ស្រុកស្អាង, ខេត្តកណ្តាល- អ្នកគាំទ្រលោកនាយករដ្ឋមន្ត្រី ហ៊ុន សែន ស្លៀកឯកសណ្ឋានស៊ីវិលរាប់រយនាក់ ដែលគាំទ្រដោយកងរាជអាវុធហត្ថ និងនគរបាលខេត្តប្រដាប់ដោយកាំភ្លើងយន្ត ដំបងឆក់ និងឧបករណ៍បាញ់ឧស្ម័នបង្ហូរទឹកភ្នែករាប់រយនាក់ដែរនោះ បានបង្ខំឲ្យលោក សម រង្ស៊ី និងលោក កឹម សុខា មេដឹកនាំគណបក្សប្រឆាំងលុបចោលកិច្ចប្រជុំមួយជាមួយអ្នកគាំទ្ររបស់ខ្លួនកាលពីម្សិលមិញ។
អ្នកគាំទ្រគណបក្សប្រជាជនកម្ពុជាដែលរួមមានកសិករវ័យចំណាស់ និងយុវជនកាត់សក់ខ្លីដូចទាហានរាប់រយនាក់ បានប្រមូលផ្តុំគ្នានៅវត្តកោះតូច ក្នុងគោលបំណងប្រើកម្លាំង ប្រសិនបើលោក សម រង្ស៊ី ឬក៏លោក កឹម សុខា ហ៊ានបើកកិច្ចប្រជុំ ឬក៏រិះគន់រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជារបស់លោក ហ៊ុន សែន នោះ។
លោក ខន លីហ៊ាង អាយុ៣៣ឆ្នាំ អ្នកគាំទ្រគណបក្សប្រជាជនកម្ពុជាស្លៀកឯកសណ្ឋានស៊ីវិល ដែលមានកាន់អាយកូម និងទំនងជាអ្នកស៊ីវិល ដែលមានកាន់អាយកូម និងទំនងជាអ្នកដឹកនាំក្រុមអ្នកគាំទ្រគណបក្សប្រជាជនកម្ពុជា ហើយត្រូវបានសម្ភាសនៅឯវត្តនេះ កាលពីរសៀលម្សិលមិញបាននិយាយថា “ ប្រសិនបើពួកគេ [គណបក្សសង្គ្រោះជាតិ] នៅតែបន្តព្យាយាមបើក [កិច្ចប្រជុំ]នេះ អ៊ីចឹងការប្រយុទ្ធគ្នានឹងមិនអាចចៀសផុតបានឡើយ”។ លោកបានបន្តថា “ យើងចង់ឲ្យមេដឹកនាំគណបក្សនយោបាយអង្គុយនៅឯតុចរចា មិនមែនអាងអីចេះតែកៀងគរប្រជាពលរដ្ឋមកធ្វើការតវ៉ានោះទេ។ ខ្ញុំមិនអាចធានាបានឡើយថាអ្វី នឹងកើតឡើងប្រសិនបើពួកគេរិះគន់គណបក្សប្រជាជនកម្ពុជាដែលខ្ញុំគាំទ្រនោះ។ ខ្ញុំមិនអាចអត់ធ្មត់បានទេប្រសិនបើពួកគេវាយប្រហារគណបក្សរបស់ខ្ញុំ”។
ជនស៊ីវិលជាច្រើននាក់ផ្សេងទៀត ដែលកំពុងតែរង់ចាំនៅឯវត្តនេះបានបដិសេធមិនឆ្លើយតបអ្វីឡើយ នៅពេលត្រូវបានសួរថា តើហេតុអ្វីបានជាពួកគេនៅទីនោះ។ រីឯអ្នកខ្លះទៀតបាននិយាយថា ពួកគេស្អប់គណបក្សសង្គ្រោះជាតិ។លោក លី ហ៊ាង បានឲ្យដឹងថា លោកនិងអ្នកគាំទ្រគណបក្សប្រជាជនផ្សេងទៀតបាននាំគ្នាចេញមកនេះ គឺដើម្បីការពារផលប្រយោជន៍សហគមន៍ពីការជ្រៀតជ្រែក និងការបំផ្លិចបំផ្លាញដោយអ្នកគាំទ្រគណបក្សសង្គ្រោះជាតិ។
វត្តមានជនស៊ីវិលដែលជាកម្លាំងគាំទ្រគណបក្សប្រជាជនកម្ពុជាប្រដាប់ដោយឧបករណ៍ផ្សេងៗ កាលពីម្សិលមិញ គឺកើតឡើងត្រឹមតែរយៈពេលបីថ្ងៃប៉ុណ្ណោះ បន្ទាប់ពីលោក ហ៊ុន សែន បានព្រមានអ្នករិះគន់លោកថា ពួកគេអាចនឹង “ ភ្លក់រសជាតិ” អំពីភាពខ្លាំងនៃប្រជាប្រិយរបស់លោក ហើយលោកបានអំពាវនាវឲ្យអ្នកគាំទ្រគណបក្សប្រជាជនកម្ពុជាទាំងអស់ត្រៀមខ្លួនប្រឆាំងរាល់សកម្មភាព ដែលខ្វះការទទួលខុសត្រូវនិងមានទំនោរទៅរកការធ្វើរដ្ឋប្រហារនោះ។
លោក ហ៊ុន សែន បានថ្លែងសន្ទរកថា នៅក្នុងខេត្តក្រចេះ កាលពីថ្ងៃសៅរ៍ថា “ លើកមុនៗ គណបក្សប្រជាជនកម្ពុជាមិនប្រើកម្លាំងនៃអ្នកគាំទ្រ និងសមាជិករបស់ខ្លួនឡើយ។ ប្រសិនបើ ហ៊ុន សែន ចេញមុខធ្វើអ្វីវិញ វានឹងមិនតូចទេ។ សូមបញ្ជាក់ឲ្យច្បាស់ ប្រសិនបើដល់ពេលត្រូវតែចាត់វិធានការហើយ”។
ស្ថានភាពនៅក្នុងឃុំ ត្រើយស្លា ពិតជាមានភាពតានតឹងណាស់ ខណៈជនស៊ីវិលដែលគាំទ្រលោក ហ៊ុន សែន រាប់រយនាក់ និងអង្គភាពនគរបាល ព្រមទាំងអង្គភាពកងរាជអាវុធហត្ថកំពុងរង់ចាំដើម្បទប់ទល់និងទប់ស្កាត់គណបក្សសង្គ្រោះជាតិ ដែលមានផែនការរៀបចំកិច្ចប្រជុំមួយនៅឯផ្ទះរបស់ជំទប់ឃុំម្នាក់ ចម្ងាយប្រមាណ៥០០ម៉ែត្រពីវត្តកោះតូច។
អ្នកភូមិនិងអ្នកគាំទ្រគណបក្សសង្គ្រោះជាតិ ដែលបាននាំគ្នាឈរជាក្រុមនៅខាងក្រៅផ្ទះរបស់ខ្លួន តាមបណ្តោយផ្លូវឆ្ពោះទៅកាន់វត្តកោះតូចនេះ បានប្រាប់អ្នកដំណើរថា ការចុះមកតំបន់នេះរបស់មេដឹកនាំបក្សប្រឆាំងត្រូវបានលុបចោល ព្រោះមានវត្តមានកងកម្លាំង មានសមត្ថកិច្ចដែលទំនងជាចង់បង្កបញ្ហា។
លោក សួន ញ៉ ជំទប់ឃុំ ត្រើយស្លា ដែលគាំទ្រគណបក្សប្រឆាំងម្នាក់និងជាអ្នករៀបចំកិច្ចប្រជុំនៅឯផ្ទះរបស់លោក កាលពីម្សិលមិញបានឲ្យដឹងថា ទីបំផុតកិច្ចប្រជុំនេះត្រូវលុបចោលនៅពេលរសៀល ដើម្បីជៀសវាង“ ការបង្ហូរឈាម”។ លោកបាននិយាយថា “ យើងជ្រើសរើសយកការដកថយ ព្រោះមានការគំរាមកំហែង ដើម្បីការពារជីវិតរបស់យើង”។ លោកបន្ថែមថា អ្នកគាំទ្រគណបក្សប្រជាជនកម្ពុជាដែលបង្ហាញខ្លួននៅតំបន់នេះ ភាគច្រើនគឺជាសមាជិកកងសន្តិសុខភូមិ និងឃុំ ដែលត្រូវបានរៀបចំដោយក្រសួងមហាផ្ទៃ។
លោក ឃឹម ចាន់គិរី អភិបាលស្រុកស្អាងបានឲ្យដឹងថា ស្ថានភាព “ មានភាពតានតឹង” កាលពីម្សិលមិញព្រោះអ្នកគាំទ្ររដ្ឋាភិបាលប្រហែលមួយពាន់នាក់បានចេញមកតវ៉ាប្រឆាំងនឹងគណបក្សសង្គ្រោះជាតិ ហេតុដូច្នេះហើយចាំបាច់ត្រូវតែដាក់ពង្រាយនគរបាល និងកងរាជអាវុធហត្ថដើម្បីការពារសន្តិសុខជូនភាគីទាំងពីរ។
លោក ចាន់គិរី មានប្រសាសន៍ថា “ គ្មាននរណាម្នាក់រៀបចំពួកគេនោះទេ។ វាជាសិទ្ធិរបស់ពួកគេ ដើម្បីធ្វើការតវ៉ានេះ ហើយយើងមិនអាចបញ្ឈប់ពួកគេបានឡើយ។ ពួកគេមកដោយខ្លួនឯង ព្រោះពួកគេមិនអាចអត់ធ្មត់តទៅទៀតបានទេ ដោយសារការរំខានមិនឈប់មិនឈរពីសំណាក់គណបក្សសង្គ្រោះជាតិ”។
តែទោះជាយ៉ាងណា លោក អៀត យ៉ុង អាយុ ៧០ឆ្នាំ ជំទប់ទីមួយឃុំ ខ្សាច់ ពន្លា ដែលជាអ្នកគាំទ្រគណបក្សប្រឆាំង និងអតីតអ្នកធ្វើការផ្អែកវេជ្ជសាស្ត្រនៅស្រុក ស្អាង បានលើកឡើងថា លោកមិនដែលស្គាល់ជនស៊ីវិលដែលគាំទ្រគណបក្សប្រជាជនកម្ពុជា និងចេញមុខមកតំបន់នេះ ដើម្បីរារាំងកិច្ចប្រជុំរបស់គណបក្សសង្គ្រោះជាតិម្នាក់ណាឡើយ។ លោក អៀត យ៉ុង មានប្រសាសន៍ថា “ ពួកគេមិនមែនជាអ្នកនៅទី នេះទេ ព្រោះមានរថយន្តបានដឹកពួកគេមក។ ប្រសិនបើពួកគេមកពីឃុំត្រើយស្លា ឬក៏រស់នៅក្នុងស្រុក ស្អាងនោះ ខ្ញុំប្រហែលជាស្គាល់ពួកគេហើយ”។ លោក បន្ថែមថា “ ខ្ញុំមិនដឹងថា ពួកគេមកពីទីណានោះទេ។ បើមើលមុខពួកគេវិញ មើលទៅសុទ្ធតែកាចៗ ហើយត្រៀមខ្លួនដើម្បីវាយប្រហារ”។
បន្ទាប់ពីលុបចោលកិច្ចប្រជុំនៅក្នុងស្រុកស្អាង ដោយសារតែមានការគំរាមកំហែងរួចមក គណបក្សសង្គ្រោះជាតិ ក្រោយមកបានធ្វើសន្និសីទកាសែតមួយនៅឯទីស្នាក់ការកណ្តាលបក្សរបស់ខ្លួនក្នុងរាជធានីភ្នំពេញ ដោយមានការចូលរួមពីលោក សម រង្ស៊ី លោក កឹម សុខា និងលោក អេង ឆៃអ៊ាង ប្រធានក្រុមការងាររបស់គណបក្សសង្គ្រោះជាតិប្រចាំខេត្តកណ្តាល។
លោក ឆៃអ៊ាង បានលើកឡើងថា លោកចាន់គិរី អភិបាលស្រុក ស្អាង បានជូនដំណឹងមកគណបក្សសង្គ្រោះជាតិកាលពីថ្ងៃច័ន្ទថា លោកមិនអនុញ្ញាតឲ្យមានការរៀបចំកិច្ចប្រជុំឡើយ ហើយនៅយប់ថ្ងៃច័ន្ទ មានរថយន្តដឹកអង្គរក្សស្លៀកឯកសណ្ឋានស៊ីវិលបានមកដល់ដោយចេញដំណើរពីក្រុងតាខ្មៅ ហើយបានសម្រាកមួយយប់នៅសាលាស្រុកស្អាង មុនពេលត្រូវបានដាក់ពង្រាយនៅវត្តកោះតូចនេះកាលពីព្រឹកម្សិលមិញ។
លោក ឆៃអ៊ាង បានមានប្រសាសន៍ថា “ យើងមិនព្រួយបារម្ភអំពីកងកម្លាំងប្រដាប់អាវុធ[នៅវត្តនេះទេ]។ អ្វីដែលយើងព្រួយបារម្ភនោះគឺ កងកម្លាំងស៊ីវិលដែលមានបង់កក្រមាពណ៌ក្រហម ហើយបង្កប់ខ្លួននៅក្នុងចំណោមមនុស្សជាច្រើនដែលមកចូលរួមកិច្ចប្រជុំ”។
ឧត្តមសេនីយ៍ ហ៊ីង ប៊ុនហៀង មេបញ្ជាការកងអង្គរក្សរបស់លោក នាយក រដ្ឋមន្ត្រី ដែលមានទីតាំងក្បែរក្រុង តាខ្មៅ បានបដិសេធចំពោះការចោទប្រកាន់របស់លោក ឆៃអ៊ាងដែលថា សមាជិកនៃអង្គភាពរបស់លោក ត្រូវបានបញ្ជូនទៅកាន់ឃុំ ត្រើយស្លា ដើម្បី រារាំងកិច្ចប្រជុំរបស់គណបក្សប្រឆាំងនោះ។
ឧត្តមសេនីយ៍ ហ៊ីង ប៊ុនហៀង បានមានប្រសាសន៍ដោយចោទប្រកាន់គណបក្សប្រឆាំងពីបទបង្ខូចកេរ្តិ៍ឈ្មោះអង្គភាពរបស់លោក ដែលថា បានជ្រៀតជ្រែកនៅក្នុងការធ្វើបាតុកម្មថា “ អង្គរក្សមានតួនាទីការពារមេដឹកនាំ ហើយកាតព្វកិច្ចរបស់អង្គរក្សមិនជាប់ទាក់ទិននឹងរឿងនយោបាយទេ”៕ស៊ុយឈាង
(រាយការណ៍បន្ថែមដោយ Kevin Doyle)