លោកស្រី មូរ សុខហួរ តំណាងរាស្ត្រជាប់ឆ្នោតមកពីគណបក្សប្រឆាំង បានឲ្យដឹងកាលពីម្សិលមិញថា គណបក្សសង្គ្រោះជាតិនឹងរក្សាទំនាក់ទំនងជិតស្និទ្ធជាមួយមន្ត្រីសហភាពអឺរ៉ុប ដើម្បីធានាថា សេចក្តីសម្រេចកាលពីថ្ងៃព្រហស្បតិ៍ ដោយបានអំពាវនាវឲ្យមានការស៊ើបអង្កេតការបោះឆ្នោតជ្រើសតាំងតំណាងរាស្ត្រកាលពីខែកក្កដា និងការបាញ់សម្លាប់អ្នកតវ៉ាប្រាំនាក់ក្នុងខែនេះ នឹងមានសកម្មភាពជាក់ស្តែង។
សភារបស់សហភាពអឺរ៉ុបបានអនុម័តសេចក្តីសម្រេចក្នុងការអំពាវនាវឲ្យរដ្ឋាភិបាលរបស់លោកនាយករដ្ឋមន្ត្រី ហ៊ុន សែនធ្វើការស៊ើបអង្កេតឯករាជ្យមួយ និងការស៊ើបអង្កេតដឹកនាំដោយអន្តរជាតិលើការបោះឆ្នោតដែលមានជម្លោះកាលពីខែកក្កដាឆ្នាំមុន និងការសម្លាប់កម្មកររោងចក្រកាត់ដេរប្រាំនាក់ និងធ្វើឲ្យជាង៤០នាក់ផ្សេងទៀតរងរបួស កាលពីថ្ងៃទី៣ ខែនេះ។
លោក ស្រី មូរ សុខហួរ មានប្រសាសន៍ថា “យើងគ្រាំទ្រសភាអឺរ៉ុបយ៉ាងខ្លាំង ហើយ យើងនឹងរក្សាទំនាក់ទំនងយ៉ាងជិតស្និទ្ធជាមួយសហគមន៍អន្តរជាតិ ដែលមានការទទួលខុសត្រូវចំពោះកាតព្វកិច្ចរបស់ខ្លួន។ លោកស្រីបានលើកឡើងបន្តថា ការកាត់ជំនួយសម្រាប់ប្រទេសកម្ពុជា អាចជាជម្រើសមួយសម្រាប់សហភាពអឺរ៉ុបដែលជាម្ចាស់ជំនួយដ៏ធំបំផុតតែមួយគត់របស់ប្រទេសកម្ពុជា។
លោកស្រីបានមានប្រសាសន៍ថា “យើងមិនចាត់ទុករដ្ឋាភិបាលនេះជារដ្ឋាភិបាលស្របច្បាប់ទេ ហើយវាជាសំណួរទាក់ទងនឹងភាពស្របច្បាប់។ ជំនួយមិនគួរត្រូវបានបែងចែកដោយឆ្លងកាត់រដ្ឋាភិបាលមិនស្របច្បាប់ទេ ហើយកិច្ចខិតខំប្រឹងប្រែងបែបនេះធ្វើឡើងក្នុងគោលបំណងលើកស្ទួយភាពស្របច្បាប់របស់រដ្ឋាភិបាល តាមរយៈការបោះឆ្នោតឡើងវិញ”។
លោក ឯក ថា អ្នកនាំពាក្យរបស់អង្គភាពព័ត៌មាននិងប្រតិកម្មរហ័សនៅទីស្តីការគណៈរដ្ឋមន្ត្រីមានប្រសាសន៍ថា រដ្ឋាភិបាលរបស់ គណបក្សប្រជាជនសង្ឃឹមថាសហភាពអឺរ៉ុបនឹងស្វាគមន៍សេចក្តីប្រកាសរបស់រដ្ឋាភិបាលឲ្យមានការស៊ើបអង្កេតការសម្លាប់អ្នកតវ៉ា និងមិនពិចារណាការកាត់ជំនួយឡើយ។ លោកបានឲ្យដឹងទៀតថា “ក្នុងឧបទ្ទវហេតុកាលពីថ្ងៃទី៣ខែមករា រដ្ឋាភិបាលមានក្រុមស៊ើបអង្កេតមួយ ហើយការស៊ើបអង្កេតមួយនឹងធ្វើឡើង”។
លោកបន្តថា “ប្រជាជនកម្ពុជាស្នើកុំឲ្យម្ចាស់ជំនួយកាត់ជំនួយដល់កម្ពុជា ពីព្រោះយើងត្រូវការប្រទេសជាមិត្តនេះគាំទ្រយើង។ ប្រជាជនកម្ពុជាមានការឆ្លងកាត់ការឈឺចាប់ច្រើនណាស់រយៈពេល៣០ឆ្នាំហើយ”។ លោក ហ្សង់-ហ្វ្រង់ស័្វរ កូតេន (Jean-Francois Cautain) ឯកអគ្គរដ្ឋទូតរបស់សហភាពអឺរ៉ុបមិនបានឆ្លើយតបនឹងសំណើសុំការអត្ថាធិប្បាយអំពីសេចក្តីសម្រេចនេះកាលពីម្សិលមិញទេ។
សេចក្តីសម្រេចដោយប្រើពាក្យធ្ងន់ៗរបស់សហភាពអឺរ៉ុបមានជំហរផ្ទុយគ្នាពីលទ្ធផលវាយតម្លៃរបស់សភាពអឺរ៉ុប ទៅលើស្ថានភាពសិទ្ធិមនុស្ស និងស្ថានភាពបោះឆ្នោតដោយយុត្តិធម៌នៅក្នុងប្រទេសកម្ពុជា។
កាលពីខែតុលាឆ្នាំ២០១២ មានការអនុម័តសេចក្តីសម្រេចមួយ ដើម្បីអំពាវនាវឲ្យគណៈកម្មការអឺរ៉ុបស៊ើបអង្កេតករណីបណ្តេញចេញដោយបង្ខំធ្វើឡើងដោយក្រុមហ៊ុនចម្ការអំពៅ ដែលទទួលបានសិទ្ធិអាទិភាពក្នុងការចេញទៅកាន់សហភាពអឺរ៉ុប ហើយដោយសារតែមានការផ្អាកការផ្តល់ផលប្រយោជន៍ទាំងនេះចំពោះប្រទេសដែលត្រូវបានគេដឹងថា មានការរំលោភសិទ្ធិមនុស្ស។
ទោះជាយ៉ាងណា កាលពីខែមីនា ឆ្នាំមុនសមាជិកគណៈកម្មការពាណិជ្ជកម្មសហភាពអឺរ៉ុប ក៏ដូចជាលោក ខេធ័ររីន អាស្តុន (Catherine Ashton)ប្រធានផ្នែកគោលនយោបាយការបរទេសសហភាពអឺរ៉ុប បានចុះហត្ថលេខាលើលិខិតមួយច្បាប់ ដែលបញ្ជាក់ថា សហភាពអឺរ៉ុបមិនមានផែនការអនុវត្តប្រតិបត្តិការស៊ើបអង្កេតនៅក្នុងប្រទេសកម្ពុជាទេ។
អង្គការសិទ្ធិមនុស្សនានាបានចោទប្រកាន់ក្រុមហ៊ុនចម្ការកៅស៊ូ ដែលនាំផលិតផលទៅទីផ្សារសហភាពអឺរ៉ុប ថាមានការពាក់ព័ន្ធក្នុងការចាប់យកដីពីប្រជាជនក្រីក្រនៅតាមជនបទ។ លើសពីនេះទៅទៀត អង្គការទាំងនេះបានរិះគន់សហភាពអឺរ៉ុបថា មិនបានស៊ើបអង្កេតករណីរំលោភតាមការចោទប្រកាន់នេះទេ។ ក្រុមហ៊ុនកូកាកូឡា បានលើកឡើងកាលពីខែវិច្ឆិកាថា សកម្មភាពទន្ទ្រានយកដីធ្វើឡើងដោយក្រុមហ៊ុនចម្ការអំពៅ គឺជាទង្វើមិនអាចទទួលយកបានទេ ហើយខ្លួននឹងចាប់ផ្តើមស៊ើ់បអង្កេតក្រុមហ៊ុននានា ដែលជាអ្នកផ្គត់ផ្គង់ស្ករដល់ខ្លួន ដូចជាក្រុមហ៊ុនដែលមានចម្ការនៅក្នុងប្រទេសកម្ពុជាជាដើម ហើយនិងបញ្ឈប់ទំនាក់ទំនងអាជីវកម្មជាមួយក្រុមហ៊ុនផ្គត់ផ្គង់ណាដែលត្រូវបានរកឃើញថាមានការពាក់ព័ន្ធក្នុងការទន្ទ្រានយកដី ឬក៏ការរំលោភសិទ្ធិមនុស្ស។
លោក សម រង្ស៊ី មេដឹកនាំគណបក្សប្រឆាំងបានលើកឡើងកាលពីម្សិលមិញថា សេចក្តីសម្រេចរបស់សហភាពអឺរ៉ុប គឺជាសញ្ញាដ៏សំខាន់មួយសម្រាប់ទាំងគណៈកម្មការអឺរ៉ុប ទំាងរដ្ឋាភិបាលកម្ពុជា។ លោកបានមានប្រសាសន៍ថា “សេចក្តីសម្រេចនោះគ្រាន់តែជាសេចក្តីថ្លែងការណ៍មួយ ក៏ប៉ុន្តែវាអាចប៉ះពាល់គណៈកម្មការអឺរ៉ុប”។ លោកបានបន្តទៀតថា “ពួកគេ[សភាអឺរ៉ុប] កំពុងស្នើឲ្យគណៈកម្មការអឺរ៉ុបអនុវត្តកិច្ចព្រមព្រៀងសហប្រតិបត្តិការរវាងប្រទេសកម្ពុជា និងសហភាពអឺរ៉ុប ហើយខចែងមួយនៅក្នុងកិច្ចព្រមព្រៀងនោះនិយាយអំពីការគោរពសិទ្ធិមនុស្ស។ ខចែងនេះនឹងដាក់សម្ពាធទៅលើគណៈកម្មការអឺរ៉ុប”។
ថ្លែងទាក់ទងទៅនឹងការទាមទារឲ្យមានការស៊ើបអង្កេតលើករណីបាញ់សម្លាប់អ្នកតវ៉ាគប់ដុំថ្មប្រាំនាក់ ពីសំណាក់កម្លាំងរបស់លោកកាលពីថ្ងៃទី៣ខែនេះ លោក ខេង ទីតូអ្នកនាំពាក្យកងរាជអាវុធហត្ថលើផ្ទៃប្រទេសបានលើកឡើងថា សហភាពអឺរ៉ុបគួរតែពេញចិត្តសេចក្តីប្រកាសអំពីការស៊ើបអង្កេតក្នុងស្រុក ទៅលើករណីបាញ់សម្លាប់នេះ។
លោកឧត្តមសេនីយ៍ ខេង ទីតូ បានមានប្រសាសន៍ថា “នេះគឺជាបញ្ហាខ្មែរ”៕សុធា
(រាយការណ៍បន្ថែមដោយ ផន បុប្ផា)