កាលពីថ្ងៃសុក្រ លោក ប៉ា សុជាតិវង្ស អភិបាលរាជធានីភ្នំពេញបានទៅសួរសុខទុក្ខអ្នកភូមិសហគមន៍បុរីកីឡាដែលត្រូវបានបណ្តេញចេញ ដែលឥឡូវនេះរស់នៅកន្លែងគំនរចាក់សំរាមនៅក្បែរអតីតលំនៅដ្ឋានរបស់ខ្លួន ហើយជាថ្មីម្តងទៀតលោកបានសន្យាសាង សង់លំនៅដ្ឋានសមរម្យសម្រាប់អ្នកភូមិ១៥០គ្រួសារដែលមិនព្រមចាកចេញពីកន្លែងអតីតផ្ទះសំបែងរបស់ខ្លួន។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានមានប្រសាសន៍ថា បើទោះជាចាំបាច់ត្រូវដោះស្រាយផែនការជាក់លាក់ច្រើនទៀតក៏ដោយ ក៏សាលារាជធានីភ្នំពេញនឹងធ្វើការបោសសម្អាតតំបន់ចាក់សំរាមដែលឥឡូវនេះអ្នកភូមិចំនួន១៥០គ្រួសាររស់នៅនិងសាងសង់ផ្ទះសំបែងជូនអ្នកភូមិទាំង១៥០គ្រួសារនោះ យ៉ាងហោចណាស់មានទំហំ៤ម៉ែត្រគុណនឹង៦ម៉ែត្រដែរនៅក្បែរនោះ។
អ្នកភូមិ១៥០គ្រួសារត្រូវបានបណ្តេញចេញពីផ្ទះសំបែងចាស់របស់ខ្លួនកាលពីឆ្នាំ២០១២ មិនត្រូវបានផ្តល់លំនៅដ្ឋានជាជម្រើស ឬសំណងដូចក្រុមហ៊ុនអភិវឌ្ឍន៍អចលនទ្រព្យដែលបានយកដីរបស់ពួកគាត់ នោះបានសន្យាជាមួយពួកគាត់ឡើយ។
លោក ឡុង ឌីម៉ង់ បានមានប្រសាសន៍ថា “ពួកគាត់កំពុងរស់នៅដោយគ្មានអនាម័យ…យើងមិនអាចអនុញ្ញាតឲ្យពួកគាត់បន្តរស់នៅដូចសព្វថ្ងៃនេះបានទៀតឡើយ ពីព្រោះវានឹងប៉ះពាល់ខ្លាំងណាស់ដល់សុខភាពរបស់ពួកគាត់”។
លោក ឡុង ឌីម៉ង់ បានមានប្រសាសន៍ទៀតថា សាលារាជធានីនឹងពិភាក្សាជាមួយក្រុមហ៊ុនភាពីម៉ិច ជាក្រុមហ៊ុនអភិវឌ្ឍន៍អចលន ទ្រព្យដែលមិនបានគោរពតាមការសន្យារបស់ខ្លួនក្នុងការសាងសង់អគារផ្ទះល្វែងសម្រាប់គ្រួសារអ្នកភូមិដែលត្រូវបានបណ្តេញចេញទាំងនោះ បន្ទាប់ពីរដ្ឋាភិបាលបានផ្តល់ដីសហគមន៍បុរីកីឡានេះទៅឲ្យក្រុមហ៊ុននេះរួចមក។
បន្ទាប់ពីលោកចូលកាន់តំណែងជាអភិបាលរាជធានីភ្នំពេញកាលពីខែឧសភា ឆ្នាំ២០១៣ លោក ប៉ា សុជាតិវង្ស បានជួបជាមួយ អ្នកភូមិអតីតសហគមន៍បឹងកក់ដែលធ្វើការតវ៉ា ដែលបានប្រឈមមុខនឹងការបណ្តេញចេញដែរ ហើយបានសន្យាដោះស្រាយ ជម្លោះដែលអូសបន្លាយជាយូរមកហើយនេះជាមួយក្រុមហ៊ុនស៊ូកាគូ អ៊ិន ជាក្រុមហ៊ុនអភិវឌ្ឍន៍អចលនទ្រព្យដែលកាន់កាប់ដោយ លោក ឡៅ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា ។
ដោយលោក ប៉ា សុជាតិវង្ស មានការដោះស្រាយជម្លោះតំបន់បឹងកក់យឺតយ៉ាវនោះ លោក ពេជ្រ លឹមឃួន អ្នកភូមិបុរីកីឡា បានមាននិយាយកាលពីម្សិលមិញថា លោកមានការព្រួយបារម្ភថា លោកអភិបាលរាជធានីនឹងមិនបានគោរពតាមការសន្យាជាមួយអ្នកភូមិសហគមន៍បុរីកីឡាដែរ។
លោក លឹមឃួន បាននិយាយថា “យើងសង្ឃឹមថា លោកអភិបាលនឹងមិនកុហកពួកយើងឡើយ”៕ សារុន