យោងតាមសេចក្តីប្រកាសរបស់សាលារាជធានីភ្នំពេញបានឲ្យដឹងថា សាលារាជធានីបានក្រើនរំឭកសាធារណជនថា នឹងមានការស្ទះចរាចរណ៍រយៈពេលវែងនៅម្តុំផ្សារអូរឫស្សី ក្នុងខណ្ឌ៧មករា បន្ទាប់ពីសកម្មភាពសាងសង់ចាប់ផ្តើមនៅក្នុងតំបន់នេះកាលពីម្សិលមិញ ដែលជាផ្នែកមួយនៃគម្រោងស្តារប្រព័ន្ធលូទឹកក្រោមមូលនិធិរបស់ប្រទេសជប៉ុន ដែលកំពុងតែដំណើរការ។
សាធារណជនត្រូវបានស្នើឲ្យបង្ហាញភាពអត់ធ្មត់របស់ខ្លួន ខណៈដែលចំណែកផ្លូវនៅក្បែរផ្សារដ៏មមាញឹកនេះ នឹងត្រូវបានជីកក្នុងរយៈពេលប្រាំពីរខែខាងមុខ ដើម្បីដាក់បំពង់លូបង្ហូរទឹកថ្មី ហើយនេះគឺជាផ្នែកមួយក្នុង ដំណាក់កាលទី៣នៃគម្រោងស្តារប្រព័ន្ធលូបង្ហូរទឹកចាស់ៗក្នុងរាជធានីភ្នំពេញឡើងវិញ ក្រោមមូលនិធិចំនួន៣៥០លានដុល្លាររបស់ទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA ។
សេចក្តីប្រកាសដដែលមានខ្លឹមសារថា “ដោយសារការខិតខំប្រឹងប្រែងដោះស្រាយបញ្ហាទឹកជន់លិចអំឡុងរដូវភ្លៀង សាធារណជនទាំងអស់ត្រូវដឹងថា ការស្ទះចរាចរណ៍នឹងកើតឡើងនៅតំបន់ការដ្ឋាន”។ លោកបានបន្ថែមថា អ្នកបើកបរត្រូវបានណែនាំឲ្យធ្វើដំណើរតាមផ្លូវវាងចេញពីតំបន់ផ្សារអូរឫស្សី អំឡុងការសាងសង់ ដើម្បីសម្រួលចរាចរណ៍។
ពីរដំណាក់កាលដំបូងនៃគម្រោងនេះ ត្រូវបានអនុវត្តក្នុងចន្លោះពីឆ្នាំ១៩៩៩ ដល់ឆ្នាំ២០០៩ ខណៈដែលដំណាក់កាលទី៣នៃគម្រោងនេះបានចាប់ផ្តើមកាលពីខែកញ្ញា ឆ្នាំ២០១២ ហើយគ្រោងនឹងបញ្ចប់ក្នុងឆ្នាំ២០១៥។ គម្រោងសម្អាតប្រព័ន្ធលូដំណាលគ្នាមួយ ក៏កំពុងតែដំណើរការផងដែរ ហើយអាជ្ញាធរសង្ឃឹមថា បន្ទាប់ពីគម្រោងទាំងពីរត្រូវបានបញ្ចប់ បញ្ហាជន់លិចនារដូវភ្លៀងនៅក្នុងរាជធានីភ្នំពេញនឹងចុះថយ។
យោងតាមសេចក្តីប្រកាសដដែល បានឲ្យដឹងទៀតថា កំណាត់ផ្លូវទី១ដែលនឹងត្រូវបានស្តារឡើងវិញ ក្នុងដំណាក់កាលសាងសង់ថ្មីបំផុតនេះគឺកំណាត់ផ្លូវលេខ១០៧ ដែលមានប្រវែង២៣៦ម៉ែត្រ ចាប់ពីផ្លូវលេខ១៨២ ដល់ផ្លូវលេខ១៧០ ដែលគេរំពឹងថា នឹងបញ្ចប់ក្នុងខែមីនា។
នៅថ្ងៃទី២១ ខែមេសាឆ្នាំនេះ សកម្មភាពជីកដាក់ប្រព័ន្ធលូ នឹងចាប់ផ្តើមនៅផ្លូវលេខ១១១ ចាប់ពីផ្លូវលេខ១៨២ ទៅដល់ផ្លូវលេខ១៦៦ ហើយការងារនេះត្រូវបានបញ្ចប់នៅថ្ងៃទី១៩ ខែមិថុនា។ ចំណែករយៈពេលបីខែចាប់ពីខែឧសភា ដល់ខែ សីហា នឹងមានការដាក់បំពង់លូប្រវែង៤៥៩ម៉ែត្រនៅតាមបណ្តោយផ្លូវលេខ១៨២ ចាប់ពីផ្លូវលេខ១៦៣ ទៅដល់ផ្លូវលេខ១៦៧។
ប្រជាជនរាជធានីភ្នំពេញមានភាពស៊ាំកាន់តែច្រើនឡើងៗ ទៅលើបញ្ហាស្ទះចរាចរណ៍ ក្នុងរយៈពេលមួយឆ្នាំកន្លងមកនេះ និងបានធ្វើដំណើរតាមផ្លូវវាងដោយសារតែគម្រោងនេះ ខណៈដែលកំណាត់ផ្លូវដែលអាចបញ្ចប់ សកម្មភាពសាងសង់បាន ដូចជា ផ្លូវលេខ៦៣ ត្រូវបានជួសជុលម្តងហើយម្តងទៀត ដោយសារបញ្ហាទាក់ទងទៅនឹងបំពង់លូដាក់ថ្មីៗ ត្រូវបានដោះស្រាយ។
លោក សំ សុវណ្ណ អភិបាលខណ្ឌ៧មករា ថ្លែងថា “ សូមប្រជាពលរដ្ឋ កុំខឹង ដោយសារតែដំណើរការសាងសង់នេះ ព្រោះគម្រោង JICA នឹងដោះស្រាយបញ្ហាការជន់លិចក្នុងរាជធានីភ្នំពេញនៅអំឡុងរដូវភ្លៀង”៕ ប៊ុននី