តែសំណើ​​របស់​លោក​ ម៉ម​ សូណង់​ដូ ​ត្រូវ​បាន​ច្រាន​ចោល​ម្តង​ទៀត​កាល​ពី​ថ្ងៃ​អង្គារ។

អ្នក​ស្រី​ ផាន់ណារី​ បាន​និយាយ​ថា “ យើង​​​ទទួល​បាន​លិខិតមួយ​ច្បាប់​​ពី​ក្រសួង​ព័ត៌មាន​ ដែល​អំពាវនាវ​ឲ្យ​មាន​កិច្ច​ប្រជុំ​មួយ​ជា​មួយ​លោក ម៉ម​ សូណង់​ដូ​ កាល​ពី​ថ្ងៃ​សុក្រ ប៉ុន្តែ​យើង​បាន​ស្នើ​ឲ្យ​មាន​ការ​ពន្យារ​ពេល​ទៅ​វិញ​ ព្រោះ​លោក​ ម៉ម​ សូណង់​ដូ​ បច្ចុប្បន្ន​កំពុង​​នៅ​​ក្រៅ​ប្រទេស​”។ អ្នក​ស្រី​បាន​បន្ត​ថា លោក​​​ ម៉ម​ សូណង់​ដូ​ នឹង​ត្រឡប់​មក​ប្រទេស​កម្ពុជា​នៅ​ថ្ងៃ​ព្រហស្បតិ៍​ ហើយ​អាច​ចូល​រួម​ប្រជុំ​បាន​នៅ​ថ្ងៃ​សុក្រ​សប្តាហ៍​ក្រោយ។

ទោះបី​ជា​ក្រសួង​បាន​ចេញ​អាជ្ញាប័ណ្ណ​ឲ្យ​ទូរទស្សន៍​ថ្មី​មួយ​ចំនួន​នៅ​ក្នុងរយៈពេល​​ប៉ុន្មាន​​ឆ្នាំ​ថ្មី​ៗនេះ​ក៏​ដោយ​ ក៏​អង្គភាព​ដែល​គ្មាន​​ទំនាក់​ទំនង​ជាមួយ​គណបក្ស​ប្រជា​ជន​កម្ពុជា​​ត្រូវ​បាន​​ប្រាប់​ថា “ ហ្វ្រេកង់​ចង្អៀត​ខ្លាំង​ណាស់​”។​​​

អ្នក​ស្រី​ ផាន់ណារី​ បាន​ព្រមាន​ថា ការ​គំរាម​ធ្វើ​ការ​តវ៉ា​របស់​លោក​ ម៉ម​ សូណង់​ដូ​នៅ​តាម​ផ្លូវ​ខាង​ក្រៅ​ក្រសួង​ព័ត៌មាន ​អាច​នឹង​កើត​ឡើង​ ប្រសិនលោក​ ខៀវ​ កាញារីទ្ធ រដ្ឋ​មន្ត្រី​ក្រសួង​ព័ត៌មាន​នៅ​តែ​បដិសេធ​សំណើ​របស់​លោក​ ម៉ម​ សូណង់​ដូ។

អ្នក​ស្រី​បាន​និយាយ​ថា “ ប្រសិន​បើ​យើង​​ត្រូវ​បាន​ច្រាន​ចោល​ម្តង​ទៀត​ ការ​តវ៉ា​និង​ការ​​ជួប​ជុំ​ នឹង​ត្រូវ​ធ្វើ​ឡើង​ជាក់​ជា​ពុំ​ខាន​ ប្រសិន​អ្នក​គាំទ្រ​ និង​ពលរដ្ឋ​ចង់​ធ្វើ​”។

លោក ម៉ម សូណង់​ដូ​ អ្នក​រិះ​គន់​រដ្ឋាភិ​បាល​​ឥត​សំចៃ​មាត់​ត្រូវ​បាន​ផ្តន្ទាទោស​ឲ្យ​ជាប់​ពន្ធ​នាគារ​​រយៈពេល​២០​ឆ្នាំ​ កាល​ពី​ឆ្នាំ​២០១២​​ ពី​​បទ​ញុះញង់​ឲ្យ​មានការ​បង្កើតចលនា​អបគមន៍ ដែល​អង្គការ​សិទ្ធិ​មនុស្ស​ជាតិ ​និង​អន្តរជាតិ​​ បាន​លើក​ឡើង​ថា ជា​រឿង​ប្រឌិត​​ឡើង​ដោយ​​រដ្ឋាភិបាល។ លោក​ត្រូវ​បាន​ដោះ​លែង​កាល​​ពីឆ្នាំ​មុន​ បន្ទាប់ពី​អន្តរជាតិបាន​​ថ្កោល​ទោស​យ៉ាង​ខ្លាំង​លើ​រដ្ឋាភិបាល​។

កាលពី​ថ្ងៃ​ពុធ​ លោក​ ម៉ម​ សូណង់​ដូ​ បាន​ប្តេជ្ញា​ថា នឹង​ប្រឆាំង​ជំទាស់​រដ្ឋាភិបាល​និង​បម្រាម​ដែលហាម​មិន​ឲ្យ​មាន​ការ​តវ៉ា​ បន្ទាប់​ពី​បាន​ជម្រាប​ប្រាប់​លោក ប៉ា​ សុជាតិ​វង្ស​ អភិបាល​រាជធានី​ភ្នំពេញ អំពី​បំណង​ធ្វើ​ការ​ជួប​ជុំ​នៅ​ទីលាន​ប្រជា​ធិបតេយ្យ​ ហើយ​បន្ទាប់​មក​ហែ​ក្បួន​ទៅ​ក្រសួង​ព័ត៌មាន​ដើម្បី​ទាម​ទារ​ឲ្យ​ក្រសួង​យល់​ព្រម​ផ្តល់​ហ្វ្រេកង់​សម្រាប់​​ការ​ដំឡើង​ស្ថានីយ​ផ្សាយ​បន្ត​។

សាលា​រាជ​ធានី​បានផ្អាក​​ការ​ចេញ​សេចក្តី​ឆ្លើយ​​តប​ដែល​លោក​ ឡុង​ ឌី​ម៉ង់​ អ្នក​នាំ​ពាក្យ​សាលា​​រាជ​ធានី​បាន​លើក​ឡើង​ កាល​ពី​ថ្ងៃ​សុក្រ​ ពេល​នេះវា​រហ័ស​ពេក​​មិន​អាច​ចេញ​លិខិត​ឆ្លើយ​តប​បាន​ទេ​ ព្រោះ​លោក​ ម៉ម​ សូណង់​ដូ​ បាន​ជួប​ពិភាក្សា​ជាមួយ​លោក ប៊ូវុធ​ ដែល​ពេល​នេះ​មិន​អាច​ទាក់​ទង​បាន​។

លោក​បាន​មាន​ប្រសាសន៍​ថា “ យើង​បាន​​​សម្រេច​ផ្អាក ​ព្រោះ​យើង​នឹង​ផ្តល់​ពេល​វេលា​ឲ្យ​ក្រសួង​ព័ត៌មាន​ជួប​ពិភាក្សា​ជាមួយ​លោក ម៉ម​ សូណង់​ដូ​ ជាមុន​សិន​”។

បច្ចុប្បន្ន​មាន​ស្ថានីយ​ទូរទស្សន៍​សរុប​ចំនួន​១១​ ហើយ​ទូរទស្សន៍​ទាំង​អស់​នេះ​ គឺ​ជា​ទូរទស្សន៍​ដែល​ផ្សព្វផ្សាយ​​ព័ត៌មាន​គាំ​ទ្រ​រដ្ឋា​ភិបាល​ដោយ​ធ្វើ​ព្រងើ​កន្តើយ​ចំពោះ​គណ​បក្ស​ប្រឆាំង​ ឬក៏​ផ្សាយ​អ្វីដែល​អាក្រក់​ពី​គណបក្ស​ប្រឆាំង​។

យោង​តាម​ស្ថិតិ​របស់​ក្រសួង​ព័ត៌មាន​ បាន​ឲ្យ​ដឹង​ថា មាន​ស្ថានីយ​វិទ្យុ​ចំនួន​៣៤​នៅ​ក្នុង​រាជធានី​ភ្នំពេញ​ ៣៨នៅ​តាម​ខេត្ត​ និង​២៥​ផ្សេង​ទៀត​ គឺ​ជា​ស្ថានីយ​ផ្សាយ​បន្ត​។​ ក៏ដូច​ជា​ស្ថានីយ​ទូរទស្សន៍​ដែរនោះ ​ស្ថានីយ​វិទ្យុ​ភាគច្រើន​ ត្រូវ​បាន​គេ​ចាត់​ទុក​ថា គាំទ្រ​តែ​គណបក្ស​កាន់​អំណាច​។

អ្នក​គាំទ្រ​ស្ថានីយ​សម្បុក​ឃ្មុំ គ្រោង​នឹង​ចាប់​ផ្តើម​ធ្វើ​ការ​តវ៉ា​ នៅ​ថ្ងៃទី​២៧​ខែ​មករា៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស