លោក នេត វ៉ាន់ថា ប្រធានមន្ទីរអគ្គិភ័យរាជធានីបានឲ្យដឹងកាលពីម្សិលមិញថា បុរសម្នាក់បានស្លាប់ និងផ្ទះចំនួនបីខ្នងត្រូវបានបំផ្លាញ បន្ទាប់ពីអគ្គិភ័យមួយបានកើតឡើងនៅក្នុងខណ្ឌ សែន សុខ រាជធានីភ្នំពេញកាលពីព្រឹកថ្ងៃអាទិត្យ។
លោក វ៉ាន់ថា បានមានប្រសាសន៍ថា ពួកគេស៊ើបអង្កេតការបង្កឲ្យមានអគ្គិភ័យនេះ ប៉ុន្តែរំពឹងថា អគ្គិភ័យនេះ ដោយសារតែទុសេខ្សែភ្លើង។ជនរងគ្រោះឈ្មោះ វ៉ាន់ ប៊ុនហៀង អាយុ២៧ឆ្នាំ បានភ្ញាក់ឡើង នៅពេលអគ្គិភ័យចាប់ផ្តើម និងបានស្រែកឲ្យភរិយាមានគភ៌ និងកូនបីនាក់របស់គាត់ឲ្យរត់ចេញពីផ្ទះ ប៉ុន្តែគាត់ខ្លួនឯងមិនអាចចេញរួចនៅពេលនោះ ហើយផ្ទះក៏បានរលំសង្កត់លើគាត់ បន្ទាប់ពីគ្រួសារនេះបានរត់ចេញ។
លោក វ៉ាន់ថា បានឲ្យដឹងថា “យើងមិនទាន់ដឹងពីមូលហេតុដែលអគ្គិភ័យកើតឡើងនៅឡើយទេ ប៉ុន្តែយើងសង្ស័យថា ដោយសារទុសេខ្សែភ្លើង”។
លោក វ៉ាន់ថា បានឲ្យដឹងបន្តទៀតថា រថយន្តពន្លត់អគ្គិភ័យចំនួនបួនគ្រឿងបានចំណាយពេលមួយម៉ោង ធ្វើការពន្លត់អណ្តាតភ្លើង ដែលពួកគេពន្លត់អស់ត្រឹមម៉ោង៣ទាបភ្លឺ។ គ្មានអ្នកស្រុកណាមកពីផ្ទះផ្សេងទៀតរងរបួសទេ។
ការទុសេខ្សែភ្លើងត្រូវបានគេស្តីបន្ទោសថាមានពាក់ព័ន្ធនឹងអគ្គិភ័យចំនួន៥៦ភាគរយនៃអគ្គិភ័យ១០៥លើកក្នុងរាជធានីភ្នំពេញកាលពីឆ្នាំទៅ ដែលបានធ្វើឲ្យមនុស្សចំនួនប្រាំមួយនាក់ស្លាប់ និង១៥នាក់រងរបួស។ មកទល់ពេលនេះនាឆ្នាំនេះមានមនុស្សចំនួនពីរនាក់ស្លាប់ក្នុងអគ្គិភ័យប្រាំលើក នេះបើយោងតាមលោក វ៉ាន់ថា៕ ប៊ុននី