សកម្មជននយោបាយ១១នាក់ត្រូវបានសន្តិសុខខណ្ឌដែលពាក់មួកការពារសុវត្ថិភាពចាប់ទាញចេញពីផ្លូវ ពេលពួកគេហែក្បួនអហិង្សាទៅកាន់ស្ថានទូតបរទេសនានា ដើម្បីដាក់ញត្តិស្នើសុំឲ្យរដ្ឋាភិបាលឈប់ប្រើអំពើហិង្សា និងដោះលែងសកម្មជន និងកូដករដែលត្រូវបានឃុំខ្លួនចំនួន២៣នាក់។
សាលារាជធានីបានឲ្យដឹងថា អ្នកតវ៉ាទាំង១១នាក់ដែលមាន១០នាក់ជាសកម្មជនសិទ្ធិដីធ្លី និងលោក រ៉ុង ឈុន សកម្មជនកម្មករដែលមានទំនាក់ទំនងជាមួយគណបក្សប្រឆាំងត្រូវបានចាប់ខ្លួនចំពោះការធ្វើឲ្យប៉ះពាល់ដល់សណ្តាប់ធ្នាប់សាធារណៈ។ ពួកគេត្រូវបានឃុំខ្លួននៅស្នងការដ្ឋាននគរបាលរាជធានីអស់រយៈពេលប្រហែល៥ម៉ោង មុនពេលដោះលែងនៅមុនម៉ោង២រសៀលបន្តិច។
លោក ឡុង ឌីម៉ង់ អ្នកនាំពាក្យសាលារាជធានីបាននិយាយថា “ យើងបានចាប់ខ្លួនពួកគេ ពីព្រោះការជួបជុំ និងការបញ្ចេញទស្សនរបស់ពួកគេធ្វើឲ្យប៉ះពាល់ដល់សណ្តាប់ធ្នាប់ និងសន្តិសុខសាធារណៈ”។
បន្ទាប់ពីរដ្ឋាភិបាលបង្ក្រាបដោយហិង្សាធ្វើឲ្យមានមនុស្សស្លាប់ពីថ្ងៃទី២ ខែមករាដល់ថ្ងៃទី៤ ខែមករា ក្រសួងមហាផ្ទៃបានប្រកាសដាក់បម្រាមដោយគ្មានកាលកំណត់លើសិទ្ធិជួបជុំគ្នាដោយអហិង្សាដែលមានចែងក្នុងរដ្ឋធម្មនុញ្ញ ហើយអ្នកជំនាញច្បាប់និយាយថា បម្រាមនេះគឺជាការខុសច្បាប់។
នៅម៉ោងប្រហែល៨និង១៥នាទីព្រឹកម្សិលមិញ សកម្មជន និងតំណាងសង្គមសីុវិលមួយក្រុមដែលមានគ្នាជាង២០នាក់បានប្រមូលបផ្តុំគ្នានៅលើចិញ្ចើមផ្លូវនៅខាងមុខស្ថានទូតអាមេរិក។
ដោយមានសន្តិសុខខណ្ឌដូនពេញជាច្រើននាក់ពាក់មួកខ្មៅការពារសុវត្ថិភាព និងកាន់ដំបងបានមកប្រមូលផ្តុំគ្នានៅក្នុងសួនច្បារនៅទល់មុខស្ថានទូតអាមេរិកនោះ មន្ត្រីសន្តិសុខស្ថានទូតម្នាក់បានស្នើឲ្យអ្នកដាក់ញត្តិទាំងនោះងាកទៅផ្នែកម្ខាងទៀតនៃផ្លូវនោះ។
បន្ទាប់ពីក្រុមអ្នកតវ៉ាទាំងនោះបានឆ្លងផ្លូវនោះរួចហើយ សន្តិសុខខណ្ឌមួយក្រុមមានគ្នាប្រហែល១០នាក់បាននាំគ្នាសម្រុកចូលទៅក្នុងក្រុមអ្នកតវ៉ា និងចាប់ទាញអ្នកស្រី ទេព វន្នី សកម្មជនបឹងកក់ ហើយរុញគាត់យ៉ាងខ្លាំងចូលទៅក្នុងរថយន្តវ៉ែនពណ៌សមួយគ្រឿង។សកម្មជនផ្សេងទៀតបានរត់ឆ្លងផ្លូវនោះវិញ ហើយបានស្នើសុំឲ្យមន្ត្រីស្ថានទូតជួយការពារពួកគាត់។
សកម្មជនបឹងកក់ម្នាក់បាននិយាយទាំងយំខ្សឹកខ្សួលនៅខ្លោងទ្វារស្ថានទូតអាមេរិកថា “ ប្រសិនបើលោករុញខ្ញុំឲ្យទៅម្ខាងទៀត អស់លោករុញខ្ញុំឲ្យទៅស្លាប់ហើយ”។បន្ទាប់ពីគេបានចាប់អ្នកស្រី ទេព វន្នី យកទៅមិនដល់១០នាទីផង ស្រាប់តែសន្តិសុខនោះបានសម្រុកចូលជាថ្មីម្តងទៀតទៅក្នុងក្រុមអ្នកតវ៉ា និងអ្នកកាសែតដែលឈរលើចិញ្ចើមផ្លូវនៅទល់មុខស្ថានទូតនេះ ហើយបានចាប់លោក រ៉ុង ឈុន ច្របាច់កមិនឲ្យគាត់និយាយរួចនៅពេលដែលសន្តិសុខទាំងនោះព្យាយាម រុញគាត់បញ្ចូលទៅក្នុងរថយន្តវ៉ែនពណ៌សដែលកំពុងរង់ចាំមួយគ្រឿងទៀត។
លោកស្រី ឡុង គឹមហ៊ាង មន្ត្រីផ្នែកទំនាក់ទំនង ក្រុមការងារពិសេសសិទ្ធិលំនៅដ្ឋាន ដែលបានរៀបចំការជួបជុំគ្នាអហិង្សានេះបានប៉ុនប៉ងរារាំងសន្តិសុខខណ្ឌមិនឲ្យចាប់ទាញលោក រ៉ុង ឈុន បញ្ចូលទៅក្នុងរថយន្តនោះដែរ។
លោក ស៊ាន ម៉ាកគីនតុស អ្នកនាំពាក្យស្ថានទូតអាមេរិកបានមានប្រសាសន៍ថា មន្ត្រី សន្តិសុខស្ថានទូតបានតាមដានដំណើរការនេះនៅពេលដែលគាត់ស្នើសុំឲ្យអ្នកតវ៉ាឆ្លងផ្លូវទៅឈរនៅជិតសន្តិសុខខណ្ឌដែលបានវាយ និងចាប់ខ្លួនអ្នកតវ៉ាជាច្រើននាក់ក្នុងរយៈពេលបីសប្តាហ៍មកនេះ។
លោក ម៉ាកគីនតុស បានមានប្រសាសន៍ថា “ ដើម្បីការពារសន្តិសុខ ក្រុមសកម្មជននេះត្រូវបានស្នើសុំឲ្យធ្វើបាតុកម្មរបស់ខ្លួនក្នុងទីសាធារណៈនៅខាងមុខស្ថានទូតនេះ”។
មុនម៉ោង៩ព្រឹកបន្តិច ដោយឃើញមានសន្តិសុខខណ្ឌមកផ្លុំកញ្ចែ និងណែនាំឲ្យសកម្មជនដែលនៅសេសសល់ អ្នកកាសែត និងអ្នកសង្កេតការណ៍អង្គការសិទ្ធិមនុស្សចាកចេញនោះ មន្ត្រីស្ថានទូតអាមេរិកបានចរចាភ្លាមៗសម្រាប់ឲ្យសកម្មជនជាស្ត្រីជាង២០នាក់ដើរចេញពីស្ថានទូតដោយគ្មានការយាយីពីសន្តិសុខខណ្ឌទាំងនោះទៀតឡើយ។
ស្ត្រីមួយក្រុមដែលឡោមព័ទ្ធដោយអ្នកកាសែត និងមានរថយន្តដឹកសន្តិសុខខណ្ឌបីគ្រឿងនៅពីក្រោយនោះ បន្ទាប់មកបានដើរទៅមហាវិថីព្រះមុនីវង្ស ហើយបានចាប់ផ្តើមហែក្បួនទៅទិសខាងជើងឆ្ពោះទៅស្ថានទូតបារាំង។ ពេលទៅដល់ជិតមន្ទីរពេទ្យកាល់ម៉ែត រថយន្តសន្តិសុខខណ្ឌបានបើកទៅមុខអ្នកហែក្បួន ហើយសន្តិសុខខណ្ឌបានលោតចេញពីរថយន្តបិទផ្លូវតែម្តង។
សកម្មជនជាស្ត្រីទាំងនេះបានចំណាយពេលប្រហែល៥នាទីព្យាយាមរុញកាត់សន្តិសុខដែលឈរជាជួរ និងបណ្តាលឲ្យមានការកកស្ទះចរាចរណ៍មួយសន្ទុះនៅតាមមហាវិថីព្រះមុនីវង្ស មុនពេលរថយន្តរបស់នគរបាលរាជធានីមួយគ្រឿងរុលចូលទៅជិតក្រុមអ្នកតវ៉ាទាំងនោះ។បន្ទាប់មកសន្តិសុខខណ្ឌបានចាប់សកម្មជនប្រាំពីរនាក់រុញ ទាត់ និងស្រែកឲ្យពួកគេចូលទៅក្នុងរថយន្តនោះ។ ក្នុងចំណោមសកម្មទាំងនោះមានអ្នកស្រី យ៉ោម បុប្ផា អ្នកស្រី សុង ស្រីលាភ ផាន់ ជុនរ៉េត ពៅ សោភា ឯម ស្រីទូច ងួន គឹមឡេង និង ជួង សុភាព។
ក្រោយមកសកម្មជនដែលនៅសេសសល់បានដើរដោយសេរីតាមមហាវិថីព្រះមុនីវង្សទៅកាន់ស្ថានទូតបារាំង ដែលនៅទីនោះពួកគេត្រូវបានអនុញ្ញាតឲ្យនៅរួមគ្នានៅខាងមុខខ្លោងទ្វារស្ថានទូត នៅពេលដែល មន្ត្រីនគរបាលបារាំងម្នាក់និយាយជាមួយតំណាងក្រុមនោះ និងបានទទួលយកញត្តិរបស់ពួកគេ។
បន្ទាប់មកទៀតសកម្មជនទាំងនោះបានដើរក្បួនទៅកាន់ស្ថានទូតអង់គ្លេស និងការិយាល័យអង្គការយូនីសេហ្វ ហើយតំណាងនៅទីនោះក៏បានទទួលយកញាត្តិរបស់ពួកគេដែរ ហើយបន្ទាប់មកពួកគេបានជិះម៉ូតូ និងរ៉ឺម៉កកង់បីទៅកាន់ស្នងការដ្ឋាននគរបាលរាជធានីភ្នំពេញ ជាទីដែលសហការីទាំង១១នាក់របស់ពួកគេត្រូវបានឃុំខ្លួន។
លោក ជួន សុវណ្ណ ស្នងការនគរបាល រាជធានីភ្នំពេញបានទៅដល់ទីនោះក្រោយថ្ងៃត្រង់បន្តិច ហើយបន្ទាប់មកបានជួបប្រជុំជាមួយ មន្ត្រីខណ្ឌដូនពេញ និងមេធាវីម្នាក់មកពីអង្គការលីកាដូ ហើយសកម្មជនទាំងនោះត្រូវបានដោះលែងនៅម៉ោងប្រហែល១និង៤៥នាទី។
ដោយឈរទន្ទឹមគ្នាចាប់ដៃគ្នាលើកឡើងលើសកម្មជនទាំង១១នាក់បានដើរតាមចំណតរថយន្តនៅស្នងការដ្ឋាននគរបាលទៅទទួលការស្វាគមន៍ពីមនុស្សដែលរង់ចាំនៅខាងក្រៅ ដែលមានព្រះសង្ឃ និងយុវជនដែលបានចូលរួមនៅពេលរសៀល។
បន្ទាប់ពីការដោះលែងពួកគាត់ហើយ អ្នកស្រី ទេព វន្នី និងលោក រ៉ុង ឈុន បាននិយាយថា ពួកគាត់មិនភ័យខ្លាចចំពោះការចាប់ខ្លួននេះទេ។
អ្នកស្រី ទេព វន្នី បាននិយាយថា “ យើងនឹងចូលរួមធ្វើការតវ៉ាទៀតដើម្បីឲ្យដោះលែងមនុស្សទាំង២៣នាក់។ យើងមិនភ័យខ្លាចចំពោះការចាប់ខ្លួន ឬការបញ្ជូនខ្លួនទៅពន្ធនាគារទេ។ យើងស៊ាំនឹងការភ័យខ្លាចទៅហើយ។ យើងចង់បានយុត្តិធម៌” ។
លោក រ៉ុង ឈុន បានមានប្រសាសន៍ថា លោក និងមេដឹកនាំសហជីពដែលមិនជាប់ពាក់ព័ន្ធនឹងរដ្ឋាភិបាលចំនួនប្រាំពីរទៀតគ្រោងធ្វើបាតុកម្មក្នុងទីលានប្រជាធិបតេយ្យនៅថ្ងៃទី២៦ខែមករា ដើម្បីទាមទារឲ្យដោះលែងសកកម្មជន និងកម្មករដែលត្រូវបានចាប់ខ្លួនទាំង២៣នាក់ ហើយពួកគេជាច្រើនត្រូវបានវាយដំនៅពេលរដ្ឋាភិបាលបង្ក្រាបដោយហិង្សាទៅលើការតវ៉ារបស់កម្មករកាលពីថ្ងៃទី២ និងទី៣ ខែមករា។
លោក រ៉ុង ឈុន បានថ្លែងថា “ ខ្ញុំមិនខ្វល់ទេ។ នៅថ្ងៃទី២៦យើងនឹងប្រមូលមនុស្សមួយម៉ឺននាក់ជួបជុំគ្នាទាមទារឲ្យដោះលែងលោក វ៉ន ពៅ និងមនុស្ស២២នាក់ទៀត”។
អង្គការសង្គមស៊ីវិលដែលរៀបចំការហែក្បួនកាលពីម្សិលមិញនេះបានចេញសេចក្តីថ្លែងការណ៍មួយលើកឡើងថា ខ្លួននឹងពន្យារពេលការហែក្បួនទៅកាន់ស្ថានទូតបរទេសដែលបានគ្រោងទុកនៅថ្ងៃនេះ ប៉ុន្តែនឹងបន្តដាក់ញត្តិនៅថ្ងៃព្រហស្បតិ៍វិញ។
លោក បេ ទៀឡេង ប្រធាននាយកដ្ឋានពន្ធនាគារនៃក្រសួងមហាផ្ទៃបាននិយាយថា លោកកំពុងរង់ចាំបទបញ្ជាពីតុលាការឲ្យដោះលែងអ្នកទោសទាំង២៣នាក់ដែលកំពុងជាប់ឃុំនៅក្នុងមណ្ឌលកែប្រែ៣ ដែល មានសន្តិសុខតឹងរ៉ឹងនៅក្នុងខេត្តកំពង់ចាម។លោកបាននិយាយថា “ វាអាស្រ័យលើតុលាការ។ បន្ទាប់ពីតុលាការចេញបទបញ្ជាយើងនឹងដោះលែងអ្នកទោសទាំង២៣នាក់នេះ៕ គឹមហឿន
(រាយការណ៍បន្ថែមដោយ ម៉ិច ដារ៉ា)