មុនពេលពិធីបុណ្យខួបគំរប់១០ឆ្នាំដែលត្រូវបានគ្រោងរៀបចំនៅថ្ងៃស្អែក សម្រាប់រំឭកអំពីសោកនាដកម្មបាញ់សម្លាប់លោក ជា វិជ្ជា ប្រធានសហជីពសេរីកម្មករ នគរបាលបានលើកឡើងកាលពីម្សិលមិញថា ទោះបីជាខ្លួនមិនមានសមត្ថភាពចាប់ជនណាម្នាក់យកទៅផ្តន្ទាទោសពីបទមនុស្សឃាតលើសកម្មជនដ៏សំខាន់រូបនេះក៏ដោយ ក៏ករណីបាញ់សម្លាប់នេះនៅតែបើកចំហ។
ទោះបីជាយ៉ាងណា លោក ជា មុនី ប្អូនប្រុសលោក ជា វិជ្ជា បានលើកឡើងជាថ្មីម្តងទៀតថា លោកមានការជឿជាក់ជាយូរមកហើយថា រដ្ឋាភិបាលបានលាក់បាំងភ័ស្តុតាងសម្រាប់ករណីបាញ់សម្លាប់បងប្រុសបង្កើតរបស់លោក។
លោកបានមានប្រសាសន៍ថា “ ខ្ញុំគិតថា ឃាតករត្រូវបានមេរបស់ពួកគេការពារ។ មេរបស់ពួកគេគឺរដ្ឋាភិបាល។ បើពួកគេមិនមានមេទេ ពួកគេនឹងត្រូវបានចាប់ខ្លួន”។ គួរបញ្ជាក់ថា លោក ជា មុនី បានស្នងតំណែងជាប្រធានសហជីពសេរីកម្មករពីបងប្រុសរបស់លោកក្នុងឆ្នាំ២០០៤។
លោកបានមានប្រសាសន៍ថា “ នេះគឺជាការអសមត្ថភាពរបស់អាជ្ញាធរ។ ប្រសិនបើរដ្ឋាភិបាលកែទម្រង់ប្រព័ន្ធតុលាការ ខ្ញុំនឹងដាក់ពាក្យបណ្តឹងជាថ្មីម្តងទៀត ពីព្រោះ បច្ចុប្បន្ន តុលាការមានអំពើពុករលួយ និងឃុបឃិតជាមួយគណបក្សប្រជាជនកម្ពុជា”។
អ្នករងទោសរបស់អ្នកដទៃពីបទមនុស្សឃាតចំនួនពីរនាក់ គឺលោក ប៊ន សំណាង និងលោក សុខ សំអឿន បានជាប់ពន្ធនាគាររយៈពេលប្រាំឆ្នាំក្នុងម្នាក់ មុនពេលលោកទាំងពីរត្រូវបានដោះលែងតាមដីការបស់តុលាការកំពូល ដោយសារតែខ្វះភ័ស្តុតាង។
កាលពីម្សិលមិញ នៅពេលត្រូវបានសួរអំពីមូលហេតុដែលមិនទាន់មានជនណាប្រឈមនឹងការផ្តន្ទាទោសពីបទមនុស្សឃាតលើមេដឹកនាំសហជីពដ៏មានការគាំទ្រយ៉ាងច្រើននៅក្នុងប្រទេសកម្ពុជា កាលពី១០ឆ្នាំមុន បើគិតត្រឹមសប្តាហ៍នេះ លោកវរសេនីយ៍ឯក ម៉ក់ ជីតូ ប្រធាននាយកដ្ឋានកណ្តាលសន្តិសុខនៃក្រសួងមហាផ្ទៃ បានឲ្យដឹងថា ប្រតិបត្តិការស៊ើបអង្កេតកំពុងតែបន្ត។ លោកវរសេនីយ៍ឯក ម៉ក់ ជីតូ បានមានប្រសាសន៍កាលពីម្សិលមិញថា “ ជាទូទៅអាជ្ញាធររបស់យើងបន្តអនុវត្តប្រតិបត្តិការស៊ើបអង្កេត”។
លោក ម៉ក់ ជីតូ បានបង្វែរសំណួរផ្សេងៗទៀតទៅលោក ហេង ពៅ អតីតស្នងការនគរបាលរាជធានីភ្នំពេញ ដែលកាលពីមុនបានដឹកនាំប្រតិបត្តិការស៊ើបអង្កេតលើករណីមនុស្សឃាតលើលោក ជា វិជ្ជា ។
លោក ហេង ពៅ ដែលបានចាប់ខ្លួនលោក សំណាង និងលោក សំអឿន ដែលបច្ចុប្បន្នរួចខ្លួនពីការជាប់ទោស បានប្រកាសថា សំណុំរឿងនេះបានបញ្ចប់ហើយ។
ក្រោយមក លោក ហេង ពៅ ត្រូវបានដំឡើងឋានៈជាអនុរដ្ឋលេខាធិការក្រសួងមហាផ្ទៃ និងជាទីប្រឹក្សាសន្តិសុខរបស់លោកនាយករដ្ឋមន្ត្រី ហ៊ុន សែន មុនពេលលោកចាកចេញពីប្រទេសកម្ពុជា បន្ទាប់ពីមានការចោទប្រកាន់លើបទព្រហ្មទណ្ឌកម្រិតធ្ងន់ជាច្រើន។
ខណៈដែលកំពុងរត់គេចខ្លួននៅក្នុងឆ្នាំ២០០៦ លោក ហេង ពៅ បានប្រាប់ទស្សនាវដ្តីបារាំងមួយឈ្មោះ L’Express ថា លោក ហុក ឡងឌី អតីតអគ្គស្នងការនគរបាលជាតិដែលស្ថិតក្នុងចំណោមសម្ពន្ធមិត្តដ៏ជិតស្និទ្ធបំផុតរបស់លោក ហ៊ុន សែន បានប្រាប់លោកឲ្យទម្លាក់កំហុសទៅលើលោក សំណាង និងលោក សំអឿន ថា បានសម្លាប់លោក ជា វិជ្ជា ។
បច្ចុប្បន្ន លោក ហេង ពៅ កំពុងជាប់ពន្ធនាគាររយៈពេល១០០ឆ្នាំ នៅក្នុងពន្ធនាគារព្រៃស ពីបទល្មើសជាច្រើន ដូចជា បទមនុស្សឃាតចៅក្រមសាលាដំបូងរាជធានីភ្នំពេញ។ តាំងពីលោកត្រូវបានចាប់ខ្លួន និងបានវិលត្រឡប់មកប្រទេសកម្ពុជាវិញ ក្រោមការត្រួតពិនិត្យដោយផ្ទាល់ពីសំណាក់លោកវរសេនីយ៍ឯក ម៉ក់ ជីតូ លោក ហេង ពៅ មិនដែលបានធ្វើអត្ថាធិប្បាយបន្ថែមទាក់ទងទៅនឹងឃាតកម្មលើលោក ជា វិជ្ជា ទេ។
ក៏ប៉ុន្តែ ក្រៅពីករណីសោកនាដកម្មបាញ់ស្លាប់លោក ជា វិជ្ជា នៅមានករណីជាច្រើនទៀតមិនទាន់ត្រូវបានដោះស្រាយ ដូចជា ករណីមនុស្សឃាតលើមេដឹកនាំសហជីពសេរីកម្មករពីររូបផ្សេងទៀត អ្នកសារព័ត៌មាន១១នាក់ អ្នកនយោបាយ និងអ្នកគាំទ្រគណបក្សប្រឆាំង និងកម្មកររោងចក្រកាត់ដេរ។
មន្ត្រីអង្គការសិទ្ធិមនុស្សបានលើកឡើងថា ករណីទាំងនេះមិនដែលត្រូវបានស៊ើបអង្កេតដោយឯករាជ្យ ឬក៏គួរឲ្យទុកចិត្ត ដោយនគរបាលទេ។
អង្គការសិទិ្ធមនុស្សក្នុងស្រុក លីកាដូ បានកត់ត្រាថា មានការបាញ់ប្រហារយ៉ាងសាហាវចំនួន១០ករណី ធ្វើឡើងដោយនគរបាល ឬក៏កងរាជអាវុធហត្ថ ក្នុងចន្លោះពីឆ្នាំ២០១២ ដល់ឆ្នាំ២០១៣ ហើយគ្មានករណីមួយណាក្នុងចំណោមករណីទាំងនេះ មានការផ្តន្ទាទោសឬស៊ើបអង្កេតគួរឲ្យទុកចិត្តទេ។
លោកស្រី ពង្ស ស៊ីវហ្គិច នាយិកាអង្គការលីកាដូ បានមានប្រសាសន៍ថា “ ទោះបីជាមានរដ្ឋធម្មនុញ្ញដ៏ល្អមួយ និងការផ្តល់សច្ចាប័នលើសន្ធិសញ្ញា និងអនុសញ្ញាអន្តរជាតិក៏ដោយរដ្ឋាភិបាលកម្ពុជាបណ្តោយឲ្យមានវប្បធម៌និទណ្ឌភាពពេញលេញ សម្រាប់មន្ត្រីអនុវត្តច្បាប់ មន្ត្រីយោធា និងមន្ត្រីជាន់ខ្ពស់ក្នុងជួររដ្ឋាភិបាល ក្នុងរយៈពេលពីរទសវត្សរ៍កន្លងមកនេះ ស្របពេលដែលប្រជាជនរបស់ខ្លួនរងការវាយដំ ការបាញ់សម្លាប់ របួស ការចាប់ខ្លួន និងការបញ្ជូនទៅពន្ធនាគារ ដោយសារគ្រាន់តែបានព្យាយាមលើកកម្ពស់សិទ្ធិសង្គម និងសិទ្ធិមនុស្ស សំខាន់ៗរបស់ខ្លួនជាសាធារណៈ”។
លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា បានលើកឡើងថា បញ្ហាខ្វះជំនាញការផ្នែកវេជ្ជសាស្ត្រ និងច្បាប់ ក្នុងជួរនគរបាលគឺជាកត្តារាំងស្ទះក្នុងដំណើរការនៃការស៊ើបអង្កេត ក៏ប៉ុន្តែ រឿងនយោបាយគឺជាក្តីកង្វល់ធំជាង។
លោកបានមានប្រសាសន៍ថា “ ឥឡូវនេះ ខ្ញុំអង្កេតឃើញថា នគរបាលមើលទៅដូចជា ជាសមាជិកគណបក្សនយោបាយមួយ”។លោកបានបន្តថា “ ដូច្នេះមន្ត្រីជាន់ខ្ពស់មានការពាក់ព័ន្ធក្នុងបទល្មើសណាមួយ នគរបាលមិនហ៊ានប៉ះពាល់ករណីនោះទេ។ ទោះបីជាពួកគេមិនមែនជាមន្ត្រីរដ្ឋាភិបាល ទោះបីជាពួកគេគឺជាអ្នកគាំទ្រគណបក្សរបស់ខ្លួនក៏ដោយ ក៏នគរបាលមិនហ៊ានប៉ះករណីនោះដែរ”។
អ្នកសារព័ត៌មាន១១នាក់ត្រូវបានធ្វើឃាតដោយសារតែការងាររបស់ពួកគេ បើគិតតាំងពីឆ្នាំ១៩៩៤មក។ លោក រស់ សុវណ្ណារិទ្ធ មេដឹកនាំសហជីពសេរីកម្មករ ត្រូវបានបាញ់សម្លាប់ ក្នុងរាជធានីភ្នំពេញ រយៈពេលបួនខែបន្ទាប់ពីលោក ជា វិជ្ជា ត្រូវបានបាញ់សម្លាប់ក្នុងឆ្នាំ២០០៤។
លោក ហ៊ី វុទ្ធី មេដឹកនាំសហជីពសេរីកម្មករម្នាក់ផ្សេងទៀត ក៏ត្រូវបានគេបាញ់សម្លាប់ក្នុងឆ្នាំ២០០៧ នៅខាងក្រៅរោងចក្រមួយផងដែរ។
ជាងនេះទៅទៀត ករណីមនុស្សឃាតលើប្រជាជនធម្មតា ធ្វើឡើងដោយនគរបាល និងកងរាជអាវុធហត្ថ បានកើតឡើងជាបន្តបន្ទាប់ ដូចជា ករណីសម្លាប់ក្មេងស្រី ហេង ចន្ថា អាយុ១៤ឆ្នាំនៅខេត្តក្រចេះ អំឡុងការបណ្តេញចេញទ្រង់ទ្រាយធំ ដែលត្រូវបានចាត់ទុកជាប្រតិបត្តិការប្រឆាំងចលនាឧទ្ទាម ករណីសម្លាប់អ្នកឈរមើលពីរនាក់អំឡុងសកម្មភាពតវ៉ាកាលពីខែកញ្ញា និងខែវិច្ឆិកា ឆ្នាំ២០១៣ ករណីបាញ់សម្លាប់កម្មករតវ៉ាប្រាំនាក់ធ្វើឡើងដោយកម្លាំងកងរាជអាវុធហត្ថនៅពេលថ្ងៃ កាលពីថ្ងៃទី៣ ខែមករា ជាដើម។
ទោះបីជាស្ទើរតែមិនទាន់មានដំណោះស្រាយសម្រាប់ករណីសម្លាប់ទាំងនេះ នៅក្នុងទសវត្សរ៍មុនក៏ដោយ ក៏លោកវរសេនីយ៍ឯក ម៉ក់ ជីតូ បានលើកឡើងថា គណៈកម្មាធិការស៊ើបអង្កេតត្រូវបានបង្កើតឡើងសម្រាប់គ្រប់ករណី។ លោកបានមានប្រសាសន៍ថា “ សម្រាប់ករណីទាំងអស់ដែលបានកើតឡើង អាជ្ញាធរក្រសួងមហាផ្ទៃ តែងតែធ្វើការស៊ើបអង្កេត។ ដូច្នេះ យើងមិនអាចធ្វើអត្ថាធិប្បាយលម្អិតអំពីករណីទាំងនោះទេ”៕ សុធា