34 C
Phnom Penh

ចោទ​ប្រកាន់​មេបញ្ជាការ​កង​រាជអាវុធ​ហត្ថខេត្ត​ស្ទឹងត្រែង​​ពី​បទ​វាយ​ដំ​បុរស​ម្នាក់រហូត​ដល់​សន្លប់

ដោយ ឌឹ ខេមបូឌា ដេលី

បទវិភាគ

មេបញ្ជាការ​កង​រាជ​អាវុធ​ហត្ថ​ខេត្ត​ស្ទឹង​ត្រែង​ម្នាក់ត្រូវ​បាន​ចោទ​ប្រកាន់​ពី​បទ​វាយ​ដំ​បុរស​ម្នាក់​រហូត​ដល់​សន្លប់​ បន្ទាប់​ពី​ក្រុម​គ្រួសារ​របស់​បុរស​រងគ្រោះ​​បាន​ដាក់​ពាក្យ​​ប្តឹង​មន្ត្រី​កង​រាជ​អាវុធហត្ថ​រូបនេះទៅ​នគរ​បាល​កាល​ពីថ្ងៃ​សៅរ៍​។

អ្នកស្រី ប៊ុន ចន្ធូ ជា​កូនស្រី​របស់​លោក ឆាយ ប៊ុន​ បាន​និយាយ​ថា លោក​វរ​សេនី​យ៍ឯក អៀង វណ្ឌី តាម​ចោទ​ថា បាន​វាយ​លោក ឆាយ​ ប៊ុន អាយុ​៥៤ឆ្នាំ​​នៅ​ទី​បញ្ជាការ​ដ្ឋាន​កង​​រាជ​អាវុធ​ហ​ត្ថ​កាលពី​ថ្ងៃសុក្រ​​បន្ទាប់ពី​​លោក ឆាយ​ ប៊ុន​ បាន​ព្យា​យាម​ទៅយក​ក្របី​​ពីរ​ក្បាល​ដែល​មន្ត្រីកងរាជ​អាវុធហត្ថ​រូប​នេះ​បាន​រឹបអូស​យក​កាល​ពី​ឆ្នាំ​មុន​អំឡុង​ការ​ឆ្មក់​ចូល​កន្លែង​​​​ធ្វើ​​​អាជីវកម្ម​​​របស់​លោក។

អ្នកស្រី​ ចន្ធូ​ បាន​និយាយ​ថា កាលពី​ពេល​ថ្មី​ៗ​នេះ​ឪពុក​របស់​ខ្ញុំ​ទទួលបាន​ដីកា​បង្គាប់​ពី​តុលាការ​ឲ្យ​ទៅ​យក​ក្របី​របស់​គាត់​ដែល​ត្រូវ​បាន​រឹបអូស​យក​អំឡុង​ការ​ឆ្មក់​ចូល​មួយ​នៅ ក្នុង​ស្រុក​ថាឡា​បរិវ៉ាត់​កាល​ពី​ខែ​តុលា បន្ទាប់ ពី​លោក ឆាយ ប៊ុន​ ត្រូវ​បាន​ចោទ​ប្រកាន់​ពី​បទ​ ចោរ​កម្ម។

ប៉ុន្តែនៅពេល​​​​ដែល​​​មនុស្ស​មួយ​ក្រុម​​​​ទៅ​​​​ដល់​​​ទី​​​នោះ ​​​និង​​​​បានសួរ​រក​ក្របីនោះ លោក​វរសេនី​យ៍​ឯក​រូប​នេះ​បាន​វាយ​ដំលោក ឆាយ ​ប៊ុន ​តែម្តង។អ្នកស្រី​បាន​បន្ត​ថា “ ពួកគេ​បានចាប់​ឪពុក​របស់​ខ្ញុំ​​និង​អ្នក​ទៅ​ជាមួយ​ពីរនាក់​ទៀត​អូស ចូល​ក្នុង​បន្ទប់មួយ​…​វាយដំរូប​គា​ត់​ ហើយ​រុញគា​ត់​ផ្ទប់​នឹង​បង្អួច​ដែក…។ ឪពុក​របស់ខ្ញុំ​រង​របួស​ជា​ទម្ងន់​បន្ទាប់ពី​មន្ត្រី​កង​រាជអាវុធ​ហត្ថ​វាយ​គាត់​រហូត​ដល់​​សន្លប់មក”។

កាលពី​ម្សិលមិញ លោក​វរសេនី​យ៍​ឯក អៀង វណ្ឌី បាន​បដិសេធ​ការ​អះ​អាង​នោះ​។ លោក​បាន​និយាយ​ថា “ ខ្ញុំ​មិន​បាន​ប្រព្រឹត្ត​បទ​​​ល្មើស​​​នេះ​​​ទេ…ហើយ​ក៏មិន​បាន​វាយ​ដំ​នរណា​ម្នាក់​ដែរ”។

លោក យ័ន ឌីន ស្នងការ​រង​នគរ​បាល​ខេត្ត​​បាន​មានប្រសាសន៍ថា មន្ត្រីរបស់​លោក​​​​កំពុង​ធ្វើការ​ស៊ើប​អង្កេត​​​​លើ​​​ការ​អះ​អាង​នោះ។ លោក​​បាន​ថ្លែង​ថា “ យើង​កំពុង​ប្រមូល​ភ័ស្តុ​តាង​ ហើយ​យើង​នឹង​បញ្ជូន​ភ័ស្តុតាង​នោះ​ទៅ​ព្រះ​រាជ​អាជ្ញា”៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស